1924​—Dart el Rak er a Mla Me Mong

OMERK LOEAK A RAZIO

A rudam er a Bethel a mle meringel el loureor el betok er a ta el rak el lomekedechor er a WBBR radio station er a Staten Island, New York City. A kot e te tilukukii a beluu e milekedecherur a klou el blai el bo lekiei er ngii a rechad er a ureor e milekedecherur a kuk ta er a blai el blil a klekedall. Sera lebo el merek lomekedechor e a rudam a mle assemble aika el klekedall me lsebechir el mora air. Engdi ngmla er ngii a bebil omelsemai el kirir el sumechokl.

Te miltik el kmo ngmeringel a de install er a antenna er a station. Tia mle 300 el fit a klemengetel e kirel el mo klabs er a delongelel a teblo el tang el 200 el fit a kldidiul. Ngdimlak el sebechir el rochir er a lekot el melasem. Te uluumerang el kmo a Jehovah mo ngosuterir me te mlo sebechir el kutmeklii. A Calvin Prosser el ta er tirke el uluureor er tia el project a kmo: “A lsekum ngdi mle ta el taem e aki kutmeklii, e ngmle sebechemam el di kemam el melekoi el kmo, ‘Ka mesa ki mkiltmeklii!’” A rudam a ngilai a rokui el odanges el msa Jehovah. Me nguaisei engdi tia dimlak bo lulebengelel a mondai er tir.

A tekoi er a razio a kmal dirk mle beches er tiakid el taem me ngdimlak lebeot a debetik a klekedall el mle usbechall. Me a rudam a miltik er a used el 500-watt transmitter el chad er tia el beluu a milekedecherur. Te uluusbech er a mic er a di regular el dengua el microphone er tir. A ta el kesus er a February e a rudam a mle sorir el test er ngii. Ngdimlak a prokuram er a rudam me te milengitakl a chelitakl er a Renged. A Ernest Lowe el ta er tirka el odam a mesaod er a omosiroi el tekoi el dilubech. Ngmelekoi el kmo te milengitakl e ngomekedong er a dengua a Judge Rutherford,b el rirengesterir er a razio er ngii er a Brooklyn, el mle 15 el mael a cherridel er tir.

A Brother Rutherford a dilu er tir el kmo: “Mstob er tilecha el cherrodech. Ko mkora ngerel a katuu!” Me alta rudam a mlo merur, te mle off er a transmitter, engdi ngmle ulterekokl a rengrir el kmo te mla mo kltmokl el mo broadcast.

A February 24, 1924, er a lekot el broadcast er a razio e a Brother Rutherford a mle dedicate er tia el radio station el kirel a “ureor er a rengedel a Mesias.” Ngdilu kmo a moktek er tia el station a mo “olengeseu er a rokui el chad el mo medengelii a llomes er a Biblia me a belkul a taem el dekiei er ngii er chelechang.”

Ngkmal di mlo ungil sel kot el broadcast. Me a WBBR a luluusbech er ngii loltobed a prokuram er a Resioning er a Jehovah loeak a razio el 33 el rak.

BEKEU EL LOUCHAIS A KNGTERIR A REMENGETEKLEL A KLECHELID

Ngmlo er ngii a convention er a Remesuub a Biblia er a July 1924 er a Columbus, Ohio. Te mlei a rechad el ngar er a kakerous el beluu er a beluulechad e mla er ngii a cheldecheduch el tilobed el tekoi er a Arabic, Merikel, France, Dois, Gris, Hungary, Italy, Lithuania, Poland, Russia, aike el omelekoi er a Scandinavia, me a Ukraine. A bebil er a cheldecheduch a mle sebecherir lorrenges er a razio, me a rudam a dirrek el lullengit er a newspaper er a beluu me loluches el kirel a prokuram er a derta er aika el sils.

A Thursday, July 24, e ngbetok er a re 5,000 el chad el mlei er a convention a tilobed el mo omerk a klumech er tia el beluu. Te rirous a bekord el 30,000 el babier e ulemuchel a betok el telael el omesubel a Biblia. A The Watch Tower ulemekedong er tia el sils el kmo “ngsel kot luchul a deurreng el telengtengil tia el convention.”

