Ngsebeched el Kiei el Mo Cherechar

1. Ngera ngrullii el mo er kid sel dolebedebek er a telbilel a Jehovah er a diak a ulebengelel el klengar?

JEHOVAH tibir el kmo tirke el olengesenges er ngii a mo nguu a “diak a ulebengelel klengar.” (Rom 6:23) Sel dolebedebek aike el letib a Jehovah el mei er kid e a bltkil a rengud el mo er ngii a lmuut el mo mesisiich. Ka di molatk: A Demad el ngar er a eanged a kmal betik a rengul er kid me ngkmal diak bo lecheroid er kid.

2. Ngmekera telbiil er a diak a ulebengelel el klengar e ngosukid?

² A telbilel a Dios er a diak a ulebengelel el klengar a ngosukid loutekangel a ringel el dechelebangel er chelechang. Mo lmuut me a recherroued a lomekdakt er kid er a kodall me ngdiak bo de stob el mesiou er a Jehovah. E ngerang? A ta er a uchul a kid el medengei el kmo sel de mad loba blakerreng el mora Jehovah, e ngmo okisid er a kodall e kede nguu omelatk el diak deluut el mo mad. (Jn. 5:28, 29; 1 Ko. 15:55-58; Heb. 2:15) Ngera uchul me ngsebechel mo ulterekokl a rengud el kmo ngsebeched el kiei el mo cherechar? Molatk aika el uchul.

JEHOVAH KIEI EL MO CHERECHAR

3. Ngera uchul me ngsebechel mo ulterekokl a rengud el kmo a Jehovah sebechel rullid me kede dingar el mo cherechar? (Psalm 102:12, 24, 27)

³ Kede medengei el kmo a Jehovah sebechel rullid me kede dingar el mo cherechar e lengii a uchul a klengar, e ngii a kiei el diak a ulebengelel. (Psa. 36:9) Morriter a bebil bades lochotii el kmo Jehovah ngkakid er a lengar ngii e mo blechoel el ngar ngii. A Psalm 90:2 a melekoi el kirel a Jehovah el kmo ng “diak a uchelem el diak a ulebengelem.” Me a Psalm 102 melekoi osisiu el tekoi. (Monguiu er a Psalm 102:12, 24, 27.) E a profet Habakuk a milluches el kirel a Demad el ngar er a eanged el kmo: “RUBAK, a kot el uchul el mer chelechang e ke mle Dios. Ng kau a Dios er ngak el chedaol e mlar ngii er a irechar e di ngar el mo cherechar.”​—Hab. 1:12.

4. Kid el diak el sebeched el mtebengii el kmo Jehovah ngkakid er a lengar ngii, ngtekoi el kired el bekikl er ngii? Mosaod.

⁴ Ngmeringel er kau a mtebengii el kmo a Jehovah ngkakid er a lengar ngii el mo “cherechar”? (Isa. 40:28) A rebetok me nguaisei a uldesuir. A Elihu millekoi el kirel a Dios el kmo: “Ng diak el sebeched el . . . [mechur] a rekil.” (Job 36:26) Me nguaisei engdi kid a rechad a dirk sebeched loumerang a tekoi el meringel er kid a mtab. Molatk er a dengki. Alta ngdiak el sebeched el mtebengii a rolel a dengki me nguaisei engdi ke doumerang el kmo ngmera el ngar ngii. Ngdi osisiu, kid a rechad a diak el sebeched el mtebengii el kmo ngmekera Jehovah e ngkakid er a lengar ngii e mo blechoel el ngar ngii. Engdi tia diak lebelkul a kmo a Dios a diak el sebechel ngar el diak a ulebengelel. A klengar er ngii a diak lultuil er aike el sebeched me a lechub e ngdiak el sebeched el mtab. (Rom 11:33-36) Uchei er a lobeob a rokui el tekoi, luldimukl er a sils me a btuch, e ngmla er ngii. Ngolterekokl er a rengud el kmo ng “uleak a klisichel el mekedbechii a beluulchad.” E mla er ngii er a uchei er a ‘lebebii a eanged.’ (Jer. 51:15; Rel. 17:24) Ngera dirrek el ta er a uchul me ngsebechel mo ulterekokl a rengud el kmo ngsebeched el kiei el mo cherechar?

