Kede Mesiou er a Dios el “Meteet ra Klechubechub”

1. Kede locha mo melatk er a ngerang sel dolatk er a chad el chubechubechad?

SEL dolatk er a chad el chubechubechad e kede mdesuii a chad el ungil a blekerdelel, bekokuii, e bekururau. Kede locha mo melatk er sel cheldecheduch er a Jesus el kirel ngike el ungil chad er a Samaria. Ngika el chad er a ngodech el beluu a “mlor chomerellel a klechubechub el mor” a chad er a Chijudea el lechillebedii e ruchorech a kloklel. Ngika el chad er a Samaria a mlo “chubur” e kmal mle ungil kutmeklii. (Lk. 10:29-37, BT) Tia el okesiu a omeketakl er a blekerdelel a Jehovah el chubechubechad. A Dios a chubechub e le ngbetik a rengul er kid. Ngika ochotii tia el klechubechub er ngii er a bek el sils loeak a omerellel el mei er kid.

2. Ngera dirrek el ta er a rolel e ngmocholt a klechubechub?

² Ngar ngii a dirrek el ta er a rolel e a chad ochotii a klechubechub. A chad ochotii a klechubechub a lsekum ngdiak lomals er a chad el kirel sel kmal belsel. Ngoeak tiaikid el rolel e a Jehovah a mla ochotii a klechubechub el mei er kid. A ta er a milluches er a Psalm a melekoi el kmo, “Ng diak lomals er kid el ngar sel kmal kirel belsed.” (Psa. 103:10) Engdi ngar ngii a bebil taem el Jehovah a mo msang a chad el mla ruebet er a klengit a mesisiich el omesmechokl.

3. Ngera el ker a bo donger?

³ Ngar tia el suobel e kede mo onger a edei el ker: Ngera uchul me a Jehovah olecholt er a klechubechub? Ngsebechel a chad el nguu a mesisiich el omesmechokl e a osisiu el taem e ngmocholt er a klechubechub? E ngera ngosukid el mo olecholt er a klechubechub? Ka me desa rolel e a Biblia onger aika el ker.

UCHUL ME A JEHOVAH OLECHOLT ER A KLECHUBECHUB

4. Ngera uchul me a Jehovah olecholt a klechubechub?

⁴ A Jehovah kmal soal lolecholt er a klechubechub. A apostol Paulus a mlukreng el mo meluches el kmo a Dios a “meteet ra klechubechub.” A Paulus a milsaod el kmo a Dios a chubechub e le ngomesterir a rengellitel el chedal el tir a diak el mecherrungel a omelatk el mo kiei er a eanged. (Efe. 2:4-7, BT) Me nguaisei engdi a klechubechub er a Jehovah engelakl er tiang. A David el ta er a milluches er a Psalm a milluches el kmo: “Ngii a ungil el mor a re bek el chad e ngar ngii a klechubechub er ngii el mor a ikel rokui el le riruul.” (Psa. 145:9) A Jehovah a betik a rengul er a rechad me ngolecholt a klechubechub el mo er tir sel sebechel meruul uaisei.

5. Ngmilekera Jesus e suubii a klechubechub er a Jehovah?

⁵ A Jesus ngike el kot lungil medengei el kmo, a Jehovah kmal soal lolecholt er a klechubechub. Ngika el Chedam me a Ngalek a dilak el ngar er a eanged el betok el telael el rak er a lekot lobeob a rechad el mo er sel taem er a lemei er a chutem a Jesus. (Osi. 8:30, 31) Ngmle betok el taem el Jesus a ulemes er a Demal lolecholt er a klechubechub el mora rechad el ngar er a klengit. (Psa. 78:37-42) A Jesus er a lolisechakl e ngmle blechoel el mesaod er tia el klebokel el blekerdelel a Demal.