A Friday, July 25, e ngdirrek dilubech a ta er a ileakl el tekoi er tia el convention. A Brother Rutherford a chiliuii a babier el bekeu el louchais a kngterir a remengeteklel a klechelid. Ngdilu el kmo a rechad er a balatiks, siobai, me a klechelid “a merrob er a rechad a mo medengelii a klemerang el kirel a Rengedel a Dios, el ngii a bo lousbech er ngii a Dios el omekngeltengat er a rechad.” Ngdirrek el dilu el kmo tirka el chad “a support er a League of Nations e melekoi el kmo ‘ngrolel e a Dios a mengedereder er a chutem.’” A remesuub a Biblia a mo ousbech er a blekeu el mo omerk er tia el klumech el mora rechad.

A The Watch Tower a milsaod er tia el convention el kmo: “Tirka el mekesai el soldau er a Rubak el mlo kldibel er a Columbus Convention a mirrael el mo remei el mesisiich a klaumerang er tir . . . , e diak lemedakt a ngii di el ultok el duubech el mo er tir.” A Leo Claus el mlo er tia el convention a kmo: “Uriul er a convention e aki mirrael el kmal semeriar el mo omerk er tia el klumech er a territory er kemam.”

Ngar er a October e a Remesuub a Biblia a mirrael el merous a betok el miliol el copy er a tract el Ecclesiastics Indicted, el mla er ngii sel klumech el lulenguiu er ngii a Brother Rutherford. Ngar er a kekerei el beluu er a Cleveland, Oklahoma e a Frank Johnson a mlo merek el merous a tract er a 20 el bung er uchei er a lebo el kirir el loltak er ngii. Ngdimlak el sebechel el mengiil er a mededaes el basio e le rechad er tia el beluu ulsiik er ngii le ngkmal kesib a rengrir er a urerel el lomerk. Me a Brother Johnson a milertii er a ikelesia el mle kmeed. Ngmilsang el kmo ngdi mle bechachau me ngdi mle mereched el ngmai a copy er a Ecclesiastics Indicted el tract loia er a Biblia er a mengeteklel a ikelesia me a derta el kingall. Ngdirk mla er ngii a temel me ngmlora lmuut el teblo el ikelesia e meruul er a osisiu el tekoi.

Me a Frank urrechedii el mo er sel basio el kirir el loltak er ngii. Ngmilertii er a back er a blil omelai el cheluch, e omdidm er tirke el chad el losiik er ngii. Tirka el chad ulemekall lengelakl engdi ngdimlak lesang. Sera lebo el dibus e a rudam me a rudos el ulemerk er a kuk ta er a basio el kmeed a mle otekir.

A ta el odam a kmo, “Sera ki morael el tobed er tia el beluu e aki mlo engelakl a kldei el ikelesia. Te mla er ngii a rebekord el 50 el chad el dechor er a derta er ngii. A rebebil er tir a milenguiu er a tract, e a rekuk bebil a uleldars er ngii el mo er bab me lesa mengeteklel a klechelid. Ngkmal mle ungil a temam! Engdi aki mirreng a sulel a Jehovah el Dios er kid el ulemekerreu er kemam e ngosukemam el mo medengei a kiram el meruul me lak ki mobdechem e merkii a klumech.”

BLEKEU EL LOMERK ER A LMUUT EL BEBIL ER A BELUU

Ngar er a lmuut el bebil er a beluu e a Remesuub a Biblia dirrek el ulemerk el loba blekeu. Ngar er a diluches er a beluu er a France e a Józef Krett ulemerk el mora rechad er a Poland el uluureor el mengiis. Ngika mle kirel el mo oltobed er a cheldecheduch el dai er ngii a “Ngdi Kmedung Okiis er a Rulekoad.” Sera lemerous a invitation el mora rechad er a beluu e a prist a dilu er tirke el mora ikelesia er ngii me lak lebong. Me nguaisei engdi a blekeradel a bai ulebitokl. Te betok er a 5,000 el chad a mlei er a cheldecheduch luldimukl er ngika el prist! A Brother Krett ullengit er a prist me losebechakl a klaumerang er ngii, engdi ngdimlak lekengei. Me a Brother Krett a rirous a rokui el babier el lullab, e mlo mtebengii el kmo a rechad a kmal semeriar er a Tekingel a Dios.—Amo. 8:11.

