“[Moltirakl] er a Klemerang”

1. Ngmekera e mo uchul a klungioled sel dechadecheduch el kirel a rolel e kede mlei er a “klemerang”?

“KE MILEKERA mei er a klemerang?” Nglocha mla mo betok el monger tia el ker. Ngta er aike el kot el ker loker er kid a kldemed er a klaumerang sel lolasem el mo medengelkid. Ngkmal soad el mo medengei a rolel e a rudam me a rudos er kid a mlo medengelii e mo betik a rengrir er a Jehovah, e kmal dmeu a rengud louchais er tir er a uchul e ngkmal betik a rengud er a klemerang. (Rom 1:11) Ngoeak aika el cheldecheduch e kede muklatk er a uchul me a klemerang a kmal mekreos. Ngdirrek el menga el meruul a rengud el mo “oltirakl er a klemerang” el belkul a kmo, kede mo kiei el ngar er a rolel e ngmo uchul a klengeltengat me a kengei er a Jehovah.​—3 Jn. 4.

2. Ngera kede mo mesaod er tia el suobel?

² Ngar tia el suobel e kede mo mesaod a bebil er a uchul me ngkmal betik a rengud er a klemerang. A uriul e kede mo mesaod er a rolel e ngsebeched el melemolem lolecholt er a bltkil a rengud el kirel tia el kmal mekreos el sengk. Ngulterekokl el mo dochelir omereng el saul er kid er aike el bla leruul a Jehovah el mekrolid el mei er a klemerang. (Jn. 6:44) Ngdirrek el mo smisichii a urunguled el mo ouchais er a klemerang el mora rechad.

UCHUL ME NGBETIK A RENGUD ER A “KLEMERANG”

3. Ngera sel kot el klou a ultutelel luchul me ngkmal betik a rengud er a klemerang?

³ Ngkmal betok a uchul me ngbetik a rengud er a klemerang. Sel ngaruchei er ngii a bltkil a rengud er a Jehovah el Dios el ngike el uchul a klemerang. Ngoeak a Biblia, e kede mla mo medengei el kmo ngdiak di lekot el mesisiich el ulemeob er a eanged me a chutem ngdirrek el betik a rengul el Chedam, e kmal omekerreu er kid. (1 Pe. 5:7) Kede medengei el kmo a Dios er kid a ‘mui er a blekokuii ma klechubechub, el diak le mereched el ngmasech a rengul, e olecholt er a blechoel bltikerreng ma blakerreng.’ (Exo. 34:6) Ngkmal soal a llemalt. (Isa. 61:8) Ngmekngit a rengul lomes er kid el chuarm, e ngii a kltmokl e kmal omes el beduluchei el kirel sel taem el lebo el terob a rokui el ringel. (Jer. 29:11) Kede dirrek el kmal lomes el beduluchei el kirel tiang! Tia ta er a uchul me ngkmal betik a rengud er a Jehovah!

4-5. Ngera uchul me a apostol Paulus ulemekesiu er a omelatk el mora uak?

⁴ Ngera dirrek el ta er a uchul me ngbetik a rengud er a klemerang? Nguchul a betok el klungiaol. Molatk er tiang. A omeltked el kirel a ngar medad a uldimukl er a klemerang. A apostol Paulus ulemekesiu er a kerresel a klemerang el kmo: “Tial omelatk a ultebechel el diak lolmesim el uak ra rengud.” (Heb. 6:19, BT) Ngdi ua uak el mtebechelii a bos me ngdiak el mesim, a klaumerang er kid el mengai a uchetemel er a Biblia a omtebechel er kid me ngdiak demesim sel bo dechelebangel a omelsemai.

⁵ A Paulus a ngar tia el bades e ngmesaod er a omelatk el mora eanged el lobang a rengellitel el Kristiano. Engdi a tekingel a dirrek el melutk el kirir a Rekristiano loba omelatk el mo kiei er a baradis el chutem. (Jn. 3:16) Klemedengei er kid er a diak a ulebengelel el klengar a mla rullii a klengar er kid el mo er ngii a belkul.

