Bo Mkerekikl Me Lak Moruul Aika el Tekoi Sel Mosuub el Obengkel a Chad

Betok a Tekoi el Dosaod: Lak momdasu el kmo ngkirem el smaod a rokui el tekoi. A Jesus a uluusbech a ker el ngosuterir a rechad el mo medengelii a tekoi el losaod er ngii. (Mt 17:24-27) A usbechel a ker a dirrek el rullii a chad el mo semeriar el mesuub, e ngosukau el mo medengelii a uldesuel me a klaumerang er ngii. (be-E 253 par. 3-4) Me sel moker a ker, e bo el klou a rengum el mengiil er a nger er a chad. A lsekum a chad a cheleuid a nger er ngii, e moker a lmuut el bebil er a ker el ngosuir el mo medengelii a melemalt el nger er a bai di mereched el ouchais er a nger er a ker. (be-E 238 par. 1-2) Mongedecheduch er tir er a rolel e ngsebechir el mo omtab a beches el tekoi el mosaod.​—be-E 230 par. 4.

Chetituokel a Omesoded: Lak mosaod a rokui el tekoi el modengei el kirel a suobel. (Jn 16:12) E bai mosaod er sel klou a ultutelel el tekoi er a parakurab. (be-E 226 par. 4-5) A komakai el tekoi a sebechel rullii el mo meringel er a chad el mo medengei aike el meklou a ultutelel el tekoi. (be-E 235 par. 3) Me a chad sel bla bo lodengelii sel klou a ultutelel el tekoi er a parakurab, e molemolem el mo er sel ongingil el parakurab.

Di Merekui a Suobel: A moktek er kid a soad el rutechii a rengul a chad, el diak di dorekui a suobel. (Lk 24:32) Mousbech er a klisichel a Tekingel a Dios el oeak sel mosaod aike el meklou a ultutelel el bades el ngar er a derta el suobel. (2Ko 10:4; Heb 4:12; be-E 144 par. 1-3) E mousbech a beot el okesiu. (be-E 245 par. 2-4) Sel mosaod er a suobel, e molatk er a omelsemai el lechelebangel me a klaumerang er ngii. Moker a chouaika el ker el kmo: “Ngua ngera uldesuem el kirel a tekoi el mosuub er ngii?” “Tiang ngera ngosisecheklid el kirel a Jehovah?” “Ngera klungiolel a omoltirakl er tia el omellach?”​—be-E 238 par. 3-5; 259 par. 1.