Kau Ke Mesuub Aike el Rokui el Sebechem er a Jehovah?

1. Ngua ngerang a uldesuel a Jehovah el kirel a tekoi er a omesuub?

¹ A Kot el Ngarbab el Sensei el Jehovah, a soal el ‘olisechakl’ er kid. (Isa. 30:20) Ngulemuchel el olisechakl er a uriul er a lebebii a kot el Ngelekel. (Jn. 8:28) E a uriul er a bo lomtok a Adam, e a Jehovah a dimlak lemeterob el olisechakl, e ngbai uleak a bltkil a rengul e ngmilsterir a rediak el mecherrungel el chad a ulekrael.​—Isa. 48:17, 18; 2 Ti. 3:14, 15.

2. Ngera el rolel a omesuub a ngar er ngii er chelecha el taem?

² Chelecha el taem, e a Jehovah a mengetmokl er a kot el ngarbab el rolel a omesuub el dirkak a ta el lebo er ngii er a chelsel a reksi er a klechad. El ua lulemlaoch a Isaia, te betok el miliol el chad a merael el mo er sel okesiu el “rois” el blil a Jehovah. (Isa. 2:2) Ngera uchul me te mo er ngii? E le ngsorir el mosisechakl er a rolel a Jehovah! (Isa. 2:3) Ngar er a rak er a omesiou er a 2010, e a Resioning er a Jehovah a chiloit a kuk betok er a 1.6 el biliol el sikang el oldingel e olisechakl er a rechad el kirel a klemerang er a Biblia. Me a lmuut el tang, a bek el sandei e a osisecheklel a Jehovah a motobed er a chelsel a kuk betok er a 105,000 el blil a ongdibel el meliuekl er a beluulechad, e dirrek el ngar er ngii a betok el babier el oltobed a blak a rengul e mellomes a rengul el mesiou el ngar er a kuk betok er a 500 el kakerous el omelekoi.

3. Ngera el klungiaol a bla mngai el okiu a osisechakl el lomeskau a Jehovah?

³ Ngmai a Klungioled er Ngii: Kede mera el mla ngmai a klungioled er aika el osisechakl el mla er a Jehovah! Kede mla suubii el kmo a Dios a ngar er ngii a ngklel e dirrek el omekerreu er kid. (Psa. 83:18; 1 Pe. 5:6, 7) Kede dirrek el mla mo medengei a nger er a bebil el meklou a ultutelel el ker el kirel a klengar el uai a: Ngera uchul me a rechad a mo chuarm e mad? Ak mekerang e metik er a mera el deurreng? Ngerang a moktek er a klengar? A Jehovah a dirrek el mla meskid a ulekrael el kirel a tekoi er a kldung el ngosukid el ‘mo ungilbesul a ikel rokui el doruul.’​—Jos. 1:8.

4. Ngera bebil er a rolel a osisechakl el ngar er ngii el kirir a remesiungel a Dios, e ngera me ngkired el mesuub aike el rokui el sebeched er a Jehovah?

⁴ Me a lmuut el tang, a Jehovah a mla remuul a ileakl el osisechakl el ngosuterir a rebetok el mesiungel el mo menglou er a omesiungir el mo er ngii. Ngar er a 4-6 el llel e ngomasech a betok el techall el sebechir a rebebil el ngmai. Me alta e a blekerdelel a klengar er kid a merrob er kid me lak dengai aika el osisechakl, engdi kid kede melai a klungioled er aike el rolel a osisechakl el kuk sebeched el ngmai? Kid kede melisiich er a rengeasek, el tir a blechoel el morimel er a resensei me a rebebil el mo er a ngarbab el skuul, el mo meruul a turrekong er tir el kirel a omesiungir el mo er a Dios? A dosuub aike el rokui el sebeched er a Jehovah a mo ngosukid el oldeu a rengud er a klengar er kid er chelechang me a dirrek el diak a ulebengelel el klengar er a ngarmedad el klebesei.​—Psa. 119:105; Jn. 17:3.

Bebil er a Rolel a Osisechakl el Ngar er Ngii el Okiu a Cheldebechelel a Jehovah

Klas el Kirel a Omenguiu me a Omeluches

• Moktek: Mo olisechakl er a rechad el mo meduch el menguiu e meluches me bo el sebechir el mesuub el di tir el tang e lolisechakl er a rebebil er a klemerang.

• Klemengetel: Di mo oltirakl er aike el dousbech.

• Basio: Blil a Ongdibel.

• Tirke el Sebechir el Mo Teloi er Ngii: Rokui el chad el mla mo oldingel a obliil me tirke el semeriar.

