A Uchei er a Bo Momerk er a Klumech, e Mosiik er a Rechad el Ngodech a Omelekingir
1. Ngera me a territory er aike el ongdibel el ngar er aike el basio el kakerous a omelekoi er ngii a meketmokl el oltirakl aike el omelekoi el ngar sel basio?
1 Sera Pentekost er a rak er a 33, er a uriul er a lenguu a oureor el klisichel a Dios, e a redisaiplo er a Jesus a ‘ulemuchel el mengedecheduch el melekoi a tekoi er a kakerous el renged’ el mo er tirke el mla er sei el mla er a kakerous el beluu. (Rel. 2:4) Tiang a mlo uchul e a rebekord el 3,000 el chad a miltecholb. A ruumesingd er tirke el mla er sel basio a locha dirrek el mle osisiu a omelekingir, el locha tekoi er a Hebru me a lechub e ng Grik. Nguaisei, engdi a Jehovah a mle soal a klumech er a Renged a loberk el mo er a rechad el ngar er a omelekingir. A ta el uchul tiang a kmo, a rechad a blechoel el beot er tir el kongei er a ungil chais el ngar er a omelekingir. Me chelecha el sils, e a territory er aike el ongdibel el ngar er aike el basio el kakerous a omelekoi er ngii a meketmokl el oltirakl aike el omelekoi el ngar sel basio. (Organized, 107 el llel, par. 2-3) Aike el group el melekoi a ngodech el omelekoi a diak a ileakl el territory er tir, engdi te bai omerk a klumech el mo er a rechad el melekoi er a omelekingir el kiei er a territory er a ongdibel el olengeseu er tir.
2. (a) Ngera tia el ureor el osiik er a rechad el melekoi a ngodech el omelekoi, e sebeched el meruul er ngii er ker? (b) Ngmekerang a ongdibel e kaingeseu er a delongelir el oureor er aike el territory el kakerous a omelekoi er ngii? (c) Ngera kired el meruul er ngii a lsekum a chad el semeriar a melekoi er a ngodech el omelekoi?
2 A lsekum e ke kiei er a basio el rokui el chad er ngii a melekoi er a osisiu el omelekoi, e ngsebechem el omerk er a klumech er a bek el blai el obo er ngii. Engdi a omkiei er a basio el kakerous a omelekoi er ngii e ngkuk ta er a tekoi. Aike el ongdibel el ousbech a ngodech el omelekoi a locha omerk er a klumech el ngar er a osisiu el basio el moldingel er ngii. Me alta aika el ongdibel a sebechir el ouchais er kau el kirir tirke el chad el melekoi er a osisiu el omelekoi el uai kau, engdi a ongdibel er kau me a lechub a group er kau a ngerechelir el osiik er a rechad el sebechiu el omerk er a klumech el mo er tir. (Momes er a baks el “Mkaingeseu er a Delongeliu.”) Sei a uchul me nglocha kirem el mo teloi er tia el ureor el osiik er a rechad el melekoi er a ngodech el omelekoi. Ngmekerang e meketmokl tia el ureor?
3. Ngera oterekeklii el kmo ngngar er ker el basio a bo losiik er a rechad er ngii a ongdibel me a lechub e ng group, e ua ngera el klungel a taem a lousbech er ngii el kirel tia el ureor?
3 Oketmeklel Tia el Ureor: A klungel a taem el mechoit el kirel a ureor el osiik er a rechad el kakerous a omelekingir el ngar er a beluu el kakerous a omelekoi er ngii a kmal di ultuil er a blekeradel er sel basio. El uai tiang, te tela el chad el ngar tia el basio a melekoi er tia el omelekoi? Te tela el publisher a ngar sel basio? Ngtela el address a lolab a ongdibel me a lechub e ng group er kau? A ongdibel a diak el kirel el osiik er a rechad el ngar er a bek el basio, e ngbai sebechel el melilt aike el basio el betok a rechad er ngii el ngar er a territory er tir me aike el basio el kmeed er tir. Nguaisei, engdi ngklou a ultutelel a lungil el kltmokl tia el ureor me bo el sebechir a rebetok el mo er ngii a techellir el omekedong er a ngklel a Jehovah.—Rom 10:13, 14.
4. (a) Ngkirel el ua ngerang a oketmeklel tia el ureor el osiik er a rechad? (b) Ngera bebil er a rolel a omosiik er a rechad el melekoi er a omelekingem?
