Mngesuterir a Remesuub a Biblia el Mo Dechor el Kirel a Klemerang

1-2. (a) Ngera uchul me a rebebil el mesuub omai er a rengrir a mo dechor el kirel a klemerang? (b) Ngera kede mo mesaod er tia el suobel?

NGNGAR ngii a tekoi el ble mbekikl el kirel luchul me a uchelel e ke ulemai er a rengum el mo ta er a Sioning er a Jehovah? Ke locha mle medakt el kmo a rechad el moureor lobengterir, resechelim, me a lechub ngtelungalek er kau a mo omtok er kau. Me a lechub e ke mle feel el kmo ngkmal diak el sebechem lotirakl a rokui el llechul a Dios. A leuaisei e ke medengelii a le feel er ngii a remesuub a Biblia el tir a kora meringel er tir a mo dechor el kirel a klemerang.

² A Jesus a miltebengii el kmo chouaika el dakt a sebechel merrob er a chad me ngdiak lemukeroul er a tekoi er a klereng. (Mt. 13:​20-22) Me nguaisei engdi ngdimlak le give up er tirke el ulemai er a rengrir a mo oltirakl er ngii. Ngbai ulechotii el mora redisaiplo er ngii a rolel e ngsebechir el lolengeseu er chouai tirkang el (1) dmangch aike el olekebai er tir me te diak lolengeriakl, (2) lmuut el mo dmolech a bltkil a rengrir el mora Jehovah, (3) mo adjust a kot meklou a ultutelel el tekoi er a klengar er tir, e (4) mo mesisiich er aike el melsemai er tir. Ngmekera sebeched el oltaut aike el luluuchais er a redisaiplo er ngii a Jesus sel dousbech er a Mkiei el Mo Cherechar! el babier lolengeseu er a chad el mesuub el mo dechor el kirel a klemerang?

MNGESUIR A STUDY ER KAU EL DMANGCH AIKE EL OLEKEBAI ER NGII ME NGDIAK LOLENGERIAKL

3. Nglocha ngera ulekebai er a Nikodemus el mo ta er a disaiplo er a Jesus?

³ A Nikodemus el ngarbab el mengeteklir a Rechijudea a mla er ngii a ullekebai er ngii el mo ta er a disaiplo er a Jesus. Ngdi mle elolem el buil er a lomuchel er a omesiungel a Jesus e a Nikodemus a mlo mtebengii el kmo a Jesus a mlodurech er a Dios. (Jn. 3:​1, 2) Me nguaisei engdi a Nikodemus a ulemart er ngii e mengedecheduch er a Jesus e le ng “mle medakd rar Chijudea.” (Jn. 7:​13, BT; 12:42) Nglocha ulemdasu el kmo a bo le disaiplo er a Jesus e ngkmal betok a bo loriid.a

4. Ngmilekera Jesus e ngosuir a Nikodemus el mo medengei aike el longerechir er ngii a Dios?

⁴ A Nikodemus a mle medengelii a Llach engdi nguluusbech a ngeso el mo medengei aike el longerechir er ngii a Jehovah. Ngmilekera Jesus e ngosuir? A Jesus a mle bekururau lousbech a temel, e kilengei lomes er a Nikodemus er a klebesei. Me a Jesus a di mle bleketakl louchais er ngii aike el kirel meruul el mo ta er a disaiplo: mo obult er a kngtil, metecholb er a ralm, e mo olecholt er a klaumerang er ngii er a Ngelekel a Dios.—Jn. 3:​5, 14-21.

5. Ngmekera sebeched el ngosuir a study er kid el dmangch aike el olekebai er a okurulel?

⁵ Mo lmuut me a lungil medengei a Bades a chad el mesuub, me nglocha ousbech a ngeso el dmangch aike el olekebai er a okurulel er a klereng. Ureor me a lechub ngultok er a telungalek a locha mengesang er ngii. Ngdi ua Jesus, mongoit a taem el lolengeseu er a study er kau. Nglocha sebechem el invite er ngii el mo melim a kohi me a lechub kom kora di hang out el terung. Ngar er a chouaisei el blekeradel e nglocha sebechel open up e ouchais aike el melsemai er ngii. Molisiich er ngii me loruul omelodech el lolechotel a bltkil a rengul el mora Jehovah, ngdiak loruul el mereng er a rengum.

