Aike el Louchais er Kid a Biblia el Kirel Ngike el Milskid Tia el Babier

1. Ngera uchul me ke kmal oba omereng el saul el kirel a Biblia?

KEDE kmal mereng a sulel a Jehovah el kirel a Biblia! Ngoeak a Biblia e ngomeskid a mellomes el ulekrael el sebechel ngosukid el kmo kede mekerang sel bo dechebangel a mondai. Ngdirrek el meskid a ungil omelatk el kirel a ngar medad el taem. A ngaruchei er ngii, a Jehovah ousbech er a Biblia el ouchais er kid el kirel. Sel dolebedebek aike el klebokel el blekerdelel, e ngkmal rutechii a rengud e odbechid el lmuut el mo kmeed er ngii e mo soad el mo kmeed el sechelil.​—Psa. 25:14.

2. Ngoeak a ngera el rolel e a Dios a mla ochotii er a rechad?

² A Jehovah soal a rechad a bo lodengelii. A ngar er a mong e nguluuchais er a rechad el kirel loeak a berrous, ues, me a dirrek el rechanghel. (Ule. 12:6; Rel. 10:3, 4) Engdi ngmekera sebeched el mesuub aika el berrous, ues, me a lechub e ngtekingel a Dios a lak a lmuches? Tiakid a uchul me a Jehovah uluusbech er a rechad el “[lemuches] er a babier a rokui el tekoi” el soal a bo dodengei. (Jer. 30:2) A “Dios [el] diak a telemellel a rolel” a uchul me ngulterekokl a rengud el kmo tia el rolel a longedecheduch er kid a kot lungil, e mo ngosukid.​—Psa. 18:30.

3. Ngmilekera Jehovah oterekeklii el kmo ngmo er ngii a Biblia er chelecha el taem? (Isaia 40:8)

³ Monguiu er a Isaia 40:8. A Tekingel a Dios a mla mo betok el telael el rak el lomesterir a reblak a rengrir el chad a mellomes el ulekrael. Ngmekera sebechel tekoi? A Biblia milluches er a babier el di beot el metemall me ngdiak a original copy er ngii er chelecha el taem. Engdi Jehovah ulterekeklii el kmo te mo lmuches a copy er ngii. Alta remilluches a diak el mecherrungel, engdi te kmal mle kerekikl er a loluches a copy er ngii. El ua tiang, a ta el chellimosk a milluches el kirel aike el Bades el tekoi er a Hebru el kmo: “Ngkmal ulterekokl a rengud el kmo ngdiak a ngii di el chuodel el babier el melemalt a copy er ngii el ua Biblia.” Me alta Biblia milluches er a kmal irechar er a babier el miltemall me a rechad el mle copy er ngii a dimlak lemecherrungel, engdi ngulterekokl a rengud el kmo aike el donguiu er a Biblia er kid er chelecha el taem ouchais a uldesuel a Jehovah, el ngike el milskid tia el babier.

4. Ngera kede mo mesaod er tia el suobel?

⁴ A Jehovah meskid a “bek el ungil e cherrungel sengk.” (Jak. 1:17) A Biblia ta er a kot lungil el sengk el bla lebeskid a Jehovah. A chad sel lebeskid a sengk e ngouchais er kid el kmo, ngungil medengelkid me aike el dousbech me a lechub e ngdiak. Me ngdi osisiu el kirel ngike el milskid a Biblia. Sel dorriter er tia el sengk, e kede suub a betok el kirel a Jehovah. Kede suubii el kmo ngkmal ungil medengelkid e medengei aike el dousbech. Ngar tia el suobel e kede mo mesaod aike el sebeched el suub er a Biblia el kirel a edei el blekerdelel a Jehovah: llomeserreng, llemalt, me a bltikerreng er ngii. Me a kot e me dosaod er a rolel e a Biblia ochotii a llemesel a rengul a Dios.

BIBLIA OCHOTII A LLEMESEL A RENGUL A DIOS

5. Ngera ta er a rolel e a Biblia ochotii a llemesel a rengul a Dios?

⁵ A Jehovah medengei el kmo kede ousbech a ungil ulekrael. E a sengk er ngii el Biblia a mui er a llomeserreng er ngii. A ulekrael er a Biblia a ungil a leruul el mora rechad. Ngmelodech a klengar er a rechad. Sera lemeluches aike el kot el babier er a Biblia, e a Moses a dilu er a rechedal a Dios el chad er a Israel el kmo: “A ikal osisechakl a diak di le bechachau el tekoi; ng kmal klengar er kemiu.” (Dut. 32:47) Tirke el uleltirakl a Bades a mle ungil e deurreng a klengar er tir. (Psa. 1:2, 3) Me alta Biblia milluches er a kmal irechar, engdi ngdirk ngar ngii a klisichel el remuul a klengar er a rechad el lmuut el mo ungil. El ua tiang, ngar er a series el “The Bible Changes Lives,” el debetik er ngii er a jw.org, e ngsebechem el metik a betok er a 50 el chisel a klengar er a rechad el ouchais er a rolel e a Biblia “meral oureor el ngar a [chelsir] a ruumerang.”​—1 Th. 2:13.

