Bo Ldeu a Rengum er a Meringel el Urerem
1. Ngera sebechel rullid el mo diak el blak a rengud er a omesiunged?
1 A chad a ulebeob el kirel “loldeu er a rengul er a urerel.” (Oli. 2:24) Engdi sel lak deues a ungil el redechel a omesiunged, e ngmo mechitechut a rengud e tiang a mo uchul e kede oridii a deurreng er kid me a blakerreng er kid. Ngera sebechel ngosukid me dolemolem el oba ungil uldasu?
2. Ngera me ngkired el mo oba melemalt el uldasu el kirel a uldesuir a rechad er a omesiunged?
2 Moba Melemalt el Uldasu: Lak mobes el kmo alta te di mle mekesai el chad a ulerrenges er a Jesus, engdi a omesiungel a kmal mle ungil. (Jn. 17:4) Ngar sel okesiu el kirel ngike el omriid a tane, e a Jesus a millekoi el kmo a ruumesingd el chad a mo diak lekengei er a klumech er a Renged. (Mt. 13:3-8, 18-22) Nguaisei, engdi a blakerreng er kid a ngar er ngii a klou el leketmeklii.
3. Ngmekerang a bo ‘dourodech’ alta te di mekesai el chad a orrenges er a klumech er a Renged?
3 Rolel e Kede Mo Bekerredechel: A doltirakl er a okesiu el lullekoi er ngii a Jesus, e tirke el kongei er a klumech a mo “ourodech.” (Mt. 13:23) Me a uriul er a leduubech el mo klou a tane er a wheat, e ngmo ourodech a beches el tane el diak el dellomel el wheat. Me a rodech el lourodech er ngii a reblak a rengrir el Kristiano a diak el beches el disaiplo, e ngbai lmuut el betok el olechotel a tane er a Renged, el ngii aike el tekoi el mesaod er a Renged. Tiang a mo uchul a “ungil” el tekoi el oldeu er a rengud, alta rechad a orrenges er kid me a lechub e ngdiak. Kede oureor el olengeseu el mengedaol er a ngklel a Jehovah. (Isa. 43:10-12; Mt. 6:9) Ngdirrek el dmeu a rengud er a techelled el oureor el kldemel a Dios. (1 Ko. 3:9) E a chouaisei el “urerel a ngor” a odeuir a rengul a Jehovah.—Heb. 13:15, 16.
4. Ngera el redechel a omesiunged a sebechel el mo er ngii el diak dodengelii?
4 Me a lmuut el tang, a meringel el urered a sebechel el ourodech engdi kid a diak el sebeched el mes a redechel. A rebebil er a rechad a rirengesii a klumech el lulemerk er ngii a Jesus, engdi ngdimlak bo el disaiplo er ngii el mo lmuut er a uriul er a omesiungel el ngar tia el chutem. Me ngdi osisiu, a tane er a Renged el dolalem er ngii er a rengul a chad a locha mo ourodech er a uriul, e ngii a locha mei er a klemerang e kid a diak dodengei. Me nguaisei, a omesiunged a ngar er ngii a klou el leketmeklii. Misei e dolemolem el mo “bekerredechel” e dochotid el kmo kede disaiplo er a Jesus.—Jn. 15:8.