4 A chelechad er a remechuodel, el ileakl ngike el odam el oungerachel a tekoi er a odingel a obliil, a kirel el oungerachel er tia el ureor el osiik er a rechad el ngodech a omelekingir me lak domelekl er a osisiu el basio er a ta el taem. (1 Ko. 9:26) Ngar er aike el group el melekoi a ngodech el omelekoi, e a chelechad er a remechuodel a ngiltii a ta er a odam el rredemelel el mo oungerachel er tia el ureor. A betok el ongdibel me a lechub e ng group a ngar er ngii a tekoi el loruul er a uchei el mo medengelterir a rechad el melekoi a ngodech el omelekoi. Te meruul er tiang el oeak a lousbech a directory me a lechub e ng Internet el osiik a ngklir tirka el chad. E a uriul e te mo osiik er tirka el chad el oeak a loudengua el mo er tir me a lechub e loldingel er tir me bo lodengei el kmo ngngera el address a kirir el odak er a territory er tir. A lsekum e ngdi ungil, e a chelechad er a remechuodel er a ongdibel el lengar er ngii tia el group a sebechir el olengit er a rokui el chedal a ongdibel me loruul er tia el ureor a lebebil er a taem.—Momes er a baks el “Rolel a Omosiik er Tirke el Melekoi er a Omelekingem.”
5. (a) Ngera bebil er a ulekrael el kirir tirke el publisher el meruul er tia el ureor el osiik er a rechad? (b) Ngera sebeched el melekoi sel doruul er tia el ureor el osiik er a rechad?
5 Ngkired el ngar er ngii a moktek er kid er a bek el taem el deteloi er tia el ureor el osiik er a rechad. Tia el ureor a tedebechel a omesiunged a uchul me ngkired el oubail el uai sel bo doldingel a obliil. Me sel loruul er tia el ureor, e a rebetok el chad a blechoel el melasem a tekoi el bo lolekoi me bo el sebechir el melemolem el semeriar e mo ungil a duch er tir el melekoi a ngodech el omelekoi. Ngsebeched el meluches a temed el dongoit el osiik er a rechad engdi ngdiak doluches aike el taem el mechoit el meruul a map er a territory me a list. Sel debetik er a chad el melekoi er a ngodech el omelekoi, e ngkired el melasem el ouchais er ngii el kirel a ungil chais, e a uriul e kede ouchais er ngike el odam el oungerachel a tekoi er a odingel a obliil me a lechub e ngchad el bla ltetkii me bo el sebechel el omekbeches aike el rekord er a territory. Ngkired el di meruul er tiang alta e a chad a dimlak el semeriar. Me alta e tia el ureor el osiik er a rechad a klou a ultutelel, engdi ngkirel el mo tabesul a tekoi el doruul e mo teloi a rokui el telengtengil a ureor er a berkel a klumech.—Momes er a baks el “Aike el Bo Molekoi Sel Moruul er Tia el Ureor el Osiik er a Rechad.”
6. Ngera el omelsemai a bo dechelebangel sel dosiik er a remechad?
6 Sel Dosiik er Tirke el Mechad: Kede ousbech a blakerreng sel dosiik er a remechad e le ngdiak el beot a doruul er ngii. Ngdiak el sebeched el dongchii a chad el mechad el okiu a ngklel, teletelel a bedengel, me a lechub a bilel. Me a lmuut el tang, a rechedal me a resechelil ngika el chad a locha mo bekikl me ngdiak louchais a tekoi el kirel. Aika el ulekrael el ngariou el kirel a dosiik er a remechad a dirrek el sebeched el ousbech sel dosiik er tirke el melekoi er a ngodech el omelekoi.
7. (a) Ngoeak a ngera el rolel e ngsebeched el metik er a remechad el ngar er aike el basio el lekiei er ngii a rechad? (b) Ngera kired el meruul er ngii me lak bo el ngodech a uldesuel a chad er a blai?
7 A ongdibel me a lechub e ng group er a sign language a mla metik el kmo ngungil a doker el kirir a remechad el ngar er aike el basio el lekiei er ngii a rechad. Nglocha sebechem el mengedecheduch er a chad er a blai el ngii a mla mesang a tonari er ngii, chad er a urerel, me a lechub e ngchad el ledak el ngar er a skuul el ousbech a sign language. Ngdirrek el locha mla mesang a sign el ngar er a hang er ngii el ouchais er a rechad el kmo ngngar er ngii a rengalek el mechad el kiei er ngii el basio. Ngii el chad a locha dirrek el ngar er ngii a chedal el mechad. Lak mobes el kmo a rechad a locha mo ngodech a uldesuir el kirel a moktek er kau el mo oldingel er tir. Engdi ngoeak a ungil el blekerdelem me a beot e melemalt el rolel a omosaod er a uchul e ke mlo oldingel, e a rechad a mo diak el ngodech a uldesuir. A rebebil a mla metik er ngii el kmo ngungil a dolecholt er a Biblia me a lechub e ngkuk bebil er a DVD er a sign language el mo er a chad er a blai sel doker er ngii el kmo ngmedengelii a chad el mechad me a lechub e ngdiak. E a uriul, e kede melekoi el kmo ngsoad el ouchais er a remechad el kirel a omelatk el ngar er a Biblia. A lsekum a chad er a blai a diak el soal el ouchais er kid a ngii di el ngerang, e nglocha mo kongei el nguu a address er kid me a lechub e ngsiotaikeng er a miting er a ongdibel el mo omsang a chedal me a lechub e ngsechelil el mechad.
