Kerrir A Rechad

◼ Ngera el omellach er a Biblia a sebeched el ousbech el kirel a usbechel a cell phone sel letemel a miting me a temel a odingel?

“A Bek el Tekoi el Duubech el Ngar Tial Beluulchad a Duubech er Sel Belsechel.” (Oli. 3:1): A cell phone a mesterir a rechad a techall el chadecheduch er a ngii di el taem. Me nguaisei, engdi ngar er ngii a taem el diak el kirel a dengua er kid el mo mengesang er kid. El uai tiang, a miting er kid a taem el dousbech el mengull er a Jehovah, e mesuub a tekingel, e dirrek el oldeu a rengud el kasisiich. (Dut. 31:12; Psa. 22:22; Rom 1:11, 12) Kid ngsebeched el mekoad a dengua er kid sel debo er a miting me sel bo lemerek e domes el kmo ngmla er ngii a oudengua me a lechub e ng text er kid? A lsekum e ngar er ngii a orechudel el dengua el dongiil er ngii, e ngungil a derellii el mo diak a ngerel me lak bo longesang er a rebebil.

Doruul a Rokui el Tekoi el Di Kirel a Ungil Chais. (1 Ko. 9:23): A lebebil er a taem e ngar er ngii a ungil el uchul e kede ousbech a cell phone er a temel a odingel. El uai tiang, a odam el oungerachel er a rechad el loldingel a sebechel el ousbech er a cell phone el omekedong er tirke el oureor er a kuk ta er a basio er a territory. A lebebil er a taem e tirke el oldingel a omekedong er a resemeriar me a lechub e ngtirke el mesuub, er a uchei er a lebo loldingel er tir, el ileakl a lsekum e te kiei er cheroid. A lsekum e kede oba dengua er kid, e ngkired el mo kerekikl me diak bo longesang er kid sel dongedecheduch er a chad er a blai. (2 Ko. 6:3) Me sel dongiil er a rebebil, e ngungil a dolemolem el melatk el kirel a berkel a klumech me tirke el doureor el obengterir, er a bai doudengua me a lechub e de text er a resechelid.

Molatk el Kirir a Rebebil. (1 Ko. 10:24; Fil. 2:4): Ngdiak el lungil a bo lak dekerekikl el olab a taem sel debo er a miting el kirel a odingel e domdasu el kmo ngsebeched el di oudengua me a lechub e kede di text el oker el kirel a basio el bo doldingel er ngii. Sel demeoud, e ngblechoel el mo kirel a group el lmuut el melodech aike el bla letib. Nguaisei el bebil er a taem e ngduubech a bkaischemrungel el tekoi el mo uchul e kede mo meoud. Engdi sel bo deblechoel el olab a taem, e kede olecholt el kmo kede olecholt a omengull el kirel tekoi el bla leketmeklii a Jehovah, me ngike el odam el oungerachel er a group me a rudam me a rudos er kid.