Bo Lengariou a Rengum el Kongei Aike el Diak Modengei

1. A Jehovah ngmilebid el sebeched el mekerang, e ngerang uchul me ngmilebid el uaisei?

A JEHOVAH milebid el sebeched el omdasu, suub a beches el tekoi, nguu a klemedengei, e mo medengei a rolel e kede oltaut aike el desuub. Ngera uchul me ngmilebid el uaisei? Ngsoal a “[debetik] er a klemedengei er a Dios” e bo dosiou er ngii loba klisichel omelebedebeked.—Osi. 2:​1-5; Rom 12:​1, NW.

2. (a) Ngera kired el mo medengelii el kired? (Rom 11:​33, 34, BT) (Dirrek el momes er a siasing.) (b) Ngmekera mo uchul a klungioled sel dekengei el kmo ngdiak dousbech el mo medengei a rokui el tekoi?

² Me alta ngsebeched el mesuub a betok el beches el tekoi, engdi ngdirk betok a diak dodengei. (Monguiu er a Rom 11:​33, 34, BT.a) Molatk er a Job. A Jehovah uleker er ngii a betok el ker el ngii a ngilsuir el mo mtebengii el kmo ngbetok a diak lodengei. Tia el cheldechedechal lobengkel a Jehovah a rirellii el mo ngariou a rengul e meklemeltii a uldesuel. (Job 42:​3-6) Ngdirrek el mo uchul a klungioled sel leboriou a rengud e dutebengii el kmo ngdiak dodengei a rokui el tekoi. Tiakid el klengariourreng a mo ngosukid el mo oumerang el kmo a Jehovah a mo ocholt aike el mera el dousbech el mo medengei, me bo lsebeched el mellomes el melilt.—Osi. 2:6.

3. Ngera kede mo mesaod er tia el suobel?

³ Ngar tia el suobel e kede mo mesaod a bebil tekoi el diak dodengei me a omelsemai el mei loeak ngii. Kede dirrek el mo merriter er a uchul me ngungil a lak dodengei a bebil tekoi. Omesoded er aika el tekoi a mo smisichii a klaumerang er kid el kmo, a Jehovah el “ngike el cherrungel a klemedengei er ngii” a ouchais er kid aike el mera el dousbech el mo medengei.—Job 37:​16, NW.

NGDIAK DODENGEI EL KMO A ULEBONGEL NGMEI ER A OINGERANG

4. A doltirakl er a Mateus 24:​36, e ngera ta er a tekoi el diak dodengelii?

⁴ Monguiu er a Mateus 24:36. Ngdiak dodengei el kmo a ulebongel er tia el mekngit el blekeradel ngmei er oingerang. Mo lmuut er a lengar tia el chutem a Jesus me ngdimlak lodengelii “sel sils ma lechub e ng sel sikang.”b Uriul e ngdilu er a rechapostol er ngii el kmo a “blsechel a taem a mla metib ra klisichel” a Jehovah. (Rel. 1:​6, 7, BT) A Jehovah a mla oterekeklii a ulebengelel tia el mekngit el blekeradel, engdi kid a diak el sebeched el mo medengei el kmo tiang ngkmal oingerang.

5. Ngera sebechel duubech lekid el diak dodengei el kmo a ulebongel ngkmal mei er oingerang?

⁵ Me ngoeak a tekingel a Jesus e ngdiak dodengei el kmo ngmo ua klteketel a ngerang el dongiil er a ulebongel. Tiakid a uchul me nglocha mo kekerei a rengud me a lechub e ngmechitechut a rengud, tokubets a lsekum e ngmla mo meketeket el dongiil er a sils er a Jehovah. Me a lechub e ngmo meringel er kid outekangel a ulekringel er a rechedal a telungalek er kid me a lechub a rebebil. (2 Pe. 3:​3, 4) Kede locha mo omdasu el kmo a bo dodengelii sel telutk el sils el lemei a ulebongel e ngmo sebechel lmuut el mo klou a rengud el mengiil e mo sebechel beot er kid outekangel a ulekringel.

6. Ngera uchul me ngungil a lak dodengei el kmo a ulebongel ngmei er oingerang?

⁶ Me nguaisei, a Jehovah el diak louchais er kid er a date er a ulebongel a meskid a techall el mo ochotii el kmo kede mesiou er ngii le ngbetik a rengud er ngii e oumerang er ngii. Kid a diak dosiou er a Jehovah loltirakl er a deadline el ua dedu el kmo a klaumerang er kid a ngar ngii sils le expire. Me ngdiak el soad el di melatk er a “Sils er a Dios” el mei ngbai soad el mo ulturk osenged er aike el bo leketmokl tia el Sils er a Jehovah. Sel doruul el uaisei e ngsebeched el melemolem el menglou er a delechel a blakerreng er kid el mora Dios e meruul aike el rokui el sebeched el mo odeuir a rengul.—2 Pe. 3:​11, 12.