6. Ngmekera sebechem el ngosuir a chad el mesuub el mo bekeu el dechor el kirel a klemerang? (1 Korinth 16:​13, NW)

⁶ A chad el mesuub sel lebo lulterekokl a rengul el kmo a Jehovah mo ngosuir el kiei el loltirakl a llechul, e ngmo bekeu a rengul loltirakl aike el losuub. (Monguiu er a 1 Korinth 16:​13, NW.b) Ngsebeched el lomekesiu er a part er kau el mora sensei er a skuul. Ka molatk er sel taem er a omngar er a skuul. Ngtecha mle kot soam el sensei? Ngulterekokl el ngike el sensei el uleba kllourreng el olengeseu er kau el mo ulterekokl a rengum er aike el sebechem el remuul. Ngdi osisiu, a ungil sensei er a Biblia a diak di lolisechakl aike el soal a Dios a doruul ngdirrek lolterekokl er a rengul a study er ngii el kmo ngoeak a ngelsuil a Jehovah e ngsebechel remuul aike el omelodech el lousbech er a klengar er ngii. Ngmekera sebechem el meruul e tiang?

MNGESUIR A STUDY ER KAU EL LMUUT EL MO DMOLECH A BLTKIL A RENGUL EL MORA JEHOVAH

7. Ngmilekera Jesus e ngosuterir a rurrenges er ngii lmuut el mukeroul a bltkil a rengrir el mora Jehovah?

⁷ A Jesus a mle medengei el kmo a bltikerreng el mora Dios a mo odbecheterir a redisaiplo er ngii el mo oltaut aike el losuub. Ngmle blechoel el olisechakl er a redisaiplo er ngii me lolemolem lomekeroul er a bltkil a rengrir el mora Demerir el ngar er a eanged. El ua tiang, ngulemekesiu er a Jehovah el mora chad el omesterir a rengelekel a ungil. (Mt. 7:​9-11) A rebebil er a rurrenges er a Jesus a locha dimlak a demerir el uaisei. Ka dim imagine er a blo lomelechesiu er ngii er a louchais er tir a Jesus el kirel a chubechub el chedam el outkeu er a ngelekel el riruul a betok el mekngit el lmuut el mei. Ngmlo sebechir el mesa klechubechub er a Dios el mora rengelekel el ngar tia el chutem.—Lk. 15:​20-24.

8. Ngmekera sebechem el ngosuir a chad el mesuub el lmuut el mo dmolech a bltkil a rengul el mora Jehovah?

⁸ Kau me ngdirrek el sebechem el ngosuir a study er kau el lmuut el mo dmolech a bltkil a rengul el mora Jehovah loeak omblechoel el mosaod a blekerdelel a Jehovah. Derta el taem el mosuub e mngesuir el connect aike el losuub el mora bltkil a rengul a Jehovah el mei er kid. Sel mosaod er a olubet e mngesuir a study er kau el mtebengii a belkul el kirel. (Rom 5:8; 1 Jn. 4:10) Sel lolatk er a bltkil a rengul a Jehovah el mo er Ngii e ngulterekokl el odbechii el mo betik a rengul er a Jehovah.—Gal. 2:20.

