Bo Mkerekikl er a Ukltkem
1. Ngerang a dai er a ileakl el ta el sils el ongdibel el kirel a rak er a omesiou er a 2013, e ngerang a moktek er a prokuram?
1 A bek el sils e kede mo chelebangel a blekeradel el sebechel el mo melemall a ukltked. Sei a uchul me a dai er a ileakl el ta el sils el ongdibel el kirel a rak er a omesiou er a 2013, el omuchel er a September 1, 2012 a kmo “Bo Mkerekikl er a Ukltkem.” (1 Ti. 1:19) Tia el prokuram a mileketmokl el mo olengeseu er a derta er kid el mo kerekikl el melebedebek er a rolel a dousbech er tia el kmal ungil el sengk el mla er Ngike el Ulemeob er kid.
2. Ngera el meklou a ultutelel el ker a mo monger er tia el prokuram?
2 Molatk Aika el Tekoi: Tia el prokuram a mo onger a euid el meklou a ultutelel el ker el kirel a ukltked:
• Ngerang a sebechel el tomellii a ukltked?
• Ngmekerang a domeklemalt er a ukltked?
• Ngmekerang e sebeched el mo diak dechelsechusem er a rsechir a rechad?
• Ngera ngochotii el kired sel domdasu e doruul a tekoi el oltirakl a omellach er a Biblia?
• Ke mekerang e diak bo molemall a ukltkir a rebebil?
• Rengeasek, ko mekerang e oltngakl a orimel el mo meruul a mekngit?
• Ngera el klengeltengat a mo er tirke el oltirakl a ukltkir el mlukrael er a oureor el klisichel a Dios?
3. Ngmekera tia el prokuram e mo uchul a klungioled?
3 A Jehovah a sebechel el olengeseu er kid el oltngakl aike el tekoi el loruul a Satan el melemall er a ukltked. Ngoeak a Tekingel me a cheldebechelel a Dios, e ngouchais er kid el kmo: “Tiakid a rael el bo mokiu ngii.” (Isa. 30:21) Tia el prokuram a ta er a rolel e a Jehovah a meskid a chouaitia el ulekrael. Me a leuaisei, e mketmokl a temem me bo el sebechem el mei er tia el prokuram el ta el sils. Bo mkerekikl el orrenges, e momtab er a rolel e ngsebechem el mo oltaut aike el tekoi er a chelsel a klengar er kau. Mdak el ongalek el mesaod er a prokuram. A bo doltaut aike el ulekrael el dolai e ngmo smisichid me a ‘ukltkel a rengud di le bliochel’ e mo ngosukid me lak demechetikaik er a ngibes er a beluulechad er a Satan.—1 Pe. 3:16.