6. Ngera uchul me ngsebeched el melekoi el kmo, ngdiak a babier el ua Biblia?

⁶ Ngdiak a ngii di el babier el ua Tekingel a Dios. E ngerang? E le ngike el milskid tia el babier el Jehovah el Dios, a kot el mesisiich e diak a ulebengelel me a diak a mellomes a rengul el uai ngii. A betok el babier a mla mad a remilluches er ngii, me a ulekrael er a chelsel a mo diak a ultutelel er uriul. Engdi a ulekrael el debetik er a Biblia a oureor er a bek el taem, e mla ngosuterir a rechad el rokui er a kakerous el taem er a reksi. Sel donguiu er tia el chedaol babier e dolebedebek aike el desuub er ngii, e ngike el milskid tia el babier a ousbech er a chedaol reng er ngii el ngosukid el mo mes a rolel e ngsebeched loltaut omellach er ngii er a klengar er kid. (Psa. 119:27; Mal. 3:16; Heb. 4:12) Chochoi, ngike el milskid a Biblia kmal soal lolengeseu er kau. Tia kirel rullid el mo menguiu er a Biblia er a bek el sils!

7. Ngmilekera Biblia e rirelleterir a rechedal a Dios er a irechar el mo tang?

⁷ A dirrek el ta er a rolel e a Biblia ochotii a llemesel a rengul a Dios a oeak a rolel e ngrulleterir a rechedal a Dios el mo tang. A rechad er a Israel er a lebora Beluu er a Nglat e te mlo kiei a kakerous el beluu er ngii. A rebebil a mlo chad er omenged, omekeroul a kerbou, me a remlo chad er a sers. A rechad er a Israel el kiei er a ta el beluu a mle sebechir el mo diak lolatk er a rebebil er tir el kiei er aike el kuk bebil er a beluu. Engdi Jehovah kiltmeklii a rolel e a rechad er a Israel a mlo kldibel er a bebil el taem el mo orrenges er a Tekingel el mechuiu e mesaod a belkul. (Dut. 31:10-13; Neh. 8:2, 8, 18) Ka molebedebek er a uldesuel a chad er a Israel el mora Jerusalem e meseterir a rebetok el miliol el chad el mlara kakerous el beluu el me mengull er a Jehovah! Me a Jehovah ullengeseu er a rechedal el mo melemolem el tang. Uriul er a lebo er ngii a ongdibel er a Rekristiano, e a rechedal a ongdibel a mle sechal me a redil el millekoi a kakerous el omelekoi, el bebil er tir a mle ngarbab el chad me a rekuk di chad er a beluu me a remerau me a remechebuul. Engdi tir el kmal mle betik a rengrir er a Tekingel a Dios a uchul me te mle tang el mengull er a di ta el mera el Dios. Tirka el mlo oumerang a di mle sebechir el mo medengelii a belkul a Tekingel a Dios loeak a ngelsuir tirke el milengull er a Jehovah me a dirrek el mora ongdibel.​—Rel. 2:42; 8:30, 31.

8. Ngmekera Biblia e meruul er a rechedal a Dios el mo tang?

⁸ A mellomes a rengul Dios er kid a melemolem lolisechakl e meruul er a rechedal el mo tang loeak a Biblia. Nguchul aike el rokui el kall er a klereng el doldeu a rengud er ngii. Kede blechoel el mo kldibel er a miting, assembly, me a convention er kid e orrenges a omengiuel me a omesodel a Bades. Me a Biblia kmal klou a ultutelel el dongu lousbech er ngii a Jehovah el olengeseu er a rechedal el mo “kaukledem el mesiou er ngii.”​—Sef. 3:9, NW.

9. Ngera el blekeradel a dousbech er ngii a lsoad el mo medengelii a belkul a klumech er a Biblia? (Lukas 10:21)

⁹ Molatk er a dirrek el ta er a olechotel a llomeserreng er a Jehovah. Betok el telengtengil a Biblia milluches el ngar er a rolel e ngdi sebechir a rengariou a rengrir el chad el mo medengei. (Monguiu er a Lukas 10:21.) A rechad er ker me ker a menguiu er a Biblia. Ngua lolekoi a ta el chellimosk, a Biblia “a diak di sel kot el klou a ildois er a rechad el menguiu er ngii, ngdirrek a rechad a kmal kerekikl sel longuiu er ngii.” Me nguaisei engdi tirke el mera el ngariou a rengrir a medengei a belkul a tekoi er a chelsel e oltaut er a klengar er tir.​—2 Ko. 3:15, 16.

