Molengeseu er a Rechad Loutekangel a Meringel el Blekeradel

1. A Jehovah ngblechoel longer a nglunguchir a remesiungel loeak a ngera el rolel?

KAU, ke medengei el kmo a Jehovah sebechel lousbech er kau el mo onger a nglunguchel a chad? Ngsebechel lousbech er kau, a omta er a remechuodel, ministerial servant, pioneer, me a lechub e ke publisher. Ngsebechel lousbech er kau omklou, kekerei, odam, me a lechub e ke odos. A chad el betik a rengul er a Jehovah sel lomekedong er ngii lolengit a ngeso, e a Dios er kid a blechoel lousbech er a remechuodel me a remesiungel el mo “uchul a klou el ongelaod” el mo er ngii. (Kol. 4:11, NW) Ngmera el ileakl el techall el sebeched el mesiou er a Jehovah me a rudam er kid el ngar tia el rolel! Ngsebeched el meruul er tiang sel lebo er ngii a outbreak er a rakt, telemellel a beluu, me a lechub e ngodechelakl.

OLENGESEU SEL LEBO ER NGII A OUTBREAK ER A RAKT

2. Ngera uchul me nglocha mo meringel er kid olengeseu sel lebo er ngii a outbreak er a rakt?

² Sel lebo er ngii a outbreak er a rakt e ngsebechel mo meringel er kid olengeseu er a rechad. El ua tiang, nglocha soad el mo oldingel er a resechelid engdi ngdiak el safe a doruul er tiang. Ngsoad el invite er tirke el diak el betok a ududir el mei er a blid engdi tiang me ngdiak el sebeched el meruul er ngii. Ngsoad el olengeseu engdi ngmeringel er kid a lsekum a telungalek er kid me ngchuarm. Me nguaisei engdi ngsoad el mo olengeseu er a rudam er kid, e a Jehovah mo dmeu a rengul sel doruul aike el sebeched el kirir. (Osi. 3:27; 19:17) Ngera sebeched el meruul er ngii?

3. Ngera kede suub er a remechuodel er a ongdibel er a Desi? (Jeremia 23:4, NW)

³ Aike el sebechir a remechuodel el meruul. A lsekum ke ta er a remechuodel, e bo mungil medengelterir a resib. (Monguiu er a Jeremia 23:4, NW.b) A odos el Desi el dulsaod er ngii er sel uleak uchei el suobel a kmo, “A remechuodel el ngar er a group er ngak a blechoel mengoit a taem lobengkek me a rebebil loldingel me a dirrek sel kim kuk di spend a time el dmak.”c Tia uchul me ngmle beot er tir olengeseu er a Desi er a leduubech a COVID-19 pandemic e lemad a rebebil chedal a telungalek er ngii er tia el rakt.

4. Ngera uchul me a remechuodel a mle sebechir el ngosuir a Desi, e ngera klubeled er ngii?

⁴ A Desi kmo, “Tirka el mechuodel el mle sechelik, a uchul me ngmle beot er ngak ouchais er tir aike el milengesang er ngak.” Ngera te suubii a remechuodel? Bo mungil mengkerengir tirke el ngar cheungel a ulekerruiu er a uchei er a leduubech a tellemall. Bom sechelirir. A lsekum e ngmo er ngii a outbreak er a rakt luchul me ngdiak el sebechiu loldingel er tir e molasem el meruul er ngii el ngar er a kuk ta er a rolel. A Desi kmo, “A lebebil e te kakerous el mechuodel a call me a lechub e te message er ngak er a osisiu el sils. Alta kmle ungil medengei aike el bades el ble el share, engdi ngkmal rirtechii a renguk.”

5. Te mekera remechuodel e sebechir el mo medengei aike el lousbech a rudam me a rudos er tir me bo lsebechir el ngosuterir?

⁵ A ta er a rolel e ngsebechem el mo medengei aike el lousbech a rudam me a rudos er kau a sel moker er tir a ker el diak luchul e te mo merur. (Osi. 20:5) Ng enough a kelir, kar lousbech, me a lmuut el bebil? Ngar ngii a techall el bo loriid a urerir me a lechub e ngblirir? Te ousbech a ngeso el apply a ngeso er a kabelment? A Desi ngilai a ngelsurir a rudam me a rudos er ngii. Engdi aike el kmal ngilsuir loutekangel a ringel el blo lechebangel a bltkil a rengrir a remechuodel el mo er ngii me a omelisiich lulemsang loeak a Biblia. Ngkmo: “A remechuodel a milluluuch lobengkek. Alta kmla obes aike el tekoi ledilung engdi ak dirk medengelii sel feeling el blo kulechesuar er ngii. Ngmle rolel e a Jehovah melekoi er ngak el kmo, ‘Ngkmal diak di lekau el tang.’”​—Isa. 41:10, 13.