KEDE ULEBEOB EL MO KIEI EL MO CHERECHAR

5. Ngera el omelatk a lulebang a kot lobekel?

⁵ A rokui el louteliil el blebelel a Jehovah ulebeob el ngar ngii a taem e te mo mad engdi rechad a ngodech. Ngmilsterir a techall el mo ngar el diak a ulebengelel. Me nguaisei engdi Jehovah ulemeklatk er a Adam el kmo: “Sel kerrekar er a mo medengei a ungil ma mekngit a diak monga er a redechel. Ele sel sils el mkelii e kom mad.” (Gen. 2:17) A Adam me a Eva a lullengesenges er a Jehovah e ngdimlak el mad. Me ngsebeched loumerang el kmo cherengel a taem e a Jehovah mo mechititerir me te mengang er a “kerrekar er a klengar.” Tia belkul a kmo Jehovah olterekokl er a rengrir el kmo te mo “ngar el mo cherechar.”b​—Gen. 3:22.

6-7. (a) Ngera dirrek el lochotii el kmo ngdimlak el moktek el rechad a mad? (b) Ngera el tekoi el msemeriar er ngii a soam el mo meruul? (Momes er a siasing.)

⁶ A rebebil scientist a mla metik a sioko lochotii el kmo, a no er a bdelud a sebechel store a lmuut el betok el information er aike le store a bdelud er chelechang. A article lultebedii er a 2010 er a Scientific American Mind el babier a melekoi el kmo a no er a bdelud a sebechel store er a bekord el 2.5 el miliol el gigabyte, e tia ua klemengetel a 3 el miliol el sikang el show er a TV (betok er a 300 el rak). Engdi no er a bdelud a locha sebechel a lmuut el klou er tiang. Tia ochotii el kmo a Jehovah milebii a no er a bdelud el mo oltekau a lmuut el betok er a di 70 me a lechub 80 el rak.​—Psa. 90:10.

⁷ A Jehovah a dirrek el lilia er a rengud a urunguled el soad el melemolem el ngar. A Biblia melekoi el kirir a rechad el kmo a Dios a mla loia er a rengrir a “urungulir el kiei el diak a ulebengelel.” (Oli. 3:11, NW) Tiakid a ta er a uchul me kede omes er a kodall el cheraro. (1 Ko. 15:26) Sel desal kmal mo smecher, ngdiak a ngera el doruul e di mo mengiil el mad? Ngdiak. Kede blechoel losiik a ukeruul me a lechub e kede melim a kar. Kede meruul aike el rokui el sebeched me lak demad. E sel lemad a betik er a rengud, el ngalek me a lechub e ngklou el chad, e ngdiak lsal kmal mo mekngit a rengud, e uaisei el kemanget el taem? (Jn. 11:32, 33) Me a Ulemeob er kid a diak bo lebeskid a urunguled me a klisiched el melemolem el ngar a lemlak el moktek er ngii a bo dolemolem el ngar. Me nguaisei engdi ngngar ngii a lmuut el bebil er a uchul me ngsebeched loumerang el kmo a klengar er kid a sebechel melemolem el diak a ulebengelel. Ka me dorriter a bebil tekoi el lurruul a Jehovah er a irechar me chelechang el ngii ochotii el kmo ngdirkak lemengodech a moktek er ngii.

NGDIRKAK EL MENGODECH A MOKTEK ER A JEHOVAH

8. A Isaia 55:11 ngera ngolterekokl a rengud er ngii el kirel a moktek er a Jehovah?

⁸ Alta Adam me a Eva mlora klengit e uliuelii a klengit el mora rengelekir, me nguaisei engdi a moktek er a Jehovah a dirkak el mengodech. (Monguiu er a Isaia 55:11.) Ngdirk moktek er ngii omesterir a rechad loba blakerreng a techall el mo ngar el diak a ulebengelel. Kede mtebengii tiang sel dolatk a tekoi el bla el dung e remuul a Jehovah el mo oltaut er a moktek er ngii.