10. Ngera lmuut el ta er a rolel e a Biblia ochotii a llomeserreng er a Jehovah?

¹⁰ Kede suubii a llomeserreng er a Jehovah el ngar er a lmuut el ta er a rolel. A Jehovah ousbech er a Biblia el diak el di lolisechakl er a rokui el chedal, ngdirrek lousbech er ngii el olisechakl e mengelaod er a derta me a derta er kid. Kede melechesiu er a ulekerreuil a Jehovah sel donguiu er a Tekingel. (Isa. 30:21) Kid ngmla mo tela el debora Biblia e donguiu a bades sel bo dechebangel a mondai, e feel el kmo ngkmal milluches el kired? Me nguaisei engdi Biblia, milluches me a rebetok el miliol el chad bo lodengelii. Me ngmekera e sebeched el metik a tekoi er ngii el chatter er chelecha el taem er kid, e kmal chatter er a tekoi el mousbech er ngii? Ngdi sebechel uaisei, e le ngike el milskid a Biblia a kot el mellomes a rengul el chad el ngar.​—2 Ti. 3:16, 17.

BIBLIA OCHOTII A LLEMELTEL A DIOS

11. Ngmilekera Dios e ochotii el kmo ngdiak longetukel er a lemeluches a Biblia?

¹¹ A llemalt a dirrek el ta er a blekerdelel a Jehovah. (Dut. 32:4) A llemalt a blechoel el obengkel a diak longetukel, e a Jehovah a kmal diak longetukel. (Rel. 10:34, 35; Rom 2:11) Tia desa er a omelekoi luluusbech el meluches er a Biblia. Aike el kot el 39 el babier er a Biblia a mle tekoi er a Hebru, el mle beot er a rechedal el mo medengei er seikid el taem. Engdi taem er a rekot el Kristiano e a omelekoi el ble lodengelii a ruumesingd er a rechad a tekoi er a Grik, me aike el 27 el lulebongel el babier er a Biblia lulluches el tekoi er a Grik. A Jehovah dimlak lolilt el meluches er a Tekingel lousbech er a di one el omelekoi. Chelecha el taem e ngbetok er a eai el biliol a ildisir a rechad el melekoi a kakerous el omelekoi. Ngmekera tirka el kmal betok el chad e sebechir el mo mesuub el kirel a Jehovah?

12. Ngera ta er a rolel e ngmla tmaut a Daniel 12:4 (NW) er chelecha el uriul sils?

¹² Ngoeak a profet Daniel, e a Jehovah tilbir el kmo a taem er a ulebongel e ng “mo betok” a “mera el klemedengei” el ngar er a Biblia. A rebetok a mo medengelii. (Monguiu er a Daniel 12:4, NW.b) A ta er a rolel e ngmla mo betok a mera el klemedengei a oeak a ureor el oliuid, oltobed, e merous a Biblia me a babier el mengai er a Biblia. A Biblia a sel kot el betok oidel me a omerusel el babier. Oidel a Biblia loltobed a siobai a lebebil e ngkmal meringel a cheral. A rechedal a Dios a mla oidii a cherrungel el Biblia me a lechub e ngtedobech er ngii el ngar er a betok er a 240 el omelekoi, me a ngii di el chad a sebechel nguu a copy el diak locheraol. Me a rechad er a rokui el renged a mesuub el kirel a “Ebangkelio el kirel [a] Renged” er a uchei er a lemei a ulebongel. (Mt. 24:14) A Dios er kid er a llemalt a soal msa techellir a rokui el chad el mo medengelii loeak sel longuiu er a Tekingel, e le ngkmal betik a rengul er kid.

BIBLIA OCHOTII A BLTKIL A RENGUL A DIOS

13. Ngera uchul me ngsebeched el melekoi el kmo a Biblia ochotii a bltkil a rengul a Dios? (Johanes 21:25)

¹³ A Biblia ngosukid el mo mesa el kmo a bltikerreng sel kot el ngarbab el blekerdelel a Jehovah. (1 Jn. 4:8) Molatk aike el leliluches a Jehovah er a Biblia me aike el dimlak el lluches. Ngliluches aike el dousbech me lsebechel mo er ngii a deleuill er kid me ngii, e mo er ngii a deurreng er a klengar er kid er chelechang, me a rolel e ngsebeched el nguu a diak a ulebengelel el klengar. Me nguaisei, a bltkil a rengul mei er kid a uchul me ngdimlak lomekberaod er kid er a kmal betok el tekoi.​—Monguiu er a Johanes 21:25.

