Mochotii a Bltikerreng me a Klechubechub el Mora Rengar er a Klengit

1. Ngera sebechel duubech sel lerellii oberaod el klengit a chad?

NGAR sel uleak uchei el suobel e kede milsaod aike el ledilung a apostol Paulus el mora ongdibel er a Korinth el kirel a chad el rirelii oberaod el klengit. Ngika el chad a dimlak el lekengei lobult er a kngtil me ngmle kirel mesuld a ngklel er a ongdibel. Me nguaisei engdi ngngua lochotii a bades el lemlengai er ngii a suobel, a Dios a sebechel mekrolii a chad el ngar er a klengit el mora bult. (Rom 2:​4, BT) Ngmekera e ousbech er a remechuodel el ngosuterir a rengar er a klengit el mora bult?

2-3. Ngera kired el meruul er ngii a lsekum kede mo medengei el kmo a kldemed er a klemerang a mla rullii a oberaod el klengit, e ngerang?

² Me nguaisei engdi a remechuodel a diak el sebechir el ngosuir a chad a lsekum ngdiak lodengei el kmo ngmla rullii oberaod el klengit. Me ngngera kired el meruul er ngii a lsekum kede mo medengei el kmo a kldemed er a klemerang a mla rullii a oberaod el klengit, el ngii a sebechel mo uchul me ngmesuld a ngklel er a ongdibel? Ngkired el melisiich er ngike el mora klengit me lebo lolengit a ngeso er a remechuodel.—Isa. 1:18; Rel. 20:28; 1 Pe. 5:2.

³ Engdi mekerang a lsekum ngii el chad a diak lekengei el mo mengedecheduch er a remechuodel? Seikid e ngkired el mo mengedecheduch er a remechuodel me bo lsebeched el loterekeklii el kmo ngii el chad a mo ngmai a ngeso el lousbech. Tiakid a olechotel a bltikerreng e le ngdiak el soad el loridii a odam me a lechub e ngodos er kid. A lsekum a chad el rullii a klengit a melemolem el ngar er a klengit e nglmuut el kmal tomellii a deleuill er ngii me a Jehovah. Ngdirrek el mo tomellii a chisel a ongdibel. Me alta ngkmal meringel er kid engdi kede ochotii a blekeu e mo mengedecheduch er a remechuodel e le ngbetik a rengud er a Jehovah me ngike el rirebet er a klengit.—Psa. 27:14.

ROLEL E A REMECHUODEL A OLENGESEU ER TIRKE EL RUEBET ER A OBERAOD EL KLENGIT

4. Ngera turrekong er a remechuodel sel lebo el kldibel lobengkel a chad el ngar er a klengit?

⁴ Sel lerellii a oberaod el klengit a ta er a chedal ongdibel, e a chelechad er a remechuodel a mo melilt er a retedei el mechuodel el mo kldibel el lobengkel ngii el chad.a Tirka el tedei el odam a kirir el mo medengei a telkelir e mo ngariou a rengrir. Alta te melasem el lolengeseu er a chad el mo obult er a kngtil, te mtebengii el kmo ngdiak el sebechir el lorremelii el mo change. (Dut. 30:19) A remechuodel a mtebengii el kmo ngdiak el rokui el ruebet er a klengit a mo obult el ua King David. (2 Sa. 12:13) A rebebil el ngar er a klengit a mo melilt el diak lorrenges omesmechokl er a Jehovah. (Gen. 4:​6-8) Me nguaisei engdi ngturrekong er a remechuodel a melasem el lolengeseu er a chad el ngar er a klengit me lobult. Ngera el omellach er a Biblia omekrael er tir sel lebo kldibel lobengkel a chad el ngar er a klengit?

5. Ngera el uldasu a kirir a remechuodel el mo obang sel bo lekldibel lobengkel a chad el mla mora klengit? (2 Timothy 2:​24-26, BT) (Dirrek el momes er a siasing.)

⁵ A remechuodel omes er a chad el mla rullii oberaod el klengit el mekreos el sib er a Jehovah el mla remiid. (Lk. 15:​4, 6) Me sel lebo longedecheduch er a chad e ngdiak el mekngit a tekingir me a omerellir el bedul ngii me a lechub e lomes er tia el miting er tir el kmo ngdi tekoi el kirir el kutmeklii. Te bai melasem lolecholt aike el blekeradel el losaod a 2 Timothy 2:​24-26 (BT).b (Monguiu.) A remechuodel a melemolem el lolecholt er a blekokuii me a delemedemekerreng e melasem el rutechii a rengul a chad el ngar er a klengit.