7. Ngera kede medengei?

⁷ Ngungil a bo lulturk osenged er aike el dodengei. Kede medengei el kmo a uriul sils a ulemuchel er a 1914. A Jehovah mla meskid a ulaoch er a Biblia el ngii a ochotii el kmo a uriul sils ulemuchel er tiakid el rak e mla ouchais er kid a komakai el omesodel a mo teletael er a beluulechad er tiakid el taem el mei. Tiakid a uchul me ngulterekokl a rengud el kmo “a kloul sils er a RUBAK a kmedang.” (Sef. 1:14) Kede dirrek el medengelii a ureor el Jehovah a soal a doruul er ngii el mo ouchais er a rokui el sebeched er a “ungil chais el kirel a Renged.” (Mt. 24:​14, NW) Tia el klumech a lomerk er ngii er a chelsel a bekord el 240 el beluu el ngar er a betok er a 1,000 el omelekoi. Ngdiak dousbech el mo medengelii “sel sils ma lechub e ng sel sikang” el mo oba blakerreng el lomerk.

NGDIAK DODENGELII A BO LORUUL ER NGII A JEHOVAH

8. A “urerel a mera el Dios,” ngmelutk er a ngerang? (Olisechakl 11:​5, NW)

⁸ Kid a diak deblechoel el medengei a “urerel a mera el Dios.” (Monguiu er a Olisechakl 11:​5, NW.c) A “urerel a mera el Dios” a melutk el kirel aike el lomekdubech a Jehovah me a lechub aike el lebechei me ngduubech me bo lemutaut a soal. Ngkmal diak dodengelii a uchul me a Jehovah mo mecherei a ileakl el tekoi me ngduubech me a lechub ngrolel e ngmo ngosukid. (Psa. 37:5) Tia el tekoi a diak el sebeched el mtebengii el di uaikid el diak el sebeched el mtebengii a rolel e a ngalek a obeob er a delel a redil el dioll, el ngii el tekoi a mo lmuut er a re scientist me ngdiak el sebechir el mo cherrungel el medengelii.

9. Kede locha mo chobangel a ngera el omelsemai lekid el diak dodengelii a bo loruul er ngii a Jehovah el kired?

⁹ Kid el diak dodengelii a bo loruul er ngii a Jehovah el kired a locha mo uchul me kede omai er a rengud el meruul a bebil el omelilt. Kede locha mo ouesarech a rengud el mengoit a ileakl el tekoi er a klengar er kid me bo lsebeched el meruul a lmuut el betok el ngar er a omesiunged, el uai a omekbeot er a klengar er kid me a lechub e kede melukl el mora basio lousbech a ngeso er a ruumerk er a klumech el kirel a Renged. Me a lechub sel lak el taut a turrekong er kid er a klereng, me a lechub ngua lak a ungil duubech er a blakerreng er kid el lomerk, me a lechub e ngmo er ngii a melsemai er a ureor lomekedechor el kirel a Renged, e kede locha mo omdasu el kmo kid kede oba kengei er a Dios me a lechub e ngdiak.

10. Kid el diak dodengelii a bo loruul er ngii a Jehovah ngngosukid el mekurulii a ngera el klou a ultutelel el blekeradel?

¹⁰ A mera er ngii, kid el diak dodengelii a bo loruul er ngii a Jehovah a ngosukid el mekeroul a meklou a ultutelel el blekeradel, el ua klengariourreng. Kede mo mtebengii el kmo a uldesuel me a rolel a Jehovah a lmuut el ngarbab er kid. (Isa. 55:​8, 9) Kede dirrek el suubii el mo mui loumerang el ulsirs er a Jehovah e ultuil er ngii el mo kutmokl a rokui el tekoi. Sel lebo er ngii a ungil duubech er a berkel a klumech me a ureor el lomekedechor el kirel a Renged, e kede msa Jehovah rokui el odanges. (Psa. 127:1; 1 Ko. 3:​7, BT) E a lsekum a tekoi a diak bo leuai a ble de expect er ngii e ngdiak el kired el lobes el kmo a Jehovah medengei a rokui el tekoi. (Isa. 26:12) Kede meruul er a part er kid e melemolem loumerang el kmo a Jehovah mo rullii a part er ngii. Mo lmuut me a lak loruul er ngii loeak a mengasireng el rolel el ua irechar, me kid a ulterekokl a rengud el kmo ngmo meskid a ulekrael el dousbech.—Rel. 16:​6-10.

