Rechad er a Ongdibel, Molengeseu er a Remesuub a Biblia el Mo Olengeriakl el Mo Nguu a Techolb

1-2. Ngtecha sebechel lolengeseu er a chad el mesuub lolengeriakl el mo nguu a techolb?

A AMY el kiei er a Fiji a melekoi el kmo: “Ngkmal mle soak aike el tekoi el kulsuub er a Biblia. Ak mle medengei el kmo tia klemerang. Me nguaisei, engdi sera kumuchel el lobengterir a rudam me a rudos e seikid e ak mlo meruul omelodech er a klengar er ngak e olengeriakl el mo nguu a techolb.” Me a experience er a Amy a osisecheklid er a klou a ultutelel el tekoi: A chad el mesuub a sebechel lolengeriakl el mo nguu a techolb a lsekum a rebebil el ngar ongdibel a olengeseu er ngii.

² A derta me a derta el publisher a sebechel ngosuir a chad el me soiseb er a ongdibel. (Efe. 4:16) A Leilani el ta er a pioneer er a Vanuatu a kmo: “Te melekoi el kmo kede ousbech er a rechad er a beluu el rokui el mekurulii a ngalek. A kumdasu e tia el tekoi a dirrek el klemerang el kirel a omeruul el disaiplo. Ngblechoel lousbech er a ongdibel el rokir el ngosuir a chad el mei er a klemerang.” A rechedal a ngalek, resechelil, me a resensei er ngii a rokui el ngar ngii a leruul el ngosuir el mukeroul el mo klou. Te meruul el uaisei sel lolisiich er ngii e lolisechakl er ngii a meklou a ultutelel el tekoi. Ngdi osisiu, a re publisher a sebechir el omesterir a remesuub er a Biblia a ulekrael me a omelisiich e kutmeklii a ungil kerebai el kirir, el ngii a mo ngosuterir lolengeriakl el mo nguu a techolb.​—Osi. 15:22.

3. Ngera ke suub er a tekingel a Ana, Dorin, me a Leilani?

³ Ngera uchul me a publisher el mesuub el obengkel a chad a kirel mo ungil a rengul er a ngeso er a rebebil? Ka momtab a tekingel a Ana el ta er a special pioneer er a Moldova. Ngdmu el kmo: “Ngkmal meringel er a di ta el chad el msa chad el mesuub aike el rokui el lousbech sel lomuchel el olengeriakl.” A Dorin el dirrek el ta er a special pioneer er a Moldova a melekoi el kmo: “Te blechoel a rebebil el publisher el dmu tekoi el rutechii a rengul a chad el mesuub el dimlak a ta el klatk.” A Leilani a dirrek el melekoi el kmo: “A bltikerreng el mocholt er a chad el mesuub a sebechel ngosuir el dongcheterir a rechedal a Jehovah.”​—Jn. 13:35.

4. Ngera kede mo mesaod er tia el suobel?

⁴ Me nguaisei, ke locha mo melatk el kmo, ‘Ak mekera ngosuir a chad el mesuub el lolengeriakl a lsekum e ngdiak el ngak a mesuub el obengkel?’ Me bo dosaod aike el sebeched el meruul a lsekum kede mo obengkel a chad el ngar er a study er ngii me a aike el sebeched el meruul a lsekum a chad el mesuub a omuchel el ngar er a miting. Kede dirrek el mo mesaod er a rolel e a remechuodel a sebechir el lolengeseu er a remesuub a Biblia el lolengeriakl el mo nguu a techolb.

SEL MOBENGKEL A CHAD EL MORA STUDY ER NGII

5. Ngera ngerechelem sel mobengkel a chad el mora study er ngii?

⁵ Ngngerechelel ngike el mesuub el lobengkel a chad el olisechakl er ngii el mo medengelii a Tekingel a Dios. Me sel mobengkel a chad el mora study er ngii e momes el kmo, kau a di olengeseu er ngii. (Oli. 4:9, 10) Me ngngera sebechem el meruul el olengeseu er ngika el mesuub a Biblia el lobengkel a chad?

