Ngmera el Ungil a Klengar er Ngak el Mesiou er a Jehovah

Ongingil el rak e ngtilobed a subed el kmo te ousbech er a re volunteer el mora branch er a South Africa e le te mo install er a beches el mesil el print er isei. Me ak lilechesii a ngklek e kmal mle dmeu a renguk er a le ngiltak. Ngdirrek el mla er ngii a lmuut el tedei el odam er a Bethel er a Canada el mlengilt. Tirka Dennis Leech, Bill McLellan, me a Ken Nordin. Te dilu er kemam el kmo ngdi one-way a ticket er kemam el mora South Africa!

Me ak kuluudengua el mora delak el kmo: “Mami ak mora South Africa!” A delak a mle cheklmuk el redil engdi ngkmal mle mesisiich a klaumerang er ngii me a deleongel er ngii me a Jehovah. Ngdimlak a kmal tekingel engdi ngkilengei er a uldesuek el mora South Africa. Ngii me a demak a dimlak lomtok er ngak el merael engdi ngkmal mle mekngit a rengrir e le kmal mo er cheroid.

MORA SOUTH AFRICA!

A kot e aki mlora Brooklyn Bethel el mo melai a training el edei el buil el kirel a ileakl el rolel a printing. A uriul e aki ngilasech er a diall el mora Cape Town, South Africa. Ngkmal dirk mlo lluich a rekik. Sera ki bora Cape Town e aki ngilasech er a train el mora Johannesburg. Tia mle klebesei. A kot el basio el ki blo mstob er ngii er a lobunga llomes a mlara Karoo, el ngii a kora medideriik el basio. Ngdi hokori e mekeald. Aki mlo ultom er a mado el teuang e melatk el kmo tia ngngera el basio. Aki mle bekikl el kmo ngmo uangerang tia el assignment er kemam. Betok el rak er uriul e aki liluut el mei er tia el basio el kmal somam le ngkmal mekekerei a delengchokl er ngii e budech.

A mle ngerechelek el telkib el taem a uluureor er a kmal mengasireng engdi ngmeringel a usbechel el mesil el Linotype machine el print a Ongkerongel me a Awake! A obis er a branch a mle print a magazine el ngar er a betok el omelekoi er a Africa el kirel aike el beluu er a South Africa me a dirrek el lmuut el bebil er a beluu er a Africa. Ngkmal mle dmeu a rengmam el mesa tia el mesil el luldurokl er ngii er a Canada el mei lemui lousbech er ngii!

A uriul e ak mlo oureor er a obis er a Factory el ngii a uluungerachel a tekoi er a printing, shipping, me a ureor loleiuid. Ak kmal mle mechesang engdi ngkmal mle dmeu a renguk e mla er ngii a belkul a klengar er ngak.

CHEBECHIIL ME A BECHES EL NGERACHEL

Sera 1968 e ak mlo bechiil ngak me a ta er a pioneer el odos el Laura Bowen, el ngii a mle kiei el kmeed er a Bethel. Ngika dirrek el luluureor er a Bethel el type el kirel a department er a ruliuid. Ngar tiakid el taem e ngdimlak el sebechir a redirk mlo bechiil el chad el melemolem el ngar er a Bethel me te milsekemam a assignment er kemam el mo special pioneer. Ak mle telkib el bekikl. Ngmla mo teruich el rak el kngar er a Bethel el ngar ngii a blik e tir a blechoel lomeskak a kelek. Kemam ngsebecham el ngmai aike el rokui el ki mousbech el ousbech er tia el kekerei el udoud el lomesterir a re special pioneer? Ngak me a Laura lomeskemam a derta er kemam a 25 el rand (el ngii er seikid el taem e ngmle $35 el udoud er a Merikel) er a bek el buil a lsekum aki remuul aike el kirel ildisel a temam, return visit er kemam, me a babier el dorous. Tiakid ludoud aki mousbech er ngii el harau er a cheral a blimam, omechar a kall, olidiuul, me a ngii di el rolel a ukeruul me a tekoi el ki mousbech.

