Mongoit a Temem el Obengterir Tirke el Betik a Rengrir er a Jehovah

Ngera uchul me ngkired el mengoit a taem el obengterir tirke el betik a rengrir er a Jehovah? E le rechad el dongoit a temed el obengterir a sebechir el ngosukid el mo meruul a melemalt el tekoi me a lechub e te melisiich er kid el mo meruul a mekngit. (Osi 13:20) El ua tiang, a King Joas a “mirruul a llemalt er medal a RUBAK” er a longoit a temel el obengkel a Ngarbab el Prist el Jehoiada. (2Kr 24:2) Engdi uriul er a lemad a Jehoiada, e a Joas a mlo diak longull er a Jehovah e le ngmekngit el klausechelei er ngii a uchul.​—2Kr 24:17-19.

Sera taem er a rekot el Kristiano, e a apostol Paulus a ulemekesiu er a ongdibel er a Rekristiano el mora “klou el blai” me a rechad er a ongdibel el mora “blil a klalo” me a lechub e ngklekedall er a blai. Me ngsebeched el melemolem el mo ua ‘blil a klalo el ileakl a usbeched’ sel lak domak a kmes el deleuill er kid el obengkel a ngii di el chad, el mo lmuut er a chedal a telungalek er kid me a lechub e ngchad er a ongdibel, el meruul a tekoi el diak lodeuir a rengul a Jehovah. (2Ti 2:20, 21) Me bo el sebeched el melemolem el mo sechelirir tirke el betik a rengrir er a Jehovah e dirrek el melisiich er kid el mo mesiou er ngii.

MOMES ER A VIDEO EL LEARN TO REJECT BAD ASSOCIATION, E MONGER AIKA EL KER:

• Ngera bebil er a rolel e ngsebeched el mo teloi a mekngit el klausechelei?

• Ngar aike el kakerous el blekeradel el dilubech, e ngera ngilsuterir tirke el tedei el Kristiano el mo diak el teloi a mekngit el klausechelei?

• Ngera el omellach er a Biblia a sebechel ngosukau el mo ungil melilt er a resechelim?