6. Ngmekera sebechem loltaut er a omellach el ngar er a Osisechakl 20:18, sel mobengkel a chad el mora study er ngii?

⁶ Mongetmokl er kau el kirel a study el bo er ngii. A kot, e molengit er ngike el mesuub el lobengkel a chad me louchais er kau a bebil tekoi el kirel a chad el mesuub. (Monguiu er a Osisechakl 20:18.) Ngsebechem loker: “Ngera sebechem louchais er ngak el kirel ngika el mesuub? Ngera ko mo mesaod er a omesubiu? Ngera soam a lemeketmokl er tia el omesubiu? Ngar ngii a kirek me a lechub e ngdiak el sebechek el meruul me a lechub ak melekoi? Ngmekera sebechek el melisiich er ngii el mo olengeriakl?” Nguaisei, a mesuub lobengkel a chad a diak bo losaod a berrotel el tekoi, engdi aike el sbedau a sebechel ngosukau. A missionari el ngklel a Joy a blechoel mesaod aika el tekoi el lobengterir tirke el mo obengkel el mora study er ngii. Ngmelekoi el kmo: “Tia ngosuir ngike el lobengkek el mora study el mo semeriar er a chad el mesuub e mo medengei aike el sebechel meruul el lolengeseu.”

7. Ngera uchul me ngkirem el kutmeklau a lsekum ke obengkel a chad el mora study er ngii?

⁷ A lsekum ke obengkel a chad el mora study er ngii e ngungil omongetmokl er kau el kirel a tekoi el bo mosaod. (Esr. 7:10) A Dorin el ngike el odam el dulsaod er ngii er a uchei, a kmo: “Ak kmal loba omereng el saul sel sekum ngike el lobengkek a kutmeklii el kirel a study er ngak. Seikid e ngmo sebechel lungil teloi er a omesubam.” Me a lmuut kung, ngike el mesuub a mo mesa el kmo kemiu el terung a ungil kltmokl, e tia kutmeklii a ungil kerebai el kirel. E a bo lak el sebechem el ungil kutmeklau el kirel, e di mketmeklii a taem el mo suub aike el meklou a ultutelel tekoi el mo soadel er a study.

8. Ngmekera sebechel a nglunguchem er a study el mo er ngii a belkul?

⁸ A nglunguuch a klou a ultutelel el telengtengil a omesubel a Biblia, me molatk er a uchei aike el bo molekoi a lsekum a chad olengit er kau el mo meluluuch. Seikid e a nglunguchem a mo er ngii a belkul. (Psa. 141:2) A Hanae el kiei er a Siabal a dirk sebechel dobedebekii a nglunguchel a ta er a odos el lulebengkel ngike el milsuub el obengkel. Ngmelekoi el kmo: “Ngmle sebechek el melechesuar el kmo ngmle mesisiich a deleuill er ngii me a Jehovah, e mle soak el mo uai ngii. Ak dirrek el milechesuar er a bltkil a rengul er a lousbech er a ngklek el ngar er a nglunguchel.”

9. A doltirakl er a Jakobus 1:19, e ngera sebechem el meruul el lolengeseu er ngike el mesuub lobengkel a chad?

⁹ Molengeseu er ngike el mesuub lobengkel a chad. A Omamuyovbi el ta er a special pioneer er a Nigeria a kmo: “A ungil lolengeseu er a temel a study a kerekikl lorrenges er a omesubam. Ngoltobed a uldesuel engdi ngdiak di longedecheduch e le ngmedengei el kmo, ngike el mesuub lobengkel a chad ngikeikid a oungerachel er a study.” Me ke mekera medengei el kmo ngoingera ungil el taem el mongedecheduch me a dirrek el ngera ke melekoi? (Osi. 25:11) Bo mkerekikl lorrenges er ngike el olisechakl me a chad el mesuub. (Monguiu er a Jakobus 1:19.) E seikid e kau a mo medengei el kmo ngoingera el taem e ngsebechem el olengeseu. Me nguaisei, engdi ngkirem el ungil omdasu er a uchei er a omongedecheduch. El ua tiang, ngdiak el soam el kmal mo beketekoi, meleb er a chad el olisechakl, me a lechub e mosaod a ngodech el tekoi. Ngbai oeak a kedeb el tekingem, okesiu, me a lechub e ngker, e ngsebechem el olengeseu el meketeklii a tekoi el soadel. A lebebil e nglocha diak a kmal sebechem el melekoi er a temel a study, engdi a omchat er a chad e molecholt er a klemeriarreng er ngii, e ngsebechem el ngosuir el mo olengeriakl.

