Lmuut el Mo Ungil a Duch er Kid el Ngar er a Omesiunged—Molisechakl er a Remesuub er a Biblia el Mo Meduch el Mesuub el Di Tir el Tang

A Uchul Me Ngklou a Ultutelel: A remesuub er a Biblia a kirir el omekeek er a uldesuir me a rengrir er a betok el tekoi el diak el di uchetemel a osisechakl er a Tekingel a Dios me bo el sebechir el melisiich er a deleuill er tir me a Dios. (Heb. 5:12–6:1) A omesubel a Biblia a ousbech er a klou el ureor. E tiang a uldimukl er sel dolechel a klemedengei er kid er a tekoi e domtab er a rolel e ngsebeched el ousbech er ngii er a chelsel a klengar er kid. (Osi. 2:1-6) Me sel losuub el di tir el meruul a research er tir e ngmo ngosuterir el mo onger a ker er a Biblia el ousbech aike el babilenged. Me a blakerreng er tir el mo oltaut aike el tekoi el losuub a mo ngosuterir el mo sebechir el outekangel a ringel el bo lechelebangel sel bo el Kristiano.—Lk. 6:47, 48.

Rolel a Moruul er Ngii:

Molisiich er a klungel a ultutelel a losiik er a ngelsuil a Jehovah el okiu a nglunguuch er a uchei er a losuub er a Biblia.—Jn. 14:26; 1 Ko. 2:10.
Ngar er a uchelel a omesubiu, e molisiich er a chad el mosuub el lobengkel me longetmokl er ngii el kirel a omesubiu. Mochotii a babilengem, e mosisecheklii el mo meduch el underline me a lechub e ng highlight aike el meklou a ultutelel el tekoi.
Molisiich er ngii me bo longer el di olab a di tekingel. Lak mrellii a omesubiu me bo luchul e ngmo seselk a rengul e le ngii el di onger aike el llechukl er a babier el mosuub er ngii.
Molisiich er ngii el mo menguiu er a Tekingel a Dios er a bek el sils. Mochotii a bldeklel a omengiuel a Biblia el ngar er a jw.org, el olecholt er a ungil rolel a loruul er tiang. A omengiuel a Biblia er a bek el sils a ousbech a ducherreng, engdi ngmo uchul a klungioled a doruul er tiang.—Psa. 1:2, 3.
Mochotii er ngii a rolel e ngsebechel el ousbech er a Watchtower Library me a lechub e ng Watchtower ONLINE LIBRARY el mo osiik a nger er ngii el kirel a ker er a Biblia. Mngesuir el mo meduch el omes a abbreviation er aike el babilenged el deblechoel el ousbech er a miting er a ongdibel.

Molasem er Tiang er Chelecha el Buil:

Ngar er a ulebengelel a bek el suobel me a lechub e ngbliongel, e moker er a chad el mosuub el obengkel me lochotii a uldesuel el kirel aike el tekoi el lesiluub. Engdi a lsekum e ngdiak a chad el mosuub el obengkel, e molasem el di kau el rullii a kedeb el omesodem el kirel a cheldecheduch er a Biblia me a lechub e ngparakurab er a Ongkerongel el mo ngosukau el mo ungil el omtab a tekoi el monguiu.