Suobel el Sebeched el Ousbech el Ngar er a Omesiunged
1. Ngerang a eru el moktek er sel suobel el “Mengedecheduch el Obengkel a Tonari”?
1 A ngar medad el taem, e a Ongkerongel a mo er ngii a suobel er a chelsel el kmo “Mengedecheduch el Obengkel a Tonari.” Tia el suobel a ngar er ngii a eru el moktek er ngii, el mo mesaod a osisechakl er a Biblia el ngar er a ungil el rolel e mo olecholt a rolel e ngsebeched el oba delemedemek el mesaod a bebil el tekoi. (1 Pe. 3:15) Kede mekerang e mo ungil el ousbech aika el suobel?
2. Ngmekerang e sebeched el ousbech aika el suobel el ngar er a omesiunged?
2 Mousbech el Ngar er a Omesiungem: Ngsebechem el kutmokl a bebil el Ongkerongel el ngar er ngii tia el suobel er a chelsel. Me a chad er a blai, chad el semeriar, me a lechub e ngike el mesuub a Biblia sel loker a ker me a lechub e ngmo er ngii a ultekengel el kirel a tekoi el mla er a ta er aika el suobel, e bsang a babier e molengit me a lsoal e bo mdak el mesaod er ngii. A lsekum e ngdiak a magazine er kau el mesaod er tia el suobel, e nglocha sebechem el download er ngii er a jw.org.
3. Ngmekerang a dosaod er a ta er aika el suobel el obengkel a chad er a blai?
3 Ngmekerang a omosaod er a ta er aika el suobel el obengkel a chad? A rebebil a mla olengit er a chad me bo leklou a ngerel el menguiu a tekingel a tonari, e tir a menguiu a tekingel a Sioning. Te mla metik el kmo a lolasem er tiaikid el rolel a kmal ungil e le ngmsa techellel a chad el mo merriter a klaumerang er kid er a rolel el diak lerellii el mo merur.—Dut. 32:2.
4. Ngmekerang a dousbech aika el suobel el olisechakl er kid?
4 Mosisecheklau Kau me a Rebebil: Me sel monguiu aika el suobel, e momtab aike el bades, okesiu, me a omesodel a tekoi. Momtab er a rolel a losaod a tekoi aika el suobel. E sola e bo molasem el oltaut aika el tekoi el ngar er a omesiungem. (Osi. 1:5; 9:9) A ta el odos a milsa el kmo, “A donguiu aika el suobel a di ua dosuub er a ‘kmal meduch’ el pioneer, el ngike el blechoel el medengelii sel tekoi el kirel el melekoi er ngii!”
5. Ngmekerang a dengesuterir tirke el dosuub a Biblia el obengterir el kutmeklterir el kirel a omesiungir?
5 Ngdirrek el sebechem el ousbech aika el bla desaod el suobel el ngosuterir tirke el mosuub a Biblia el obengterir el kutmeklterir el kirel a omesiungir. Mdak el menguiu aika el suobel, e becherei ngika el mesuub me lolekoi a tekingel ngike el Sioning. Ngoeak tia el rolel, e tirke el mesuub a Biblia a sebechir el mesaod a klaumerang er tir el oba delemedemek. (Kol. 4:6) Nguaisei, aika el suobel a di ta er aike el betok el rolel e a Jehovah a ngosukid el ‘meruul a ikel rokui el ngercheled’ el ngar er a omesiunged.—2 Ti. 4:5.