6-7. Ngmekera Yvonne e mla mongeseu er chelecha el bla bo lodengelii a klemerang el kirel a ngar medad?

⁶ Molatk er a experience er a odos el Yvonne. Ngika dimlak lemukeroul er a klemerang me sera lekekerei e ngmle medakt er a kodall. Ngkmal diak lobes er a tekoi el lechiliuii: “A ta er a klebesei e ngmo diak a klukuk.” Ngdmu el kmo: “Aika el tekoi a rirellak me ak di mekar sel klebesei e omdasu el kirel a ngar medak el taem. Ak millatk el kmo: ‘Ngulterekokl el diak el di el tiakid a klengar e lemerekong. Ngera uchul me ak chad?’ Ngdiak el soak el mad!”

⁷ Sera bo lengeasek e ngmlo medengelterir a Resioning er a Jehovah. Ngmelekoi el kmo: “Ak mlo oumerang el kmo ngngar ngii a omeltkek el sebechek el kiei er a Baradis el mo cherechar.” Ngmekera e mla mongeseu er chelecha el bla bo lodengelii a klemerang? Ngkmo: “Ngmla mo diak mekar a leklebesei el melatk er a ngar medak el taem me a lechub a kodall.” Ngbleketakl el kmo a klemerang a kmal mekreos er a rengul a Yvonne, e kmal soal louchais er a rechad el kirel a omeltkel kirel a ngar medad.​—1 Ti. 4:16.

8-9. (a) Ngmle uangerang osengel a ta el chad er a okesiu er a Jesus el kirel a klalo el lebiltik er ngii? (b) Ngngua ngera klungel a kerresel a klemerang er osengem?

⁸ A ungil chais el kirel a Rengedel a Dios a dirrek el uldimukl er a klemerang er a Biblia. A Jesus a ulemekesiu er a klemerang el kirel a Renged el mora mekreos el klalo el berrotel. Ngdilu el ngar er a Mateus 13:44 el kmo: “Ng ua tiakid a Rengedel a eanged. A tal chad a miltik er a berrotel el mekreos el klalo el ngar a sers. Me ng lmuut el mertii, e kmal ungil a rengul me ng merael el mo oterau a rokui el kloklel e lmuut el mei el me mecherar ngiil sers.” Mutebengii el kmo ngika el chad a dimlak losiik er tia el klalo. Engdi sera lebetik er ngii e ngkilengei loriid a betok me bo lsebechel nguu. Ngika ulterau a rokui el kloklel. E ngerang? Ngmle medengei el kmo tia kmal mekreos el klalo. Ngmle lmuut el mekreos er aike el rokui el tekoi el lurriid.

⁹ Kid, nguaisei a uldesued el kirel a klemerang? Chochoi! Kede medengei el kmo ngdiak a ngii di el ngerang er tia el beluulechad el sebechel mekesiur a deurreng el dobang e le kede mesiou er a Jehovah e oba omelatk el mo kiei el mo cherechar er cheungel omengederederel a Renged. Kede kongei el mo oriid a rokui el tekoi me dolemolem el oba kmes el deleuill er kid me a Jehovah. Sel luchul a deuil a rengud a sel bo de “meral odeuir a rengul.”​—Kol. 1:10, BT.

10-11. Ngera rirellii a Michael el mo ngodechii a klengar er ngii?