• Rolel e Ngsebeched el Mo Soiseb er Ngii: A remechuodel er a ongdibel a mengetmokl a klas el kirel a omenguiu me a omeluches el oltirakl er aike el lousbech a ongdibel, e dirrek el melisiich er a rokui el chad el sebechir el ngmai a klungiolir er tia el rolel a omesuub me lemei er tia el klas.

Skuul el kirel a Urerel a Dios

• Moktek: Mo olisechakl er tirke el mla mo oldingel a obliil el mo meduch el omerk a klumech e dirrek el mo sensei er a ungil el chais.

• Klemengetel: Di blechoel el ngar er ngii.

• Basio: Blil a Ongdibel.

• Tirke el Sebechir el Mo Teloi er Ngii: Rokui el mla mo oldingel a obliil me tirke el blechoel el mei er a miting, e kongei a osisecheklel a Biblia, me a klengar er tir a oltirakl a omellach el kirir a Rekristiano.

• Rolel e Ngsebeched el Mo Soiseb er Ngii: Mongedecheduch er ngike el odam el oungerachel er a Skuul el kirel a Urerel a Dios.

Klas el Kirel a Ngodech el Omelekoi

• Moktek: Mo olisechakl er tirke el mla mo oldingel a obliil el mo meduch el omerk er a ungil el chais el ngar er a ngodech el omelekoi.

• Klemengetel: Euang me a lechub e ngeim el buil. Aika el klas a blechoel el ngar er ngii er a tutau er a Sebadong el tang me a lechub e ngeru el sikang a klemengetel.

• Basio: Blil a Ongdibel.

• Tirke el Sebechir el Mo Teloi er Ngii: Chad el mla mo oldingel a obliil el ungil a delecherul er a ongdibel e soal el omerk er a klumech el ngar er a ngodech el omelekoi.

• Rolel e Ngsebeched el Mo Soiseb er Ngii: Aika el klas a longetmokl a obis er a branch el oltirakl er aike el lousbech a ongdibel.

Okedecherul me a Ulekbechesul a Blil a Ongdibel

• Moktek: Mo omekedechor e omekbeches a Blil a Ongdibel. Tiang a diak el skuul, engdi ngoeak tia el tekoi el mla meketmokl, e tirke el chad el mla tonget a temir a mosisechakl a kakerous el duch me bo el sebechir el olengeseu el meruul er tia el ureor.

• Klemengetel: Di mo oltirakl er aike el sebechir tirke el chad el mo teloi er ngii el meruul.

• Basio: Ngii di el basio el mla metutk el okiu a Chelechad er a Rumekedechor a Blai. A rebebil er tirke el mla tonget a temir a mo mengilt el mo olengeseu aike el basio el mlo er ngii a meklou el tellemall er ngii.

• Tekoi el Kired el Meruul: Ngkirir el rudam me a rudos el mla metecholb e nguu a kengei er a chelechad er a remechuodel. Ngsebechir el ngar er ngii a duch er tir me a lechub e ngdiak.

• Rolel e Ngsebeched el Mo Soiseb er Ngii: Mrellii a Kingdom Hall Volunteer Worker Questionnaire (S-82) el sebechem el nguu er a remechuodel er a ongdibel.

Skuul el kirir a Rengar er a Mui el Taem el Omesiou

• Moktek: Mo olengeseu er a rengar er a mui el taem el omesiou el mo ‘churrengelii chomesiungir.’​—2 Ti. 4:5.

• Klemengetel: Eru el sandei.

• Basio: A obis er a branch a mo melilt er ngii; te blechoel el ngiltii a kmeed el Blil a Ongdibel.

• Tekoi el Kired el Meruul: Mla ngar er a mui el taem el omesiou el kesengil e ngta el rak.

• Rolel e Ngsebeched el Mo Soiseb er Ngii: Tirke el ngar er a mui el taem el omesiou el rredemelel a mong, a di lotuu a ngklir e ngike el odam el oldingel a ongdibel a mesubed er tir.

Skulir Tirke el Beches el Mo Soiseb er a Bethel

• Moktek: Tia el skuul a mileketmokl el ngosuterir a rebeches el chad el mo soiseb er a Bethel me bo el sebechir el mo ungil a omesiungir.

• Klemengetel: Ta el sikang er a bek el sandei el kirel a teruich me a elolem el sandei.

• Basio: Bethel.

• Tekoi el Kired el Meruul: Kirel el meketeketang el chedal a telungalek er a Bethel me a lechub e ngtirke el mla tonget a temir el oureor er a Bethel el kemanget el taem (ta el rak me a lechub e ngkemanget el taem).

• Rolel e Ngsebeched el Mo Soiseb er Ngii: Tirke el chedal a telungalek er a Bethel el rredemelel a sebechir el mong.

