Secherel a Uldasu a Mla Oberk er a Beluulechad el Rokir

“Ngblechoel el di suebek a renguk, mo lmuut me ak dengchokl el di ngak el tang.”

“Sel sal kmal mo ungil a renguk ak mo bekikl. Ak medengei el kmo a kngtil a renguk okiuellel.”

“Ak melasem el omes a tekoi el di kirel chelecha el sils. Engdi a lebebil e ak meeleb er a betok el uldasu.”

Aika tekingir a rechad el smecher er a secherel a uldasu. Kau me a lechub e ngbetik er a rengum, ke mo omelechesiu el uaisei?

Bo lemechelaod a rengum el kmo, ngdiak di lekau el tang. A rebetok er chelechang a chuarm el secherel a uldasu a uchul, le ngtir me a lechub e ngbetik er a rengrir a smecher er tia el tekoi.

Kede mera el kiei er a “blsechel a ringel” luchul me kede mo chuarm a betok el tekoi. (2 Timothy 3:1, BT) Ta el omesuub a kmo a beluulechad el rokir, e ngta el chad er a delongelir a reteai a smecher er a ta er a bedengel a secherel a uldasu. Sera leduubech a COVID-19 pandemic er a 2020 e ngngilasech er a 26 el basent a ildisir a rechad el smecher el di suebek a rengrir e ngilasech er a 28 el basent a ildisir a rechad el smecher er a depression.

Ngklou a ultutelel el bo dodengei el kmo te betok el chad a smecher er a secherel a uldasu. Engdi nglmuut el klou a ultutelel a bo dodengelii a rolel e kau me a telungalek er kau a sebechel mo ungil a klengar er kemiu.

**Ngerang a health er a uldasu?**

A lungil a health er a uldesuel a chad e ngungil a rengul e sebechel meruul a tekoi. Ngsebechel loutekangel a rolel a stress er a bek el sils, e sebechel lungil loureor e ungil a rengul er a klengar er ngii.

Secherel a uldasu . . .

A DIAK el chelitechetul a chad.
A secher el uchul a ringel el mora chad e uchul me ngdiak el sebechel lungil omdasu, e diak a klisichel er aike el tekoi el bo lomelechesiu, e ngar ngii a lerellii el mora blekerdelel.
Ngrullii a chad el mo meringel er ngii a mo er ngii a deleuill er ngii me a rebebil, e diak el sebechel el meruul a tekoi er a klengar er a bek el sils.
Ngsebechel duubech el mora ngii di el chad el diak el ior er a rekil, siukang, klebliil, klechelid, skulel, me a lechub e ngkerrekerengel a chad.

Uldekdak el siasing: 1. Ngeasek el buik el mekngit a rengul e depressed. 2. Chad el mengelaod er a bechil. 3. Redil el mengedecheduch er a toktang.

Ngmai a ngeso el kirel a secherel a uldasu

A lsekum ngkau me a lechub e ngbetik er a rengum a experience a ngeldechel a blekerdelem, cheliuem me a lechub e ngblengrum, me a lechub ngmla mo meketeket el di el mekngit a rengum me a lechub e ngsuebek a rengum, e nglocha kirem el mo osiik a ukeruul el sebechel ngosukau el mo medengelii a uchul me ke uaisei, e sumecheklii. Engdi ngsebechem el metik a ngeso er ker?

Ngike el kot el mellomes a rengul el chad el Jesus Kristus a dilu el kmo: “A re diak el secher el chad a diak lousbech er a toktang; ng bai tirkel smecher ousbech er ngii.” (Mateus 9:12) A rechad el ngar ngii a secherir sel lengai aike el rolel a ukeruul me a kar lousbech, e ngsebechir lolengeasek a symptoms er tir e mongeseu el mo ungil a klengar er tir. Ngolechotel a llomeserreng a lemereched el mo osiik a ukeruul a lsekum e ngoberaod me a lechub ngmla mo meketeket el ngar ngii a symptoms er tir.a

Me alta Biblia diak el babier er a ukeruul engdi a tekoi er a chelsel a sebechel ngosukid er a ringelel a uldasu. Aki mengemedaol er kau el mo merriter aika el suobel er tia el babier el mesaod er a rolel a Biblia sebechel ngosukid er a secherel a uldasu.

a A Ongkerongel a diak lolisiich er a ileakl el bedengel a ukeruul. A chad a kirel kerekikl el merriter aike el options el ngar ngii el kirel, e melilt.