6. Te mekera remechuodel e di tir el kutmokl a rengrir er a uchei er a bo lekldibel lobengkel a chad el rirellii a klengit? (Rom 2:​4, BT)

⁶ A remechuodel a kutmokl a rengrir. Te melasem el oukerebai er a Jehovah el ngar er a rokui el omerellir el bedul a chad el mla mora klengit, e diak lobes a tekingel a Paulus el kmo: “A klechubechub ra Dios chomekrael er kau el mora bult.” (Monguiu er a Rom 2:​4, BT.c) A remechuodel a kirir el mo medengei el kmo, tir a di mengkerengel a sib el ngar er cheungel a ulekrolel a Kristus. (Isa. 11:​3, 4; Mt. 18:​18-20) Me a uchei er a lebo el kldibel lobengkel a chad el ngar er a klengit tirka el tedei el mechuodel, e ngkirir el meluluuch el loba tia el turrekong: omekrael er a chad el ngar er a klengit el mora bult. Te mo meruul a research lousbech er a Biblia me aike el babilenged e meluluuch lolengit er a Jehovah me lengesuterir el mo understand er a chad me a blekeradel el dilubech. Te mo merriter aike el kirir el mo medengei el kirel a ulekurulel a chad el locha ngar ngii a lerirellii er a tekoi el lulemdasu, e mo rullii a tekoi el lerirellii.—Osi. 20:5.

7-8. Ngmekera sebechir a remechuodel el loukerebai er a kllourreng er a Jehovah sel lebo el kldibel lobengkel a chad el mla mora klengit?

⁷ A remechuodel oukerebai er a kllourreng er a Jehovah. Te melatk a omerellel a Jehovah el bedul tirke el riruul a klengit er a irechar. El ua tiang, a Jehovah uleba kllourreng lolengeseu er a Kain e omeklatk er ngii er a mo duubech a lsekum e ngdiak el change e dilu er ngii el kmo, ngmo omekngeltengat er ngii a lsekum e ngolengesenges. (Gen. 4:​6, 7) A Jehovah milengelechel er a David loeak a profet Nathan, el luluusbech er a okesiu el rirtechii a rengul a king. (2 Sa. 12:​1-7) Me a Jehovah a di ‘uleldurech’ er a “re profet” el mo olengeseu er a renged er a Israel sel bo lak lolengesenges er ngii. (Jer. 7:​24, 25) Ngdimlak longiil er a rechedal el mo obult el kot e mochu olengeseu er tir. Te bai dirk mlara klengit e ngmelisiich er tir me lobult.

⁸ A remechuodel oltirakl er a kerebil a Jehovah sel lolasem lolengeseu er tirke el ruebet er a oberaod el klengit. Ngngua lolekoi a 2 Timothy 4:​2, te “oba kllourreng” el melasem el mengedecheduch er a chad el mla mora klengit. Ngkirel a mechuodel el blechoel el lolecholt er a ulserechakl el reng e oba kllourreng el melasem el lolengeseu er a chad el mo soal el meruul er a llemalt. A lsekum a mechuodel a mo seselk a rengul me a lechub e ngmasech a rengul e nglocha mo diak el soal lorrenges a ulekrael er ngii me a lechub e ngmo diak el soal lobult.

9-10. Ngmekera sebechir a remechuodel el ngosuir a chad el ngar er a klengit el mo mtebengii a uchul me ngmlora klengit?

⁹ A remechuodel a melasem el mo medengei aike el milekrolii a chad el mo rullii a klengit. El ua tiang, ngika el Kristiano ngmerrael el mo mechitechut lengii el mengemikr omesubel el di ngii el tang me a lechub e ngberkel a klumech? A nglunguchel el mora Jehovah ngoudeleokl me a lechub e ngkora di bechachau el cheldecheduch? Ngomechei a mekngit el ngibes me ngomekrael er ngii? Ngmengoit a taem el lobengterir a rua techang? Ngmelilt choua ngerang el rolel ongelaod? Aika el omelilt er ngii ngngera ngmla rullii er a uldesuel me a rengul? Ngmtab a berredel omerellel el mora Demal el Jehovah?

