Rolel a Dengai a Klisiich er a Bades

1. Ngera el ringel a locha lechebangel a rechedal a Jehovah?

KAU ke chelebangel er a meringel el blekeradel? Nglocha ngar ngii a chad er a ongdibel el mla tomellii a rengum. (Jak. 3:2) Me a lechub a rechad er a urerem me a lechub te ngalek er a skuul a oltuub er kau le ke mesiou er a Jehovah. (1 Pe. 4:3, 4) Me a lechub a rechedal a telungalek er kau a melasem el merrob er kau me ngdiak mngar er a miting me a lechub e mongedecheduch er a rechad el kirel a klaumerang er kau. (Mt. 10:35, 36) A lsekum a blekeradel a kmal mo meringel e ke locha mo omdasu el kmo ngungil bo lak kusiou er a Jehovah. Me nguaisei engdi ngsebechel mo ulterekokl a rengum el kmo a ngii di el ringel el bo mchebangel, a Jehovah a mo meskau a llomeserreng el mo ungil melilt a tekoi me a dirrek el klisiich el mo outekangel er ngii.

2. A doltirakl er a Rom 15:4, e ngera ngsebechel rullii a omengiued er a Tekingel a Dios?

² A Jehovah a liluches er a Tekingel a komakai el rolel e a rediak el mecherrungel el chad a uluutekangel a meringel el blekeradel. E ngera uchul? Me bo el sebeched el ngmai a klubeled er ngii. Tiakid a lulemekrael er a apostol Paulus el mo meluches el kirel. (Monguiu er a Rom 15:4.) A donguiu aika el cheldecheduch e ngsebechel mengelaod er kid e meskid omeltked. Me nguaisei, engdi ngdiak el sebeched el ngmai a klungioled er ngii a lsekum e kede di menguiu. Ngkirel a Bades el melodech a uldesued e remutech a rengud. Ngera sebeched el meruul er ngii a lsekum kede ousbech a ulekrael el kirel a ringel el dechelebangel er ngii? Ngsebeched el meruul aika el eua el tekoi: (1) Moluluuch, (2) Imagine, (3) Molebedebek, e (4) Moltaut. Me bo dosaod a rolel a doruul a derta er aika el tekoi.b E a uriul e kede mousbech er tia el rolel a omesuub el ngmai a klubeled er a tekoi el dilubech er a klengar er a King David me a apostol Paulus.

3. Ngera ungil moruul er ngii er a uchei er a omonguiu er a Biblia, e ngera uchul?

³ (1) Moluluuch. Uchei er a omonguiu er a Biblia e molengit er a Jehovah me lengesukau el mo mesa rolel e ngsebechem el ngmai a klungiolem er a omengiuem. El ua tiang, a lsekum kosiik a ulekrael el kirel a mondai el mchebangel er ngii, e molengit er a Jehovah me lengesukau el metik a omellach er a Tekingel el mo omekrael er kau.​—Fil. 4:6, 7; Jak. 1:5.

4. Ngera sebechel ngosukau el rullii a cheldecheduch er a Biblia el mo mera el tekoi er a uldesuem?

⁴ (2) Imagine. A Jehovah a mla meskid a mengasireng el duch el sebeched el imagine a tekoi. Imagine er kau el seluk er a chelsel tia el tekoi el dilubech e momelechesiu er kau el ngika el chad el chelebangel er tia el tekoi. Molasem el imagine a tekoi el lulemes me a dirrek el mlara uldesuel ngika el chad el monguiu el kirel.