9. Ngera ngmla tibir a Dios? (Daniel 12:2, 13)

⁹ A Jehovah tibir el kmo ngmo olekiis er a rechad el mla mad e mo mesterir a techellir el mo kiei el mo cherechar. (Rel. 24:15; Tit. 1:1, 2) A blak a rengul el chad el Job a mle ulterekokl a rengul el kmo a Jehovah a kmal soal mo olekiis er a rulekoad. (Job 14:14, 15) A profet Daniel a mle medengei el kmo a rechad a mo mekiis el mo nguu a techall el mo kiei el mo cherechar. (Psa. 37:29; monguiu er a Daniel 12:2, 13.) Rechijudea er a taem er a Jesus a dirrek el mle medengei el kmo Jehovah sebechel mesterir a reblak a rengrir el mesiungel a “diak a ulebengelel klengar.” (Lk. 10:25; 18:18) Jesus a mle blechoel el mesaod el kirel tia el telbilel a Dios, me ngii a Demal a ulekisii er a kodall.​—Mt. 19:29; 22:31, 32; Lk. 18:30; Jn. 11:25.

10. A okiis er a ngar er a mong ngera ngochotii? (Momes er a siasing.)

¹⁰ A Jehovah ngike el Luchul a klengar e ngar ngii a klisichel lmuut el omekngar er a rechad. Ngmilsa klisichel a profet Elias el mo olekiis er a ngelekel a melakl el dil er a Sarefath. (1 Ki. 17:21-23) Uriul e a Profet Elisa uleak a ngelsuil a Dios e ngulekisii a ngelekel a redil er a Sunem el sechal. (2 Ki. 4:18-20, 34-37) Aikang me a lmuut el bebil er okiis ochotii el kmo a Jehovah ngar ngii a klisichel lolekiis er a rechad. E a Jesus er a lengar tia el chutem e ngulechotii el kmo a Demal a milsa klisichel el mo meruul er tiang. (Jn. 11:23-25, 43, 44) Chelecha e ngngar er a eanged e mla ngmai a “rokui el klisiich er omerreder er a eanged me a beluulchad.” Me ngsebechel lotutii tia el telbiil el kmo, “tirkel rokui el mla mad” a mo mekiis el mo nguu a techall el mo kiei el mo cherechar.​—Mt. 28:18; Jn. 5:25-29.

11. Ngmekera olubet e uchul me ngsebeched el kiei el mo cherechar?

¹¹ Ngera uchul me a Jehovah milecherei a betik er a rengul Ngelekel me ngmad er a meringel el kodall? A Jesus onger er tiang er a ledu el kmo: “Ele Dios a kmal mle betik a rengul er a beluulchad me ng milsa di tal Ngelekel, me tirkel rokui el mo oumera er a Ngelekel a Dios a diak le mad e bai mo ngar el diak a ulebengelel.” (Jn. 3:16) A Dios er a lebeskid a Ngelekel el olbetel a kngtid, e ngrirellii el mo sebeched el nguu a diak a ulebengelel el klengar. (Mt. 20:28) A apostol Paulus a silodii tia el klou a ultutelel telengtengil a moktek er a Dios er a loluches el kmo: “A kodall a mlei el okiu a tal chad, me ng dirrek el ua isei a okiis er a kodall a mlei el okiu a tal chad. Ele ng Adam a mlo uchul e a rokui el chad a mor a kodall, me ng dirrek el ua isei el Kristus a mlo uchul e a rokui el chad a mo mekiis er a kodall.”​—1 Ko. 15:21, 22.

12. Ngmekera Renged e mo olengeseu loltaut er a moktek er a Jehovah el kired?

¹² A Jesus ullisechakl er a rultirakl er ngii el mo meluluuch me lemei a Rengedel a Dios e lemotaut a soal er a beluulechad. (Mt. 6:9, 10) Ngtelengtengil a moktek er a Dios el rechad a mo kiei el mo cherechar er tia el chutem. Me a Jehovah tiltkii a Ngelekel el mo King er a Renged el Longedereder er Ngii a Mesias, el mo oltaut er tiang. E ngii a mla mengudel er a re 144,000 el chad er a beluulechad el mo oureor lobengkel a Jesus loltaut er a moktek er ngii.​—Och. 5:9, 10.