Skulir a Remechuodel Me Tirke el Odam el Olengeseu er a Remechuodel

• Moktek: Mo olengeseu er a remechuodel me tirke el odam el olengeseu er tir el mo omekerreu a urerir el omtebechel e oungerachel a tekoi er a ongdibel. (Rel. 20:28) Tia el skuul a mo er ngii er sel taem el lengiltii a Chelechad er a Ruungerachel.

• Klemengetel: Ngar er aika el dirk mlo merek el rak, e tia el skuul a mla er ngii el ta el sils me a tedobech el kirir a remechuodel e dirrek el mla er ngii el ta el sils el kirir tirke el odam el olengeseu er a remechuodel.

• Basio: Ngblechoel el ngar er a ngii er a kmeed el Blil a Ongdibel me a lechub aike el Blil a Meklou el Ongdibel.

• Tekoi el Kired el Meruul: Kirel el ta er a remechuodel me a lechub e ngodam el olengeseu er a remechuodel.

• Rolel e Ngsebeched el Mo Soiseb er Ngii: Tirke el mechuodel er a ongdibel me tirke el odam el olengeseu er tir el rredemelel, a lolengit er tir ngike el odam el oldingel a ongdibel me te mo er tia el skuul.

Skuul el Kirir a Remechuodel er a Ongdibela

• Moktek: Mo olengeseu er a remechuodel el mo omekerreu a ngerechelir er a ongdibel.

• Klemengetel: Eim el klebesei.

• Basio: A obis er a branch a mo melilt er ngii; te blechoel el ngiltii a kmeed el Blil a Ongdibel me a lechub aike el Blil a Meklou el Ongdibel.

• Tekoi el Kired el Meruul: Kirir el mechuodel er a ongdibel.

• Rolel e Ngsebeched el Mo Soiseb er Ngii: Tirke el mechuodel el rredemelel, a lolengit er tir a obis er a branch me te mo er tia el skuul.

Skuul el Kirir a Rudam el Oldingel a Ongdibel me a Rebecherirb

• Moktek: Mo olengeseu er a rudam el oldingel a ongdibel me tirke el odam el oungerachel aike el eru el sils el ongdibel el mo ungil el mesiou er aike el ongdibel el lebo er ngii, e mo meringel el “oureor el kirel a berekel a tikingel a Dios ma chosisechakl,” e mo omekerreu er tirke el loungerachel er tir.​—1 Ti. 5:17; 1 Pe. 5:2, 3.

• Klemengetel: Eru el buil.

• Basio: A obis er a branch a mo melilt er ngii.

• Tekoi el Kired el Meruul: Kirir el rudam el oldingel a ongdibel me a lechub e ngtirke el odam el oungerachel aike el eru el sils el ongdibel.

• Rolel e Ngsebeched el Mo Soiseb er Ngii: Tirke el odam el oldingel a ongdibel me tirke el odam el oungerachel aike el eru el sils el ongdibel me a rebecherir el rredemelel, a lolengit er tir a obis er a branch me te mo er tia el skuul.

Skuul er a Biblia el kirir a Remesobil el Odamc

• Moktek: Mo olengeseu er tirke el diak el bechiil el mechuodel me tirke el odam el olengeseu er tir el kirel a lmuut el bebil er a ngerachel. A rebetok er tirke el tuobed er tia el skuul a mo mesiou er aike el basio el ousbech a ngeso el ngar er a belurir. E a rebebil a mo mesiou el ngar er a ngodech el beluu a lsekum e ngsebechir.

• Klemengetel: Eru el buil.

• Basio: A obis er a branch a mo melilt er ngii; te blechoel el ngiltii a kmeed el Blil a Ongdibel me a lechub aike el Blil a Meklou el Ongdibel.

• Tekoi el Kired el Meruul: Ngii di el mesobil el odam el 23 el mo bedul a 62 a rekil el mesisiich a bedengel e soal el mesiou er a rudam er ngii e dirrek el soal el menglou er a ureor er a berkel a klumech er aike el basio el ousbech a ngeso. (Mk. 10:29, 30) Ngkirir el mla mesiou el ta er a odam el olengeseu er a remechuodel me a lechub e ngta er a remechuodel er a ongdibel el kesengil e ngeru el rak.

• Rolel e Ngsebeched el Mo Soiseb er Ngii: A lsekum tia el skuul a ngar er ngii er a branch el mngar er cheungel, e a miting el kirir tirke el sorir el mo soiseb er ngii a mo er ngii er sel eru el sils el ongdibel. A lmuut el bebil er a omesodel a mo er ngii er tiakid el miting.