8. Ngmekerang a ongdibel el ousbech er a ngodech el omelekoi a lolengeseu er a ongdibel er a sign-language?
8 A ongdibel er a sign-language a locha mo olengit er a ta er a ongdibel el ousbech er a ngodech el omelekoi el mo olengeseu er tir el osiik er a remechad el ngar er aike el meklou el territory er tir, el tang me a lechub e ngeru el taem er a ta el rak. A miting el kirel a odingel el bo loungerachel er ngii a ongdibel er a sign-language a sebechel el uldimukl a ulekrael el kirel tia el ureor me a olechotel a doruul er ngii. A ta el publisher er a ongdibel er a sign-language a sebechel el obengkel a derta el car group e nguu a map el olecholt er a basio el bo losiik er a remechad er ngii.
9. Ngmekerang e sebeched el osiik er a remechad er aike el basio el bo el kldibel er ngii, e loilil er ngii, me a lechub e te melai a ngeso er ngii?
9 Ngdirrek el sebeched el osiik er a remechad er aike el basio el bo el kldibel er ngii, e loilil er ngii, me a lechub e te melai a ngeso er ngii. Tirke el publisher el mo er aika el basio a kirir el oubail a bail el chatter er sel basio el lebo er ngii. Nglocha ungil a longedecheduch er a tang me a lechub e ngteru el chad el ngar sei er a bai longedecheduch er a rokui el chad. A lsekum e ngmlo ungil a cheldechedechemiu, e nglocha sebechiu el kaiuecholt a dengua er kemiu.
10. Ngmekerang e sebeched el osiik er a remechad el ngar er a basio er a siobai?
10 Ngdirrek el sebeched el kutmokl a map el olecholt a siobai er a beluu e mo oldingel aikang er a ungil el taem. A ta er a map a sebechel el olecholt a stand er a cheluch. E a kuk ta er a map a ngar er ngii a dry cleaner, blil a omesilek, blil a blengur, hotel me a lmuut el ta er a bedengel a siobai. A lsekum a derta el map a ngar er ngii a osisiu el siobai er ngii, e ngsebeched el ousbech a osisiu el rolel a cheldecheduch me bo donglou er a duch er kid el kirel tia el ureor. El uai tiang, a hotel a blechoel el ngar er ngii a remechad el mo kiei er ngii, me ngsebeched el mesaod er a urered el mo er ngike el oureor er a front desk e msang a DVD me a siotaikeng er a miting el mo mesterir a remechad el kiei er a hotel er tir. Ngar er a bebil el siobai, e ngsebeched el oker er tir a lsekum e ngngar er ngii a rechad er a ureor me a lechub e te okiak er tir el ousbech a sign language. A lsekum e ngngar er ngii a skuul el kirir a remechad el ngar er a territory er kid, e ngsebeched el mesterir a bebil er a DVD el mo er a library er tir.
11. Ngera me tia el ureor el osiik er a rechad el melekoi a ngodech el omelekoi a klou a ultutelel el telengtengil a ureor er a berkel a klumech?
11 A Klou a Ultutelel el Ureor: Sel mosiik er a rechad er a blai el melekoi er a omelekingem e ngousbech a klou el taem. Me a lmuut el tang, ngsebechel el mereched el mengodech a blekeradel er a bebil er a basio e le rechad a melukl me a lechub e te ngar er ngii a rebeches el me soiseb er tia el basio. E tiang a uchul e ngmo meringel a domekbeches a rekord er a territory er kid. Me nguaisei, engdi ngar er a betok el basio, e tia el ureor el osiik er a rechad el melekoi a ngodech el omelekoi a klou a ultutelel el telengtengil a ureor er a berkel a klumech. A Jehovah, el ngii a mla meskid tia el ngerachel el mo omerk a klumech, a diak longetukel er a rechad. (Rel. 10:34) Ngsoal “a rokui el chad a bo le sobel e bo lodengelii a klemerang.” (1 Ti. 2:3, 4) Me a leuaisei, e bo dedak el oureor el obengkel a Jehovah el osiik er a rechad el kakerous a omelekingir el tir a “ungil e kerekikl el rongesii a tekingel a Dios e dolemii er a rengrir.”—Lk. 8:15.
