A Tekingel a Dios Ngmla Mengodech?

A rebebil a melatk el kmo a Tekingel a Dios ngmla mengodech me a lechub e ngdiak. A apostol Petrus a millekoi el kmo a tekingel a Dios a “di melemolem el diak a ulebengelel.” (1 Petrus 1:25) Me ngmekera e mo ulterekokl a rengud el kmo a telbilel a Dios a melemalt a omelechesel?

A Dios a ngar ngii a klisichel el omekerreu er a Tekingel me ngdiak lemetemall. A irechar er a loluches er a chedaol babier e te mle kerekikl lomechur a derta el llechukl me lak ledechel, e lengodech, el kesadel a tekoi er ngii. Me nguaisei, engdi ngdiak lemecherrungel, me ngmla er ngii a bebil el cheleuid el tekoi el liluches.

KEDE MEKERA MEDENGEI EL KMO A CHEDAOL LLECHUKL ER CHELECHA EL TAEM A NGAR NGII A KLEMECHEL A DIOS?

Ngar ngii a betok el telael el utsusi er a manuscript er a Chedaol Llechukl. Me a lsekum ngar ngii a klekakerous er ngii, e ngsebechem el lomekesiu er ngii me aike el bebil er a utsusi me bo modengei el kmo ngera melemalt me a diak.​—A lsoam el mo medengei a betok, e momes er a “Has the Bible Been Changed or Tampered With?” el ngar er a jw.org.

El ua tiang, aike el babier er a irechar el Dead Sea Scrolls, a lebiltik tirke el kiei er a ii er a bita er a Ulekoad el Daob er a 1947. Aika el babier a ngar ngii a tedebechel a Chedaol Llechukl er ngii, el milluches er a betok er a 2,000 el rak er a mla me mong. A rechellimosk a ulemekesiu aika el manuscript me a Chedaol Llechukl el dolab er chelecha el taem. E ngera te miltik?

Te mle kerekikl el merriter e miltik el kmo a tekoi el ngar er a Chedaol Llechukl el dolab er chelecha el taem a kmal di uaike el di mla llechukl.a Me ngsebechel mo ulterekokl a rengud el kmo a Dios a kmal mle ungil lomekerreu er a Chedaol Tekingel el kired er chelecha el taem.

Me ngsebeched el menguiu er a Tekingel a Dios el oba ulterekokl el reng e oumerang el kmo ngmelemalt a omelechesel. Chelechang e me bo dosaod aike el sebeched el suub el kirel a Dios er a reprofet er ngii.