A Miting el Kirel a Odingel a Obliil el Oltaut er a Moktek er Ngii

1. Ngera moktek er aika el miting el kirel a odingel a obliil?

¹ A ta el taem, e a Jesus a mlo kldibel el obengterir a rebebil er a redisaiplo er ngii er a uchei er a bo loldingel a obliil. (Lk. 10:1-11) Ngmillisiich e omeklatk er tir el kmo ngdiak el di el bo el tir el tang, e le “merreder er a sim” el Jehovah a mo omekrael er tir. Ngdirrek el milsterir a ulekrael el milengetmokl er tir el kirel a ureor, e ulemii er tir el mo “derteru.” Chelecha el sils, e aike el miting el mo er ngii er a uchei er a bo doldingel a obliil a osisiu a moktek er ngii, el mo melisiich e mengetmokl e omechobech a tekoi el doruul.

2. Ngkirel el ua ngerang a klemengetel a miting el kirel a odingel a obliil?

² Chelechang e a miting el kirel a odingel a obliil a 10 el mo er a 15 el bung a klemengetel, tiang a uldimukl er a lomii er a rechad, me a basio el bo lomerk er a klumech er ngii, e meluluuch. Engdi tia el tekoi a mo mengodech. Ngomuchel er a April, e a miting el kirel a odingel a mo eim el mo er a euid el bung a klemengetel. Engdi a lsekum e ngmo er ngii a miting er a odingel er a uriul er a ta er a miting er a ongdibel, e ngkirel el lmuut el mo kedeb a temel, e le kede dirk mlo merek el oldeu a rengud er a omesodel a Biblia. A bo lemekedeb aika el miting el kirel a odingel a mo uchul e a rokui el chad a sebechir el mengoit a klou el taem el oldingel a obliil. E dirrek, a lsekum a re pioneer me a re publisher a mla omuchel a temir er a uchei er a miting el kirel a odingel, e ngdi mo kedeb el taem a meterob er a temir.

3. Ngkirel el mo ua ngera omengetmeklel a miting el kirel a odingel me bo el sebechel mo uchul a klungiolir a re publisher?

³ A miting el kirel a odingel a obliil a kirel ungil kltmokl el mo uchul a klungiolir a re publisher. Ngar er a betok el ongdibel, e ngmo uchul a klungiolir tirke el ngar er aike el group er a odingel el mo kebetech er a kakerous el basio er a bai di lebo er a chimo el basio. Tia mo uchul e ngmo beot er kid el mo er a basio er a miting el kirel a odingel me a basio el domerk er a klumech er ngii. A re publisher a sebechir el mereched el obii, e sebechel mo beot er a rudam el oungerachel er a group er a ongdibel el mo kerekikl er tirke el loungerachel er tir. A chelechad er a remechuodel a sebechir el omes a blekeradel el kmo ngera ungil el mo er a rokui el chad. A uchei er a orokiolel a miting el obengkel a kedeb el nglunguuch, e a rokui el chad a kirir el mo medengei el kmo te mo er ker e oureor el obengterir a rua techang.

4. Ngera uchul me a miting el kirel a odingel a diak domes el ua lak el sal klou a ultutelel er aike el kuk bebil er a miting?

⁴ Ngdiak el Lak el Sal Klou a Ultutelel er Aike el Kuk Bebil er a Miting: A miting el kirel a odingel a obliil a meketmokl el mo uchul a klungiolir tirke el mo oldingel a uchul me ngdiak el rokui el chad er a ongdibel a mo teloi er ngii. Nguaisei, engdi tiang a diak el kirel rullid me bo domes er ngii el ua lak el sal klou a ultutelel er aike el kuk bebil er a miting. Ngdi ua rokui el miting er kid, a miting el kirel a odingel a mla er a Jehovah el mei me ngrullid el mo olecholt a bltikerreng me a ungil el omeruul. (Heb. 10:24, 25) Me ngike el oungerachel a kirel el mo ungil kltmokl el sebechel mo mesaod a tekoi el mo uchul a odanges el mo er a Jehovah e mo klungiolir tirke el kldibel. A lsebechel, e a re publisher el mo oldingel a kirir el melasem el mo teloi er aika el miting.