Aki mlo special pioneer er bita er a beluu er a Durban el ngii a ngar er a Indian Ocean. Te mle betok a rechad er a India el kiei er tia el basio e le klou el ildois er tir a uldelid er a rechad er a India el mlei er a bekord el 1875 el mo oureor er aike el siobai el meruul a sukal. Chelecha e te meruul a kakerous el ureor engdi te dirk olab a siukang er tir me a kelir el ngii a uldimukl a kakerous el bedengel a kare el kmal ungil a telemtemul. Tirka dirrek el melekoi a tekoi er a Merikel me tia rirellii el kmal mo beot er kemam.

A re special pioneer a mle kirir el mengoit er a 150 el sikang el omerk er a klumech. Me ngak me a Laura tilbir el mo meruul elolem el sikang er sel kot el sils er kemam er a odingel. Ngmeral mle mekeald. Ngdimlak a study me a return visit er kemam me ngmle kiram el oldingel a obliil el elolem el sikang. Telkib el taem e a kulemes er a klok er ngak. Ngdirk 40 el bung er aki momuchel! Ak millatk el kmo, kemam aki mekera e sebecham el special pioneer?

Telkib el taem e ngmlo sebecham el rullii a ungil routine er kemam. Ngbek el sils el ki moruul a kelam el sandwich e locha soup me a lechub e ngkohi er a mahobing. Sel ki bo mousbech lolengull e aki park er a mlimam er a cheungel a kerrekar. A lebebil e a rengalek er a India me iliueklemam e olengeng er kemam el mechas a rengrir e le ki mle ngodech er tir. Sesei el klebesei e aki mlo mtebengii el kmo a uriul er a eru me a lechub e ngedei el sikang el ki moldingel e ngii a kora kmal mo mereched a taem.

Ngmera el mle dmeu a rengmam el louchais er a klemerang el mo er tirka el chad el kmal mle meduch lomtechakl er a rechad! Aki milsa el kmo a rechad er a India a kmal mengull er a rebebil, medemedemek, e betik a rengrir er a Dios. A rebetok el Hindu a kilengei er a klumech el ki mulemerk er ngii. Ngkmal mle sorir el mesuub el kirel a Jehovah, Jesus, Biblia, beluulechad er a ngar medad el budech, me a omelatk el kirir a rulekoad. Ta el rak er uriul e ngmlo er ngii a 20 el study er kemam. Bek el sils e ngta el ki momengur lobengkel a ta er tirke el telungalek el ki mosuub el obengterir. Ngmeral mle dmeu a rengmam.

Me nguaisei, ngdimlak el meketeket e aki ngiluu a beches el ngerachel. Aki mlo mesiou loldingel a ongdibel er aike el beluu el ngar bita er a Indian Ocean. Ngderta el sandei el kim kie kakerous el blai e oldingel er a re publisher er a ongdibel el melisiich er tir. Tirke el telungalek el kim blo mkiei lobengterir a ngilikemam el mo chedal a telungalek er tir. Ngkmal mle dmeu a rengmam el mengoit a taem el obengterir, tir me a rengelekir me a chermir. Aki milsiou el loldingel a ongdibel el eru el rak e a branch obis a omekedong er kemam. A odam a dilu el kmo, “Aki omdasu a lmuut el melai er kemiu el me mesiou er a Bethel.” Me ak dilu el kmo, “Kemam a kmal dmeu a rengmam er a klengar er kemam er tiang.” Nguaisei, engdi ngmle dmeu a rengmam el mo mesiou er a ngii di el basio el le assign er kemam.

LMUUT EL MORA BETHEL

A ngerechelek er a Bethel a mlo oureor lobengkel a Service Department el obengterir a rudam el kmal mle mellomes e klou a klemedengei er tir. Ngar tiakid el taem e a rudam el oldingel a ongdibel a mle blechoel el send a report el mora branch er a uriul er a loldingel er a ongdibel. Seikid e a Service Department a kuk odureklii a babier el mora ongdibel el kirel a report er a odam el oldingel a ongdibel. Aika el babier a lurruul el mo melisiich er a ongdibel e omesterir a ulekrael a lsekum te ousbech er ngii. Tia mle klou el ureor el kirir tirke el milsiou el secretary e le te uleiuid a babilengir a rudam el oldingel a ongdibel el ngii a mle tekoi er a Xhosa, Zulu, me a lmuut el bebil er a omelekoi el mo tekoi er a Merikel, e a uriul e te kuk oliuid a babilengel a branch el mo tekoi er aika el beluu. Ak mera el oba omereng el saul el kirir tirka el blak a rengrir el lodam el milsiou el uliuid el ngilsukak el dirrek el mo medengei a ringel el lechilebangel a rudam me a rudos er kid el mechedelekelek el chad er a Africa.