Ngar er a Africa e a Claude Brown a ngiluu a ungil chais el mora Gold Coast, el chelechang e ngokedongall el Ghana. A cheldecheduch el luleltobed me a babier el lerirous a ngilsuir a klemerang el loberk er tia beluu. A John Blankson el mlara skuul el mesuub el mo chad er a pharmacy a mlora ta er aika el cheldecheduch el luleltobed a Brother Brown. Ngdi mle mereched el mtebengii el kmo ngmla metik er a klemerang. A John a kmo: “A klemerang rirellak el kmal mo dmeu a renguk. Ak mle blechoel el mesaod el kirel er a skuul.”

A ta er a klebesei e a John a mlora ta er a ikelesia e oker er a prist el kirel a Trinidad, el bla bo lodengelii el kmo ngdiak lemengai er a Bades. A prist a uldikii e oldiu el kmo: “Kau a diak em Kristiano; ke chedal a Diabelong. Mtobed er tiang!”

Sera lebo el rrei a John e nglilechesii a babier el mora prist lolengit er ngii me lebo el kldibel er a buai e losaod er a Trinidad. Me a prist a dilu er a John me lebora obis er ngike el ua dedu el kmo ngkot el sensei er a skuul er a pharmacy, me ngika el sensei a uleker er ngii el kmo ngmera el milluches el mora prist.

Me a John a dilu el kmo, “Nguaisei.”

Me ngika el sensei a dilu er a John me llechesii a babier el mora prist lolengit a klausubes. Me a John a milluches el kmo:

“A sensei er ngak a dilu er ngak me kuluches el lolengit a klausubes me ak kmal kongei el lolengit a klausubes a lsekum ke di bleketakl el louchais el kmo ke olisechakl a klsuul el osisechakl.”

Me a sensei a kmal mlo mechas a rengul, e uleker er ngii el kmo, “Blankson, tiakid a soam el meluches er ngii?”

“Chochoi. Ngdi tiakid a sebechek el luchesii.”

“Kau a bo kutebedau er a skuul. Ngmekera sebechem el mengedecheduch er a prist er a klechelid er a kabelment el uaisei e omdasu el kmo ngkmal sebechem el oureor el ngar cheungel a kabelment?”

“Engdi sensei, . . . kau sel molisechakl e lebo er ngii a tekoi el diak ki em understand, e ngdiak ki moker a ker?”

“Nguaisei.”

“Tiakid a dilubech. Ngika ullisechakl er a Biblia me a kuleker er ngii a ker. A lsekum e ngdiak el sebechel longer er ngak, e ngera me ak meluches el mo er ngii el lolengit a klausubes?”

Me ngdimlak lotebedii a Blankson er a skuul. Me ngii a dimlak loluches lolengit a klausubes.

OMES EL BEDUL A NGAR MEDAD

Me a The Watch Tower a milsaod er tia el rak el kmo: “Ngkmal sebeched el melekoi el lobengkel a David el kmo: ‘Kau a miltuchulak er a klisiich el kirel a mekemad.’ (Psa. 18:39) Tia el rak a kmal melisiich e le kede mla mesa chimal a Rubak . . . A rechedal . . . a kmal loba deurreng el lomerk.”

Uriul er tia el osisiu el rak e a rudam a millib el kirel a lmuut el ta er a radio station. Me a ureor el meruul er a lmuut el ta er a radio station a mlo er ngii er bita er a Chicago. Tia el beches el station a mle ngklel a WORD. Te uluusbech er a lmuut el mesisiich el transmitter me a rechad el kiei er a kmal cheroid a sebechir rongesii a klumech er a Renged, mo lmuut er a diluches er a Canada.

A 1925 e a Jehovah mo ngosuterir a rudam el mo medengei a beches el tekoi el kirel a 12 el bliongel er a Ocholt. Tia mo uchul me a rebebil a mesibas. Engdi rebetok a kmal mo dmeu a rengrir el mo medengei a tekoi el dilubech er a eanged me a lerellii el mora rechedal a Jehovah el ngar er a chutem.