A Jehovah a ‘Mla Ochotii er Ngak a Melemalt el Rael’

A RECHAD ER A BLIK A NGILSUKAK EL METIK ER A MELEMALT EL RAEL

A rechad er a blik a mlo medengelii a klemerang er aike el rak er a 1920, el uchei er a bo lebechiil. E ngak a milechell er a uchelel a rak er a 1939. Aki kiliei er a England e sera kkekerei el buik e ak ulebengterir a rechad er a blik el mora miting er a Rekristiano, ak dirrek el mle teloi er a Skuul el Kirel a Urerel a Dios. Ak dirk melatk er sel kot el cheldechedechak, er a bok dechor er bebul a baks me bo el sebechek el mesterir a rokui el chad. Ngmle elolem a rekik e kmal mle medakt, er a kumes er a remeklou el chad el ngar ongdibel.

A demak a mle type er a kedeb el tekingek e loia er a card el kuusbech er ngii sel kuldingel. Ngmle eai a rekik er a kkot el mo mengedecheduch er a chad er a blai el di ngak el tang. Ngkmal mlo ungil a renguk er a lechiuii tia el card e lekengei el nguu a babier el “Let God Be True”! Ak di rirurt el mouchais er a demak. A berkel a klumech me a miting a milskak a klou el deurreng e milekurulii a urungulek el mo soak el mesiou er a Jehovah el mui el taem.

Ngliluut el mukeroul a bltkil a renguk el kirel a klemerang er sel taem el demak a mle subscribe er A Ongkerongel el kirek. Ak kmal mle semeriar el menguiu sel ta el lemei er a mail. Me ngmlukeroul a klaumerang er ngak er a Jehovah el mlo uchul me ak rirellii a telbilel a renguk el mo er ngii.

Ngak me a rechad er a blik a mle delegate er a Theocracy’s Increase Assembly el mla er ngii er a New York er a 1950. A “Missionary Day” a mle dai er a prokuram er a Thursday el August 3. Seikid el sils e a Odam el Carey Barber el uriul e ngmlo mesiou el chedal a Chelechad er a Ruungerachel, a ultebedii a cheldecheduch er a techolb. Uriul e nguleker er tirke el mo metecholb aike el eru el ker er a ulebengelel a cheldechedechal me ak mlo dechor e kmo, “Chochoi!” Ngmle 11 a rekik engdi ak mle medengei el kmo ak mla nguu a klou a ultutelel el bakes. Me nguaisei engdi ak mle medakt el mo soiseb er a pool le kdirk mle metitur el mengikai. Me a angko er ngak a ulebengkek el mora pool e ulelterekokl er a renguk el kmo a rokui el tekoi a di mo ungilbesul. Ngmeral di mle mereched el mo merek le ochik a dimlak leretechii a berteklel a pool. Ak mlara chimal a ta el odam el mora tang. A tang a tilchelbak e a tang a kilderak lotebedak er a pool. Seikid el klou a ultutelel sils el mei er chelechang e a Jehovah ngkaikid er a lolecholt er ngak er a melemalt el rael.

NGILELTII EL MO OUMERA EL ULSIRS ER A JEHOVAH

Sera ktobed er a skuul e ngmle soak el mo pioneer engdi a resensei er ngak a uleldubech er ngak el mora ngarbab el skuul. Ak mlo mechitechut a orrimel er tir e mlora university. Me nguaisei, engdi ak mlo mtebengii el kmo ngdiak el sebechek el melemolem el mesisiich er a klemerang e a osisiu el taem e ngblak a renguk er a subelek, me ak ngileltii el mo diak ngar er a skuul. Ak milluluuch el mora Jehovah el kirel tia el tekoi e lilechesii a tengami er ngak el mora skulek el louchais er tir el kmo, ak mo merek er a skuul er a uriul er a ulebengelel a kot el rak er a skuul. Ak di mle mereched lomuchel el pioneer, el mle mui el oumera el lulsirs er a Jehovah.

A kulemuchel er a omesiungek er a Wellingborough er a July 1957. Ak ullengit er a rudam el ngar er a London Bethel me louchais er ngak el kmo ngtecha ungil odam el meketeketa el pioneer el sebechek el mo oureor el obengkel. A Odam el Bert Vaisey a ulsisecheklak er a betok el tekoi. A blakerreng er ngii a ngilsukak el rullii a ungil schedule er a odingel. Me a ongdibel er kemam a mla er ngii a retelolem el mechudelang el odos, Odam el Vaisey, me ngak. Omengetmeklek el kirel a miting e mo teloi er ngii, a milskak a betok el techall el mo omekeroul er a klaumerang er ngak er a Jehovah e ouchais el kirel er a ongdibel.