6. A rebetok el ngar er a ongdibel, ngngera sebechir el meruul lolengeseu er a rebebil? (Momes er a siasing.)

⁶ Aike el sebechir a rebebil el meruul. Nguaisei, kede expect er a remechuodel el mo omekerreu er a rudam me a rudos er a ongdibel. Engdi a Jehovah olengit er kid el rokui el mo melisiich e olengeseu er a rechad. (Gal. 6:10) Mo lmuut er a kekerei lolechotel a bltikerreng me ngsebechel klou a lerellii el mora chad el smecher. A ngalek a sebechel lodureklii a card me a lechub e ng arts er ngii el mora odam el melisiich er ngii. A ngeasek a sebechel shopping me a lechub e ngmeruul er a kuk ta er a tekoi el kirel a odos. E kuk mekerang a derellii a kall e denguu el mora blil a chad el smecher? Nguaisei el sel lobriid a rakt e ngrokui el chad er a ongdibel ousbech omelisiich. Nglocha sebeched el kiei el telkib el meketeket er a uriul er a miting el mengedecheduch er a rudam me a rudos er a blil a ongdibel me a lechub e ngoeak a videoconferencing. A remechuodel me te dirrek lousbech omelisiich. A rebebil a mla lmuches a note el mora remechuodel el mereng a sulir, el tir a lmuut el mo betok a loruul el kirir a rudam me a rudos er tir er a temel a outbreak er a rakt. Ngmera el melisiich sel doruul er a ngerecheled el mo ‘melemolem el kasisiich a rengud e kaingeseu’!​—1 Th. 5:11.

OLENGESEU ER A RECHAD SEL LEDUUBECH A TELEMELLEL A BELUU

7. Ngera el ringel a mo er ngii sel leduubech a tellemall?

⁷ A tellemall a di mereched el ngodechii a klengar er a chad. A rebebil oriid a kloklir, blirir, me a lechub e ngbetik er a rengrir. Aika el tekoi a dirrek el duubech el mora rudam me a rudos er kid. Ngera sebeched el meruul lolengeseu?

8. Ngera sebechir a remechuodel me a rebdelul a telungalek el meruul er a uchei er a ledubech a tellemall?

⁸ Aike el sebechir a remechuodel el meruul. Remechuodel mngesuterir a rudam er kau el kutmeklterir er a uchei er a ledubech a tellemall. Make sure el kmo rokui el chedal ongdibel a medengei aike el kirir el meruul el mo melemolem el safe e omekedong er a remechuodel. A Margaret el dulsaod er ngii er a uleak uchei el suobel a kmo: “A remechuodel a ultebedii a local need el omeklatk er kemam el kmo ngdirk ngar ngii a techellel a seseb el duubech. Te dilu el kmo a lsekum e te mo kmo ngkired el evacuate me a lechub ngmla mo kengaol a blekeradel, e ngkiram el mereched el chemiis.” Tia kmal mle usbechall el cheldecheduch e le eim el sandei er uriul e ngmlo er ngii a kengaol el seseb. Temel omengull el telungalek e a rebdelul a telungalek a sebechir el review a ngerechelel a derta el chedal a telungalek sel leduubech a tellemall. A lsekum kau me a rengelekem a kltmokl, e ko mo oba chelellakl el reng sel leduubech a tellemall.

9. Te mekera remechuodel e sebechir el uchei me a uriul e te mengetmokl el kirel a tellemall?

⁹ A lsekum e kau a group overseer, e lak mongiil el mo er sel taem el ledubech a tellemall el mo olterekokl el kmo kolab a correct el contact er a rechad el ngar er a group er kau. Mrellii a list er kau e mblechoel el check el kmo ng up-to-date a contact er tir. Me sel ledubech a tellemall e ngsebechem el contact er tir e mo medengei el kmo ngera tousbech. Di mereched el louchais er a tebechelel a chelechad er a remechuodel, e ngii a mo ouchais er a circuit overseer. A rudam sel ledak loureor e ngkmal klou a bo lerellii. Uriul er a seseb e a circuit overseer er a Margaret a dimlak el bechiuaiu el 36 hours. Ngmle mechesang el organize a urerir a remechuodel, el tir a millasem el contact e olengeseu er a re 450 el odam me a odos el chiliis. (2 Ko. 11:27) Me tirke el uluusbech a basio lebo er ngii a miltik osebechakl.

