Ngkmal Sebechem el Ngiltii a Ungil Klengar el Kirem

Bekord el 3,500 el rak er a mla me mong e a Jehovah el Dios a uluuchais er tirke el milengull er ngii aike el kirir el meruul a lsorir loterekeklii a ungil klengar el kirir er a ngar medad. Ngdilu er tir el kmo: “Ngak er chelechang a omeskemiu omelilt er a delongelel a klengar ma kodall, ma delongelel a klengeltengetel a Dios ma dellebeklel a Dios . . . Mngiltii a klengar.”​—Duteronomi 30:19.

Tirka mle kirir el rullii a ungil el omelilt a lsorir el mo ungil a klengar er tir. Ngdi osisiu el kired er chelecha el taem. A Biblia a ouchais er a rolel e ngsebeched el meruul er tiang: “Bo le betik a rengmiu er a RUBAK el Dios er kemiu e molengesenges er ngii.”​—Duteronomi 30:20.

NGMEKERA BO LEBETIK A RENGUD ER A JEHOVAH E DOLENGESENGES ER NGII?

MOSUUB ER A BIBLIA: A bo lebetik a rengum er a Jehovah e ngkirem el kot e ke mesuub el kirel er a Biblia. Sel moruul el uaisei e ke mo mesa el kmo ngika kmal betik a rengul el Dios el kmal soal a ungil kirem. Ngmengemedaol er kau el mo meluluuch el mo er ngii “ele ng kerekikl el omekerreu er [kau].” (1 Petrus 5:7) A Biblia tibir el kmo a omolasem el mo medengelii e ngmo ‘olekeed er ngii er kau.’​—Jakobus 4:8.

MOLTAUT AIKE EL MOSUUB: A bo dorrenges er a Dios e ngbelkul a kmo kede mo oltirakl a ulekrael er ngii el debetik er a Biblia. Sel moruul el uaisei “e ng di mo ungilbesul a ikel rokui el moruul.”​—Josua 1:8.