10. Ngmekera experience er kau e sebechel ngosuir a chad el mesuub?

¹⁰ Mouchais a experience er kau. A lsekum e ngsebechel, e mouchais er a chad el mesuub er a rolel omsilubii a klemerang, rolel e ke mlo mesisiich er a omelsemai, me a lechub a rolel e ke milsa chimal a Jehovah er a klengar er kau. (Psa. 78:4, 7) A experience er kau a locha tekoi el lousbech el rongesii a chad el mesuub. Nglocha mo smisichii a klaumerang er ngii me a lechub e ngodbechii el mo olengeriakl el mo nguu a techolb. Ngdirrek el locha mo ochotii a rolel e ngsebechel mo mesisiich er a ringel el lechelebangel er ngii. (1 Pe. 5:9) A Gabriel el kiei er a Brazil el chelechang e ngmesiou el pioneer, a melatk a rolel e ngngilai a klungiolel er aike el taem er a losuub a Biblia. Ngmelekoi el kmo: “Sera krenges a experience er a rudam e ak mlo medengei el kmo a Jehovah mes a omelsemai el dechelebangel. E a lsekum e ngmle sebechir el mo mesisiich er ngii, me ngak me ngdirrek el sebechek.”

A LSEKUM A CHAD EL MESUUB A OMUCHEL EL NGAR ER A MITING

11-12. Ngera uchul me ngkired el mo ungil loutkeu er a chad el mesuub el mlei er a miting?

¹¹ A chad el mesuub a bo lolengeriakl el mo nguu a techolb e ngkirel mei er a miting. Tia mo ngosuir. (Heb. 10:24, 25) Ngike el mesuub el lobengkel a locha mo invite er ngii. Sel lemei e ngsebeched el rokui el melisiich er ngii el melemolem el mei er a Blil a Ongdibel. Ngoeak a ngera el rolel e ngsebeched el meruul el uaisei?

¹² Moutkeu er a chad el mesuub. (Rom 15:7) A lsekum a chad a melechesuar el kmo ngdmeu a rengud le ngteloi er kid, e nglocha mo soal melemolem el mei er a Blil a Ongdibel. Moutkeu er ngii e mngesuir el mo medengelterir a rebebil el ngar er a rolel e ngdiak momekringel er ngii. Lak momdasu el kmo ngngar ngii a oungerachel er ngii. Ngike el mesuub lobengkel a locha meoud me a lechub e ngar ngii a kirel meruul er a ongdibel. Mkerekikl lorrenges er ngii sel longedecheduch, e molecholt er a klemeriarreng er ngii. Ngera ngmo rullii a omungil loutkeu er a chad? Ka momtab er a experience er a Dmitrii el miltecholb er a sesei el rak er a uchei e chelecha e ngta er a remesiou er a ongdibel. Ngmesaod er a kot el taem er a lebora miting el kmo: “Ngar ngii a odam el milsekak el dechor rikl er a Blil a Ongdibel el kora mle merur e metitur me ngulebengkek el mo tmuu. Ngkmal mlo mechas a renguk e le te betok a mle outkeu er ngak. Ngkmal mle soak a miting me a kuluureng omko me ngmla er ngii er a bek el sils. Ngdirkak a ta el bo kchebengelii tia el tekoi er a ngii di el ker.”