10. Ngera uchul me a remechuodel omes er a oldingel er a rudam me a rudos er tir el kmal klou a ultutelel? (Johanes 21:15)

¹⁰ A remechuodel a urerir el omesterir omelisiich el oeak a Bades e mo melisiich er tirke el ouedikel a rengrir. (1 Pe. 5:2) Sel bo lodengei el kmo ngmo duubech a telemall e ngkirir el make sure el kmo a derta el odam me a odos a safe e ngar ngii a kelir me a basio el kiei er ngii. Me nguaisei engdi a uriul er a tellemall e ngmo kirir lomesterir a omelisiich el oeak a Bades e mo melisiich er tirke el ouedikel e suebek a rengrir, el betok el buil. (Monguiu er a Johanes 21:15.) A Harold el mesiou el chedal a Branch Committee e mla meet er a rebetok el odam me a odos el mlo chuarm er a telemellel a beluu a kmo, “Ngousbech a taem el lmuut el mo mesisiich er chouaitia el blekeradel. Te locha mo feel el kmo a klengar er tir a mla mo normal engdi te locha di melemolem el melatk er a betik a rengrir el mlad, mekreos er a rengrir el klalo, me a lechub e ngmeringel el blekeradel lebla er ngii. Aika el uldasu a sebechel rulleterir el lmuut el mo omelechesiu er a klou el klengiterreng. Tia diak el belkul a kmo ngdiak a klaumerang er tir. Kid a rechad a uaisei.”

11. Ngera bo lousbech er ngii a retelungalek?

¹¹ Remechuodel moltaut er tia el omellach el mo ‘lmangel el obengterir a re lmangel.’ (Rom 12:15) Tirke el suobel chouaika el blekeradel a locha mo ousbech er kemiu lolterekokl a rengrir el kmo ngdirkak loridii a bltkil a rengul a Jehovah me a rudam er tir. A remechuodel a kirir el mo olengeseu er a retelungalek el mo melemolem el meluluuch, mesuub, ngar er a miting, e oldingel. A remechuodel a dirrek el sebechir el melisiich er a ruungalek el mo olengeseu er a rengelekir el melatk aike el tekoi el telemellel a beluu a diak el sebechel tomall. Ruungalek momeklatk er a rengelekiu el kmo a Jehovah Sechelirir e ngii a mo blechoel lolengeseu er tir. E msodii el mo er tir el kmo ngmo blechoel el ngar ngii a telungalek er tir er a rudam me a rudos er a beluulechad el rokir, el tir a kmal kltmokl el mo olengeseu er tir.

12. Ngera sebechir a rebebil el meruul lolengeseu a tellemall el dilubech? (Momes er a siasing.)

¹² Aike el sebechir a rebebil el meruul. A lsekum a tellemall el duubech a kmeed er kau, e moker er a remechuodel a rolel e ngsebechem lolengeseu. Nglocha sebechem el ngoititerir el me kiei er a blim a rebebil chiliis me a lechub re volunteer lolengeseu er a telemellel a beluu. Nglocha sebechem el deliver a kall me aike el lousbech a re publisher. A lsekum a tellemall el duubech a cheroid er kau, e nglocha dirk sebechem lolengeseu. Ngoeak a ngera el rolel? Loeak sel moluluuch el kirir tirke el ngar ngii a lerellii el mo er tir a telemellel a beluu. (2 Ko. 1:8-11) Nglocha sebechem lolengeseu er a ureor loeak a tengetengem el mora worldwide work. (2 Ko. 8:2-5) A lsekum e ngsebechem el mora beluu el miltemall e moker er a remechuodel er a rolel e ngsebechem el mong el volunteer. A lsekum e te invite er kau, e ke locha mo melai a training el ngii a mo ngosukau el lolengeseu el ngar er a kot lungil rolel.

OLENGESEU ER A RUDAM LOUTEKANGEL ODECHELAKL

13. Ngera el omelsemai a lechebangel a rudam er kid el kiei a beluu el merrob a urered?

¹³ Ngar aike el beluu el merrob a urered, e a odechelakl a rullii a klengar el lmuut el mo meringel. A rudam er aika el beluu a dirk chuarm le ngrolel a udoud a uchul, mo smecher, e orideterir a rebetik er a rengrir. Engdi a terebengel a urered a uchul me a remechuodel a diak el sebechir el mimokl el omais me a lechub e te mengedecheduch er tirke el ousbech omelisiich. Tia dilubech el mora Andrei el dulsaod er ngii er sel oeak uchei el suobel. A odos el mlara service group er ngii a mle chuarm le ngtekoi er a udoud a uchul. E mle accident er a mlai. Nguluusbech a betok el botk e dimlak el sebechel loureor. Me alta ngmla er ngii a terebengel a urered me a pandemic, engdi a rudam a mirruul aike el rokui el sebechir lolengeseu, e a Jehovah ulemes er tir.

