Rolel a Jehovah Onger a Nglunguched

1-2. Ngera kede locha mo omdasu er ngii el kirel a nglunguched?

NGMLA ta el bo momdasu el kmo a Jehovah ngonger a nglunguchem me a lechub e ngdiak? Ngdiak di lekau el tang a mla omdasu el uaisei. Te betok el odam me a odos a mla melekoi el uaisei sel lechebangel a ringel. A lsekum kede chelebangel er a ringel, e ngdirrek el locha mo meringel er kid a mesa rolel a Jehovah onger a nglunguched.

² Me domes a uchul me ngsebechel mo ulterekokl a rengud el kmo a Jehovah onger a nglunguchir a remengull er ngii. (1 Jn. 5:15) Kede dirrek el mo onger aika el edei el ker: Ngera uchul me a lebebil e kede mo omdasu el kmo a Jehovah a diak longer a nglunguched? Ngoeak a ngera el rolel e a Jehovah onger a nglunguuch er chelecha el taem?

A JEHOVAH LOCHA DIAK BO LONGER EL NGAR ER A ROLEL EL SOAD

3. Ngera uchul me a Jehovah kmal soal a doluluuch el mo er ngii?

³ A Bades a olterekokl a rengud el kmo a Jehovah kmal betik a rengul er kid, me kid a kmal mekreos er osengel. (Hag. 2:7; 1 Jn. 4:10) Sei a uchul me ngmengemedaol er kid el mo olengit a ngelsuil loeak a nglunguuch. (1 Pe. 5:6, 7) Ngsoal lolengeseu er kid el mo melemolem el kmeed er ngii e outekangel a ringel el bo dechebangel.

4. Kede mekera medengei el kmo a Jehovah onger a nglunguchir a remengull er ngii? (Dirrek el momes er a siasing.)

⁴ Ngar er a Biblia e kede blechoel el menguiu el kirel a Jehovah el kmo ngulenger a nglunguchir a remengull er ngii. Ngsebechem el medesuii a ta er tir? E a King David? Ngika mle betok a kdekudel el cherrouel er a klemengetel a klengar er ngii el rokir e mle blechoel el meluluuch lolengit er a ngelsuil a Jehovah. A ta el taem e ngkmal ulengit el kmo: “Mrenges a nglunguchek e RUBAK, mrenges a ongtik! Ke melemalt me mrengesii a ongtik; ng blak a rengum me monger er ngak!” (Psa. 143:1) A Jehovah ulenger er a nglunguchel a David e ulsebelii. (1 Sa. 19:10, 18-20; 2 Sa. 5:17-25) Me a David a mle sebechel ulterekokl a rengul el melekoi el kmo: “[Jehovah] kmeed er tirkel rokui el omekedong er ngii.” Kid me ngdirrek el sebechel mo ulterekokl a rengud er tiang.​—Psa. 145:18.

5. A remesiungel a Jehovah er a ngar er a mong ngmle blechoel el monger a nglunguchir el ngar er a sorir el rolel? Mosaod. (Dirrek el momes er a siasing.)

⁵ A Jehovah locha diak bo longer a nglunguched el ngar er a rolel el soad. Tiakid a dilubech el mora apostol Paulus. Ngika ullengit er a Dios me lecheridii “a secher el ulemekringel er a [bedengel] el ua ia toched.” Ngmle edei el taem el loluluuch el kirel. A Jehovah ngulenger er a nglunguchel? Chochoi, engdi ngdimlak el ngar er a rolel el soal. Jehovah dimlak el choridii tia el mondai er ngii, e ngbai milsa klisiich luluusbech er ngii el mo melemolem el mesiou er ngii loba blakerreng.​—2 Ko. 12:7-10.

6. Ngera uchul me a lebebil e ngua lak longer a nglunguched a Jehovah?

⁶ Kid a locha mo monger a nglunguched el ngar er a rolel el dimlak dolatk er ngii. Ngsebechel mo ulterekokl a rengud el kmo a Jehovah medengelii sel kot lungil rolel e ngngosukid. Ngika sebechel “kudmokl a lmuut el kmal obdois el tekoi er a ikel sebeched el olengit, ma me soiseb er a uldesued.” (Efe. 3:20, 21) Tia uchul me a nglunguched a mo monger er a taem me a lechub e ngngar er a rolel el dimlak dolatk er ngii.