13. A ungil omerellem ngngera ngsebechel rullii er a chad el mesuub?

¹³ Mketmeklii a ungil kerebai. A ungil omerellem a sebechel oterekeklii a rengul a chad el mesuub el kmo ngmla metik er a klemerang. (Mt. 5:16) A Vitalii el ta er a pioneer er a Moldova a melekoi el kmo: “Ak milsa rolel a rechad er a ongdibel a lekiei, lomdasu, e loruul a tekoi. Tia ulterekeklii a renguk el kmo a Resioning er a Jehovah a mera el oltirakl er a Dios.”

14. Ngmekera kerebai er kau e ngosuir a chad el mesuub el mo melemolem el olengeriakl?

¹⁴ A chad el mesuub a bo lolengeriakl el mo nguu a techolb e ngkirel loltaut a tekoi el losuub. E tia locha mo meringel er ngii. Me nguaisei, engdi sel lesa rolel e ngmlo uchul a klungiolem e le kau luleltaut a omellach er a Biblia, e nglocha mo odbechii el mo oukerebai er kau. (1 Ko. 11:1, BT) Momtab a tekingel a Hanae el dulsaod er ngii er a uchei. Ngmelekoi el kmo: “A rudam me a rudos a kiei el oltirakl a tekoi el kulsuub. Ngoeak tir e ak milsa rolel e ngsebeched el melisiich e ousubes e olecholt a bltikerreng. Te mle blechoel melekoi a ungil kirir a rebebil. Ngmle soak loukerebai er tir.”

15. Ngmekera Osisechakl 27:17 e ochotii a uchul me ngkired el omak a klausechelei er kid me a chad el mesuub el mei er a miting?

¹⁵ Momak er a klausechelei er kau me a chad el mesuub. Molemolem el olecholt er a klemeriarreng er kau er ngii sel lemei er a miting. (Fil. 2:4) Molasem el mengedecheduch er ngii. Ngsebechem el chotengii er a ungil omelodech el bla leruul e oker er ngii el kirel a omesubel, telungalek er ngii, me a urerel. Me nguaisei, engdi moruul uaisei el ngar er a rolel e ngdiak mrellii el mo merur. Chouaika el cheldechedechemiu a sebechel lolekes er a deleuill er kemiu. Sel bom sechelil a chad el mesuub e ke olengeseu er ngii lolengeriakl el mo nguu a techolb. (Monguiu er a Osisechakl 27:17.) A Hanae er chelechang a mesiou el ta er a regular pioneer. Ngmelatk er a lomuchel el ngar er a miting, e melekoi el kmo: “Sera lebo er ngii a resechelik er a ongdibel, e ak mlo semeriar el mora miting, e mong alta ngmesaul a bedengek. Ngkmal mle soak lobengterir tirka el beches el sechelik e tia ngilsukak el dmort a klausechelei er ngak me tirke el dimlak losiou er a Jehovah. Ngmle soak el lmuut el mo kmeed er a Jehovah me a rudam me a rudos. Sei a uchul me ak mlo metecholb.”

16. Ngera dirrek el sebechem el meruul el ngosuir a chad el mesuub el mo omelechesiu el kmo, ngchedal a ongdibel?

¹⁶ A chad el mesuub sel lolemolem lolengeriakl e loruul omelodech er a klengar er ngii, e mngesuir el mo melechesuar el kmo ngchedal a ongdibel. Ngsebechem el meruul el uaisei sel momtechakl er ngii. (Heb. 13:2) A Denis el kiei er a Moldova a melatk aike el taem er a losuub a Biblia e melekoi el kmo: “Ngmle betok el taem el rudam a milengemedaol er ngak me a bechik el mo obengterir. Aki mlo medengei a rolel a Jehovah ullengeseu er tir. Tia millisiich er kemam. Aika el taem el ki mulengoit lobengterir a ulelterekokl a rengmam el kmo, ngsomam el mesiou er a Jehovah e ngar ngii a ungil klengar el kltmokl el kiram.” Me a chad el mesuub sel lebo el publisher, e ngdirrek el sebechem lolengit er ngii el mo obengkem loldingel. A Diego el publisher er a Brazil a melekoi el kmo: “Te betok el odam a ulengit er ngak el mo oldingel lobengterir. Tia mle kot lungil rolel e ak mo medengelterir. Sera bo kudengelterir e ak siluub a betok e mlo melechesukak el kmeed er a Jehovah me a Jesus.”