5. Ngngera omelebedebek, e ke mekera mo meduch el melebedebek a tekoi el monguiu?

⁵ (3) Molebedebek. A omelebedebek a belkul a kmo, kede kerekikl el melatk a tekoi el donguiu me a rolel e ngsebechel el ngosukid. Ngngosukau el lomechobech a tekoi er a uldesuem e menglou er a klemedengei er kau el kirel a tekoi el mosuub er ngii. A omengiuel a Biblia el diak omelebedebek a di ua domes er a puzzle el terrakl er bebul a tebel engdi ngdiak domechobech er ngii. A omelebedebek a di ua domechobech er tia el puzzle me bo el sebeched el mesa siasing el rokir. Ngsebechem el di kau loker aika el ker el mo ngosukau el melebedebek a tekoi el monguiu: ‘Ngika el chad el kunguiu el kirel ngera ngmirruul el mesmechokl er a tekoi el ble lechelebangel er ngii? Ngmilekera Jehovah e ngosuir? Ngmekera kuusbech aika el tekoi el bla ksuub el mo ngosukak el loutekangel a ringel?’

6. Ngera uchul me ngkired el oltaut a tekoi el desuub?

⁶ (4) Moltaut. A Jesus a dilu el kmo a lsekum e ngdiak doltaut a tekoi el desuub e kede di ua chad el lomekedechor er a blil er a chelechol. Ngmeringel el oureor, engdi ngdiak a ultutelel a meringel el urerel. E ngerang? E le sel lemei a ses el eolt me a ieleb el subechii er a blil e ngmeukel. (Mt. 7:24-27) Ngdi osisiu, a lsekum e kede meluluuch, imagine, e melebedebek engdi ngdiak doltaut a tekoi el desuub, e ngkmal di mo diak a ultutelel. Sel bo dechebangel a ringel me a lechub e ngodechelakl, e a klaumerang er kid a mo mechitechut. Me nguaisei, engdi a lsekum e kede mesuub e oltaut a tekoi el desuub e kede mo ungil melilt, mo budech a klengar er kid, e mo er ngii a mesisiich el klaumerang er kid. (Isa. 48:17, 18) Me chelecha e me dousbech aika el eua el tekoi el bla desaod el mo omes a sebeched el suub er a tekoi el dilubech er a klengar er a King David.

NGERA SEBECHED EL SUUB ER A KING DAVID?

7. Ngera el cheldecheduch er a Biblia a bo dosaod er ngii er chelechang?

⁷ Ngar ngii a sechelim me a lechub e ngchedal a telungalek er kau el mla tomellii a rengum? A le uaisei, e a tekoi el sebechel ngosukau a mo mesuub el kmo ngmilekera King David er sel taem el ngelekel er a Absalom a tilemellii a rengul e mlo melasem el melai er a kleking.​—2 Sa. 15:5-14, 31; 18:6-14.

8. Ngera sebechem el meruul er ngii me mnguu a ngelsuil a Jehovah?

⁸ (1) Moluluuch. Molatk er tia el cheldecheduch e moluluuch el louchais er a Jehovah er a uldesuem el kirel a dimlak lemelemalt el tekoi el dilubech el mo er kau. (Psa. 6:6-9) Di bleketakl louchais er ngii aike el ngar er a rengum. E molengit er ngii me lengesukau el mes a omellach er a Biblia el sebechel lomekrael er kau el mo medengei a tekoi el kirem el meruul.

9. Ka mosaod er a tekoi el dilubech er a delongelel a David me a Absalom.

⁹ (2) Imagine. Molatk a tekoi el dilubech er tia el cheldecheduch em imagine el kmo tia ngngera ngrirellii er a King David. A ngelekel a David er a Absalom a mlo mela rak el lolasem el meruul er a rechad el mo soal ngii. (2 Sa. 15:7) Sera bo lomelechesiu el kmo ngmla mo ungil taem el nguu a kleking, e nguldercheterir a ruderchelel el mora rokui el kebliil er a Israel el mo melekoi er a rechad me longetmokl er tir el mo kongei er ngii el king er tir. Ngika dirrek el milengesuseu er a Ahithofel el ta er a kmeed el sechelil a David e chad er a kelulau er ngii el mo obengkel el lomtok. Me chelecha Absalom a mla rullii el king e mocha melasem lomdechem er a David el lomekoad er ngii, e a David a locha kmal mle smecher er tiakid el taem. (Psa. 41:1-9) A David a mlo medengelii a telbilel a Absalom me ngchiliis er a Jerusalem. Cherengel a taem e a rechedal a Absalom a mlo oumekemad er a rechedal a David. Te mlo mechitechut me a Absalom a lulekodir.