7. Ngera uchul me nglocha kired el mo melodech a tekoi el doluluuch el kirel? Mosaod.

⁷ Nglocha kired el mo ngmodech a tekoi el doluluuch el kirel sel lobeketakl er a rengud a soal a Jehovah. El ua tiang, molatk er a Martin Poetzinger. Kedeb el taem er uriul er a bo lebechiil, e a odam Poetzinger a mlekelebus er a Nazi concentration camp. A uchelel e ngullengit er a Jehovah me lotebedii er a concentration camp me bo lsebechel lomekerreu er a bechil e lluut el mo omerk er a klumech. Me nguaisei, a eru el sandei er uriul e ngmlo mtebengii el kmo ngdimlak a olechotel a kmo, a Jehovah mengetmokl er a rolel e ngtuobed. Me ngmlo meluluuch el kmo: “Jehovah, a kulengit me mochotii er ngak el kmo ngngera soam a kuruul er ngii.” Ngika mlo melatk er tirke el bebil er a odam el ngar tia el camp me a tekoi el mle kirir loutekangel. A rebetok er tir a mle bekikl el kirir a rebecherir me a rengelekir. Me a odam el Poetzinger a milluluuch el kmo: “Jehovah ke mera el mesaul er tia el beches el assignment er ngak. Mngesukak el mo smisicheterir a rudam er ngak.” Ngika milengoit a etiu el rak el ngar er aika el camp el meruul er tiang!

8. Ngera el klou a ultutelel el tekoi a kired el melatk er ngii sel doluluuch?

⁸ Ngdiak el kired lobes el kmo a Jehovah a ngar ngii a moktek er ngii, e ngii a mo otutii loltirakl er a taem el bla loterekeklii. Tia el moktek er ngii a uldimukl er a mo olekngemed a rokui el mondai luchul a klou el ringel er chelecha el taem, me ngmo diak el mo cherechar. Mondai el ua telemellel a beluu, secher, me a kodall. A Jehovah mo otutii a moktek er ngii loeak a Rengedel. (Dan. 2:44; Och. 21:3, 4) Me nguaisei engdi chelecha Jehovah dirk omechei er a Satan me ngmengedereder er a beluulechad.b (Jn. 12:31; Och. 12:9) A lsekum a Jehovah sumechokl a rokui el mondai er chelechang, e ngmo ua lungil mengedereder a Satan. Engdi chelecha el dongiil er a Jehovah el mo oltaut a telbilel, e ngdiak lebelkul a kmo ngdiak lolengeseu er kid. Me dosaod a bebil er a rolel e a Jehovah olengeseu er kid.

ROLEL E A JEHOVAH ONGER A NGLUNGUCHED ER CHELECHA EL TAEM

9. Ngmekera Jehovah e sebechel ngosukid sel lekired el meruul omelilt? Mosaod.

⁹ Ngmeskid a llomeserreng. A Jehovah tibir el mo meskid a llomeserreng me lsebeched el mo ungil melilt. Kede tokubets lousbech er a llomeserreng er a Dios sel bo doruul omelilt el ngar ngii a bo lerellii er a klengar er kid el rokir, el ua mo bechiil me a lechub e kede melemolem el mesobil. (Jak. 1:5) Molatk er a experience er a mesobil lodos el Maria.c Ngkmal mle dmeu a rengul el mesiou el regular pioneer er a bo lodengelii a ta el odam. Ngmelekoi el kmo: “Sera lemukeroul a deleuill er kemam, me ngak a kmal mlo soak ngii me ngii a mlo soal ngak. Ak mle medengei el kmo ngkirek el melilt. Ak milluluuch el kemanget el taem el kirel. Ak kmal luluusbech er a ulekrael er a Jehovah, engdi ak dirrek el mle medengei el kmo Jehovah diak bo loruul er a omelilt el kirek.” Maria ulemelechesiu el kmo a Jehovah ulenger er a nglunguchel el lolengit er a llomeserreng. Ngoeak a ngera el rolel? Sera loruul a research lousbech aike el babilenged e ngmlo sebechel metik a ileakl el suobel el ngilsuir longer a tekoi el lullatk. Ngdirrek el kmal lulerrenges er a ulekrael er a delal el kmal blak a rengul. A ulekrael er ngii a ngilsuir a Maria el mo merriter er a rengul. Me ngmle sebechel lungil melilt.