6. Ngmilekera Jesus e ngosukid el mo melechesuar er a klechubechub er a Jehovah?

⁶ El ua dulsaod er a uleakuchei el suobel, a Jesus a uluusbech er a okesiu er a ririid el ngalek el omekesiu el kmo, a Jehovah a kmal soal lolecholt er a klechubechub. Ngika el ngalek a chilitii a delengcheklel e “okngemed a ududel er a tametereng el klengar.” (Lk. 15:13) A uriul e ngulebult er a kngtil e ngiluu a rengul el moriou e mirrael lmuut el mo remei. Me ngmilekera demal er a lebe rrei? A Jesus a dilu el kmo: “Ng dirk mle cheroid er a blai [ngika el ngalek] e a demal a mesang, me ng kmal mlo chubur, me ng rirurt el mong el mechulii ngiil ngelekel e turengur a medal.” Ngika el rubak a dimlak lomekrur er a ngelekel. Ngbai uleba klechubechub el ousubes er ngii e outkeu er ngii el lmuut el mei er a telungalek er ngii. Ngika el ngalek a kmal riruul a klengit engdi ngii el ulebult a uchul me a demal a uluusubes er ngii. Ngika el chubechub el chedam er tia el lokesiu a omtechei er a Jehovah. Ngar tia el klebokel el rolel e a Jesus ulechotii el kmo, a Demal a kmal soal lousubes er a rengar er a klengit el tir a obult er a kngterir.​—Lk. 15:17-24.

7. Ngmekera klechubechub er a Jehovah e ochotii a llemesel a rengul?

⁷ A Jehovah olecholt er a klechubechub el lolechotel a diak lemokesiu el llomeserreng er ngii. A llomeserreng er a Jehovah a diak di lolechotel a klemedengei er ngii. A Biblia melekoi el kmo a “llomeserreng el ngar bab el mei” a “mui er a klechubechub, e meruul a bek bedengel a ungil.” (Jak. 3:17) A Jehovah a di ua betik a rengul el chad er a blid el medengei el kmo a klechubechub er ngii a mo uchul a klungiolel a rengelekel. (Psa. 103:13, NW; Isa. 49:15) Ngii lolecholt er a klechubechub el mo er tir a uchul me alta te diak lemecherrungel engdi ngngar er ngii a omeltkir el kirel a ngar medad. Me a llemesel a rengul a Jehovah a odbechii el mo olecholt er a klechubechub sel lsebechel meruul uaisei. Osisiu el taem e a klechubechub er a Jehovah a tabesul. Ngkmal diak bo lolecholt er a klechubechub el melemolem er a mekngit.

8. Ngera kirel meketmokl a lebebil er a taem, e ngera uchul?

⁸ Omko mesiungel a Jehovah durengul el meruul a klengit. E kede mo mekerang? A Paulus a mlukreng el mo meluches el kmo: “Ng diak bo mobengkel.” (1 Ko. 5:11) A rengar er a klengit el diak lekengei el obult a mo mesuld a ngklir er a ongdibel. Tia kirel meketmokl el omekerreu er a reblak a rengrir el odam me a odos e dirrek lolechotel a chedaol rolel a Jehovah. Me nguaisei engdi rebebil a locha mo meringel er tir omes er a omesuld el ngakl el olechotel a klechubechub er a Dios. A omesuld el ngakl, ngmera lolechotel a klechubechub? Ka me dosaod er ngii.

NGSEBECHEL A MERINGEL EL OMESMECHOKL EL OCHOTII A KLECHUBECHUB?

9-10. A doltirakl er a Hebru 12:5, 6, e ngera uchul me ngsebeched el melekoi el kmo a omesuld el ngakl a olechotel a klechubechub? Momekesiu.

⁹ Ngkmal mo mekngit a rengud sel derengesii a announcement er a miting el kmo, a chad el dodengelii e betik a rengud er ngii “a mla mo diak el ta er a Sioning er a Jehovah.” Kede locha mo melatk el kmo, ngkmal mle kirel mesuld a ngklel? Me a omesuld el ngakl ngmera el olechotel a klechubechub? Nguaisei. Le ngdiak lolechotel a llomeserreng, klechubechub, me a bltikerreng a lsekum e kede orreked omesmechokl er a chad lousbech er ngii. (Osi. 13:24) A omesuld el ngakl ngsebechel ngosuir a chad el lobult er a kngtil? Ngkmal sebechel. A rebetok el odam me a odos el mirruul a oberaod el klengit a melekoi el kmo, tir el milsuld a ngklir a ngilsuterir el melechesuar a klengit el lurruul, obult er a kngterir, e lmuut el mei er a Jehovah.​—Monguiu er a Hebru 12:5, 6.