Aike el miting el kirel a odingel a obliil a diak domes el ua lak el sal klou a ultutelel er aike el kuk bebil er a miting er a ongdibel

5. (a) Ngera ngerechelel a odam el oungerachel a tekoi er a odingel a obliil el kirel a miting er a odingel? (b) Ngkirel ua ngerang a teletelel a odos a loungerachel er a miting el kirel a odingel?

⁵ Omengetmokl el Kirel Ngike el Oungerachel el Meruul: A chad a kirel el nguu a suobel el bo loltobed er ngii er a uchei me bo el sebechel el mo ungil kltmokl el otebedii. Tiang a osisiu ngii me a miting el kirel a odingel a obliil. Nguaisei, engdi a group er a odingel sel bo lekebetech er a kakerous el basio, e a rudam el oungerachel er a group er a ongdibel me a lechub e ngtirke el olengeseu er tir a mo oungerachel er a miting er a group er tir. Engdi a lsekum a ongdibel el rokir a mo dmak, e a odam el oungerachel a tekoi er a odingel a obliil a mo ngiltii a chad el mo oungerachel er a miting. A rebebil er a rudam el oungerachel a tekoi er a odingel a obliil a omesterir tirke el rokui el oungerachel a schedule me a lechub e te loia er a information board. A odam el oungerachel a tekoi er a odingel a obliil a kirel el mo ungil el melilt er a chad el mo oungerachel er a miting, e kirel medengei el kmo a klungiolel aika el miting a mo ultuil er a duch er a chad el olisechakl e omechobech a tekoi el bo losaod. A lsekum e ngdiak a remechuodel, remesiou er a ongdibel, me a lechub e ngodam el sebechel el oungerachel a lebebil er a taem, e a odam el oungerachel a tekoi er a odingel a obliil a kirel ngiltii a odos el sebechel el mo oungerachel er a miting.—Momes er a suobel el “Sel Sekum a Odos a Oungerachel.”

6. Ngera uchul me ngklou a ultutelel el kirel ngike el mo oungerachel er a miting er a odingel el mo ungil el kltmokl?

⁶ Sel dengai a suobel el bo doltobed er a Skuul el Kirel a Urerel a Dios me a lechub a Miting el Kirel a Berkel a Klumech, e kede omes el meklou a ultutelel me kede mo ungil el kutmokl. Te di mekesai er kid a mengiil el mo er sel taem el dengar er a omerolled el mo er a miting a omdasu a tekoi el bo lolekoi. Me tirke el oungerachel er a miting el kirel a odingel a omes a ngerechelir el dirrek el meklou a ultutelel. Chelecha el bo lekedeb a miting el kirel a odingel, e ngkmal klou a ultutelel a ungil el omengetmokl me bo el sebechel a miting el mo er ngii a lerellii e dirrek el mo merek er a ulterekokl el taem. A ungil el omengetmokl a dirrek el uldimukl er sel dolai a basio el domerk er a klumech er ngii er a uchei.

7. Ngera bebil er a tekoi el sebechel ngike el oungerachel el mo mesaod?

⁷ Aike el Mo Soadel: Ngkakerous a blekeradel er a bek el basio a uchul me a blak a rengul el mesiou a dirkak lerellii a outline el kirel a derta el miting er a odingel a obliil. A baks el “Sel Temel a Miting er a Odingel a Obliil, e Ngsebechem el Mesaod,” a ocholt a bebil er a rolel. Oumesingd er a taem e a miting a mo soadel el oeak a omesaod. E a lebebil er a taem, e ngsebechel el uldimukl er a ungil e kltmokl el olechotel me a lechub a video el mesaod el kirel a omesiunged el ngar er a jw.org. Me sel longetmokl er ngii el kirel a miting er a odingel, e ngike el oungerachel a kirel el melatk aike el tekoi el mo melisiich e kutmeklterir tirke el chad el mo oldingel er seikid el sils.