10. Ngera mle sebechel a David el meruul er ngii?

¹⁰ Chelecha ka molatk er a uldesuel a David er a lomes aika el tekoi el duubech el mo er ngii. Ngika kmal mle betik a rengul er a Absalom e uluumerang er a Ahithofel. Me nguaisei, engdi tirka el terung a kmal tilemellii a rengul e dirrek el millasem el omekoad er ngii. Me a David a mle sebechel mo diak loumerang er tirke el bebil er a resechelil e mo omdasu el kmo te obengkel a Absalom el omtok er ngii. Ngmle sebechel di melatk er a di ngii e chemiis el di ngii el tang. Me a lechub e ngmle sebechel mo mechitechut a rengul. Nguaisei engdi a David a dimlak loruul aika el tekoi. Ngbai mlo mesisiich er tia el meringel el blekeradel. Ngera uchul me ngmle sebechel el mo mesisiich?

11. Ngmilekera David er a chelsel tia el meringel el blekeradel?

¹¹ (3) Molebedebek. Ngera el omellach a omsuub er tia el cheldecheduch? Monger tia el ker: “Ngera ngmirruul a David el mesmechokl er a tekoi el ble lechelebangel er ngii?” A David a dimlak bo louedikel a rengul e lemereched el melilt, el mo uchul e ngmekngit el melilt. Ngdirrek el dimlak longudel a blachel e bo lemedakt e lak lodengei el kmo ngmekerang. Ngbai milluluuch el mora Jehovah lolengit a ngeso. Ngdirrek lullengit a ngeso er a resechelil. Ngdirrek el mle mereched el mo oltaut a tekoi lullilt el mo meruul. E alta ngkmal miltemall a rengul, engdi ngdimlak lorreked a ngasechereng e bo loumededenger er a rebebil. Ngbai millemolem lultuil er a Jehovah e oumerang er a resechelil.

12. Ngngera ngmirruul a Jehovah el lolengeseu er a David?

¹² Ngmilekera Jehovah e ngosuir a David? A lsekum e ke mo meruul a research e ke mo metik el kmo a Jehovah milsa David a klisiich el luluusbech er ngii el mo outekangel er tia el ringel. (Psa. 3:1-8) Ngulemekngeltengat a tekoi el lullilt a David. A Jehovah a dirrek el ullengeseu er a resechelil a David el luleba blakerreng el mora king er tir e ulemekerreu er ngii.

13. Ngmekera sebechem el loukerebai er a David a lsekum a chad a tomellii a rengum? (Mateus 18:15-17)

¹³ (4) Moltaut. Di lekau el oker, ‘Ak mekera oukerebai er a David?’ Ngkirem el mereched el mo sumecheklii a mondai. E oltirakl er a mondai el mchelebangel er ngii, e ngsebechem el mo oltaut a tekingel a Jesus me a lechub e ngomellach er ngii el ngar er a Mateus er a 18 el bliongel. (Monguiu er a Mateus 18:15-17.) Me nguaisei engdi ngdiak el kirem el mereched el melilt a tekoi el di oltirakl er a uldesuem. Ngkirem el meluluuch el mora Jehovah lolengit er ngii el mo cholleklii a rengum e lebeskau a llomeserreng el mousbech er ngii el mo sumecheklii tia el tekoi. Lak bo moumededenger er a resechelim. Bai mkengei a ngeso el lomeskau. (Osi. 17:17) E sel kot el klou a ultutelel el kirem el meruul er ngii a mo oltirakl a ulekrael el lomeskau a Jehovah el ngar er a Tekingel.​—Osi. 3:5, 6.

NGERA SEBECHED EL SUUB ER A PAULUS?

