Skuul el Kirel a Urerel a Dios er a 2015 a Ngosukid el Mo Olengeriakl er a Rolel a Dolisechakl

¹ A milluches er a psalm el David a kmo: “A tekingek ma uldesuek bo le betechii a rengum, RUBAK el cheuotelek!” (Psa. 19:14) Kid a dirrek el soad a omelekinged a lodeuir a rengul a Jehovah e le kede mengreos a techelled el ouchais er a klemerang el ngar er a ongdibel me a ngar er a omesiunged. A Skuul el Kirel a Urerel a Dios a ta er a rolel e a Jehovah a olisechakl er kid el kirel a omesiunged. Tia el osisechakl a ngar er ngii er a bek el sandei el ngar er a kuk betok er a 111,000 el ongdibel er a beluulechad el rokir. Ngmla ngosuterir a rudam me a rudos er a beluulechad el rokir el kakerous a blekerdelel a klengar er tir el mo meduch el olisechakl a ungil chais, el sebechir el lolisechakl el lomeksemeriar a rengrir a rechad e oba delemedemek me a blekeu.​—Rel. 19:8; Kol. 4:6.

² A bldeklel a suobel er a rak er a 2015 a mo uldimukl er a bades el mlengai er a “An Introduction to God’s Word” el tekoi er a Merikel, me a suobel el mla er a Biblia Olisechakl el babier me a Ungil Chais el brochure. Ngdirrek el ngar er ngii a omeldechel a temel a omesodel a omengiuel a Biblia me a Kot el Cheldecheduch. Aika el omelodech el obengkel a ulekrael er a rolel a doltobed a cheldecheduch a bo dosaod er aika el parakurab el beldukl er iou.

³ Omesodel a Omengiuel a Biblia: A rudam el mo oltobed er tia el cheldecheduch a kirir el mo mesaod er a ta er a tekoi er a Bades el omeksemeriar e sebeched el ousbech er ngii el mengai er a omengiuel a Biblia er sel sandei er a chelsel a eru el bung. A ungil el omengetmokl a mo uchul e ngsebechem el ouchais er a ongdibel a ta er a klou a ultutelel el tekoi er a chelsel a mla moterekokl el taem. A uriul e a ongdibel a mo ousbech er sel elolem el bung el leblechoel el lousbech er ngii el kirel a nger er a rederta el chad el ousbech er a 30 el bio me a lechub e ngmekesai er ngii el kirel a tekoi el ble lesemeriar er ngii er a omengiuel a Biblia er a bek el sandei. Ngousbech er a ungil el omengetmokl me a ultebechel el reng el mo meruul er a klou a belkul el nger er kau er a chelsel a 30 el bio, engdi a doruul el uaisei e ngungil el omesuub el kired. Ngdirrek el mesterir a techellir a rebebil el mo sebechir el louchais aike el lesiluub er a lorriter a bades er a Biblia.

⁴ Kot el Cheldecheduch: A taem el mloterekokl el kirel a omengiuel a Biblia a mla mekesadel el di mo edei el bung me a lechub e ngkesai el dousbech el menguiu a di mekesai el bades. Tirke el mo menguiu a kirir el mesuub er ngii el betok el taem el oeak a longuiu el klou a ngerir e lekerekikl el melemalt a tekoi el longuiu e bo lungil el diak el medebdeb a omengiuir me bo el sebechir el bleketakl el ouchais a belkul a tekoi el losaod er ngii. A rokui el chedal a Jehovah a kirir el meringel el mesuub el mo sebechir el ungil e meduch el menguiu, e le a omenguiu a ta er a klou a ultutelel el tekoi er a rolel a omengull er kid. Ngkmal dmeu a rengud e le rebetok el ngeleked a kmal meduch el menguiu! A ruungalek a dechat er tir el kirel a bltikerreng er tir el olengeseu er a rengelekir el mo meduch el menguiu.

⁵ Ongeru el Cheldecheduch: Tiang a eim el bung el cheldecheduch el bo loruul er ngii a odos. Ngkirel el ousbech er a mla mengilt el dai. Tia el suobel el loruul er ngii a kirel el oltaut er ngii er a blekerdelel a odingel el ungil el kirel a basio el loldingel er ngii. Modak a bebil er a bades el locha sebechem el lousbech el mesaod er a osisiu el tekoi ngii me a dai er a suobel. Ngike el oungerachel er a skuul a mo tutkii a chad el mo olengeseu er ngii.

⁶ Ongedei el Cheldecheduch: Tiang a eim el bung el cheldecheduch el bo loltobed er ngii a odam me a lechub a odos. A lsekum a odos a mo oltobed er ngii, e ngmo ua blekerdelel sel Ongeru el Cheldecheduch. E sel sekum e a odam a mo oltobed er ngii, e a suobel el bo losaod er ngii a mengai er a Ungil Chais el brochure me a lechub e ng Biblia Olisechakl el babier, e kirel el oltobed er a cheldecheduch el lomdasu aike el lousbech a rechad er a chelsel a ongdibel. A ngalek er a skuul a kirel rullii a dai er a cheldechedechal e smiik a melemalt el bades el bo lousbech.

