Lmuut el Meleketek er a Deleuill er Kau me a Jehovah

BEK el rak e te betok el sib er a Jehovah a lmuut el mei er a klemerang. Molatk er a klou el “deurreng er a eanged” sel lluut el mei tirkang! (Lk. 15:7, 10) A lsekum ke mla lmuut el mei er a klemerang e bo lulterekokl a rengum el kmo a Jesus, rechanghel, me a Jehovah a kmal dmeu a rengrir el mesekau el lmuut el mo dechor el kirel a klemerang. Me nguaisei engdi chelecha el mluut el meleketek er a deleuill er kau me a Jehovah e ke locha mo chobangel a omelsemai. Ngera bebil er ngii e ngera sebechem el meruul el kirel?

NGERA IKA EL OMELSEMAI?

Alta rebetok el odam me a odos a lmuut el mei er a ongdibel, me nguaisei engdi ngdirk mechitechut a rengrir. Ke locha medengelii a losaod er ngii a King David. Alta Jehovah uluusubes er a David engdi ngdirk millekoi el kmo: “A kngtik a mla mechelchebak.” (Psa. 40:12; 65:3, NW) Me a chad a locha mo kemanget el taem el dirk loldechelakl er ngii a uldesuel e dirk merur el kirel a tekoi el riruul alta ngmla lmuut el mei er a Jehovah. A Isabelle a mle seluld a ngklel el betok er a lluich el rak.a Ngdmu el kmo, “Ngkmal mle meringel er ngak oumerang el kmo a Jehovah a mla ousubes er ngak.” Me a lsekum e ngmo mechitechut a rengum e nglocha sebechel lmuut el mo mechitechut a deleuill er kau me a Jehovah. (Osi. 24:10) Lak becherei tia el tekoi me leduubech.

A rebebil a locha bekikl el kmo ngdiak el sebechir el remuul aike el rokui el kirir el meruul el lmuut el toketekii a deleuill er tir me a Jehovah. A Antoine a mesaod el kirel er a lluut el mei er a klemerang el kmo, “Ak mlo omelechesiu el kmo, ngkmal betok er a tekoi el ksiluub e kurruul er ak Sioning a bla kubes.” A rebebil a mo uaisei a uldesuir a uchul me te diak el mui el teloi a tekoi er a klereng.

Ngsebeched el omekesiu er ngii el uai tiang: A chad el miltemall a blil er a typhoon a locha kmal mo kurusii sel lolatk er a taem me a ureor el lousbech er ngii el lmuut el meleketek er a blil. Ngdi osisiu, a lsekum a deleuill er kau me a Jehovah a miltemall er a oberaod el klengit e ke locha mo omdasu el kmo ngkmal klou el ureor a omluut el meleketek er a deleuill er kau me a Jehovah. Me nguaisei, engdi ngngar ngii a ngeso.

A Jehovah mengemedaol er kau el kmo: “Mada de dedesii tial tekoi.” (Isa. 1:18) Kau a mla meringel loureor el ‘meledaes er tial tekoi.’ E a Jehovah a kmal betik a rengul er kau le kuluureor el kirel. Ka di molatk er tiang: Ke mla msa Jehovah a nger er ngii er a ultelecheklel a Satan!—Osi. 27:11.

Kau el mla rullii tia el tekoi a mla okedau er a Jehovah e ngii a tibir el mo olekeed er ngii er kau. (Jak. 4:8) Me alta ngkmal lungil tekoi el kau a mla lmuut el mei er a ongdibel, me nguaisei ngdirk ngar ngii a kirem el meruul. Ngkirem el melemolem el melisiich er a bltkil a rengum el mora Demam e Sechelim el Jehovah. Ngmekera omoruul er tiang?

MORUUL A TURREKONG EL SEBECHEM EL OTAUT

Molasem el meruul a turrekong el sebechem el otaut. Nglocha kmal dirkak mobes aike el tekoi el bla msuub el kirel a Jehovah me a telbilel er a Baradis. Me nguaisei engdi chelechang e ngkirem el lmuut el mo meruul aike el tekoi el murruul el ua omerk er a klumech, mora miting, e mengoit a taem el obengterir a rudam me a rudos er kau. Ka molatk aika el turrekong.