Sel longetmokl el kirel a miting er a odingel, e ngike el oungerachel a kirel el melatk aike el bo losaod el mo melisiich e mengetmokl er tirke el mo oldingel er seikid el sils

8. Ngera kmal osisecheklid el bo dosaod er ngii er a temel a miting er a odingel sel Sebadong me a Sandei?

⁸ El ua tiang, sel Sebadong, e a ruumesingd el publisher a merous er A Ongkerongel me a Awake! el babier. A rebetok er kid el oldingel sel Sebadong a diak doldingel a lemitil a sils, me ngmo meringel er kid el dobedebek aike el tekoi el bo dolekoi sel doldingel el dullasem er a temel a Omengull el Telungalek er kid. Sei a uchul, me ngungil a lsekum ngike el oungerachel a mo omelekl a bebil er a rolel a domuchel a cheldechedechad el ngar er a ikrel a Omesiunged el Kirel a Renged. Ngdirrek el sebeched el mesaod a bebil er a tekoi el dilubech er a beluad, ungil klebesei, me a lechub aike el ileakl el sils sel dorous er a magazine me a lechub a rolel a deluut el mo oldingel er a chad el ngilai a magazine. A lsekum e te ngar er ngii a rebebil el mla ousbech er a magazine el dorous er ngii, e ngike el oungerachel a sebechel el olengit er tir me louchais a bebil er a rolel me a lechub e te ouchais a ungil el tekoi el dilubech el mo er tir. Sel Sandei, e ngike el oungerachel a sebechel el melilt er a osisiu el tekoi el bo lousbech er ngii el kirel aike el babier el bo dorous er seikid el buil. Aike el babier el dousbech el mesuub, el ua Ungil Chais, Listen to God me a Biblia Olisechakl el babier a sebeched el merous er a ngii di el taem, me ngike el oungerachel a sebechel el ngosukid er a rolel a bo dorous aika el babier.

9. Ngera sebechel mo soadel sel Sebadong me a Sandei sel deteloi er a ileakl el ureor?

⁹ A lsekum a ongdibel a teloi er a ileakl el ureor sel Sebadong me a Sandei, e ngike el oungerachel a sebechel el mo mesaod er a rolel a dorous a beches el magazine el obengkel a invitation me a lechub a tract, me a lechub e ngsebechel el mesaod a tekoi el bo dolekoi a lsekum a chad a semeriar. A kuk ta er a tekoi el sebechel meruul er ngii a ouchais aike el tekoi el dilubech el ochotii a klungel a ultutelel aika el ileakl el ureor.

10, 11. Ngera uchul me a ungil el omengetmokl el loruul a re publisher a klou a ultutelel el kirel a miting er a odingel?

¹⁰ Omengetmokl el Kirir a Re Publisher el Meruul: A re publisher el mo er a miting er a odingel a ngar er ngii a ngerechelir el rullii tia el kldibel el mo er ngii a leketmeklii. Sel longetmokl er tir er a uchei el kirel a odingel, el locha sel temel a omengull el telungalek er tir, e ngmo er ngii a tekoi el sebechir el ouchais el mo er a rebebil er a re publisher. A ungil el omengetmokl a dirrek el uldimukl er a lolai a magazine me a babilenged er a uchei er a demei er a miting el kirel a odingel me bo el sebechir a rokui el chad el merael el mo er a basio el domerk er a klumech er ngii el diak bo loruul a kmung ngerang el mo omekmeoud er a odingel.