Uriul er a kkelebus el telkib el taem e le ngak el dimlak kengei el mo teloi er a klsoldau, e ak mlo medengelii a special pioneer el odos el Barbara. Aki mlo bechiil er a 1959, e kilengei el mo mesiou er a ngii di el ker. A kot e aki mlo mesiou er a Lancashire el ngar er a diluchesngebard er a beluu er a England. E a January 1961 e te mle invite er ngak el mora London Bethel el kirel a Skuul el Kirir a Rudam el Oldingel a Ongdibel me a Remechuodel me a Remesiou er a Ongdibel. Uriul er a skuul e ngkmal mlo mechas a renguk e le ak miltutk el mo odam el oldingel a ongdibel. Ngmle eru el sandei el kngar er a Birmingham el melai a training er a ta er a odam el oldingel a ongdibel, e a Barbara a mle sebechel el obengkek. Uriul er isei e aki mlo mesiou er a beluu er a Lancashire me a Cheshire.

NGDIMLAK LECHELEUID A KLAUMERANG ER NGAK ER A JEHOVAH

Sera August 1962 er aki mngar er a vacation, e aki ngiluu a tengami er a branch office el lulebengkel a application el kirel a Skuul er a Gilead! Uriul er aki moluluuch el kirel, e aki mle complete aika el application e odurokl el mora branch office. Eim el buil er a uriul, e aki mlora Brooklyn, New York, el mora 38 el klas er a Gilead, el ngii a teruich el buil a klemengetel el skuul er a Biblia.

Ngar tia el skuul, e aki milsuub el kirel a Tekingel a Dios, cheldebechelel, me a klodam er kid. Aki dirk mle 20 me a derengel a rekmam me ngkmal klou aki msiluub er tirke el bebil er a rengalek er a skuul. E mla er ngii a ileakl el techellek el oureor el obengkel a Odam el Fred Rusk, el ta er a rulisechakl er kemam. A ta er a klou a ultutelel el tekoi el lullisiich er ngii a kmo, ngkirel melemalt a omellach er kid, el belkul a kmo ngmengai a uchetemel er a Bades. A rebebil er tirke el uleltobed a cheldecheduch er tia el skuul a odam el Nathan Knorr, Frederick Franz, me a Karl Klein. Aki dirrek el siluub a betok er a klengariourreng er a Odam el A. H. Macmillan, el lultebedii a cheldecheduch el ngii a milsaod er a rolel e a Jehovah a ulemekrael er a rechedal er aike el rak er a 1914 el mora uchelel a 1919 el mle betok a omelsemai!

NGMLENGODECH A NGERECHELAM

Sera lebocha er a ulebengelel tia el skuul, e a Odam el Knorr a dilu er ngak me a Barbara el kmo, aki mo mesiou er a Burundi el ngar er a Africa. Me aki di mle mereched el mora library er a Bethel el mo omes er a Yearbook el kmo, te tela publisher er tia el beluu. Ngmlo mechas a rengmam e le ngdimlak a ulecherengelir! Nguaisei, kemam a mocha er a basio el dirkak a ta el lerengesii a ungil chais, el beluu el dimlak a kmal klemedengei er kemam el kirel. Ngmlo ouedikel a rengmam, engdi a nglunguuch a ngilsukemam el mo chollakl a rengmam.

Ngkmal mle ngodech a rokui el tekoi er tia el beluu, a blekerdelel a eanged, siukang, me a omelekoi. E mle kiram el suubii a tekoi er a France. Ngdirrek el mle kiram el sikii aki bo mkiei er ngii. Eru el klebesei er a uriul er aki mei, e a classmate er kemam er a Gilead el Harry Arnott a uldingel er kemam el ngar omerollel el lmuut el mora ngerechelel er a Zambia. Ngika ngilsukemam el sikii a apartment, el ngii a mlo kot el blimam el missionari. Me nguaisei engdi ngdi mle telkib e aki mlo chelebangel a ultok er a rebulis, el tir a dimlak a klemedengei er tir el kirir a Resioning er a Jehovah. Aki mocha ungil a rengmam er tia el ngerechelam, e te dmu er kemam el kmo ngdiak el sebecham el kiei er tia el beluu a lak a work permit er kemam. Ngklengiterreng e le ngmle kiram el merael el kuk mora ta er a beluu el Uganda.