14. Ngera dirrek el ta er a rolel e a tekoi el debetik er a Biblia ochotii a bltkil a rengul a Dios el mei er kid?

¹⁴ A Jehovah dirrek lulechotii a bltikerreng er a lolilt el mengedecheduch er kid el ngar er a rolel e ngkobkellid. Ngar er a Biblia e ngdiak el beskid a betok el llach el louchais a bek el tekoi el kired el meruul el ua longedereder er a klengar er kid. E ngbai ousbech a chisel a klengar er a rechad, ulaoch, me a ungil ulekrael el ngosukid el mo ungil melilt. Ngoeak aikakid el rolel e a Tekingel a Dios a odbechid el mo betik a rengud er ngii e mera el ngar er a rengud lolengesenges er ngii.

15. (a) Ngmekera Jehovah e mla ochotii el kmo ngomekerreu er tirke el menguiu er a Tekingel? (b) Sel momes er a siasing, e ngtecha el ngar er a Biblia a lolebedebek el kirel ngika el ngalek, kekerei el odam, me ngika el chudela el odos?

¹⁵ A Biblia ochotii el kmo a Dios a kmal omekerreu er kid. Ngoeak a ngera el rolel? A Tekingel a mui er a cheldecheduch louchais a uldesuir a rechad. Ngsebeched el melechesiu aike el lulemelechesiu e le tir a “mle chad el ua ikid.” (Jak. 5:17) A lmuut el ngarbab er ngii, sel dorriter omerellel a Jehovah el mora rechad el uai kid, e ngsebeched el mo mesa el kmo “a Rubak a kmal bekokuii e chubechubchad.”​—Jak. 5:11.

16. Ngera kede suubii el kirel a Jehovah sel donguiu el kirir a rechad er a Biblia el riruul a cheleuid? (Isaia 55:7)

¹⁶ Ngar ngii a lmuut el ta er a rolel e a Biblia ochotii a bltkil a rengul a Jehovah el mei er kid. A Tekingel olterekokl er a rengud el kmo ngkmal diak bo lechitid sel deruul a cheleuid. A rechad er a Israel a mlo betok el taem el lebora klengit lomtok er a Jehovah, engdi sel lobult e a Jehovah ousubes er tir. (Monguiu er a Isaia 55:7.) A rekot el Kristiano a dirrek el mle medengei el kmo a Dios a kmal mle betik a rengul er tir. A apostol Paulus a mlukreng el mo melekoi er a rekldemel er a klaumerang el mo ‘ousubes . . . e mengelaod’ er a chad el mirruul er a oberaod el klengit engdi ngulebult er a kngtil. (2 Ko. 2:6, 7, BT; 1 Ko. 5:1-5) Ngmera el ileakl el tekoi el Jehovah dimlak loltngakl er a remengull er ngii le tir el riruul a cheleuid! E ngbai, ngoeak a bltikerreng e ngulengeseu e mesmechokl er tir, e mechititerir me te lmuut el mei er ngii. Ngtibir er chelecha el taem el kmo ngmo meruul el uaisei el kirir a rokui lobult er a kngterir.​—Jak. 4:8-10.

MONGREOS ER A “UNGIL . . . SENGK” EL TEKINGEL A DIOS

17. Ngera uchul me a Biblia kmal ileakl el sengk?

¹⁷ A Jehovah mla meskid a klebokel el sengk. Ngera uchul me a Tekingel a kmal ileakl? Ngua bla desuubii, ngochotii a llomeserreng, llemalt, me a bltikerreng er ngii. Tia el babier ochotii el kmo a Jehovah soal a bo dodengelii. Ngsoal a bo desechelil.

18. Ngmekera dochotii el kmo kede oba omereng el saul el kirel a “ungil . . . sengk” el Biblia?

¹⁸ Ngkmal diak el soad el mo meterekakl er a “ungil . . . sengk” el Tekingel a Dios. (Jak. 1:17) Me dolemolem lolecholt er omereng el saul el kirel. Ngsebeched el meruul el uaisei sel donguiu er ngii e dolebedebek a tekoi el donguiu. Sel doruul el uaisei e ngsebechel mo ulterekokl a rengud el kmo ngika el milskid a Biblia a mo omekngeltengat er kid me kid a mo “metik er a klemedengei er a Dios.”​—Osi. 2:5.