¹¹ Ngdirrek el klou a ultutelel a debo er a miting er a odingel er a uchei er a lomuchel. Ngkired el melasem el mo oltirakl a taem er a bek el temel a miting er a ongdibel. Nguaisei ngsebeched el mo mengesang er a rechad sel demeoud el mei er a miting er a odingel. Ngoeak a ngera el rolel? A odam el oungerachel a melebedebek a bebil er a tekoi er a uchei er a lomii er a rechad. A lsekum te di mekesai el publisher a ngar tia el miting, e nglocha mo oldurokl er a rokui el chad el mo er a basio el domerk er a klumech er ngii el bla luchelii. A lsekum a rebebil a di mirrael el mei er a miting er a odingel, e a basio el domerk er a klumech er ngii a cheroid, e nglocha mo melekoi er tirke el publisher el oumlai me te oltak er tir. A lsekum a basio el domerk er a klumech er ngii a klou a delengerenger er ngii, e nglocha mo melekoi er a rebebil el odam me te dmak el oureor el obengterir a rudos me a lechub e te oureor el kmeed er tir. A re publisher el smecher me a remechudelang a locha lolekoi er tir el mo oureor er a melemalt el basio me a lechub a blai el mekesai a stairs er ngii. A rebeches el publisher a locha kirir el oureor el obengterir tirke el ngar er ngii a duch er tir. Engdi a lsekum a re publisher a meoud el mei, e a mla meketmokl el tekoi a mo kirel el mengodech el mo oltirakl er tir. Nguaisei, a lebebil er a taem e ngmo er ngii a ungil el uchul me kede mo meoud. Engdi a lsekum e kede mo blechoel el di meoud, e nglocha ungil a di lekid el oker el kmo, ak meoud e le ngdiak a omereng el saul er ngak el kirel a miting er a odingel me a lechub e ngdiak kungil kltmokl er a uchei.

12. A lsekum ke blechoel el di kau el melilt a obo moruul er a odingel, e ngera ungil el bo molatk er ngii?

¹² A re publisher el mo oldingel a sebechir el di tir el melilt er a rechad el bo ledak el mo oldingel er a uchei er a lomuchel a miting, me a lechub e te mecherei a odam me ngmelilt er a rechad el mo oureor el obengterir. A lsekum kom blechoel el di kemiu el melilt er a rechad el mo obengkemiu el oldingel, e ngsebechiu el mo ua “lak a medechel el berrotel er a rengmiu” e bo moureor el obengterir a rekakerous el publisher er a bai di moureor el obengterir a osisiu el chad? (2 Ko. 6:11-13) Ngsebechel bebil er a taem e ko moureor el obengkel a beches el publisher me bo el sebechel lolengeriakl er a duch er ngii el olisechakl? (1 Ko. 10:24; 1 Ti. 4:13, 15) Bo mkerekikl el orrenges a ngii di el ulekrael el mngai, el uldimukl er sel basio el bo momuchel el oldingel er ngii. Sel bo el merek a miting, e lak molodech a mla meketmokl el tekoi e mereched el mo er a basio el domerk er a klumech er ngii.

13. A lsekum a rokui el chad el ngar er aika el miting a kerekikl el meruul a ngerechelir, e ngera el klungiaol a bo dengai er aika el miting?

¹³ A uriul er a odingel, e tirke el disaiplo el Jesus a ulemii er tir el mo oldingel a “liluut el mei el kmal dmeu a rengrir.” (Lk. 10:17) Ngulterekokl a rengud el kmo sel miting el lurruul er ngii a Jesus er a uchei er a lomuchel el mo omerk er a klumech a ngilsuterir el mo meduch er a ureor. Chelecha el sils, e a miting er a odingel a obliil a dirrek el kirel mo uchul a klungioled. A lsekum a rokui el ngar er aika el miting a kerekikl el meruul a ngerechelir, e aika el miting a mo melisiich, e mengetmokl, e omechobech a tekoi el doruul me bo el sebeched el churrengelii a urered el mo ungil el “ocholt el mor a rokui el chad.”—Mt. 24:14.