TE MEKERA REMECHUODEL E SEBECHIR EL LOLENGESEU?

17. Te mekera remechuodel e sebechir el lolengeseu er a rechad el mesuub?

¹⁷ Mongoit a taem lobengterir a rechad el mesuub. Remechuodel, a klemeriarreng er kemiu er a rechad el mesuub a sebechel ngosuterir el mo olengeriakl el mo nguu a techolb. Kau, ngsebechem el blechoel mengedecheduch er a rechad el mesuub el mei er a miting? Te mo melechesuar a klemeriarreng er kau er tir a lsekum ke mo medengei a ngklir, tokubets sel lomuchel el onger. Ngsebechem el kutmeklii a taem el mo obengkel a ta er a publisher el mora study er ngii? Nglocha diak modengei el kmo ngkmal klou a obo mngesuir. A Jackie el pioneer er a Nigeria a melekoi el kmo: “A rebetok el mesuub a kmal mechas a rengrir sel bo lodengei el kmo a odam el ulebengkek el mo mesuub lobengterir a ta er a remechuodel. A ta er a mesuub a dilu el kmo: ‘A bastor er ngak a kmal diak bo loruul el uaisei. Ngika di oldingel er a remerau a lsekum te harau er ngii!’” Ngika el mesuub a mla omuchel el ngar er a miting.

18. Te mekera remechuodel e oltaut er a ngerechelir el ngar er a Rellir 20:28?

¹⁸ Molisechakl e molisiich er tirke el mesuub el lobengterir a rechad. Remechuodel, ngngar ngii a oberaod el ngerecheliu el lolengeseu er a re publisher el mo meduch lomerk e olisechakl. (Monguiu er a Rellir 20:28.) A lsekum a chad a merur el study lobengkel a chad er medam, e mdu er ngii el kmo ngsebechem el loungerachel er a study er ngii. A Jackie el dulsaod er ngii er a uchei a kmo: “A remechuodel a blechoel loker el kirir a rechad el kusuub lobengterir. E sel bok chebangel a omelsemai er a omesubek lobengterir, e te omeskak a ungil ngeso er a uldasu.” A remechuodel a kmal klou a sebechir el rullii el mo melisiich er a remesuub lobengterir a rechad e ngosuterir el melemolem er tia el lureor. (1 Th. 5:11) A Jackie a melemolem el melekoi el kmo: “Ngkmal soak sel lolisiich er ngak a remechuodel e louchais er ngak el kmo te oba omereng el saul el kirel a meringel el urerek. Aika el tekingir a omekbeches a reng el di ua mekelekolt el ralm el kolekeltii a rengul a chad er a ringel el sils. A ungil tekingir a rullak el mo melechesuar el kmo a kungil meruul er a ngerechelek el mesuub el obengterir a rechad. Ngdirrek el rullak el lmuut el mo dmeu a renguk.”​—Osi. 25:25.

19. Ngera el deurreng a sebeched el mo oba el rokui?

¹⁹ Me alta ngdiak a chad el dosuub lobengkel engdi ngdirk sebeched el ngosuir a chad lolengeriakl er a tekoi er a klereng. Ngsebeched el olengeseu er a chad er a study er ngii sel deketmokl aike el soad el mo melekoi e meruul el uaisei el ngar er a rolel e ngdiak bo domerober er a study er ngii. Ngsebeched el omak a klausechelei er kid lobengterir a remesuub a Biblia el mei er a Blil a Ongdibel e kutmeklii a ungil kerebai el kirir. E a remechuodel a sebechir el melisiich er a remesuub a Biblia sel longoit a taem el obengterir. Te dirrek el sebechir a remechuodel el melisiich er tirke el mesuub lobengterir a rechad sel lolisechakl e lechat er tir. Ngdiak a deurreng el mo uai sel dodengei el kmo ngngar ngii a derirellii el mo ngosuir a chad el mo betik a rengul er a Demad el Jehovah e mo mesiou er Ngii.