14. Te mekera remechuodel e sebechir el ochotii a kerebai el mo ultuil er a Jehovah?

¹⁴ Aike el sebechir a remechuodel el meruul. A Andrei a milluluuch e mirruul aike el sebechel. Me ngmilekerang a Jehovah? Nguluusbech er a rebebil ngar er a ongdibel el mle sebechir el meruul a betok el mo olengeseu er a odos. A rebebil er tir uleltak er ngii el mora appointment er ngii. A rekuk bebil a milsa udoud. Me a Jehovah uldbecheterir el mo meruul aike el sebechir, e ulemekngeltengat er tir. (Heb. 13:16) Remechuodel sel lak el sebeched el mimokl el meruul a tekoi e molengit a ngeso er a rebebil. (Jer. 36:5, 6) A ngaruchei er ngii e multuil er a Jehovah. Ngsebechel ngosukau el mo olengeseu er a rudam me a rudos er kau.

15. Ngmekera sebechel melemolem el ngar ngii a kltarreng er a delongeled sel dechebangel odechelakl?

¹⁵ Aike el sebechir a rebebil el meruul. Sel lorrob a urered e ngmo kired el di mo mekekerei el group sel bo deteloi er a rudam. Me ngkmal klou a ultutelel er chelechang a lebudech a delongeled. Lak mkautok e bai momtok er a Satan. Momes lengelakl a chelitecheterir a rudam e molasem el mereched el sumechokl a mlo mekngit er a delongeliu. (Osi. 19:11; Efe. 4:26) Mosiik a techall el mo olengeseu er a rechad. (Tit. 3:14) A ngelsurir a rebebil el mo er ngike el odos a mlo uchul me a service group er tir a kmal mlo close el ua chimo el telungalek.​—Psa. 133:1.

16. Ngua lolekoi a Kolose 4:3, 18, ngmekera sebeched lolengeseu er a rudam me a rudos er kid el modechelakl?

¹⁶ A rebetok el telael el odam me a odos er kid el Kristiano mesiou er a Jehovah alta kabelment a merrob a urered. A rebebil er tir a kelebus el kirel a klaumerang er tir. Ngkmal sebeched el meluluuch el kirir me a telungalek er tir. Ngdirrek el sebeched el meluluuch el kirir tirke el oba blekeu el support er a rudam me a rudos el kelebus alta ngbelkul a kmo ngmo er ngii a techellir el dirrek el mo mekelebus. Te melisiich er tirka el odam el mo melemolem el ulsirs er a Jehovah, omesterir aike el lousbech, e mesebechakl er tir er a kerrekeriil.d (Monguiu er a Kolose 4:3, 18.) Lak moumededenger er a klisichel a nglunguchiu!​—2 Th. 3:1, 2; 1 Ti. 2:1, 2.

17. Ngmekera deketmeklid er chelechang el kirel odechelakl?

¹⁷ Kau me a telungalek er kau a sebechiu el mengetmokl er kemiu el kirel a odechelakl er chelechang. (Rel. 14:22) Lak molatk el kirel aike el rokui el mekngit el sebechel duubech. E bai molisiich er a deleuill er kau me a Jehovah e molengeseu er a rengelekem el mo meruul el uaisei. A lsekum e ngngar ngii aike el taem el bo louedikel a rengum e mouchais er a Dios aike el rokui el ngar er a rengum. (Psa. 62:7, 8) Mdak el telungalek el mesaod a uchul me ngsebechiu loumerang er a Jehovah.e Ngdi ua sel di luchei e mongetmokl er kemiu el kirel a tellemall e ngngosuterir a rengelekiu, me ngdi osisiu el kirel sel mketmeklterir el kirel odechelakl. Te moba blekeu me a chelellakl el reng le ke mla osisecheklterir el mo oumerang lulsirs er a Jehovah.

18. Ngera medechel el kired er a ngar medad?

¹⁸ A budech er a Dios a rullid el mo melechesukid el selebechakl. (Fil. 4:6, 7) Jehovah ousbech er ngii el mengellakl a rengud sel bo dechebangel a rakt, telemellel a beluu, me a odechelakl er chelecha el taem. Ngousbech er a remechuodel el omecheliu er kid. E meskid el rokui a ileakl el techall el mo olengeseu er a rebebil. A budech el domelechesiu er ngii er chelechang a mo ngosukid el kirel a meklou el omelsemai el merael el mei, mo lmuut er a “kloul ringel.” (Mt. 24:21, BT) Ngar tiakid el taem e ngkired el melemolem loba budech er kid e olengeseu er a rebebil el dirrek el mo meruul el uaisei. Engdi uriul er ngii e ngdiak deluut el mo chobangel a tekoi el rullid el mo suebek a rengud. Kede mo oldeu a rengud er a tekoi el soal a Jehovah el kired el mo cherechar, el ngii a mera el budech.​—Isa. 26:3, 4.