“A Paulus [a] . . . Mirreng a Sulel a Dios e Kmal Mlo Mesisiich a Rengul”

A ongdibel er a Rom er a lerrenges el kmo a Paulus a merekung, e a rudam a mlara omerael el bekord el 40 mael (64 km) el mo olsiuekl er ngii. Me aike el omerellir ngera ngrirellii er a Paulus? “A Paulus er a leseterir e ng mirreng a sulel a Dios e kmal mlo mesisiich a rengul.” (Rel 28:15) Me alta Paulus a ble lodengelii a rechad el kmo nguleldingel a ongdibel el melisiich er tir, engdi chelsel sel taem er a lekelebus, e ngii a bai uluusbech a omelisiich.​—2Ko 13:10.

Me chelecha el taem e a rudam el oldingel a ongdibel a oldingel a ongdibel el melisiich er a rudam me a rudos. Te di ua rokui el chedal a Dios el lebebil er a taem e ngmo mesaul a bedengir, e mo suebek a rengrir e mechitechut a rengrir. Me sel lluut el mo oldingel a ongdibel er kau choua tirkaikid el odam me a rebecherir, e ngera sebechem el meruul el mo ngosuterir el mo oba blekeu me bo el sebeched el “dul kasisiich”?​—Rom 1:11, 12, BT.

• 

  Bora ike el miting er a berkel a klumech. A rudam el oldingel a ongdibel a ngmai omelisiich a lsekum a re publisher a mo meruul a omelodech er a klengar er tir me bo el sebechir el ngmai a mui el klungiolir er sel ileakl el sandei er a temel odngelir. (1Th 1:2, 3; 2:20) Molasem el mo auxiliary pioneer er seikid el buil er a temel odngelir. Me kau, ngsebechem el olengit el mo oureor el obengkel ngii me a bechil, me a lechub e ke nguu a ta er tir el mo omes er a chad el mesuub a Biblia el obengkem? Ngkmal dmeu a rengrir el oureor el obengterir a rekakerous el chad el uldimukl er tirke el beches me tirke el lomdasu el kmo te diak lemeduch lomerk er a klumech.

• 

  Bo bekururau. Kau, ngsebechem el kongei er tir el mo kiei lobengkem, me a lechub e ke omeka er tir? Tia ochotii el mo er tir me a rebecherir el kmo ngbetik a rengum er tir. Te diak longerechir er kau el mo meruul a meklou el tekoi.​—Lk 10:38-42.

• 

  Morrenges e moltaut a ulekrael me a omellach er ngii. A rudam el oldingel a ongdibel a ngosukid el mo mesa rolel e ngsebeched el mo olengeriakl er a omesiunged el mora Jehovah. Me a lebebil er a taem, e te locha mo meskid a mesisiich el omellach. (1Ko 5:1-5) Me ngmo uchul a deuil a rengrir sel dolengesenges e doltirakl aike ledung.​—Heb 13:17.

• 

  Molecholt a omereng el saul. Mouchais er a odam el oldingel a ongdibel me a bechil a rolel e a meringel el urerir a mlo uchul a klungiolem. Ngsebechem el meruul er tiang lokiu sel bo mongedecheduch er tir me a lechub ke luchesii a babier el mo er tir.​—Kol. 3:15.