¹⁰ Molatk er tia el okesiu. A mengkerengel a sib a mesa el kmo a ta er a chermel sib a smecher. Ngmedengei el kmo ngkirel eklii er a delebechel e omekerreu er ngii er tia el secherel. Me nguaisei engdi sib el charm a rruul el kirel obengkel a delebechel me nglocha mo meringel er ngii a mo cheroid er tir. Me tiang ngbelkul a kmo ngika el mengkerengel a sib a kmal mekngit a blekerdelel el mla eklii er a delebechel? Ngkmal diak. A mengkerengel a sib a medengei el kmo a lebecherei me lobengkel a delebechel e ngsebechel loberk tia el secherel el mora ike el bebil sib. Ngomekerreu er a delebechel sel loleakl er ngii er aike el bebil.​—Momekesiu er a Levitikus 13:3, 4.

11. (a) Ngoeak a ngera el rolel e ngsebeched lomekesiu er a chad el mla mesuld a ngklel el mora smecher el sib? (b) Ngera sebechir el meruul a reseluld a ngklir e ngera el ngeso a lengai?

¹¹ A Kristiano sel lemesuld a ngklel e ngsebeched lomekesiu er ngii el ua ngika el smecher el sib. Ngika smecher er a klereng. (Jak. 5:14) A secher er a klereng a di ua bebil rakt el sebechel el mo bekoiueiuul. Me a uchul me a lebebil e ngusbechall a chad el smecher el mo meakl er a ongdibel. Tia el omesmechokl a olechotel a bltkil a rengul a Jehovah el mora reblak a rengrir el chedal a delebechel er ngii. Ngdirrek el sebechel subechii a rengul ngike el rirebet er a klengit e odbechii el mo obult. A chad el seluld a ngklel a dirk sebechel mei er a miting el melai a okelel a reng e meleketek er a klaumerang er ngii. Ngsebechel melai aike el babilenged el bo lousbech er a di bedengel e dirrek el sebechel lomes a JW Broadcasting^®. A remechuodel sel lomes er ngii el meruul a omelodech er a klengar er ngii, e ngmo ngar ngii aike el taem el bo lomsa ulekrael lolengeseu er ngii el meruul er a deleuill er ngii me a Jehovah me bo lsebechel lmuut el mei er a ongdibel el ta er a Sioning er a Jehovah.b

12. Ngera el olechotel a bltikerreng me a klechubechub el tekoi a loruul er ngii a remechuodel el mo er tirke el diak lekengei lobult er a kngterir?

¹² Ngklou a ultutelel a lak dobes el kmo ngdi tirke el diak lekengei lobult a mesuld a ngklir. A remechuodel a medengei el kmo a omesuld el ngakl a oberaod el tekoi me ngdiak di el beot er tir a melib el kirel tiang. Te medengei el kmo a Jehovah mesmechokl “el mo er sel kirel.” (Jer. 30:11, NW) Ngbetik a rengrir er a rudam er tir e kmal diak el sorir el meruul a tekoi el mo uchul a telemellir. Me nguaisei engdi a lebebil e ngolechotel a bltikerreng me a klechubechub a lsekum e ngmesuld a ngklel a chad el telkib el taem.

13. Ngera uchul me a ta el Kristiano er a Korinth a mle kirel mesuld a ngklel?

¹³ Molatk er a omerellel a apostol Paulus el mora chad el dimlak el kengei lobult er a kngtil. Ngmla er ngii a Kristiano er a Korinth el uluusechelei er a bechil a demal. Tia mera el kikiongel el omeruul! Me a Paulus a mle medengei el kmo, a irechar e a Jehovah dilu er a rechad er a Israel el kmo: “A chad el mo bad el obengkel a bechil a demal a mla mekerrengii a demal, me te dul mo okodall.” (Lev. 20:11) Me nguaisei a Paulus a dimlak el sebechel dmu er a ongdibel me lokodir ngika el chad, engdi ngdilu er tir el kmo le seldii a ngklel. Tia el kikiongel lomerellel ngika el chad a ngar ngii a lerirellii er a rechad er a ongdibel, e le rebebil er tir a mlo omdasu el kmo tia el loruul er ngii a diak el oberaod el klengit!​—1 Ko. 5:1, 2, 13.

