A Ker el Mla er a Remenguiu
Ngtecha mo mekiis el mei er tia el chutem, e ngera el bedengel okiis a bo lenguu?
Molatk er a nger er a Biblia el kirel tiang.
A Rellir 24:15 a kmo ngmo er ngii okiis er a re “ungil ma re mekngit.” A rungil a melutk el kirir tirke el ullengesenges er a Dios er a uchei er a lemad me a ngklir a lluches er a babier er a klengar. (Mal. 3:16) A remekngit tirke el mlad e dimlak a kmal techellir el mo mesuub el kirel a Jehovah, me a ngklir a diak el llechukl er a babier er a klengar.
A Johanes 5:28, 29 (BT) a mesaod el kirel aika el eru el bliongel er a rechad el ngar er a Rellir 24:15. A Jesus a kmo a re “merruul a ungil a mekiis el mo nguu a klengar” e tirke el “merruul a mekngit a mekiis el mo nguu a kerrekeriil.” Tirke el mirruul a ungil a mo mekiis el mo nguu a klengar e le ngklir a llechukl er a babier er a klengar. Engdi tirke el mirruul a klengit a mo mekiis el mo nguu a kerrekeriil. A ngklir a diak el lluches er a babier er a klengar me te mo ngar er a kerrekeriil me a lechub e ng probation. Ngar tiakid el taem e te mo nguu a techall el mo mesuub el kirel a Jehovah e meluches a ngklir er a babier er a klengar.
A Ocholt 20:12, 13 a mesaod el kmo a rokui el chad el mo mekiis a kirir el mo oltirakl aike el “llechukl er a ikel babier,” el ngii a melutk el kirel aike el beches el llach el mo er ngii er a beches el blekeradel. Tirke el diak bo lolengesenges a mo nguemed.—Isa. 65:20.
A Daniel 12:2 omlaoch el kmo a rebebil er tirke el mla mad a mo mekiis el “mo ngar el mo cherechar ma re bebil a mo motuub e mo merur el diak a ulebengelel.” Tia el bades a mesaod el kirel a ulebengelel a tekoi el mo duubech el mo er tirke el mekiis. Te “mo ngar el mo cherechar” me a lechub e te “mo merur el diak a ulebengelel.” A ulebengelel a ta el telael el rak e a rebebil a mo nguu a diak a ulebengelel el klengar me a rebebil a mo nguemed el mo cherechar.—Och. 20:15; 21:3, 4.
Molatk er tia el okesiu. Ngsebeched lomekesiu aika el eru el bliongel er a rechad el mo mekiis el mora rechad el sorir el mo kiei er a ngodech el beluu. Tirke el mirruul a ungil a di uai tirke el olab a work visa me a lechub e ng resident visa el ngar ngii a ilmeklir. E tirke el mirruul a mekngit a di uai tirke el olab a temporary visa me a lechub e ng visitor’s visa. Ngkirir el mo ochotii loeak omerellir el kmo ngsebechir el mo melemolem el kiei er a beluu. Ngdi osisiu a remirruul a mekngit a kirir el mo olengesenges a llechul a Jehovah e ochotii loeak omerellir me a blekerdelir el kmo ngsebechir el melemolem el kiei er a Baradis. E alta rechad olab a kakerous el visa sel siseb er a ngodech el beluu engdi cherengel a taem e ngsebechir el mo citizen er tia el beluu me a lechub e te deport er tir. Tia di mo oltirakl er a blekerdelir me a omerellir er a chelsel tia el beluu. Me ngdi osisiu, ngkmal di mo oltirakl er a blakerreng me a omerellir tirke el mo mekiis er a beches el blekeradel el kmo, te mo nguu a diak a ulebengelel el klengar me a lechub e ngdiak.
A Jehovah a diak di lechubechub el Dios, ngdirrek el melemalt el Dios. (Dut. 32:4; Psa. 33:5) Ngmo ochotii a bltikerreng er ngii sel bo lolekiis er a rungil me a remekngit. Engdi ngika dirk oltirakl a ngarbab el llechul el kirel a ungil me a mekngit. Ngdi tirke el mo betik a rengrir er ngii e oltirakl aika el llechul a sebechir el melemolem el kiei er a beches el blekeradel.