11. Ngera kede medengei el sebechel ngosukid?

¹¹ Molebedebek el kmo a omerellel a Jehovah a blechoel el bltikerreng, melemalt, e mellomes. Kede medengei el kmo ngkmal mengreos aike el doruul el kirel me a kirir a rekldemed er a klemerang. Kede dirrek el medengei el kmo ngblechoel el lomekngeltengat er tirke el loba blakerreng el mo er ngii.—Heb. 11:6.

NGDIAK DODENGELII A KLUKUK ER KID

12. A doltirakl er a Jakobus 4:​13, 14, e ngngera diak dodengelii?

¹² Monguiu er a Jakobus 4:​13, 14. Ngklemerang el kmo ngdiak a ta er kid el medengelii a klukuk er ngii. Chelecha el beluulechad e a “taem me a bkaischemrungel a duubech el mo er a bek el chad.” (Oli. 9:​11, NW) Sei a uchul me ngdiak el sebeched el kmal medengei el kmo a telbiled a mo tmaut me a lechub e kede mo melemolem el ngar e otutii.

13. A ngar medad el diak lulterekokl ngera ngsebechel rullii el mei er kid?

¹³ A klengar el diak lulterekokl a uchul me nglocha mo meringel er kid el loutekangel. E ngerang? Kede locha di bekikl el kmo ngera mo duubech, e tia sebechel mo uchul e kede oridii a deurreng er kid. A mekngit el tekoi el sebechel di kiul duubech me a bkaischemrungel el tekoi a sebechel mo uchul a klengiterreng me a ringel. E sel lak el taut aike el domdasu e ngsebechel metemall omeltked e mo mechitechut a rengud.—Osi. 13:12.

14. A deurreng er kid el diak a ulebengelel ngultuil er a ngerang? (Dirrek el momes a siasing.)

¹⁴ Sel doutekangel a ringel e bo demesisiich er ngii e kede meketeklii el kmo a ngii di el tekoi el duubech e kede mesiou er a Demad el ngar er a eanged e le ngbetik a rengud er ngii, ngdiak el ngii el ngar er ngii a denguu. Cheldecheduch er a Biblia ochotii el kmo ngdiak el kired el expect el kmo a Jehovah mo protect er kid er a rokui el ringel, me ngii a diak lolterekokl a tekoi el mo duubech er a klengar er kid. A Jehovah medengei el kmo a deurreng er kid a diak lultuil er aike el mo duubech el mei er kid er a ngar medad. Ngbai ultuil er a sked er a ulekrael er ngii me a blekongesenges er kid el mo er ngii. (Jer. 10:23) Sel domes el bedul ngii sel doruul omelilt e ngua dolekoi el kmo: “A lsekum ng soal a rubak, e aki mo kiei e meruul er tiang ma lechub e aki mo kiei e meruul er sei.”—Jak. 4:15.

15. Ngera kede medengei el kirel a ngar medad?

¹⁵ Me alta ngdiak dodengei a mo duubech er a bek el sils, engdi kede medengei el kmo a Jehovah a mla tibir el mei er kid a diak a ulebengelel el klengar er a eanged me a lechub e ngtia el chutem. Kede medengei el kmo ngdiak el sebechel lomulak me a diak a ngii di el ngerang el sebechel stob er ngii loltaut a telbilel. (Tit. 1:2) Ngdi ngii el tang a sebechel “[ouchais] er a mo rsel; [ng] di mla ouchais er a mo duubech.” Tia klemerang el kirel a tekoi el dilubech er a irechar me a tekoi el mo duubech er a ngar medad. (Isa. 46:10) Kede medengei el kmo ngdiak a sebechel mo merrob er a Jehovah loubltikerreng el mei er kid. (Rom 8:​35-39) Ngmo meskid a llomeserreng, ongelaod, me a klisiich el dousbech er ngii loutekangel a ngii di el tekoi el bo dechebangel. Ngkmal sebechel mo ulterekokl a rengud el kmo a Jehovah mo ngosukid e omekngeltengat er kid.—Jer. 17:​7, 8.

NGDIAK EL SEBECHED EL MO CHERRUNGEL EL MTEBENGII A KLEMEDENGEI ER A JEHOVAH EL KIRED

16. Ngua lolekoi a Psalm 139:​1-6, ngera el klemedengei a lobang a Jehovah el diak el sebeched el mo cherrungel el mtebengii?