Ngmle suebek a rengmam el mora Uganda el diak a visa er kemam, engdi aki mle oumera el ulsirs er a Jehovah. A odam el chad er a Canada el mle olengeseu er a Uganda a silodii el mora ta er a ofiser er a immigration er a blekeradel el dilubech, me ngmilskemam a sesei el buil el mo meruul er a permit er kemam me bo lsebecham el melemolem el kiei er tia el beluu. Tia ulterekeklii el mei er kemam el kmo a Jehovah a ullengeseu er kemam.

A blekeradel er tia el beluu a kmal mle ngodech er a Burundi. Te mla mechelii a ureor er a berkel a klumech, alta te di mle 28 a Sioning er tia el beluu el rokir. E a rebetok el chad er a territory a millekoi a tekoi er a Merikel. Me nguaisei engdi aki miltebengii el kmo a lsomam el ngosuterir a resemeriar el mo olengeriakl, e ngkiram el suubii a ta er aika el betok el omelekoi er tia el beluu. Aki ulemuchel el omerk er a klumech er a Kampala el oumesingd el chad er ngii a millekoi a Luganda, me aki ngileltii el mo mesuub er tia el omelekoi. Me alta ki uluusbech a betok el rak el suubii tia el omelekoi, engdi aki milsa el kmo ngkmal klou a lerirellii er a ureram er a berkel a klumech! Ngmle sebecham el mo ungil medengei aike el lousbech er a tekoi er a klereng tirke el ki mulsuub el obengterir. Me tir a mlo sebechir el ouchais er kemam aike el mera el ngar er a rengrir me a dirrek el uldesuir el kirel a tekoi el losuub.

BETOK EL OMEROLLAM

Ngkmal mle dmeu a rengmam el ngosuterir a rebebil el mo medengelii a klemerang, e liluut el medechel a deurreng er kemam er a le tutkemam el mo mesiou el oldingel a ongdibel. Ngar cheungel a ulekrael er a branch er a Kenya, e aki mlo merael losiik a basio lousbech er a re special pioneer. Ngbetok el taem el lulmtechakl er kemam a rechad el tir a dirkak a ta el longedecheduch er a Resioning. Te ngilikemam er a dmuil e dirrek el riruul a kelam.

Ngmlo er ngii a kuk ta er a bedengel a omerollam. Ak mlara Kampala e ngiluu a train el eru el klebesei el mora olekerodel er a Kenya er a Mombasa e ngmasech er a diall el mora Seychelles, el ngii a beluu el mlara Indian Ocean. Uriul e a Barbara a ulebengkek el odingel er a beluu er a Seychelles er aike el rak er a 1965 el mora 1972. Chelsel tiakid el taem, e tirke el teru el publisher a mlo group e a uriul e ngmlo ongdibel. A bebil er a omerollam a ngilikemam el mo oldingel er a rudam el ngar er a Eritrea, Ethiopia, me a Sudan.

Ngar er a Uganda, e a blekeradel a mlengodech e le resoldau a ngiluu a klisichel a dereder. Aike el mlo oeak uriul el rak a mle mui er a dakt e kmal ngilsukak el mo mesa klungel a ultutelel a doltirakl er a ulekrael el kmo, “a kloklel a kaiser le bora kaiser.” (Mk. 12:17, BT) Ngmla er ngii a taem el rokui el chad er a ngodech el beluu a mlo kirir el register er a blil a bulis el kot el kmeed er a blirir. Aki di mle mereched el mo register. Sesei el klebesei er uriul er aki momekall er a chelsel a Kampala e a rebulis a mle mengedecheduch er ngak me a ta er a missionari. Ngkmal mlo melekedukem a ulmam! Te uleltelechakl er kemam el kmo, kemam a ourabek e ngilikemam el mo er sel klou el blil a bulis. Aki dilu er tir el kmo kemam a missionari el chad er a budech. Aki dilu el kmo aki mla mo register engdi te dimlak el rongesmam. Te mle teisio er kemam e ngoikemam el mo er sel blil a bulis el kmeed er a blil a missionari. Ngkmal mle ungil a rengmam el mesa ngike el ofiser el mle medengei el kmo aki mle register er a uchei. Ngdilu er a rebulis me lebechikemam me ki morael!

