Moltirakl a Kerebai er a Reprofet—Amos
1. Ngera me a kerebil a Amos a uchul a omelisiich el kired?
1 Ngmla ta el molatk el kmo ngdiak mrredemelel a mo omerk er a klumech e le ngdiak a skulem e mla er a chebuul el delengchokl? A leuaisei, e ngsebechem el ngmai a omelisiich er a kerebil a Amos. Ngmle klekerengel a sib e chad er a omeridm el rodech, engdi a Jehovah a ulemekngerachel er ngii el mo omerk er a klou a ultutelel el klumech. (Amo. 1:1; 7:14, 15) Me ngdi osisiu, a Jehovah a ousbech er a rengariou a rengrir el chad er chelecha el taem. (1 Ko. 1:27-29) Ngera kuk bebil el tekoi el kirel a omesiunged a sebeched el suub er a profet el Amos?
2. Ngera me ngsebeched el melemolem el mesisiich sel bo dechelebangel a ultok el ngar er a omesiunged?
2 Molemolem el Mesisiich Sel Bo Mchelebangel a Ultok: A Amasia, el milengull a sechal el kerebou e prist er aike el teruich el kebliil er a diluches er a Israel, a rirengesii a Amos el omlaoch e ua ledilu er ngii el kmo: ‘Bo mrei er a beluam! E lak omluut el mei! Kemam a ngar er ngii a klechelid er kemam!’ (Amo. 7:12, 13) A Amasia a chileuid a tekingel a profet er a bo lolengit er a King Jeroboam me leterebengii a urerel a Amos. (Amo. 7:7-11) Engdi a Amos a dimlak bo el medakt. Chelecha el taem, e a rebebil el mengeteklel a klechelid a osiik a ngeso er a kabelment sel bo loldechelakl er a rechedal a Jehovah. Engdi a Jehovah a ulterekeklii el kmo ngdiak a klekedall er a mekemad el merruul el mo sebechel el tomellid.—Isa. 54:17.
3. Ngera el eru el klumech a domerk er chelechang?
3 Mouchais er a Kerrekerilel a Dios Me Aike el Klengeltengat el Mo er Ngii: Me alta e a Amos a ulemlaoch a kerrekeriil el kirel aike el teruich el kebliil er a renged er a Israel, engdi ngar er a ulebengelel a babilengel el ngar er a Biblia, e nguluuchais er a telbilel a Jehovah el mo sumechokl a tekoi er a beluu me aike el betok el klengeltengat el mo er ngii. (Amo. 9:13-15) Kid a dirrek el ouchais el kirel sel mereku el “Sils er a Kerrekeriil,” engdi tiang a di telengtengil sel “Ebangkelio el kirel ngii el Renged” el kired el omerk er ngii. (2 Pe. 2:9; Mt. 24:14) A Jehovah sel lokngemedeterir a redengerenger er a Armakedon e tiang a mo kutmeklii a rael el kirel a paradis el chutem.—Psa. 37:34.
4. Ngera oterekeklii el kmo ngsebeched el oltaut er a soal a Jehovah?
4 A domerk a klumech er a Renged el ngar er a beluulechad el betok el chad a omtok er kid a ulterekokl el melasem er a blakerreng er kid el meruul a soal a Jehovah. (Jn. 15:19) Engdi kede medengei el kmo a Jehovah a mo melemolem el omeskid aike el dousbech el mo oltaut er sel soal, el di ua lurruul el mo er a Amos.—2 Ko. 3:5.
[Aike el Ker er a Suobel]