Ngar tiakid el taem e a rolel a kabelment er a South Africa a mileakl er a rebecheleleu me a remechedelekelek. Ngmla er ngii a ulterekokl el basio el lekiei me a rechad el kakerous a chiro er tir a dimlak el lsal sebechir el dmak. A rudam me a rudos er kid el mechedelekelek el chad er a Africa a di millekoi a tekingir, omerk el ngar er a tekingir, e mora miting er a ongdibel el melekoi a tekingir.

Ngdimlak kudengelterir a rebetok el mechedelekelek el chad er a Africa e le ngerechelek er a territory er a ongdibel er ngak a blechoel lobengterir tirke el melekoi a tekoi er a Merikel. Engdi chelecha ngmocha er ngii a techellek el mo medengelterir a remechedelekelek el chad er a Africa me a siukang er tir. Ak mlo medengei a omelsemai el lechilebangel a rudam er a siukang me a klaumerang er tir. Tirka kmal uleba blekeu! Te ultngakl a siukang el dimlak el mengai er a Bades e dimlak el kengei el mo teloi a omeruul el chelsechusem er a oltuubladek, alta te mlo chelebangel a meringel el ultok er a telungalek er tir me a rechad er a beluu. Ngkmal mle klou a chelebuul er aike el oberberk el beluu. A rebetok a dimlak a skulir me nguaisei engdi te milengull er a Biblia.

Ngmla er ngii a ileakl el techellek el mesiou er aike el kerrekeriil el kirel a ilmokl er a omengull me a dirrek el kerrekeriil el kirel a diak domekbitang er a tekoi er a balatiks. Ngkmal millisiich er a klaumerang er ngak lomes er a blakerreng er a remekekerei el ngalek el Sioning el tir a ble le expell er tir er a skuul le te dimlak el kengei el teloi a nglunguuch me a lechub e longitakl a chelitakl er a klechelid.

A rudam er a beluu er a Swaziland (el chelechang e ngokedongall el Eswatini) a dirrek el mlo chelebangel a omelsemai. A rokui el chad er tia el beluu a mle kirir el mo meruul aike el siukang er tir sel lemad a chad er sel taem er a lemad a King Sobhuza II. A resechal a mle kirir el tuamk a chiurir e a redil a mle kirir el tmuk a chiurir el mo mekekedeb. Rebetok er a rudam me a rudos a mlodechelakl e le tir el dimlak el kengei el mo meruul er tia el tekoi el chelsechusem er a omengull er a rebladek. Ngkmal remutech a rengud a blakerreng er tir el mora Jehovah! Aki siluub a betok el kirel a blakerreng me a kllourreng er tirka el rudam er kid er a Africa el ngii a kmal milleketek a klaumerang er kemam.

LMUUT EL MORA BLIL A PRINT A BABIER

Sera 1981 e ak mlukngerachel el mo olengeseu el print a babier el ousbech a computer. Me ak liluut el mo oureor er a blil a de print a babier. Tia kmal mle ileakl el taem! Ngmengodechang a rolel a de print a babier. A ta er a chad lolterau a klalo a milsa branch a beches el mesil el mo tames er ngii el di tada. Tia mlo uchul e aki miltechei aike el 9 el mechut el mesil er a 5 er aika el beches. Aki dirrek el mle install er a beches el printing press. Ngmeredechang a rolel a de print!

Rolel a computer a uchul me ngmlo er ngii a beches el prokuram el MEPS, Multilanguage Electronic Publishing System. Technology a kmal mla ngodechii a rolel a de print el kuk ngodech er sera kemam el teua el odam er a Canada a kim kot el mei er a South Africa! (Isa. 60:17) Seikid el taem e kemam el teuang a mla mo becherir a re pioneer el odos el kmal mle betik a rengrir er a Jehovah. Ngak me a Bill a dirk milsiou el ngar er a Bethel. A Ken me a Dennis a mlo er ngii a telungalek er tir e dimlak el kiei el cheroid er kemam.