¹⁰ A remechuodel a sebechir el loker er a chad a ker el ngosuir el mo melatk aike el chiltechetur a deleuill er ngii me a Jehovah, e rirellii el mo ruebet er a klengit. Te meruul er tiang el ngar er a ungil rolel e diak loker er ngii a personal el tekoi el diak lousbech el mo medengei. (Osi. 20:5) Me a lmuut kung, ngsebechir lousbech a okesiu el ngosuir a chad el mo mtebengii a berredel a cheleuid el omerellel el ua lurruul er ngii a Nathan el mora David. Sel kot el taem el bo mkldibel el mengedecheduch er ngii e nglocha mo ouuchel a rengul er a omelilt er ngii e obult er a kngtil.

11. Ngmle uangerang omerellel a Jesus el mora rechad el ngar er a klengit?

¹¹ A remechuodel a mora tkurrebab el sebechir el loukerebai er a Jesus. A Jesus a ngilsuir a Paulus loeak a loker er ngii er tia el kmal ungil ker: “Saulus, Saulus! Ngera uchul me koldechelakl er ngak?” Me a Jesus a ngilsuir a Paulus el mo mtebengii el kmo a tekoi el loruul er ngii a mekngit. (Rel. 9:​3-6) E a Jesus a dilu el kirel a redil el “Jesebel” el kmo: “Ak mla msa techall el omult er a rengul er a kngtil.”—Och. 2:​20, 21.

12-13. Nglocha mekera remechuodel e omsang a chad el ngar er a klengit a taem el mo obult? (Dirrek el momes er a siasing.)

¹² A remechuodel a oltirakl er a kerebil a Jesus e kmal diak lomdasu el kmo a chad a diak el soal lobult. Ngar sel kot el miting er a remechuodel lobengkel a chad el ngar er a klengit e a rebebil a mo obult me nguaisei engdi a rekuk bebil a locha ousbech er a lmuut el klou el taem. Me a remechuodel a locha diak di leta el taem el bo lekldibel lobengkel a chad el ngar er a klengit. Sel kot miting er a remechuodel lobengkel a chad a locha mo rullii el mo dmolech lomdasu aike el mildung er ngii. Nglocha moriou a rengul e meluluuch el mora Jehovah. (Psa. 32:5; 38:18) Me a ongingil el miting er tir e nglocha mengodech a blekerdelel er sel kot el taem er a longedecheduch er ngii.

¹³ A remechuodel olecholt er a blekokuii me a klechubechub me bo lsebechir el ngosuir a chad el mora bulterreng. Nglunguchir e omeltkir el kmo a Jehovah mo omekngeltengat er a blakerreng er tir el lolengeseu er a chad el mlora klengit, me ngii el chad a mo mtab omerellel e obult.—2 Ti. 2:​25, 26, BT.

14. Ngtecha nguu a credit sel lobult a chad el ngar er a klengit, e ngerang?

¹⁴ A chad el ngar er a klengit a lsekum e ngobult e nguchul a klou el deurreng! (Lk. 15:​7, 10) Me ngtecha nguu a credit el kirel? Te remechuodel? Momtab aike el ledilu Paulus el kirir a rechad el ngar er a klengit: “A Dios a lta ngmo mesterir a reng ra bult.” (2 Ti. 2:​25, BT) Me ngdiak el ngii di el chad e ngbai Jehovah ngii ngike el ngosuir a Kristiano el mo ngodechii a uldesuel me a rengul. A Paulus a melemolem el louchais a ungil duubech sel lobult a chad. Ngmo medengelii a klemerang, e mekar, me ngmo sebechel el chemiis er a bedeklel a Satan.—2 Ti. 2:26.

15. Ngmekera remechuodel e melemolem el lolengeseu er a chad el mlora klengit el mla obult?

¹⁵ Sel lobult a chad er a kngtil e tirke el tedei el mechuodel a mo melemolem el meruul a sheperding call el mo er ngii me bo lsebechel melemolem el melai a ngeso el lousbech el mo oldechelakl a bedeklel a Satan e muklemalt a rolel. (Heb. 12:​12, 13) Me a remechuodel a diak bo louchais a lurruul ngika el mlora klengit. Me nguaisei engdi ngera te locha mo ouchais er a ongdibel?

“MOSMECHOKL ER . . . MEDERIR A ROKUI EL LOMES”

16. Tirke el “lomes” el losaod er tir a Paulus er a 1 Timothy 5:20 (NW), ngmelutk er a rua techang?

¹⁶ Monguiu er a 1 Timothy 5:20 (NW).d A Paulus a liluches aika el tekoi el mora Timothy el uai ngii el ta er a remechuodel, er a rolel e ngmesmechokl er “tirke el meruul a klengit.” Ngera mle belkul a tekingel? Tia diak el belkul a kmo tirke el “lomes” a melutk er a rokui el chedal ongdibel. Tia sebechel melutk el kirir tirke el medengei el kirel a kngtil ngii el chad, el tir tirke el milsang el meruul er ngii me a lechub e ngtirke el luluuchais er tir el kirel. A remechuodel a di tirkaikid el chad a bo louchais er tir el kmo te mla sumecheklii ngii el chad.