9. Ngera ngilsuir a ta el chad el ngklel a Michael el ngodechii a klengar er ngii?

⁹ Molatk er a Michael el chad er a Indonesia. Ngmlukeroul el medengelii a klemerang engdi ngdimlak lemetecholb. Sera le 18 a rekil e ngmlora ngodech el beluu el mo oureor el lomekall a torak. A uriul e ngmlo bechiil engdi milecherei a telungalek er ngii e liluut el mo oureor er a ngodech el beluu. Tiakid el taem e a bechil me a ngelekel el redil a ulemuchel el mesuub a Biblia e ulengeriakl. Sera lemad a delal a Michael e ngliluut el mo remei le ngmle soal loba demal. Tiakid e ngkilengei el mo mesuub er a Biblia. Sera lebo losuub er a 27 el suobel er a Mkiei el Mo Cherechar! e ngkmal rirtechii a rengul aike el lesiluub er cheungel a “Bom Dmolech el Merriter.” Sera bo lolatk er a lulemelechesiu er ngii a Jehovah el lomes er a Ngelekel el chuarm, e ngmlo merael a iuechel a medal. Sera bo lutebengii a klungel a bltkil a rengul a Jehovah me a Jesus el mo er ngii, e ngkmal mlo oba dmolech el omereng el saul e tia uldbechii el mo ngodechii a klengar er ngii e metecholb.

MNGESUIR A STUDY ER KAU EL MO ADJUST A KOT MEKLOU A ULTUTELEL EL TEKOI ER A KLENGAR ER NGII

10. Ngmilekera Jesus e ngosuterir a redisaiplo er ngii el melodech a mo meklou a ultutelel el tekoi er a klengar er tir? (Lukas 5:​5-11) (Dirrek el momes er a siasing.)

¹⁰ A redisaiplo a di mle mereched el mo mtebengii el kmo a Jesus ngike el telbiil el Mesias, engdi te uluusbech a ngeso el mo rullii a berkel a klumech el mo klou a ultutelel er a klengar er tir. A Petrus me a Andreas er a le invite er tir a Jesus el mo mui el taem loltirakl er ngii e te already mla mo disaiplo er ngii. (Mt. 4:​18, 19) Tir me a Jakobus me a Johanes a mle chad er omenged e kmal mle ungil merael a siobai er tir. (Mk. 1:​16-20) A Petrus me a Andreas er a ‘lebechei a ukedir’ e mo oltirakl er a Jesus e te ulterekokl el ulterekeklii a rolel e a telungalek er tir a mo melemolem el melai aike el lousbech. Ngera uldbecheterir el mo melodech a mo meklou a ultutelel er a klengar er tir? A babier er a Lukas ouchais er kid el kmo a mengasireng el tekoi el lerirellii a Jesus a silsichii a klaumerang er tir el kmo a Jehovah a mo blechoel el omesterir aike el lousbech.—Monguiu er a Lukas 5:​5-11.

11. Ngmekera sebeched el lousbech a experience er kid el melisiich er a klaumerang er a study er kid?

¹¹ Ngdiak el sebeched el meruul a mengasireng el tekoi el ua Jesus, engdi ngsebeched el share a experience el kirel a rolel e a Jehovah support er tirke el nguu el mo kot er a klengar er tir. El ua tiang, kau ke dirk remember er a rolel e a Jehovah ngilsukau er a omomuchel el ngar er a miting? Ke locha mlo mengedecheduch er a merredelem er a ureor e silodii el mo er ngii a uchul me ngmla mo diak el sebechem el oureor el overtime a lsekum ngmo melemall er a temel a miting er kau. Sel mouchais aika el experience lobengkel a study er kau, e mouchais er a rolel e ngsilsichii a klaumerang er kau er a omomes er a Jehovah el support er a omelilt er kau el nguu el mo kot er a klengar er kau.

12. (a) Ngera uchul me ngungil a de invite er a rekakerous el chad el mora study er kid? (b) Ngera dirrek el sebechem el lousbech el ngosuir a study er kau el mo nguu a Jehovah el mo kot er a klengar er ngii? Mouchais er a ta er a example.

¹² A study er kau a dirrek el ngmai a klungiolel sel lorrenges er a rolel e a rekuk bebil er a Rekristiano millodech aike el mlo meklou a ultutelel el tekoi er a klengar er tir. Mada em invite er a rudam me a rudos el kakerous a blekerdelel a klengar er tir el me teloi er a omesubiu er a Biblia. Molengit er tir me louchais er a rolel e te mlei er a klemerang me aike el lurruul el mo nguu a Jehovah el mo kot er a klengar er tir. Me a lmuut kung, mongoit a taem el lomes aike el video el ngar cheungel a “Bom Dmolech el Merriter” me a Lechub e ng “A Lsebechem e Momes” er a Mkiei el Mo Cherechar! el babier. El ua tiang, sel mosuub er a 37 el suobel e ngsebechem el melisiich a omellach el desuub er a video el Jehovah Will Care for Our Needs.