10. A doltirakl er a 2 Korinth 4:7, e ngera ngmo meruul er ngii a Jehovah el olengeseu er a remengull er ngii? Mosaod. (Dirrek el momes er a siasing.)

¹⁰ Ngmeskid a klisiich el outekangel. Ngdi ua lurruul er ngii el kirel a apostol Paulus, a Jehovah dirrek el mo meskid a klisiich el dousbech er ngii el mo outekangel a ringel. (Monguiu er a 2 Korinth 4:7.) Molatk er a rolel e a Jehovah ngilsuir a odam el Benjamin el loutekangel er a kmal meringel el blekeradel. A klou er a klengar er a Benjamin el ngeasek e ngii me a telungalek er ngii a kiliei a kiamp er a Africa el kirir a rechad el chemiis a mekemad. Ngkmo: “Ak mle blechoel el meluluuch el mora Jehovah lolengit er ngii me lebeskak a klisiich el mo meruul a tekoi el lodeuir a rengul. A Jehovah ulenger a nglunguchek loeak a lebeskak a budech er a uldasu, blekeu el melemolem lomerk, me aika el babilenged el ngilsukak el melemolem el mesisiich er a klereng.” Ngmelemolem el melekoi el kmo: “Sera kunguiu a experience er a rudam me a rudos e kisa rolel e a Jehovah ngilsuterir el outekangel, e ngsilsichii a renguk el mo melemolem loba blakerreng.”

11-12. Ngmekera Jehovah e locha mo ousbech er a telungalek er kid er a klereng el mo onger a nglunguched? (Dirrek el momes er a siasing.)

¹¹ Ngousbech er a telungalek er kid er a klereng. Sel kesus er a uchei er a letengetengii a klengar er ngii a Jesus e ngkmal mle blak a rengul el meluluuch. Ngullengit er a Jehovah me lak lebechititerir a rechad me bo lomdasu el kmo ngoltuub er ngii. Engdi Jehovah dimlak loruul er tiang, ngbai ngilsuir a Jesus loeak a loderechii a ta er ngii el anghel el mo melisiich er ngii. (Lk. 22:42, 43) Jehovah dirrek el locha mo ngosukid loeak a dengua me a lechub e ngodngelel a odam me a lechub odos er kid el melisiich er kid. Kid el rokui a sebeched el losiik a techall el mo melekoi a “ungil tekoi” el mora rekldemed er a klemerang.​—Osi. 12:25.

¹² Molatk er a experience er a Miriam. Sesei el sandei er uriul er a lemad a bechil, e ngmlara blai el di ngii el tang el kmal mekngit a rengul e diak lodengei el kmo ngmo mekerang. Ngika lilangel el diak el sebechel el stob e kmal mle soal mengedecheduch er a kmung techang. Ngmelekoi el kmo: “Ngkmal dimlak a klisichel a renguk lomekedong er a ngii di el chad, me ak milluluuch el mora Jehovah. Me ak dirk milluluuch e lmangel e a dengua er ngak ouring. Ngmle ta er a remechuodel el kmal ungil sechelik.” Miriam a ngilai a omelisiich me a ongelaod er ngika el mechuodel me a bechil. Ngulterekokl a rengul el kmo a Jehovah uldbechii ngika el mechuodel el mo oudengua el mo er ngii.

13. Mouchais er a ta er a olechotel e a Jehovah sebechel lousbech er tirke el diak longull er ngii el mo onger a nglunguched.

¹³ Nglocha mo ousbech er a rechad el diak el longull er ngii. (Osi. 21:1) A lebebil a Jehovah olengeseu er a rechedal loeak sel lodbecheterir tirke el diak losiou er ngii el mo ngosuterir. El ua tiang, nguldbechii a King Artakserses el mo kongei er a Nehemia el mora Jerusalem el mo olengeseu el lmuut el toketekii ngii el mats. (Neh. 2:3-6) Chelecha el taem a Jehovah dirrek el sebechel odbecheterir tirke el diak longull er ngii el me ngosukid sel bo dousbech er ngii.

