A Ker El Mla Er A Remenguiu
Aika el blekeradel el llechukl er a Galatia 5:22, 23, BT, ngdi ikaikid a “rodech ra Reng”?
Aika el bades a omasech a kltiu el blekerdelir a Rekristiano el kmo: “A rodech ra Reng a bltikerreng, ma deourreng, ma budech, ma kllourreng, ma blekokuii, ma ungilreng, ma blakerreng, ma delemedemek, ma chomengerem.” Engdi ngdiak el kired el omdasu el kmo, ngdi ikaikid el blekeradel a sebechel a chedaol reng er a Dios el ngosukid el mo omekeroul.
Ka momtab a tekingel a apostol Paulus el ngar er a uleakuchei el bades: “A urerel a klechad a di bleketakl, el deleboes, ma ngellengalek, ma klekad, ma omeluluuch el bleob el chelid, ma olai, ma klaucherarou, ma klakoad, ma blechelechelingaorreng, ma ngasechereng, ma cheldesongel, ma blekilekeakl, ma klautok ma klekakeakl, ma chelechei, ma cheltelaol er a rrom, ma klaiueong, ma ikel ua ingii.” (Gal. 5:19-21) Me a Paulus a mle sebechel omasech a kuk bebil er a blekeradel el kmo ng “urerel a klechad” el uaike el losaod a Kolose 3:5. Me ngdi osisiu, sera bo el merek el omasech a etiu el ungil blekeradel, e ngdilu el kmo: “Me ngdiak a llach el merrob iaikang.” Me a Paulus a dimlak lomasech aike el rokui el ungil blekeradel el sebechel a chedaol reng el ngosukid el omekeroul.
E tiang a mo bleketakl sel domekesiu er ngii el mo er aike el lulluches a Paulus el mora ongdibel er a Efesus el kmo: “Llomes a chourodech a bek lungil, ma llemalt, ma klemerang.” (Efe. 5:8, 9, BT) Me alta “ungilreng” el obengkel a llemalt me a klemerang a uldimukl er a rodech er a “llomes,” engdi ngdirrek el uldimukl er a “rodech ra Reng.”
A Paulus a dirrek el milengelechel er a Timothy el mo ‘oltoir ra llemalt, ma chomeluu ra Dios, ma kloumerang, ma bltikerreng, ma ducherreng, ma delemedemek,’ el elolem el ungil blekeradel. (1 Ti. 6:11, BT) Me nguaisei, ngdi kldei er aikang el bltikerreng, klaumerang me a lechub e ngblakerreng, me a delemedemek a uldimukl er a “rodech ra Reng.” Engdi a Timothy a mle medengei el kmo ngousbech er a ngelsuil a chedaol reng el mo omekeroul aike el kuk bebil er a blekeradel el ua llemalt, omeluu er a Dios, me a ducherreng.—Momekesiu er a Kolose 3:12; 2 Petrus 1:5-7.
Me a leuaisei, e a Galatia 5:22, 23, BT a diak lomasech a rokui el blekeradel el kirir a Rekristiano el mo omekeroul. A chedaol reng er a Dios a sebechel ngosukid el omekeroul aike el kltiu el blekeradel el rullii a “rodech ra Reng.” Engdi ngar ngii a lmuut el bebil er a blekeradel el dousbech me demukeroul el mo mesisiich el Kristiano e mo ‘oubail er ngikel beches el chad, el ulebeob el okesiul a Dios ra meral llemalt ma cheledaol.’—Efe. 4:24, BT.