⁷ A Beches el Teletelel a Ongedei el Cheldecheduch el kirir a Rudam: A lsekum a cheldecheduch a mengai er a bades el ngar er a “An Introduction to God’s Word” el tekoi er a Merikel, e ngkirel el mo motobed el uai a olechotel a omengull el telungalek me a lechub e ngoldingel a obliil. Ngblechoel ngike el oungerachel er a skuul el mo tutkii ngike el mo oltobed er a cheldecheduch me a chad el obengkel me a setting er ngii. Ngike el mo olengeseu er ngii a kirel el mo ta er a chad er a delengcheklel me a lechub e ngodam el ngar er a ongdibel. Modak a bebil er a bades el melisiich a omellach er a Biblia el sebechem el lousbech el mesaod er a osisiu el tekoi ngii me a dai er a suobel. A lebebil er a taem e a ta er a remechuodel a mo oltobed er tia el cheldecheduch. A remechuodel a sebechir el melilt er a chad el olengeseu er tir me a setting. Ngulterekokl el mo melisiich er a ongdibel sel lesterir a remechuodel el olecholt er a rolel a lolisechakl el obengkel a ta er a chad er a delengcheklel me a lechub e ngodam el ngar er a ongdibel.

⁸ Omellach: Ngike el oungerachel er a skuul a mo ousbech er a eru el bung er a uriul er a cheldechedecherir a rederta el ngalek er a skuul el mo chemat er tir e omesterir aike el lousbech el omellach el mengai er a Benefit From Theocratic Ministry School Education el babier. Me ngike el oungerachel er a skuul sel louchais er a cheldechedechal a ngalek er a skuul, e ngdiak bo louchais a omellach el kirel a suobel el loureor er ngii. Engdi uriul er a cheldechedechal a ngalek er a skuul e ngike el oungerachel er a skuul a kirel el chemat er ngii, e ouchais er a omellach el kirel a suobel el loureor er ngii, e smodii a uchul me ngmle ungil el oltaut er tia el tekoi, me a lechub e ngoeak a delemedemek e ngsmodii el kmo ngmo uchul a klungiolel a lsekum nglmuut el oureor er ngii er a ta er a taem.

⁹ A babier er a omellach el kirel a ngalek er a skuul a debetik er ngii er a babilenged er a Ministry School el babier er a 79 el mo er a 81 el llel. A uriul er a ngalek er a skuul er a lotebedii a cheldechedechal, e ngike el oungerachel er a skuul a di mo omelechang a olangch er aike el tekoi el luluureor er ngii er a chelsel a babilengel, e mo di tir el terung e ngoker er ngii el kmo ngmirruul er sel exercise el ngar sel suobel el obengkel a omellach el luluureor er ngii. A bebil er a ulekrael el sebechel ngosuir me a chetengel a ngalek er a skuul a sebechem el subedii er a uriul er a miting me a lechub e ngkuk ta er a taem. A rolel a omolecholt er a ngalek er a skuul el kmo ke kmal omekerreu er ngii er aike el lousbech er a skuul a kirel mo uchul a techall el mo sebechem el ngosuir el olengeriakl er a tekoi er a klereng.​—1 Ti. 4:15.

¹⁰ A lsekum e a cheldechedechal a ngalek er a skuul a mo engelakl er a temel, e ngike el oungerachel er a skuul me a lechub a chad el olengeseu er ngii a kirel di klekar el msang a olangch el ua, usbechel a kambalang me a lechub a omelengod er a tebel, el sebechel el mo medengei el kmo ngmla engelakl er a taem. Engdi ngmeruul er tiang el ngar er a ungil el blekeradel. A ngalek er a skuul a kirel mo medengelii tiang, me ngrokir sel tekoi el lulsaod er ngii e mereched el metengel er a stage.​—Momes er a Ministry School el babier, 282 el llel, par. 4.

¹¹ A rokui el chad el mo oltirakl a osisechakl er a Biblia a kmal dongemedaol er tir el mo teloi er a Skuul el Kirel a Urerel a Dios. (Momes er a Ministry School el babier, 282 el llel, par. 6.) A osisechakl el tia el skuul a oltobed, a mla rulleterir a rechedal a Jehovah el mo omerk e olisechakl er a ungil chais er a Renged el oba bltikerreng, omengull, me a ulterekokl el reng. A Jehovah a kmal ulterekokl el oba deurreng el kirel a odengesel el oeak tirke el chad el kmal melai a betok el klungiolir er tia el osisecheklel a tekingel a Dios!​—Psa. 148:12, 13; Isa. 50:4.