[Baks el ngar er a 5 el llel]
Mkaingeseu er a Delongeliu
A lsekum a ongdibel me a lechub e ng group a soal a ngeso el osiik er tirke el melekoi er a omelekingir el sebechir el omerk a klumech el mo er tir, e ngike el odam el oungerachel a tekoi er a odingel a obliil a sebechel el mengedecheduch er a remechuodel el ngar er a bebil er a ongdibel el ousbech a ngodech el omelekoi el kmeed er tir. Nglocha ungil a lomekedong aike el ongdibel el betok a rechad er ngii el melekoi er a omelekingir me a lechub aike el ongdibel el di kmeed er tir. Aika el ongdibel a sebechir el ouchais er tirke el publisher er tir me a lsekum e te metik er a chad el melekoi er ngii el omelekoi, e te luchesii a address er ngii e nguu el msang ngike el odam el oungerachel a tekoi er a odingel a obliil me nguu el msang a ongdibel me a lechub e ng group el ullengit a ngeso. Tirke el odam el oungerachel a tekoi er a odingel a obliil er aika el ongdibel a sebechir el kutmeklii a ungil el rolel a lomerk er a klumech er aike el territory el kakerous a omelekoi er ngii e lomekrael er a resemeriar el chad el mo er a ongdibel me a lechub e ng group el oltirakl er a omelekingir.
A lsekum tirke el oldingel a metik er a chad el melekoi a ngodech el omelekoi el ngii a mera el semeriar (me a lechub a chad el mechad), e ngkirir el di mereched el luchesii a Please Follow Up (S-43) el form e nguu el msang ngike el melechesel a ongdibel. Tiang a mo uchul e ngii el chad a mereched el ngmai a ngeso el kirel a tekingel a Dios.
[Baks el ngar er a 6 el llel]
Rolel a Omosiik er Tirke el Melekoi er a Omelekingem
• Moker er a rebebil er a rechad—tirke el mesuub a Biblia, rechad er a blim, rechad er a urerem me a lmuut el bebil.
• Mousbech er a directory el osiik a ngklir a rechad el melekoi er a omelekingem. Aike el directory el omii a ngklir a rechad el oltirakl a address er tir a sebeched el metik er a Internet me a lechub e ngokiu a kombalii er a dengua.
• Bo mkerekikl sel moker a tekoi er aike el basio el uai a library, obis er a kabelment, me a college.
• Momes er a simbung el kirel a subed el ouchais a tekoi er a buai el longetmokl tirke el melekoi a ngodech el omelekoi.
• Bo er aike el stoang me a siobai el olterau a kloklir el mo er a rechad el melekoi a ngodech el omelekoi.
• A lsekum e ke nguu a kengei er tirke el oungerachel, e mketmeklii a tebel el ngar er ngii a babilenged er ngii el ngar medal a siobai, center er a rengalek er a skuul er a daingak, me a basio er a olidiuul el blechoel ngar er ngii a rechad el melekoi er a omelekingem.
• A lsekum e ngdi ungil er a llach er a beluam, e becherar a commercial directory me a lechub e ngprokuram er a computer el ousbech er a Internet el osiik a ngklir a rechad.
[Baks el ngar er a 7 el llel]
Aike el Bo Molekoi Sel Moruul er Tia el Ureor el Osiik er a Rechad
A ungil e bleketakl el rolel a cheldecheduch a mo uchul e ngdiak bo lengodech a uldesuir a rechad. Ngblechoel el ungil a mochotii a babier el ngar er a omelekingel el kot.
A uriul er a moutkeu er a chad, e ngsebechem el melekoi el kmo: “Aki osiik er a rechad el melekoi a tekoi er a ․․․․․ me bo el sebecham el ouchais er tir el kirel a omelatk el ngar er a Biblia. Ngar er ngii a chad el modengelii el sebecham el mengedecheduch er ngii?”
Sel mosiik er a remechad, e ngsebechem el melekoi el kmo: “Alii. Ngsebechek el ochotii er kau tia el tekoi? [Mousbech er a portable video player el ochotii a ta el bades el mengai er a New World Translation—On DVD.] Tiang a di ta er a bades el ngar er a American Sign Language. Ngdirrek el ngar er ngii a bebil er a video el diak el ocheraol, el mileketmokl el olengeseu er a remechad el kirel a tekingel a Dios. Ke medengelii a chad el mechad me a lechub e ngousbech a sign language?” A lsekum a chad er a blai a diak el sebechel el lotkii a chad, e ngungil a moker er ngii a lsekum e ngmla meseterir er a ureor, skuul me a lechub e ngbasio el lekiei er ngii.