¹⁰ A rebetok er kid a mla kongei el loriid a betok el tekoi me denguu a kengei er a Jehovah. A rebebil a mla chemoit a kmal ngarbab el ureor. A rekuk bebil a mla mo diak lolasem el mo merau. E a rebebil a mla remuul a meklou el omelodech er a klengar er tir. Tiakid a lurruul er ngii a Michael. Ngika dimlak lemukeroul er a klemerang. Me sera ledirk kekerei el chad e ngmlo chad er a karate. Ngdmu el kmo: “Ngkmal mle klou a ultutelel er ngak a lolemolem el fit a bedengek. A lebebil ak mlo omdasu el kmo ngkmal diak a chad el sebechel rutechak.” Engdi sera lomuchel el mesuub er a Biblia, e ngmlo medengelii a uldesuel a Jehovah el kirel a klaudechelakl. (Psa. 11:5, NW) A Michael a mesaod el kirir tirke el obekel el milsuub lobengkel el kmo: “Ngdimlak a ta ledu el kmo ngkirek el mo diak kuu karate, te bai di millemolem lolisechakl er ngak a klemerang er a Biblia.”

¹¹ Sera lemukeroul a klemedengei er ngii el kirel a Jehovah me a bltkil a rengul el mo er ngii me ngdirrek el mlukeroul. Ngileakl el rirtechii a rengul er a bo lodengelii a klechubechub er a Jehovah el mora remengull er ngii. A Michael a mlo mtebengii el kmo ngkirel ngodechii a klengar er ngii. Ngkmo: “Ak mle medengei el kmo tiakid a mo kot el meringel el tekoi el kirek el meruul er ngii el mo diak kuu karate. Engdi ak dirrek el mle medengei el kmo ngodeuir a rengul a Jehovah. Ak mle medengei el kmo ngdiak a ngii di el ngerang el bo kuriid el mo mekesiur a bo kusiou er ngii.” A Michael a uleba omereng el saul el kirel a kerresel a klemerang el bla lebetik er ngii, e tiakid a rirellii el mo meruul a meklou el omelodech er a klengar er ngii.​—Jak. 1:25.

12-13. Ngmilekera klemerang er a Biblia e ngosuir a Mayli?

¹² A Biblia ochotii a kerresel a klemerang loeak a lomekesiu er ngii el mora olbidel lomekllomes er a ilkolk. (Psa. 119:105; Efe. 5:8) A Mayli el redil er a Azerbaijan a kmal oba omereng el saul el kirel a ngeso el bla lenguu er a Tekingel a Dios. Ngika mlukeroul er a delengchokl el demal a Muslim e a delal a Chijudea. Ngkmo: “Alta ngdimlak kuumededenger el kmo ngngar ngii a Dios engdi ngngar ngii a bebil el tekoi el kmal mle rrau a renguk el kirel. Ak millatk, ‘Ngera uchul me a Dios ulemeob er a rechad, e ngera moktek er a chad el chuarm er a klemengetel a klengar er ngii el rokir e mora beluu er a ngau?’ A rechad a blechoel el melekoi el kmo a rokui el tekoi a mla moterekokl er a Dios, me ak mlo melatk, ‘Kid kede di ua puppet er chimal a Dios el kmal soal lomes er a rechad el chuarm?’”

¹³ A Mayli a millemolem losiik a nger er aika el keril. Cherengel a taem e ngmlo mesuub er a Biblia e mei er a klemerang. Ngkmo: “A bleketakl el omesodel a Biblia ngildechii a osengek el kirel a klengar el mo ungil. Ngrirellii el mo budech a uldesuek.” Kede kmal di ua Mayli loldanges er a Jehovah, el ‘milekedongid el otebedid er a ilkolk el mor a mengasireng el llemesel.’​—1 Pe. 2:9.

14. Ngmekera deluut el smisichii a bltkil a rengud er a klemerang? (Dirrek el momes er a baks el “Lmuut el Bebil er a Okesiu.”)

¹⁴ Aika kmal di kesai el olechotel a kerresel a klemerang. Nglocha sebechem el lmatk a lmuut el bebil. Kau, ngsebechem el rullii a project er kau er a omesubel a Biblia el mo suub aike el lmuut el bebil er a uchul e ngbetik a rengud er a klemerang? Sel lluut el mukeroul a bltkil a rengud er a klemerang, me kid a mo osiik a lmuut el bebil er a rolel e ngsebeched lochotii a bltkil a rengud el kirel.