Ngar er aikeikid el taem e ngkmal mlo meringel er kemam sel lestob er kemam a resoldau, el ileakl a lsekum te kmal millim. Me nguaisei engdi bek el taem e aki milluluuch e mlo chelellakl a rengmam sel lekengei er kemam el mo imuul. Ngklengiterreng e le sera 1973 e a rokui el missionari el chad er a ngodech el beluu a mle kirir el tuobed er a Uganda.

Seikid e ngliluut el mengodech a ngerechelam me a ki mlo mesiou er a Côte d’Ivoire, West Africa. Tia kmal mle klou el omelodech e le ngmle kiram el suubii a beches el siukang e di melekoi a tekoi er a France er a bek el taem e mo smau el kiei el obengterir a remissionari el mle kakerous a ulekurulir! Me nguaisei engdi aki milsa ulekrael er a Jehovah e le rengariou e melemalt a rengrir el chad a kilengei er a klemerang. Me ngmle sebecham el terung el mesa el kmo, a klaumerang er kemam a uchul me a Jehovah a ulechotii er kemam a melemalt el rael.

E sola e a Barbara a di mle kiul mo smecher er a kasinoma. Me alta aki ulemais el mora Europe el kirel a ukeruul engdi sera 1983 aki miltebengii el kmo ngdikea el sebecham el mesiou el ngar er a Africa. Ngkmal mlo mekngit a rengmam el kirel tiang!

NGMLENGODECH A BLEKERDELEL A KLENGAR ER KEMAM

A rektel a Barbara el kasinoma a di mirrael el mong el mlo uchul a kodellel er aki mosiou er a London Bethel. A telungalek er a Bethel a kmal ngilsukak er tiakid el taem. A ta el obekel a ngilsukak el mo meduch el di ngak e mo melemolem el oumera lulsirs er a Jehovah. A uriul e ak mlo medengelii a Ann el ta er a odos el volunteer loureor er a Bethel el mla ta losiou el special pioneer. A bltkil a rengul el mora Jehovah a ulechotii el kmo ngmle mesisiich er a tekoi er a klereng. Aki mlo bechiil er a 1989 e kemam tia er a ki mosiou er a London Bethel.

Ngmla er ngii a ileakl el techellek er aike el rak er a 1995 el mora 2018 el mesiou el omtechei er a world headquarter er kid (el mle okedongall el zone overseer er a uchei) el oldingel er a kmeed el 60 el kakerous el beluu. Ngar er a derta er aika el odngelam e ngmle sebechek el mesa rolel e a Jehovah omekngeltengat er a rechedal er a chelsel a kakerous el blekeradel.

Sera 2017 e ngmlo sebecham el mo oldingel er a Africa. Ngkmal mle dmeu a renguk lolecholt er a beluu er a Burundi el mora Ann. Ngdirrek el kmal mlo mechas a rengmam er a okurulel a ureor er tia el beluu! E ngar sel osisiu el rael el kuleldingel a obliil er ngii er a 1964, e ngdechor er ngii a Bethel el lekiei er ngii a rebetok er a 15,500 el publisher.

Ngkmal mle dmeu a renguk er a knguu a itinerary er ngak el kirel aike el basio el bo kuldingel er a 2018, e le ta er aika el beluu a Côte d’Ivoire. Sera er aki mkerd er a Abidjan el capital er tia el beluu, e ngdi mle ngii me ak bocha krei er a beluak. Ak ulemes er a list er a dengua er a Bethel e miltebengii el kmo ngike el odam el kiei er bita er a room er kemam a Odam el Sossou. Ak mlo dobedebekii el kmo ngika milsiou el city overseer er a kdirk ngar er a Abidjan. Me nguaisei ak mle cheleuid, ngika mle ngelekel.

A Jehovah a kmal loltaut a telbilel. Aike el betok el meringel el blekeradel el blok chelebangel a mla osisecheklak el kmo, sel doumera el ulsirs er a Jehovah e ngmo ochotii er kid a melemalt el rael. Ngkmal soak el di melemolem el merael er a melemalt el rael, el ngii a di merael el mo mellomes el omekrael er kid el mora klengar er a beches el blekeradel.​—Osi. 4:18.