Ngera Sebechel Ngosukid Loterekeklii a Ungil Klengar el Kired er a Ngar Medad?

Ngua dulsaod er aike el uleak uchei el suobel, a rechad a mla melasem losiik er a ungil klengar loeak a klaumerang er tir er a mesisiich el reng, ngarbab el skuul, kerruul, me sel bo lungil chad. Engdi aika el tekoi a di ua cheleuid el map el diak el sebechel mekrolid el mo er sel soad el mo er ngii. Tiang ngbelkul a kmo ngdiak a sebechel ngosukid loterekeklii a ungil klengar el kired er a ngar medad? Ngkmal diak leuaisei!

ULEKRAEL EL MLA ER BAB EL MEI

Sel doruul a omelilt e kede blechoel lolengit a ulekrael er a chad el klou e betok a klemedengei er ngii er kid. Ngdi osisiu, ngsebeched el ngmai a ulekrael el kirel a ungil klengar er a ngar medad er ngike el kmal chudelang e kot el betok a klemedengei er ngii er kid. A ulekrael er ngii a dengai er a cheldellel a betok el chedaol el llechukl el melluches er a bekord el 3,500 el rak er a mla me mong. Tia el babier a okedongall el Biblia.

Ngera uchul me ngsebechem loumerang er a Biblia? E le ngike el milluches er ngii a ngike el kot el chuodel e mellomes a rengul el Chad el ngar. Ngika losaod er ngii el kmo ng “ngikel mle ngar er a irechar el mei” el ‘diak a uchelel el diak a ulebengelel.’ (Daniel 7:9; Psalm 90:2) Ngika “milebii a eanged; ng ngii a Dios! Ng mirruul er a beluulchad.” (Isaia 45:18) Ngouchais er kid el kmo a ngklel a Jehovah.—Exodus 3:14, 15, footnote.

A Biblia a diak longetukel er a rechad e ledu el kmo ngngar ngii a siukang me a rechad el kuk ungil er a rebebil, e le tia babilengel Ngike el ulemeob er a rokui el chad. A omellach er ngii a blechoel el oureor e a rechad er a betok el kakerous el beluu a mla ngmai a klungiolir er ngii. Ngmla moiuid el mo betok el omelekoi e ngii sel kot el betok a omerusel el babier er a beluulechad.a Tia belkul a kmo a rechad a kmal sebechir el mo medengelii a Biblia e mukrael er ngii. Tia kmal loltirakl aike el lolekoi a Biblia el kmo:

“A Dios a meral di osisiu er a rengul a re bek el chad. Ma chad er a ngii di le beluu el mengdekudel er ngii e meruul a melemalt a diak bo le chitii.”—RELLIR 10:34, 35.

Ngdi ua betik a rengul el chedam me a chedil el omesterir a rengelekir a ulekrael, a Jehovah el Dios a betik a rengul el Chedam el omeskid a ngeso loeak a Tekingel el Biblia. (2 Timothy 3:16) Ngkmal sebeched el oumerang er a Tekingel e le ngii a milebid e medengelii a rolel a klengar el kot lungil el kired.

ULEKRAEL EL SEBECHED EL ULTUIL

Ngsebeched loumera el ultuil er a Biblia el kirel a ulekrael er a klengar er a ngar medad e le bekord el 2,000 el rak er a mla me mong, e ngulemlaoch a mo duubech me a mo blekerdelir a rechad er chelecha el taem el ngii a kmal melemalt a otutel.

MO DUUBECH

“A meklou el beluu a mo kaumekemad; ma renged a mo kaodechelakl. E mor ngii er ker me ker a kdekudel el desiu, ma bosech, ma meringel el rakt.”—LUKAS 21:10, 11.

BLEKERADEL

“Ng mo medbedubech a ikel mor ngii a ringel er ngii sel bo lekeed a ulebongel er a beluulchad. Ele re chad a di mo omdasu er a di tir, e di sorir a udoud, e di oumead er tir e ngarbab a rengrir; te mo mekngit a ngerir el mor a re chad, e diak lorrenges a tekingir a re demerir ma re derrir, e diak loreng a saul, ma diak le sorir el melatk er a chelid. Ng mekngit omerellir el mor a re chad, e diak lousubes a telemellir a re chad; toltuub er a re chad, e mekngit a blekerdelir, e bekeu el sorir el omekcharm er a re chad, e ouketui a ungil tekoi. Te cheblad, e meterkakl el diak lomekerreu, e belkuuk er a kldidairreng, e kuk sorir a tametereng el ngar uchei er a Dios.” —2 TIMOTHY 3:1-4.