ROLEL A DOCHOTII EL KMO NGBETIK A RENGUD ER A KLEMERANG

15. Ngera ta er a rolel e ngsebeched lochotii el kmo ngbetik a rengud er a klemerang?

¹⁵ Ngsebeched lochotii el kmo ngbetik a rengud er a klemerang sel deblechoel el mesuub er a Biblia me aike el babilenged el mengai er a Biblia. Kede medengei el kmo a bla bo demeketeket el ngar er a klemerang me a lak, me ngii a kmal dirk betok a sebeched el suub. Sel kot el Ongkerongel el mlotobed a kmo: “A klemerang a di ua bung er a ked el sebechel mo meringel er kid a metik le ngar er a delongelel aika el betok el chudel er a klsuul osisechakl er a beluulechad. Ngkmal kirem el mo kerekikl losiik. . . . Obetik er ngii ngkirem el meringel loureor el nguu. Lak di lungil a rengum er a di chimong el bung er a klemerang. . . . Mosiik a lmuut el betok.” Ngdiak lebeot omesuub, engdi ngdi mo uchul a klungioled a doruul er ngii.

16. Ngera el rolel omesubel a Biblia obla betik er ngii el kmo ngkmal ngosukau? (Osisechakl 2:4-6)

¹⁶ Ngdiak el kid el rokui a soad el menguiu e mesuub. Me nguaisei engdi Jehovah mengemedaol er kid el mo melemolem el ‘osiik’ a dmolech el klemedengei er a klemerang. (Monguiu er a Osisechakl 2:4-6.) Sel doureor el meringel el meruul er tiang e ngdi mo uchul a klungioled. A Corey a mesaod el kirel a omengiuel er a Biblia el kmo, ngdi omes a derta el bades. Ngdmu el kmo: “Ak chemuiu a rokui el footnote, omes a rokui el cross-reference, e meruul a lmuut el bebil er a research. . . . Ngkmal betok a kngai sel kuruul el uaisei!” Me a dousbech er tia el rolel omesuub me a lechub e ngkuk tang, kede ochotii omereng el saul er kid el kirel a klemerang sel doureor el meringel el mengoit a taem el mesuub er ngii.​—Psa. 1:1-3.

17. Ngera belkul a bo dekiei el loltirakl er a klemerang? (Jakobus 1:25)

¹⁷ E kede medengei el kmo ngdiak el sebeched el di mesuub er a klemerang. Ngkired el mo kiei loltirakl er a klemerang e oltaut er a klengar er kid aike el dosuub. Seikid e a klemerang a sebechel meskid a mera el deurreng. (Monguiu er a Jakobus 1:25.) Ngmekera doterekeklii el kmo kede kiei loltirakl er a klemerang? A ta el odam a meskid a ngeso er a uldasu el kmo, dorriter er a klengar er kid el kmo ngngera kede oltaut me a ngera sebeched el lmuut el olengeriakl er ngii. A apostol Paulus a mesaod er ngii el kmo: “Ngii di bo le blak a rengud el oltirakl a ikel bla bo dodengei.”​—Fil. 3:16.

18. Ngera me kede mora tkurrebab el sebeched el “oltirakl er a klemerang”?

¹⁸ Ka di molatk aike el klungiaol el dengai sel debora tkurrebab el sebeched el mo “oltirakl er a klemerang”! Ngdiak di bo lungil a klengar er kid kede dirrek luchul a klou el deurreng el mora Jehovah me a rudam me a rudos er kid. (Osi. 27:11; 3 Jn. 4) Ngdiak a lmuut el ngaruchei luchul me ngbetik a rengud er a klemerang e kiei el oltirakl er ngii!