14. Oingerang el taem e a bades er a 2 Timothy 1:12-16; 4:6-11, 17-22 a kmal mo melisiich er kau?

¹⁴ A rechedal a telungalek er kau te omtok er kau? Me a lechub e ke kiei er a basio el merrob a bebil me a lechub e ngrokui el urerir a rechedal a Jehovah? A leuaisei e ke ngmo ngmai omelisiich a omonguiu er a 2 Timothy 1:12-16 me a 4:6-11, 17-22.c A Paulus a liluches aika el bades er a lengar er a kelebus.

15. Ngera sebechem lolengit er a Jehovah?

¹⁵ (1) Moluluuch. Uchei er a monguiu aika el bades e mouchais er a Jehovah er a mondai el mchebangel er ngii me a uldesuem el kirel. Bo bleketakl. E a uriul e molengit er ngii me lengesukau el mes a omellach er a blekeradel el dilubech el mora Paulus el sebechel ngosukau el mo medengei a tekoi el kirem el meruul.

16. Ka mosaod er a tekoi el ble lechelebangel er ngii a Paulus.

¹⁶ (2) Imagine. Imagine er kau el chelebangel er tia el tekoi el dilubech el mora Paulus. Ngrrengodel er a bombatel el ngar er a blil a kelebus er a Rom. Ngika mla ta el bo el kelebus engdi chelecha el taem e ngulterekokl a rengul el kmo te mo mekodir. E a rebebil er a resechelil a mla choitii, e ngii a kmal mesaul ku bedengel.​—2 Ti. 1:15.

17. Ngera mle sebechel a Paulus el meruul er ngii?

¹⁷ A Paulus a mle sebechel el di melatk a tekoi el dilubech er a ngar er a mong e mo omdasu el kmo a lsekum ngmirruul a ngodech el omelilt e nglocha dimlak lemekelebus. Ngmle sebechel el ngmasech a rengul er a rechad el ngar er a Asia el chilitii, e mo oumededenger er a resechelil. Nguaisei engdi a Paulus a dimlak loruul aika el tekoi. Ngera uchul me ngmle sebechel a Paulus el melemolem ulterekokl a rengul e di melatk a ungil?

18. Ngmilekera Paulus er a meringel el blekeradel el ble lechelebangel er ngii?

¹⁸ (3) Molebedebek. Monger tia el ker, “Ngera ngmirruul a Paulus el mesmechokl er a tekoi el ble lechelebangel er ngii?” Alta Paulus a mle medengei el kmo ngdi kmedu el mo mad engdi ngdimlak lobes el kmo, nglmuut el klou a ultutelel a doruul a tekoi el mo uchul a klebkall el mora Jehovah. Ngdirrek el millemolem el melatk a rolel e ngsebechel melisiich er a rebebil. Ngmle blechoel meluluuch el ultuil er a Jehovah. (2 Ti. 1:3) E dimlak lolatk er tirke el chilitii ngbai ullecholt a omereng el saul el kirir a resechelil el mle blechoel lolengeseu er ngii. Me a lmuut kung, a Paulus a mle blak a rengul mesuub er a Tekingel a Dios. (2 Ti. 3:16, 17; 4:13) E a ngaruchei er ngii, ngmle ulterekokl a rengul el kmo a Jehovah me a Jesus a mle betik a rengrir er ngii. Te kmal dirkak a ta lechitii, e dirrek el mo omekngeltengat er ngii er a blakerreng er ngii el mo er tir.

19. Ngngera ngmirruul a Jehovah el lolengeseu er a Paulus?

¹⁹ A Jehovah milengelechel er a Paulus el kmo ngkirel mo outekangel a odechelakl e le ngii el Kristiano. (Rel. 21:11-13) Ngmilekera Jehovah e ngosuir a Paulus? A Jehovah a ulenger a nglunguchel e milsa klisiich. (2 Ti. 4:17) A Jehovah a dirrek el dilu er a Paulus el kmo ngmo nguu a nguked el ble lemeringel loureor el kirel. E uluusbech er a resechelil a Paulus el dimlak lechitii el mo olengeseu er ngii.

