Moltirakl a Kerebai er a Reprofet—Habakuk
1. Ngera uchul me ngsebeched el mo uai a profet el Habakuk?
1 Chelecha el dechelebangel a betok el mekngit el omeruul el ngar tia el beluulechad, e kede locha mo omdasu el uai a Habakuk el uleker er a Jehovah el kmo: “Ng kol ngera uchul me ke rullak el mes a ua isel chelebuul ma mekngit? A omelemall ma mekngit el bekeu el omeruul a di iliuekl er ngak.” (Hab. 1:3; 2 Ti. 3:1, 13) A dolebedebek er a klemechel me a ungil kerebil a Habakuk a sebechel ngosukid el mo melemolem el outekangel er chelecha el dongiil er a sils er a kerrekerilel a Jehovah.—2 Pe. 3:7.
2. Ngmekerang a dochotii el kmo kede oumerang er a Dios er chelecha el sils?
2 Bo Moumerang er a Dios: A Habakuk a dimlak bo loberaod a rengul er aike el mekngit el blekeradel el mle iliuekl er ngii, e ngbai di millemolem el melisiich er a klaumerang er ngii e mle blak a rengul. (Hab. 2:1) A Jehovah a ulterekeklii el mo er a Habakuk el kmo a Tekingel a mo tmaut er sel telutk el temel e “tirkel melemalt a mo ngar ele ng blak a rengrir er a Dios.” (Hab. 2:2-4) E tiang ngera belkul el kired a Rekristiano el kiei er a taem er a ulebongel? Ngkmal klou a ultutelel a bo lulterekokl a rengud el kmo a ulebongel a mei, er a bai di bo dodengei el kmo ngmei er a oingerang. A klaumerang er kid a rullid el di klekar e dirrek el nguu a omesiunged el mo kot el klou a ultutelel el tekoi er a chelsel a klengar er kid.—Heb. 10:38, 39.
3. Ngera uchul me ngkired el lomelemii a deuil a rengud sel dosiou er a Jehovah?
3 Moldeu er a Rengum er a Jehovah: A Kok er a Makok sel bo loldechelakl er a rechedal a Jehovah, e a klaumerang er kid a mo measem. (Ese. 38:2, 10-12) A ultok a mo uchul a ringel el mo er a rokui el chad, el uldimukl er tirke el mo kats er a mekemad. Ngmo ngesonges a kall e kede dirrek el locha mo oriid a klokled. Ngdirrek a rolel a klengar er a rechad a mo meringel. Kede mo mekerang sel bo leduubech a chouaika el meringel el tekoi? A Habakuk a mle medengei el kmo ngmo er ngii a ringel, me ngtilbir a rengul el mo lomelemii a deuil a rengul sel losiou er a Jehovah. (Hab. 3:16-19) ‘A deurreng el le beskid a RUBAK’ a dirrek el mo ngosukid el outekangel a ringel el bo dechelebangel er a ngar medad el klebesei.—Neh. 8:10; Heb. 12:2.
4. Ngmo dmeu a rengud el kirel a ngerang er chelechang me a dirrek el kirel a ngar medad el klebesei?
4 Tirke el bo lolsobel er tir a Jehovah er sel merael mei el sils er a kerrekerilel a mo melemolem el mosisechakl er sel soal a Dios el kirel a klengar. (Hab. 2:14) Tirke el mo mekiis a dirrek el mo mesuub el kirel a Jehovah. Me chelechang e bo dousbech a bek el techall el mo mengedecheduch er a rechad el kirel a Jehovah me a mengasireng el urerel!—Psa. 34:1; 71:17.