14. Ngmilekera Paulus e ochotii a klechubechub el mo er ngike el chad er a Korinth el ulebult er a kngtil, e ngera uchul? (2 Korinth 2:5-8, 11)

¹⁴ A uriul e a Paulus a mlo medengei el kmo ngika el chad a mla ngodechii a klengar er ngii. Ngika mera el ulebult! Me alta ngmlo uchul a rur el mora ongdibel, me nguaisei a Paulus a dilu el kmo lak el sal “kmal omekringel er ngii.” Ngdilu er tir el kmo: “Ng kiriu er chelechal bai ousubes er ngii e omekebek er a medal.” E ngera uchul? Ngmelemolem el melekoi el kmo: “Me lak bo le meeleb er a klou el klengiterreng.” A Paulus a mlo chubur ngika el chad el mla obult. Ngdimlak el soal a lesal mo mekngit a rengul er a tekoi el lerirellii e bo lemechitechut a rengul me bo lak el lsebechel losiik a klausubes.​—Monguiu er a 2 Korinth 2:5-8, 11.

15. Te mekera remechuodel e omsa chad a mesisiich el omesmechokl e a osisiu el taem e te olecholt er a klechubechub?

¹⁵ Me a remechuodel a oukerebai e a Jehovah lolecholt er a klechubechub. Te msa chad a mesisiich el omesmechokl a lsekum e ngkirel engdi te olecholt er a klechubechub a lsekum e ngsebechel. A lsekum a remechuodel a diak losmechokl er a chad el mlora klengit e tia diak lolechotel a klechubechub te bai melemolem er a klengit el ngar ngii. Me nguaisei, engdi te di remechuodel a kirir lolecholt er a klechubechub?

NGERA SEBECHEL NGOSUKID EL ROKUI EL MO OLECHOLT ER A KLECHUBECHUB?

16. A doltirakl er a Osisechakl 21:13, e ngngera ngmo meruul er ngii a Jehovah el mo er tirke el diak lekengei el olecholt er a klechubechub?

¹⁶ A rokui el Kristiano a melasem el mo chubechub el uai a Jehovah. E ngera uchul? A ta er ngii a Jehovah diak bo lorrenges er tirke el diak lekengei lolecholt er a klechubechub. (Monguiu er a Osisechakl 21:13.) Ngdiak a ta er kid el soal a Jehovah lak lorrenges a nglunguchel, sei a uchul me ngdiak el soad el mo medecherecher a rengud. Ngdiak el soad el mengad a dingad er a Kristiano el chelebangel a ringel e ngbai kired el kltmokl el mo “rongesii a lolengit a ngesou.” Me kede mora tkurrebab el sebeched loltirakl er tia el bades el kmo: “Ngikel diak le chubechub a mo nguu a kerrekeriil el diak a klechubechub er ngii.” (Jak. 2:13, BT) A lsekum e ngmoriou a rengud e diak dobes el kmo kede kmal ousbech er a klechubechub, e seikid e ngmo beot er kid olecholt er a klechubechub. Ngtokubets el soad el mo olecholt er a klechubechub a lsekum a chad el rirebet er a klengit a lmuut el mei er a klemerang.

17. Ngmilekera King David e ochotii a klechubechub?

¹⁷ A kerebai er a Biblia a dirrek el ngosukid el mo olecholt er a klechubechub e diak bo le debsochel a omerelled. El uai tiang, molatk er a King David. Ngika mle blechoel el olecholt er a klechubechub. Alta Saul a mle soal omekoad er ngii, engdi a David a ulechotii a klechubechub el mora ngellitel el king er a Dios e dimlak a ta el bo lolaitechei.​—1 Sa. 24:9-12, 18, 19.

18-19. A David ngdimlak lolecholt er a klechubechub er a ngera el eru el blekeradel?