13. Ngera ngmeruul er ngii a Jehovah er chelechang, e ngera ngerecheled?

¹³ Jehovah er chelechang a mengudel er a “kloul seked” er a rechad e olisechakl er tir el mo kiei el ngar cheungel a omengederederel a Renged. (Och. 7:9, 10; Jak. 2:8) Me alta kede kiei er a beluulechad el rechad a kakeakl le ngkltui me a mekemad a uchul, tirke el chedal a “kloul seked” a meringel loureor mengoit a rokui el rolel a kltui er a rengrir. Ngoeak omerellir e te meleot a saider er tir el mo osib. (Mik. 4:3) Te diak el teloi a mekemad el ngii a melai a betok el klengar er a rechad, te bai olengeseu er a rechad el mo nguu a “meral klengar” loeak sel lolisechakl er tir el kirel a mera el Dios me a moktek er ngii. (1 Ti. 6:19) A rechedal a telungalek er tir a locha mo omtok er tir me a lechub ngdiak bo lebetok a ududir le te support er a Rengedel a Dios, me nguaisei engdi Jehovah mo oterekeklii el kmo te ngmai aike el lousbech. (Mt. 6:25, 30-33; Lk. 18:29, 30) Aika el tekoi oterekeklii a rengud el kmo ngmera el ngar ngii a Renged e ngii a mo melemolem loltaut er a moktek er a Jehovah.

UNGIL KLENGAR EL MERAEL EL MEI

14-15. Ngmekera mo tmaut a telbilel a Jehovah el mo okngemedii a kodall el mo cherechar?

¹⁴ A Jesus chelechang e ng King er a Rengedel a Dios el ngar er a eanged, e ngii a mo otaut aike el rokui el telbilel a Jehovah. (2 Ko. 1:20) Ulemuchel er a 1914 el mei e a Jesus omtebechel er a recherrouel. (Psa. 110:1, 2, NW) Jesus me a remengedereder lobengkel a di kmedung e te mo okngemedeterir a rokui el mekngit.​—Och. 6:2.

¹⁵ Temel a Ta el Telael el Rak el Omengederederel a Jesus e a rulekoad a mo mekiis me a rebekongesenges el chad a mo mecherrungel. Uriul er a ulebongel el omelsemai e tirke el mukerrekeriil er a Jehovah el kmo te melemalt “a mo ungilbesrir el kiei er a chelsel a beluu e mo oubeluu er ngii el di blechoel.” (Psa. 37:10, 11, 29) E a “cherarou el kmal mo uriul el bo lokngemedii, a kodall.”​—1 Ko. 15:26.

16. Ngera kirel sel kot el klou a ultutelel luchul me kede mesiou er a Jehovah?

¹⁶ Ngua bla desodii, a omeltked el kiei el mo cherechar a mengai a uchetemel er a Tekingel a Dios. Tia el omelatk a sebechel ngosukid el mo melemolem loba blakerreng er chelecha el uriul sils. Engdi a bo dodeuir a rengul a Jehovah e ngdiak el di urunguled el diak el soad el mad orrael er kid. A kot el klou a ultutelel luchul me kede oba blakerreng el mora Jehovah me a Jesus a dmolech el bltkil a rengud el mo er tir. (2 Ko. 5:14, 15) Tia el bltikerreng a rullid el mo soad loukerebai er tir e mo ouchais er a rechad er a omelatk el dobang. (Rom 10:13-15) E sel dosuub el mo diak dolatk er a di kid e mo bekururau e kede mo tirke el chad el Jehovah soal sechelirir el mo cherechar.​—Heb. 13:16.

17. Ngera ngerechelel a derta er kid? (Mateus 7:13, 14)

¹⁷ Me kid kede mo ta er tirke el mo nguu a diak ulebengelel el klengar? A Jehovah mla meskid tia el techall. Me chelechang ngdi ngar kid el mo melemolem el merael er a rael el mora klengar. (Monguiu er a Mateus 7:13, 14.) Ngmo uangera klengar sel bo dekiei el mo cherechar? Kede mo mesaod er a nger er tiang er a ongingil suobel.