A Beluulechad Ngmo Nguemed?

Ngera Diak el Bo Lengemed?

RECHAD

Aike el lolekoi a Biblia: A Dios a “dimlak le rellii [a beluulechad] el di bechachau el beluu, ng bai basio el kirir a re chad el kiei er ngii.”​—ISAIA 45:18.

BELUULECHAD

Aike el lolekoi a Biblia: “A telecheroll a memochang ma beches el telecheroll a mermang, e a beluulchad a di ua isei el mo cherechar.”​—OLISECHAKL 1:4.

A BELKUL TIANG: A doltirakl er a Biblia, e a beluulechad a kmal diak el bo lengemed e di mo blechoel ngar ngii a rechad el kiei er ngii. Me a leuaisei, e ngera belkul a ulebongel er a beluulechad?

MOLATK ER TIANG: A Biblia omekesiu er a ulebongel er a beluulechad el mora tekoi el dilubech er a taem er a Noah. Seikid el taem e a beluulechad a “mio er a mekngit.” (Genesis 6:13) Me nguaisei engdi a Noah a mle melemalt el chad. Me a Dios a ulsebelii a Noah me a telungalek er ngii engdi ngulekngemedeterir a remekngit el chad lokiu a ieleb. A Biblia melekoi el kirel seikid el taem el kmo: “A belulechad er isel taem a mleeleb ra ralm el nguemed.” (2 Petrus 3:6, BT) Tia mle ulebongel er seikid el beluulechad. Me nguaisei engdi ngngera ngilemed? Ngdimlak el beluulechad ngdi ngtirke el mekngit el ngar er a beluulechad. Me a Biblia sel losaod er a ulebongel er a beluulechad e ngdiak losaod er a okngemedel tia el chutem. Ngbai mesaod er a okngemedir a remekngit el chad me a okngemedel tia el mekngit el blekeradel.

Ngera Mo Nguemed?

MONDAI ME A DELENGERENGER

Aike el lolekoi a Biblia: “Ngdi telkib kung, e a re dengerenger a mo dibus; ke mo osiik er tir, ngdi mo diak ke betik er tir; ngdi tirkel medemedemek a mo ungilbesrir el kiei el ngar a beluu el ungil a rengrir er a cherrungel budech.”​—PSALM 37:10, 11.

A BELKUL TIANG: A Ieleb er a taem er a Noah a dimlak lokngemedii a delengerenger. Uriul er a Ieleb e a remekngit el chad a liluut el mo omekringel er a klengar er a rokui el chad. Engdi ngdi kmedung e a Dios a mo okngemedii a delengerenger. Ngdi uaike el lolekoi ngike el milluches er a psalm: “A re dengerenger a mo dibus.” A Dios a mo okngemedii loeak a Rengedel el ngii a kabelment er ngii el ngar er a eanged el mo mengedereder er a beluulechad.

MOLATK ER TIANG: Tirke el chad el mengedereder er chelechang te mo kongei er a Rengedel a Dios? A Biblia kmo ngdiak bo loruul uaisei. Te mo omtok er a Rengedel a Dios. (Psalm 2:2) Ngera mo rsel? A Rengedel a Dios a mo okngemed a rokui el kabelment er a rechad “e ngii a mo medechel el mo cherechar.” (Daniel 2:44) Engdi ngera uchul me a kabelment er a rechad a mo nguemed?

USBECHALL​—Ulebengelel a Omengederederir a Rechad

Aike el lolekoi a Biblia: “Diak a chad el sebechel el chodereder a blekeklel.”​—JEREMIA 10:23.

A BELKUL TIANG: A rechad a dimlak lobeob el sebechir el di tir el mengedereder er tir. Ngkmal diak el sebechir el mo ungil lomekrael er a rechad e mesmechokl a mondai er tir.

MOLATK ER TIANG: A Britannica Academic a melekoi el kmo a derta el kabelment er a klechad a diak el sebechel “sumechokl a cherrouel a beluulechad el rokir el chelebuul, klengerenger, rakt, telemellel a beluu, me a mekemad me a kuk bebil rolel a koadelchad.” Ngmelemolem el melekoi el kmo: “A rebebil . . . oumera el kmo a di ta el rolel e ngmesmechokl aika el mondai a lsekum e ngdi mo chimo kabelment er a beluulechad el mengedereder.” Nguaisei ngmo lmuut me a lsekum a rokui el kabelment er a beluulechad a mo dmak e mengedereder engdi remengedereder a diak el mecherrungel el chad e diak a klisichir er aika el mondai el dosaod. Ngdi ta el Rengedel a Dios a ngar ngii a klisichel el sumechokl el mo diak a rokui el mondai er tia el beluulechad.

Me a doltirakl er a Biblia e a ulebongel er a beluulechad el ngii a okngemedel tia el mekngit el blekeradel er a beluulechad, a tekoi el diak lemedakt er ngii a rungil chad. Ngbai ungil chais e le tia el mekngit el beluulechad a mo mutechei er a beches el blekeradel er a Dios!

Tia ngmo duubech er oingerang? A ongingil suobel a mo mesaod er a nger er a Biblia el kirel tiang.