20. Ngmekera sebechem el loukerebai er a Paulus sel molatk er a Rom 8:38, 39?

²⁰ (4) Moltaut. Di lekau el oker, ‘Ak mekera oukerebai er a Paulus?’ Ngkired el mo ua Paulus el mle medengei el kmo kede mo modechelakl el kirel a klaumerang er kid. (Mk. 10:29, 30) Ngkired el ultuil er a Jehovah loeak a nglunguuch e blechoel el mesuub er a Tekingel a lsekum e ngsoad el melemolem el oba blakerreng sel bo dechelebangel a ringel. E diak el kired el obes el kmo a kot el klou a ultutelel el sebeched el meruul er ngii, a meruul a tekoi el mo uchul a klebkall el mora Jehovah. Ngsebechel mo ulterekokl a rengud el kmo a Jehovah a kmal diak bo lechitid e diak a ngii di el chad el sebechel tomellii a bltkil a rengul el mei er kid.​—Monguiu er a Rom 8:38, 39; Heb. 13:5, 6.

DENGAI A KLUBELED ER A RELMUUT EL BEBIL CHAD ER A BIBLIA

21. Ngera ngilsuir a Aya me a Hector el mo mesisiich a omelsemai el blo lechebangel?

²¹ Ngsebeched el nguu a klisiich el dousbech el mo outekangel a ngii di el blekeradel sel domes a kerebai er a Biblia. El ua tiang, a Aya el pioneer er a Siabal a melekoi el kmo a cheldechedechal a Jona a ngilsuir el mo mesisiich er a dektel el omerk er a klumech er a buai. E a Hector el ngeasek er a Indonesia el rechad er a blil a diak losiou er a Jehovah a melekoi el kmo, a kerebil a Ruth a rullii el mo soal mesuub el kirel a Jehovah e mo mesiou er Ngii.

22. Ke mekera mo ungil ngmai a klungiolem er aike el drama el mlengai er a Biblia me a lechub aike el suobel el “Imitate Their Faith”?

²² Me ke mo er ker e metik a kerebai er a Biblia el ngii a mo smisichau? Aike el video me a audio drama er kid me a dirrek aike el suobel el “Imitate Their Faith” a sebechel remuul a cheldecheduch er a Biblia el mo mera el tekoi er a uldesued.d Me nguaisei engdi a uchei er a momes, morrenges, me a lechub e ke menguiu aike el cheldecheduch, e molengit er a Jehovah me lengesukau el metik a ileakl el tekoi el sebechem el oltaut. Imagine er kau el tirka el chad el chelebangel aika el tekoi. E molebedebek a tekoi el lurruul tirka el blak a rengrir el mesiungel a Jehovah me a rolel e a Jehovah a ullengeseu er tir el mo mesisiich er aika el blekeradel. E moltaut aika el bla msuub er a klengar er kau. Moreng a sulel a Jehovah el kirel a ngeso el lomeskau. E mochotii a omereng el saul el kirel loeak sel mosiik a techall el mo melisiich e olengeseu er a rebebil.

23. A doltirakl er a Isaia 41:10, 13, e ngera ngtibir a Jehovah el mo meruul el kired?

²³ A klengar er tia el beluulechad el chederedall er a Satan a sebechel kmal mo meringel, el lebebil e ngdiak dodengei el kmo kede mo mekerang. (2 Ti. 3:1) Me nguaisei, engdi ngdiak el kirel mo ouedikel a rengud me a lechub e bo demedakt. A Jehovah medengei a tekoi el dechebangel. Ngtibir el kmo sel bo dousbech a ngeso e ngmo ngosukid e sobecheklid. (Monguiu er a Isaia 41:10, 13.) Me ngsebechel mo ulterekokl a rengud el kmo a Jehovah a mo ngosukid e sebeched el mora Biblia el kirel a klisiich el mo outekangel a ngii di el blekeradel.