Sel Sekum a Odos a Oungerachel

A lsekum a odos a mo kirel el oungerachel er a miting er a odingel, e ngkirel el delekedek a bdelul e di dengchokl. Aike el bo losaod a di osisiu ngii me aike el blechoel losaod a odam. Ngdiak el kirel el ua lolisechakl er tirke el ngar er a miting, e ngbai sebechel el muchelii a cheldecheduch e olengit er a rechad me louchais a uldesuir e ledak el mesaod. A lsekum e ngolengit er a ta er a odos el mo meluluuch, e ngdirrek el kirel delekedek a bdelul. A lsekum a odam a me teloi er a miting er a uriul er a lomuchel, e a odos a mo olengit er ngii el mo merekui er a miting. A odam el oungerachel a tekoi er a odingel a obliil a kirel omtab a kakerous el blekeradel el sebechel duubech me lak bo luchul a mekngit el uldasu el kirel a odos. El ua tiang, ngsebechel a kmal kekerei el odam el ngar er a miting, engdi a odos a mo kirel oungerachel er a miting e le remechuodel a omdasu el kmo ngika el odam a dirkak el bo el sebechel el oungerachel a miting. Ngar er a chelsel a uai tia el blekeradel, e a odam el oungerachel a tekoi er a odingel a obliil a kirel louchais er tirka el mekekerei el odam el kmo ngar er ngii a odos el mo oungerachel er a miting, engdi tir a kirir el mo meluluuch a lsekum a remechuodel a omes el kmo ngsebechir. Me a lechub e ngsebechel el mo er ngii a odam el teloi er tir el diak el sebechel oungerachel er a miting me a lechub e ngdiak el sebechel meluluuch, e te di remechuodel a medengelii a uchul tia el tekoi. Me a remechuodel a diak bo louchais er tia el berrotel el tekoi, te di mo subedeterir a lullilt er tir el rudos el kmo ngkirir el oungerachel e meluluuch el kirir tirke el mo kldibel a lsekum ngika el odam a teloi er a miting. A remechuodel a dirrek el sebechir el ouchais er a odam er aike el sils el rudos a mo oungerachel er a miting el kirel a odingel.

Sel Temel a Miting er a Odingel a Obliil, e Ngsebechem el Mesaod:

A bebil er a rolel a domuchel a cheldechedechad el ngar er a Omesiunged el Kirel a Renged.
A video el mesaod el kirel a omesiunged el ngar er a jw.org.
A ta er a kired el meruul er ngii a ungil tekoi el dolekoi a doldingel, el ua uchelel a cheldechedechad, me a rolel a deluut el mo oldingel er a chad, me a lechub a omesodel a tenget a lsekum a rechad a kongei el melai a babilenged.
Bades el melisiich me a lechub e ngosisecheklid a tekoi el kirel a omesiunged.
A tekoi el dilubech el ngar er a beluad me a lechub e ngar er a babilenged el kirel a oldingel a obliil.
Tekoi el ngar er a suobel er a Omesiunged el Kirel a Renged.
Tekoi el mla er aike el dirk mlo merek el Miting el Kirel a Berkel a Klumech.
Tekoi el kirel a omesiunged el mengai er A Ongkerongel.
Tekoi el kirel a omesiunged el mlengai er a babier el ua Ministry School me a “Come Be My Follower.”
A suobel el ngar er a jw.org el sebeched el ousbech er a omesiunged.
A suobel el ngar er a chelsel tia el dirk milengodech el oidel a New World Translation el sebeched el ousbech el ngar er a omesiunged.
Rolel a domuchel a cheldechedechad el obengkel a chad er a basio el domerk er a klumech er ngii, el diak loumerang er a Dios, e oumerang el kmo kede mla er a mongkii el mei, chad er a Hindu, me a lechub e te Buddhist.
Rolel a donger er a rechad el merrob a bek el bedengel a cheldecheduch.
Rolel a dolengeseu er ngike el doldingel el obengkel el mo meduch el mengedecheduch er a medal a tuangel.
Rolel a dongedecheduch er a chad el melekoi er a ngodech el omelekoi.
Rolel a doruul er a ileakl el teletelel a omesiunged el bo leteloi er ngii a rebebil, el ua ureor el osiik er a rechad er a kakerous el beluu, ousioning el ousbech a dengua, ousioning er a buai, lmuut el mo oldingel er tirke el semeriar, me a lechub a rechad el dosuub a Biblia el obengterir.
A uleklatk el kirel a ulekerreuil a bedenged, ngeldechel a sils me a taem sel doldingel, ungil blekeradel, melemalt el uldasu el kirir a rebebil, me a bebil er a osisiu el tekoi.