Ngdi mirrael el mo betok a ureor er a branch. Aika el babilenged el mengai er a Biblia a di mirrael el mo betok a oidel me a otebedel el ngar er a kakerous el omelekoi. Aki dirrek el uldurokl aika el babilenged el mora aike el kuk bebil er a branch. Tia mlo uchul me a ki mlo ousbech er a beches el basio el bo lekiei er ngii a rudam loureor. Me a rudam a milekedecherur tia el basio er ngebard er a Johannesburg e te dedicate er ngii er a 1987. Ngkmal mle dmeu a renguk el mesa okurulel a ureor e dirrek el mesiou el chedal a Branch Committee er a South Africa el betok el rak.

LMUUT EL TA ER A BECHES EL NGERACHEL!

Ngkora kmal mlo mechas a rengmam e le te mle invite er ngak er a 2001 el mo mesiou er a Branch Committee er a beluu er a Merikel. Alta ngkmal mle mekngit a rengmam le ngdimlak el somam el choititerir a resechelimam me a ureor er a South Africa, engdi aki dirrek el uluusemeriar el lomuchel er a beches el klengar er kemam er a Bethel er a beluu er a Merikel.

Me nguaisei, aki kora mle bekikl a merael e choitii a delal a Laura el kmal chudelang. Ngdimlak el sebecham el ngar er a New York e olengeseu er ngii. A retedei el merrengel a Laura a kilengei el mo olengeseu er a derrir er aike el rokui el lousbech. Te dilu el kmo, “Ngdiak el sebechemam el mo teloi er a ureor el mui el taem me nguaisei engdi aki molengeseu er a Mami er aike el lousbech e ngsebecham lolengeseu er kemiu el melemolem el ngar er a mui el taem el omesiou.” Aki kmal loba omereng el saul el kirir.

A brother er ngak me a bechil el kiliei er a Toronto, Canada a dirrek el kilengei el mo omekerreu er a delemam el ngii a melakl el dil. Ngika kiliei el obengterir el betok er a lluich el rak. Aki kmal loba omereng el saul e le te kmal ulemekerreu er ngii el mo lmuut er a kodellel. A delak a mlo smecher er a telkib el taem er uriul er a ki bora New York. Ngmera el klengeltengat el telungalek er kemam a kmal kilengei el melodech a klengar er tir el mo omekerreu er a remechudelang el chad er a blimam, e le ki medengei el kmo tia kmal diak lebeot el tekoi!

A kuluureor er a blil a rellel aika el babilenged er a branch er a Merikel el betok el rak, el chelecha e ngkmal mla mo mereched e beot a rellel. Chelecha e ak mla mo oureor er a Purchasing Department. Ngmera el dmeu a renguk el chedal tia el telungalek er a Bethel el chelecha ngmla mo bekord el 5,000 a chedal e bekord el 2,000 a rechad el me oureor el olengeseu er ngii!

Ngkmal dimlak kudengei el kmo tiakid a mo klengar er ngak er a okolem el rak er a mla me mong. A Laura a kmal di mle support er ngak er a chelsel tiakid el taem el rokir. Ngmera el lungil a klengar ngak! Aki kmal mengreos aike el kakerous el ngerachel el ki blo molab me a rechad el kim uluureor el obengterir. Tirka uldimukl er tirke el ngar er aike el betok el branch el ki blo moldingel el ngar er a omesiungam. Chelecha el bla bo lokai me a derengel a rekik e ngmla mo mekesai a ngerechelek e le ngar ngii a remekekerei el lodam el bla losisecheklterir el mo meruul.

A ta er a milluches er a Psalm a dilu el kmo: “Ngeltengat a beluu el oudios er a [Jehovah].” (Psa. 33:12) Tia mera el klemerang! Ak mera el oba omereng el saul el mlo sebechek el mesiou er a Jehovah lobengterir a redmeu a rengrir el chedal.