Bo Dekerekikl Sel Doldingel a Obliil
1. Ngera me ngkired el mo kerekikl sel doldingel a obliil?
1 A remesiungel a Dios a uai a “sib el mora delongelel chokami” el omerk er a klumech er a “chelsel tial chebirukel e mekngit el telecheroll.” (Mt. 10:16; Fil. 2:15) A chisel a klou el uldikel er a chelsel a beluu, seked el oldechelakl er a rebebil me tirke el omdechem er a rechad el kirel a udoud a olecholt el kmo a remekngit el chad a “mengal mora mekngit.” (2 Ti. 3:13) Ngera el omellach er a Biblia a doltaut e ngmo ngosukid el mo ‘mellomes a rengud’ e kerekikl sel doldingel a obliil?—Mt. 10:16.
2. Ngera el blekeradel a sebechel el duubech el uchul e ngkired el mo omerk er a klumech er a kuk ta er a basio?
2 Moruul a Tekoi el Oba Llomeserreng: A Osisechakl 22:3 a melisiich er kid el mo mellomes a rengud me bo el sebeched el ‘oibngid’ er a tellemall. Bo mkerekikl! A ungil el blekeradel er a basio el moldingel er ngii a sebechel el di mereched el mengodech. Ke locha mo mesterir a rebetok el bulis me a lechub a klou el seked el ngar er a rael. E a lebebil er a taem e a ungil a rengul el chad er a blai a sebechel el louchais er kau el kmo ngngera ngar er ngii. Me ngungil a omereched el merael el mo er a ta er a basio er a bai molemolem el ngar sei.—Osi. 17:14; Jn. 8:59; 1 Th. 4:11.
3. Ngmekerang a omellach er a Olisechakl 4:9 e melutk el kirel a omesiunged?
3 Dmak el Oureor: A Olisechakl 4:9 a kmo: “A re terung a kuk ungil er a di tang.” Alta ke mla mo smau el di kau el tang el oldingel a obliil, engdi chelechang e ngungil a omoruul el uaisei? Ngar er a bebil el basio e ngdi ungil. Engdi ngngar er a kuk bebil er a basio, e ngdiak el ungil a lsekum a odos me a lechub a ngeasek a di ngii el tang el oldingel a obliil, el ileakl sel bla lengelt a sils. A tekoi el mla duubech a ochotii el kmo ngklou a ultutelel a lengar er ngii a chad el lobengked el kerekikl aike el meliuekl er kid. (Oli. 4:10, 12) Bo mkerekikl er tirke el chad el obengkem el oldingel. Sel omngar er a territory e ngungil a obo blechoel el ouchais er a rebebil er a uchei er a omorael.
4. Ngmekerang e sebeched el mo kerekikl er a rokui el chad el ngar er a ongdibel?
4 A remechuodel a ngerechelir el lomeskid a ungil el ulekrael el loltirakl a blekerdelel a beluu el dekiei er ngii, e ‘diak lolengull el omecheliu er kid.’ (Heb. 13:17) Kede ulterekokl el mo ngmai a klengeltengat er a Jehovah sel dolecholt a klengariourreng e demui el oureor el lobengterir. (Mik. 6:8; 1 Ko. 10:12) Me a leuaisei, e bo el sebechir a rokui el mesiungel a Dios el mo ungil el ousioning e bo lekerekikl el ngar er aike el basio el loldingel er ngii.