Bo blechoel mengedecheduch er a Jehovah. A Demam el Jehovah a medengei a lsekum a rengum a kmal dirk mengesang er kau el kirel a tekoi el omrirellii, el uchul me ngmeringel er kau a meluluuch el mo er ngii. (Rom 8:26) Me nguaisei engdi “di blechoel el meluluuch” louchais er a Jehovah el kmo ngkmal soam a lebo er ngii a deleuill er kau me ngii. (Rom 12:12) A Andrej a dirk melatk el kmo: “Ak kmal uluuchel er a renguk e merur er a tekoi el kriruul. Engdi uriul er a bek el nglunguchek e ngdi mirrael el mo ungil a renguk. Ak mlo omelechesiu er a budech.” A lsekum e ngdiak modengei el kmo ke mo meluluuch el kirel a ngerang e monguiu a nglunguchel a King David el ngar er a Psalm 51 me a 65 el klou el bliongel.

Bo blechoel el mesuub er a Biblia. Molisiich er a klereng er kau e tia mo ngosukau el mekurulii a bltkil a rengum el mora Jehovah. (Psa. 19:7-11) A Felipe a melekoi el kmo, “Ngak el dimlak kblechoel el menguiu e mesuub er a Biblia a uchul me ak mlo mechitechut e tomellii a rengul a Jehovah. Ngdimlak el soak el lmuut el ruebet er a klengit me ak kerekikl el menguiu e mesuub er a Biblia el omekerreu er ngak.” Kau me ngdirrek el sebechem el meruul el uaisei. A lsekum e ke ousbech a ngeso el melilt a obo mosuub er a omesubem el di kau el tang, e ngsebechem el lolengit er a sechelim el mesisiich er a klemerang me ngngosukau.

Mluut el meleketek er a deleuill er kau me a rudam me a rudos er kau. A rebebil el lmuut el mei er a klemerang a bekikl el kmo nglocha diak lungil a uldesuir a rechad er a ongdibel el kirir. A Larissa a melekoi el kmo: “Ak mera el mle merur. A kulemelechesiu el kmo ak kmal tilemall a rengrir a rechad er a ongdibel. Ngmle uaisei a uldesuek el kemanget el taem.” Bo lulterekokl a rengum el kmo a remechuodel me a rebebil a kmal sorir el olengeseu er kau el lmuut el mo mesisiich er a klereng. (Momes er a baks el “Ngera Sebechir a Remechuodel el Meruul?”) Ngkmal dmeu a rengrir er kau el mla lmuut el mei e kmal sorir lolengeseu er kau el mo ungil!—Osi. 17:17.

Ngera sebechem el meruul lolekeed er kau er a ongdibel? Bo mui el teloi er a rechad er a ongdibel loeak sel obo er a miting e momerk er a klumech. Tia ngmekera ngosukau? A Felix a kmo: “A rechad er a ongdibel a kmal mle dmeu a rengrir er a kluut el mei er a klemerang. Ak kmal ulemelechesiu er a bltkil a rengrir. Te rokui el ngilsukak el lmuut el mo omelechesiu el kmo ak chedal ongdibel, me a Jehovah a mla ousubes er ngak, me ngak a kmal sebechek el melemolem el mesiou er a Jehovah.”—Momes er a baks el “Ngera Sebechem el Meruul?”

LAK EM GIVE UP!

A Satan a mo melemolem el ometech a “typhoon” er a klengar er kau el melasem el mengitechut er kau er chelecha el mluut el meleketek er a deleuill er kau me a Jehovah. (Lk. 4:13) Bo mkltmokl el kirel loeak sel molisiich er a klereng er kau er chelechang.

A Jehovah a tibir el mora sib er ngii el kmo: “Ak mo sikii ngike el mla remiid, ak mo oluutii ngike el meleuaoch, ak mo merenged a cheltechat er ngike el telemall, e mo smisichii ngike el mechitechut.” (Ese. 34:16, NW) A Jehovah mla ngosuterir a rebetok el lmuut el toketek a deleuill er tir me ngii. Me bo lulterekokl a rengum el kmo ngkmal soal lolengeseu er kau el melemolem el meleketek er a mesisiich el deleuill er kau me a ngii.

Ngera Sebechir a Remechuodel el Meruul?