¹⁶ Monguiu er a Psalm 139:​1-6. A Ulemeob er kid a medengei el kmo kede rruul el uangerang el chad e medengei aike el mla rullid el mo uaisei a teleteled er a ikrel me aike el mla rullid el mo uaisei a domdasu e domelechesiu a tekoi. Ngdiak lemekimd a klemeriarreng er ngii er kid. Ngmedengei aike el dedung me a mera el belkul a tekinged, aike el doruul me a uchul me kede meruul. Ngua lutebengii a King David, a Jehovah mla iliueklid er a ulekerreuil me ngii a diak el kedeb a chimal. Ngmera el mengasireng el tekoi el Rubak el Olab a Bek el Klisiich, el Ulemeob er a eanged me a chutem a uaisei a klemeriarreng er ngii er kid! A David a dilu el kmo: “A klemedengei er kau er ngak a kmal mengasireng; ng kmal dmolech me ng diak kutebengii.”—Psa. 139:6.

17. Ngera uchul me nglocha mo meringel er kid oumerang el kmo a Jehovah a ungil medengelkid?

¹⁷ Nglocha ulekuruled, siukang er kid, me a lechub ngklaumerang er kid er a uchei a uchul me ngmeringel er kid omes er a Jehovah el betik a rengul el Chedam el soal mo medengelkid. Me a lechub e kede feel el kmo a kngtid er a ngar er a mong a kmal mekngit me a Jehovah kmal diak soal mo medengelkid e kmal cheroid er kid. Mo lmuut er a David me ngmlo feel el uaisei. (Psa. 38:​18, 21) Me a lechub a chad el mera el soal ngodechii a klengar er ngii e mo kiei el loltirakl a melemalt el llechul a Dios a locha mo melatk, ‘A lsekum a Dios a kmal ungil medengelkak, ngera uchul me ng expect er ngak el mo ngodechii a klengar el chatter er a renguk?’

18. Ngera el klungiaol a dengai sel dekengei el kmo a Jehovah ungil medengelkid el lmuut el ngaruchei er a klemedengei er kid el kired? (Dirrek el momes a siasing.)

¹⁸ Ngsebeched el suubii el mo kongei el kmo a Jehovah ungil medengelkid el lmuut el ngaruchei er a klemedengei er kid el kired, e mes aike el lungil er kid el diak el sebeched el mes. Me alta ngmes a chelitechetud e medengelii a uchul me kede feel e act el uaisei, ngkmal betik a rengul er kid. (Rom 7:15) Sel bo de appreciate el kmo a Jehovah mesa potential er kid, e ngmo smisichii a rengud el mo mesiou er ngii loba blakerreng e mo dmeu a rengud el meruul el uaisei.

19. Ngera kede medengelii el kirel a Jehovah el kmal diak doumededenger er ngii?

¹⁹ Kede medengei el kmo a Jehovah a bltikerreng. Ngkmal diak doumededenger er tia el tekoi. (1 Jn. 4:8) Kede medengei el kmo a melemalt el llechul olechotel a bltkil a rengul el mei er kid me ngii a blechoel el meruul aike el mo uchul a klungioled. Kede medengei el kmo a Jehovah a soal a dekiei el mo cherechar. Tiakid a uchul me ngmilskid a olubet. A sengk er a olubet olterekokl er a rengud el kmo alta ngdiak demecherrungel ngsebeched el mesiou er a Jehovah loltirakl er a soal. (Rom 7:​24, 25) Me kid a medengei el kmo a “Dios a lmuut el klou ra rengud, e medenge rokuil tekoi.” (1 Jn. 3:​19, 20, BT) A Jehovah mes a rokui el tekoi el kired, e oumerang el kmo kede mo meruul er a soal.

20. Ngera mo ngosukid loibngid er a diak a ultutelel el sebekreng?

²⁰ A Jehovah ouchais a rokui el tekoi el dousbech el mo medengei. Sel leboriou a rengud el kongei er tia el tekoi, e kede mochib er a diak a ultutelel el sebekreng el kirel a tekoi el diak a klisiched er ngii e mo ulturk a osenged er aike el lmuut el meklou a ultutelel. Sel doruul el uaisei e kede ochotii a klaumerang er kid er a Jehovah el “ngike el cherrungel a klemedengei er ngii.” (Job 36:​4, NW) Me alta ngdiak el betok a klemedengei er kid er chelechang el kirel a bebil el tekoi, kede omes el beduluchei el mo mesuub a beches el tekoi el kirel a Dios er kid el mo cherechar.—Oli. 3:​11, NW.