Ngera ke mo melatk sel mesa el kmo alta Biblia a milluches er a kmal irechar engdi ngkmal melemalt a ulochel el kirel chelecha el taem? Ke locha mo kongei a tekingel a Leung el chad er a Hong Kong el kmo: “A ulaoch er a Biblia milluches er a kmal irechar. Ngkmal diak el sebechir a redi chad el omlaoch aika el tekoi el kmal melemalt a otutel. Ngike el milskid a Biblia a lmuut el kmal ngarbab er kid.”

Ngbetok el dart el ulaoch er a Biblia a mla tmaut.b Tia ochotii el kmo a Biblia a mera el Tekingel a Dios. A Jehovah a kmo: “Ng di ngak el tang a Dios, e diak a ngodech el ua ingak. Ngar sel kmal uchelel e ak uluuchais er a mo rsel.” (Isaia 46:9, 10) Me ngkmal sebechem lultuil aike el lolekoi a Biblia el kirel a ngar medad.

ULEKRAEL EL MO UCHUL A KLUNGIOLEM ER CHELECHANG ME A DIRREK EL MO CHERECHAR

Ngmo uchul a klungiolem sel moltirakl a ulekrael el ngar er a Chedaol Llechukl. Molatk a bebil rolel.

NGMO TABESUL A OSENGED EL KIREL A UDOUD ME A UREOR

“Ngdi bai ungil er a chad a lak a kmal ngera er ngii e le budech a rengul er a le mechesang erebital chimal el di oltoir er a eolt.”—OLISECHAKL 4:6.

NGMO UNGIL A KLENGAR ER A TELUNGALEK

“A re bek el sechal a kirir el betik a rengrir er a re becherir el di ua le tir, ma re bek el redil a kmal kirir el mengull er a re becherir.”—EFESUS 5:33.

NGMO SEBECHED EL OBENGTERIR A REBEBIL

“Lak lochedechudel a rengum, e lak lolengasech a rengum! Lak el sebek a rengum, e ng diak a ngeral ungil el le rellii er kau.”—PSALM 37:8.

A omoltaut aike el lolekoi a Biblia e ngmo uchul a klungiolem er chelechang e ngdirrek el mo uchul a ungil klengar er a ngar medam. Ngar er a Tekingel a Dios e kede metik a telbilel el kirel a ungil klengar er a ngar medad, el ika el tekoi a uldimukl er ngii

BUDECH ME A OSEBECHAKL

“Mo ungilbesrir el kiei el ngar a beluu el ungil a rengrir er a cherrungel budech.”—PSALM 37:11.

BLAI ME A KALL EL KIRIR A ROKUI EL CHAD

“A re chad a mo toketek a blai e mo kiei er ngii . . . Te mo dualem a sers er a bilong, e mo dmeu a rengrir er a bilong.”—ISAIA 65:21, 22.

MO DIAK A SECHER ME A KODALL

“Ng dikea lluut el mor ngii a kodall, e mo diak a klengiterreng, ma langel, ma ringel.”—OCHOLT 21:4.

Ngera kirem el meruul er ngii el oterekeklii el kmo ke mo nguu tia el ungil klengar er a ngar medad? Ongingil el suobel a mo mesaod er tiang.

a A lsoam el mo medengei a komakai el omesodel a oidel me a omerusel a Biblia e bora www.jw.org e momes er cheungel a BIBLE TEACHINGS > HISTORY & THE BIBLE.

b A lsoam a komakai el omesaod e momes er a book lultebedii a Resioning er a Jehovah el Ngerang Mera el Lolisechakl a Biblia? er a 2 el bliongel. Ngsebechem el metik er tia el babier er a www.jw.org/pau. Momes er cheungel AIKE EL NGAR ER NGII > BOOK ME A BROCHURE.