Skuul er a Biblia el kirir a Rekristiano el Obekeld

• Moktek: Mesterir a rebechiil el chad a ileakl el ngeso me bo el sebechel a Jehovah me a cheldebechelel el mo ousbech er tir. A ruumesingd er tirke el mo tuobed er tia el skuul a mo mesiou er aike el basio el ousbech a ngeso el ngar er a belurir. E a rebebil a mo mesiou el ngar er a ngodech el beluu a lsekum e ngsebechir.

• Klemengetel: Eru el buil.

• Basio: Aike el kot el klas a ngar er ngii er chelecha el taem er a Watchtower Educational Center el ngar er a Patterson, New York, U.S.A. E a uriul, e tia el skuul a mo er ngii er aike el basio el lolilt a obis er a branch, el ngii a blechoel el aike el Blil a Meklou el Ongdibel me a lechub e ng Blil a Ongdibel.

• Tekoi el Kired el Meruul: Tirke el bechiil el chad el 25 el mo bedul a 50 a rekrir e mesisiich a bedengir el blekerdelel a klengar er tir a uchul e ngsebechir el mesiou er aike el basio el ousbech a ngeso e dirrek el oba uldasu el kmo: “Ng ngak a mong! Moderchak!” (Isa. 6:8) Te dirrek el kirir el mla bechiil el kesengil e ngeru el rak e ngar er a mui el taem el omesiou el kesengil e ngeru el rak el dimlak a ta el lemeterob.

• Rolel e Ngsebeched el Mo Soiseb er Ngii: A lsekum tia el skuul a ngar er ngii er a branch el mngar er cheungel, e a miting el kirir tirke el sorir el mo soiseb er ngii a mo er ngii er sel ileakl el ta el sils el ongdibel. A lmuut el bebil er a omesodel a mo er ngii er tiakid el miting.

Gilead​—Omesubel a Biblia el kirir a Remo Missionari

• Moktek: Mo olisechakl er a repioneer me a rebebil el ngar er a mui el taem el omesiou el kirel a ureor er a klemissionari.

• Klemengetel: Eim el buil.

• Basio: Watchtower Educational Center, Patterson, New York, U.S.A.

• Tekoi el Kired el Meruul: Rebechiil el chad el mla metecholb el edei el rak e 21 el mo bedul a 38 a rekrir er sel taem el lekot el otungii a babilengir el kirel tia el skuul. Ngkirir el melekoi a tekoi er a Merikel, e mla bechiil el kesengil e ngeru el rak, e ngar er a mui el taem el omesiou el kesengil e ngeru el rak el dimlak a ta el lemeterob. Ngkirir el mesisiich a bedengir. A repioneer el mesiou el ngar er a ngodech el beluu (el uldimukl er tirke el ua missionari); me a rudam el oldingel a ongdibel me tirke el oungerachel aike el eru el sils el ongdibel; me a rechedal a telungalek er a Bethel; me tirke el tilobed er a Ministerial Training School, me a Skuul er a Biblia el kirir a Remesobil el Odam, me a Skuul er a Biblia el kirir a Rekristiano el Obekel a dirrek el sebechir el olengit el mo er tia el skuul a lsekum e te rredemelel.

• Rolel e Ngsebeched el Mo Soiseb er Ngii: Ngar er aika el mla mengilt el branch, e ngmo er ngii a miting el kirir tirke el semeriar el mo er tia el skuul er aike el edei el sils el ongdibel. A lmuut el bebil er a omesodel a mo er ngii er tiakid el miting. A lsekum e ngdiak tiakid el miting er a basio el omkiei er ngii e soam el mo er a Gilead, e ngsebechem el meluches el mo er a obis er a branch el kirel a lmuut el bebil er a omesodel.

Skuul el kirir a Rechedal a Chelechad er a Branch me a Rebecherir

• Moktek: Mo olengeseu er tirke el mesiou el ngar er a Chelechad er a Branch el mo ungil el kutmokl a urerir el omtebechel er a Bethel, e mo kerekikl aike el tekoi el ngar er ngii a lerellii er a ongdibel, e mo omtebechel aike el ongdibel el ngar er a basio el losiou er ngii, e dirrek el omtebechel a oidel me a otebedel me a odureklel a babier me a kuk bebil er a ureor.​—Lk. 12:48b.

• Klemengetel: Eru el buil.

• Basio: Watchtower Educational Center, Patterson, New York, U.S.A.

• Tekoi el Kired el Meruul: Kirel el chedal a Chelechad er a Branch me a lechub e ng Country Committee me a lechub e ngtirke el odam el lomes er tir e ngsebechir el mo er aika el ureor.

• Rolel e Ngsebeched el Mo Soiseb er Ngii: Rudam me a rebecherir el tir a rredemelel, a lolengit er tir a Chelechad er a Ruungerachel me te mo er tia el skuul.

[Aike el footnote]