A remechuodel a kmal betok a sebechir el meruul el olengeseu er tirke el mla lmuut el mei er a klemerang el mo toketek a deleuill er tir me a Jehovah. Molatk aike el sebechir el meruul.

Molterekokl a rengrir. A apostol Paulus a mle medengei el kmo a chad el mla obult er a kngtil a sebechel “meeleb er a klou el klengiterreng.” (2 Ko. 2:7) Ngika locha blechoel el melatk a tekoi el leriruul luchul me ngmo mechitechut a rengul e di merur el kirel. Me a Paulus a milengelechel er a ongdibel el kmo: “Ng kiriu [el] . . . ousubes er ngii e omekebek er a medal.” Tirke el lmuut el mei er a klemerang ousbech el dolterekokl a rengrir el kmo, Jehovah kmal betik a rengul er tir me a ongdibel el dirrek. Sel bo blechoel el chemat er tir e olengeseu er tir e ngsebechiu el ngosuterir me ngdiak el bo lemechitechut a rengrir.

Moluluuch el obengterir. “A nglunguchel a melemalt el chad a kmal klou a le rellii.” (Jak. 5:16) A Larissa el dulsaod er ngii er a uchei a kmo: “A kuluuchais er a remechuodel a tekoi el kuluumededenger e bekikl el kirel. Te milluluuch el kirek. Seikid e ak mlo mtebengii el kmo a remechuodel a dimlak el kesib a rengrir er ngak. Ngbai kmal mle sorir el ngosukak el lmuut el toketekii a deleuill er ngak me a Jehovah.” A Theo a melekoi el kmo: “A nglunguchir a remechuodel a ulterekeklii a renguk el kmo, a Jehovah mera el betik a rengul er ngak e diak di lomes aike el mekngit ngdirrek el mes aike el ungil er ngak.”

Momak a klausechelei er kau el obengterir. A rechad el dirk liluut el mei er a klemerang a ousbech er a resechelirir er a ongdibel. A Justin el ta er a remechuodel a melekoi el kmo: “Mosiik aike el techall el sebechem lolengit er tir el mo oureor el obengkem er a odingel, e kot el klou a ultutelel a obo moldingel er tir er a blirir. Ngkmal klou a ultutelel a bo desechelirir!” A Henry el dirrek el ta er a remechuodel a kmo: “A rebebil sel lomes er a remechuodel el melasem el mo sechelirir tirke el liluut el mei er a klemerang e te mo melasem el mo meruul el uaisei.”

Molengeseu er tir el mesuub. A sechelil a chad el dirk liluut el mei er a klemerang el mesisiich er a tekoi er a klereng a sebechel ngosuir el kutmeklii a ungil schedule er ngii er omesuub. A Darko el ta er a remechuodel a melekoi el kmo: “Ngkmal soak louchais er tir a mekreos el tekoi el ksiluub er a omesubek el di ngak el tang, e ochotii a klemeriarreng er ngak el kirel a omesubel a Biblia. Ngdirrek el ngar ngii aike el taem el kubengterir el mesuub a bebil suobel.” A Clayton el dirrek el ta er a remechuodel a melekoi el kmo: “Ak melisiich er tir el mo omes a cheldecheduch er a Biblia el ngii a kmeed el osisiu er a blekeradel el blo lechebangel me a rolel e te ngmai a klubelir er ngii.”

Momecheliu er tir. Tirke el lmuut el mei er a klemerang a mla meseterir a remechuodel el oukerekeriil. Me chelecha ngkmal tokubets el kirir el mo omes er tir el ua mengkerengel a sib. (Jer. 23:4) Me di mereched el orrenges e mkltmokl el mo chemat er tir. Mblechoel el mengedecheduch er tir. Molatk a tekoi el loruul a ta er a remechuodel el Marcus sel loruul a sheperding call el mo er tir. Ngmelekoi el kmo: “Aki menguiu a bades el mo er tir, chemat er tir, e olterekokl a rengrir el kmo aki kmal chemat er tir el kmal mle meringel loureor el lmuut el mei er a klemerang me a Jehovah me ngdirrek el kmal chemat er tir. A uriul er aika el odngelam e aki kutmeklii a taem el ki mluut el mo oldingel er tir.”

a A bebil ngakl a mlengodech.