17. A lsekum a ongdibel el rokir a medengelii a oberaod el kngtil a chad me a lechub e te mo remenges el kirel, e ngera el subed a kirel motobed, e ngerang?

¹⁷ Ngar er a bebil el blekeradel e a kngtil a chad a bo lodengelii a rechedal ongdibel el rokui me a lechub e te mo remenges el kirel. Ngar tiakid el blekeradel e tirke el “lomes” el losaod er tir a bades a melutk el kirel a ongdibel el rokir. Me a ta er a remechuodel a mo mesubed er a ongdibel el kmo a odam me a lechub e ngodos a mla reprove. E ngerang? A Paulus a dmu el kmo: Ng “olachidnger el mo er tirke el bebil” me lak lebora klengit.

18. Ngera te mo meruul er ngii a remechuodel a lsekum a chad el telecholb el rullii a oberaod el klengit a kesai a rekil er a 18?

¹⁸ E kuk mekerang a lsekum a chad el telecholb e kesai a rekil er a 18 a rullii oberaod el klengit? A chelechad er a remechuodel a mo tutketerir a reteru el mechuodel el mo mengedecheduch er ngii el ngalek me a rechad er a blil el Kristiano.e A remechuodel a mo oker er a rechad er a blil el kmo ngngera te mla remuul el mo olengeseu er a ngelekir el mora bulterreng. A lsekum ngika el ngalek a orrenges omesmechokl er a rechad er a blil e meruul omelodech er a uldesuel me a omerellel, e tirka el teru el mechuodel a locha mo melilt el di mecherei a rechad er a blil me te melemolem el lolengeseu er ngii e diak a belkul loruul a lmuut el dechelel. A remechuodel a medengei el kmo te ruungalek a mla nguu a ngerachel er a Jehovah el mo mesmechokl er a rengelekir loeak a bltikerreng. (Dut. 6:​6, 7; Osi. 6:20; 22:6; Efe. 6:​2-4) Engdi a remechuodel a kuk mong e check er a rechad er a blil ngii el ngalek el mo make sure el kmo ngmelai a ngeso el lousbech. Me nguaisei, engdi ngmekerang a lsekum a telecholb el ngalek el dirkak bo le 18 a rekil a diak el lekengei el lobult er a kngtil? Seikid e ngmo metutk a retedei el mechuodel el mo kldibel lobengkel ngii me a rechad er a blil el Kristiano.

A JEHOVAH A “KMAL BEKOKUII E CHUBECHUBCHAD”

19. Te mekera remechuodel e mora tkurrebab el sebechir el loukerebai er a Jehovah sel bo kldibel lobengkel a chad el mla rullii oberaod el klengit?

¹⁹ A Jehovah mengerechir er a remechuodel el mo omekerreu er a ongdibel er tirke el omtok a llechul. (1 Ko. 5:7) Me nguaisei engdi a remechuodel a dirrek el mora tkurrebab el sebechir el lolengeseu er a chad el mo obult er a kngtil. Seikid a uchul me sel lolengeseu er ngii el chad e te oba omelatk el kmo a chad a mo melodech omerellel. E ngerang? E le ngsorir el loukerebai er a Jehovah el “kmal bekokuii e chubechubchad.” (Jak. 5:11) Mutebengii a rolel e a chudelang el apostol Johanes ulechotii tia el osisiu el reng. Ngmilluches el kmo: “Rengelekei, ak meluches a ikal tekoi lekor kemiu el kirel me lako bora klengit; ngdi lsekum ngngarngii a mocha ra klengit, e ngngarngii a Rubak ra ngeso el kired el ngar medal a Dios, el Jesus Kristus el ngikel melemalt.”—1 Jn. 2:​1, BT.

20. Ngera kede mesaod er sel ulebongel el suobel er tia el series?

²⁰ Ngklengiterreng e le ngngar ngii aike el taem el Kristiano a diak lekengei el lobult. A leuaisei e ngkirel el mesuld a ngklel er a ongdibel. Te mo mekerang a remechuodel sel leduubech tia el tekoi? Kede mesaod er tiang el ngar sel ulebongel el suobel er tia el series.