¹⁸ Me nguaisei engdi David a dimlak leblechoel lolecholt er a klechubechub. El ua tiang, a Nabal a mle mekngit a omerellel el chad. Ngika dimlak lochotii a omengull el mora David e dimlak el soal lomsa David me a rechedal a kall. Me a David a kmal mlo kesib a rengul me ngmle soal lomekoad er ngii me a rokui el sechal er a telungalek er ngii. Me nguaisei engdi bechil a Nabal er a Abigail a mle ungil a omerellel e klou a rengul, me ngdi mle mereched el mo msa kall a David. Me a David a dimlak bo el chelsechusem er a rsechir a rechad.​—1 Sa. 25:9-22, 32-35.

¹⁹ A kuk ta er a taem e a profet Nathan a uluuchais er a David el kirel a merau el chad el rirecherechii a chermel a chebuul el chad el sib. A David a kmal mlo kesib a rengul e dilu el kmo: “Ak ulsiich a tekoi el ngar medal a di ngar el RUBAK el kmo ngikel chad el rirellii itiang a kirel mad!” (2 Sa. 12:1-6) A David a mle medengelii a Llach er a Moses. A chad el rirecherechii a sib a mle kirel el mtechir ngika el sib el eua el chachisois. (Exo. 22:1) Engdi a chad ngkirel mad? Tia kmal meringel el kerrekeriil. Me nguaisei engdi Nathan a di uluusbech er tiang lomekesiu el kmo a klengit el lurruul a David a lmuut el oberaod er tiang! E a Jehovah a kmal mle chubechub omerellel el mora David er a omerellel a David el mora chad el rirecherechii a sib er a okesiu er a Nathan!​—2 Sa. 12:7-13.

20. Ngera kede suubii er a kerebil a David?

²⁰ Mutebengii el kmo a David er a lak lorekedii a ngesechel a rengul e ngmlo soal lomekoad er a Nabal me a rokui el chedal. E a uriul e ngdilu el kmo ngike el merau el chad er a okesiu er a Nathan a mle kirel el mo okodall er a tekoi el lerirellii. Ngar tia el ongeru el blekeradel e kede locha mo melatk el kmo, ngera me ngika el kmal ungil a omerellel el chad a kmal meringel a kerrekerilel. Molatk a tekoi el dirk dilubech er a klengar er a David. Tiakid el taem e a David a dimlak lungil a ukltkel. Tia el meringel el kerrekerilel a mle olechotel a kmo ngmle smecher er a klereng. A Jesus a ulemeklatk er a rultirakl er ngii el kmo: “Lak moukerrekeriil er a re chad, me lak bo loukerrekeriil er kemiu a Dios, ele Dios a mo oukerrekeriil er kemiu el di ua iser cho moukerrekeriil er a re chad.” (Mt. 7:1, 2) Mada dongkar er kid er a medecherecher el reng e bo de “meteet ra klechubechub” el ua Dios er kid.

21-22. Ngoeak a ngera el rolel e ngsebeched lolecholt er a klechubechub?

²¹ Me a klechubechub a diak di letekoi el domelechesiu er ngii. A rechubechub el chad a meruul a tekoi el olengeseu er a rebebil. Me kid el rokui bo dekerekikl lomes aike lousbech a telungalek er kid, ongdibel, me a rechad er a beluu. Nglocha kmal betok a rolel e ngsebeched el olecholt er a klechubechub! Ngngar ngii a chad el dodengelii el ousbech a ongelaod? Ngngar ngii a sebeched el ngosuir loeak sel domsa bebil kall me a lechub e doruul a tekoi el lochotii el kmo kede melatk er ngii? A Kristiano el dirk liluut el mei er a klemerang, ngngousbech a ongelaod me a omelisiich? Kid, ngsebeched el louchais er a ungil chais el mengelaod er a rechad? Aikaikid a bebil er a kot lungil rolel e ngsebeched lolecholt er a klechubechub el mora rechad.​—Job 29:12, 13; Rom 10:14, 15; Jak. 1:27.

²² A lsekum e ngmo biusech a medad el kirel aika el tekoi e kede mo mesa el kmo, ngkmal betok a techall el mo olecholt a klechubechub. Sel bo dolecholt er a klechubechub e kede rullii el kmal mo dmeu a rengul a Demad el ngar er a eanged el ngii a Dios el “meteet ra klechubechub”!