14. Ngera kmal em appreciate er ngii er a experience er a Soo Hing? (Dirrek el momes er a siasing.)

¹⁴ A odos el Soo Hing a mlo melechesiu el kmo a Jehovah ngilsuir loeak a ngelsuil a toktang er tir. A ngelekel el sechal a smecher er a bebil el secherel a uldasu. Sera lemetemall a ngelekel er a klou el tellemall e ngii me a bechil a mle kirir el mo diak loureor e omekerreu er ngii. Tia uchul me ngmlo er ngii a nelsengesel a udoud. A Soo Hing a mlo omdasu el kmo ngdikea el sebechel loutekangel. Me ngmilluluuch louchais er a Jehovah aike el rokui el ngar er a rengul e ullengit a ngeso. A toktang er tir a mlo osiik a rolel e ngsebechel ngosuir ngii me a telungalek er ngii. Tia uchul me ngmlo sebechir el melai a ngeso er a kabelment e metik er a ungil basio el sebechir el afford er ngii. Uriul e a Soo Hing a dilu el kmo: “Aki kmal milsang a chimal a Jehovah. Ngika mera el ‘onger a nglunguuch.’”​—Psa. 65:2.

KEDE OUSBECH ER A KLAUMERANG EL OSIIK E KONGEI ER A NGER ER A JEHOVAH

15. Ngera ngilsuir a ta el odos el mo mesa el kmo a Jehovah onger a nglunguchel?

¹⁵ A nglunguched a diak leblechoel el monger er a mengasireng el rolel. Engdi nger er ngii a sel dousbech er ngii el mo melemolem loba blakerreng el mora Demad el ngar er a eanged. Me bo mkerekikl lomes a nger er a Jehovah er a nglunguchem. A odos el Yoko mlo omdasu el kmo a Jehovah diak longer a nglunguchel, engdi ngika mlo omuchel el meluches a ongtil el mora Jehovah. A telkib el taem er uriul e ngulemes er a babilengel e mlo mtebengii el kmo a Jehovah mla onger a betok el nglunguchel, mo lmuut er a bebil el bla lobes el kirel. Ngkired el kuk mong e mengoit a taem el stob e melatk a rolel e a Jehovah onger a nglunguched.​—Psa. 66:19, 20.

16. Ngmekera sebeched lochotii a klaumerang er kid el ngar er a nglunguched? (Hebru 11:6)

¹⁶ Kede ochotii a klaumerang el diak di loeak sel doluluuch el mora Jehovah ngdirrek loeak sel dekengei a rolel e ngonger a nglunguched. (Monguiu er a Hebru 11:6.) Molatk er a Mike me a bechil er a Chrissy. Ngmla er ngii a turrekong er tir el mo mesiou el ngar er a Bethel. A Mike a kmo: “Aki mle apply el obekel el betok el taem e milluluuch el mora Jehovah el betok el taem el kirel. Engdi ngdimlak a ta el le invite er kemam.” A Mike me a Chrissy millemolem el ulterekokl a rengrir el kmo a Jehovah a mle medengelii a ungil rolel e ngousbech er tir. Te millemolem el meruul aike el rokui el sebechir. Te milsiou el regular pioneer er a basio luluusbech a ngeso e mle teloi a ureor lomekedechor a basio el kirel omengull. Chelecha el taem e te mesiou el oldingel ongdibel. A Mike a kmo: “A Jehovah dimlak leblechoel longer a nglungucham er a rolel el somam, engdi ngmla onger e ngar er a rolel el lmuut lungil er aike el ki mullatk.”

17-18. A doltirakl er a Psalm 86:6, 7, e ngngera sebechel mo ulterekokl a rengud er ngii?

¹⁷ Monguiu er a Psalm 86:6, 7. A ta er a milluches er a Psalm el David a mle ulterekokl a rengul el kmo a Jehovah ulerrenges e ulenger a nglunguchel. Ngdirrek el sebechel mo ulterekokl a rengum er tiang. Tirke el dulsaod er tir er tia el suobel olterekokl a rengud el kmo, a Jehovah sebechel meskid a llomeserreng me a klisiich el dousbech er ngii el mo outekangel. Nglocha mo ousbech er a telungalek er kid er a klereng me a lechub e ngtirke el diak losiou er ngii el me olengeseu er kid.

¹⁸ Me alta Jehovah locha diak bo longer er a nglunguched el ngar er a rolel el dullatk er ngii, engdi kede medengei el kmo ngmo onger. Ngmo meskid aike el dousbech er sel taem el dousbech er ngii. Me molemolem el meluluuch loba klaumerang, lulterekokl a rengum el kmo a Jehovah mo omekerreu er kau er chelechang me ngii a “mo meskau sel msal oureng er ngii” er a beches el blekeradel el di kmedung e ngmei.​—Psa. 37:4.