MNGESUIR A STUDY ER KAU EL MO MESISIICH ER AIKE EL MELSEMAI ER NGII

13. Ngmilekera Jesus e kutmeklterir a redisaiplo er ngii el kirel a ultok?

¹³ A Jesus ulemelekl el mora rultirakl er ngii el kmo a rebebil a mo omtok er tir el uldimukl er a rechederir. (Mt. 5:11; 10:​22, 36) Sera lolekedang a ulebengelel a omesiungel a Jesus e ngulemeklatk er a redisaiplo er ngii el kmo ngsebechir el loriid a klengar er tir. (Mt. 24:9; Jn. 15:20; 16:2) Ngmillisiich er tir me bo lekerekikl sel lomerk er a klumech. Ngdilu er tir me lak longaititekangel er a rumtok er tir e bo lekerekikl a tekingir me a omerellir me bo el sebechir el melemolem el lomerk.

14. Ngmekera sebeched el ngosuir a chad el mesuub el mo kltmokl el kirel a ultok? (2 Timothy 3:12)

¹⁴ Ngsebeched el ngosuir a chad el mesuub el mo kltmokl el kirel a ultok loeak a douchais er ngii aike el sebechel expect er a rechad er a urerel, resechelil, me a rechedal. (Monguiu er a 2 Timothy 3:12.) A rebebil er a rechad er a urerel a locha mo omekako er ngii el kirel a beches el rolel a klengar er ngii. A rekuk bebil el mo lmuut er a rekmeed el chedal a locha mo melekoi a mekngit el kirel aike el losuub er a Biblia. Sel recheded el ngosuterir a re study er kid el mo medengei el kirel a ultok me aike el sebechir el meruul sel leduubech, e kede mo kutmeklterir el kirel.

15. Ngera sebechel ngosuir a chad el mesuub loutekangel a ultok er a telungalek er ngii?

¹⁵ Lak di mouchais er a study el kmo a telungalek er ngii a locha mo omtok er ngii mdirrek el melisiich er ngii me lolatk er a uchul me te locha uaisei. Te locha omdasu el kmo ngmla mecheblad me a lechub ngdiak lungil a uldesuir el kirir a Resioning er a Jehovah. Mo lmuut er a rebetik er a rengul a Jesus me ngdimlak lungil a rengrir er ngii. (Mk. 3:21; Jn. 7:5) Mosisecheklii a study er kau me lolemolem loba klengariourreng me a omelengmes el ngar omerellel el mora rebebil luldimukl er a telungalek er ngii.

16. Ngmekera sebeched el ngosuir a chad el mesuub el louchais a klaumerang er ngii el ngar er a ungil rolel?

¹⁶ Mo lmuut me a lsekum a rechedal a study er kau olecholt er a klemeriarreng me ngdiak el kirel a study er kau el di smaod a rokui el tekoi el mo er tir. A bo leuaisei e a rechedal el semeriar a locha mo kedeb a telrir er aika el betok el tekoi me ngdiak el sorir lmuut el mengedecheduch er ngii el kirel. Me molisiich er a study er kau me louchais a klaumerang er ngii el ngar er a rolel e ngsebechir el lmuut el kongei lorrenges er ngii er a ta er a taem. (Kol. 4:​6, BT) Nglocha sebechel melekoi er a rechedal me te mo omes er a jw.org. Tia mo ngosuterir el mo medengei a betok el kirir a Resioning er a Jehovah er sel sorir el rretel lungil er tir.

17. Ngmekera sebechem el train er a chad el mesuub el mo meduch longer a kerrir a rechad el kirir a Resioning er a Jehovah? (Dirrek el momes er a siasing.)

¹⁷ Ngdirrek el sebechem lousbech er a “Frequently Asked Questions” el series er a jw.org el ngosuir a study er kau el kutmokl a beot el nger er a ker el locha bo loker a rechedal me a lechub ngrechad er a urerel. (2 Ti. 2:​24, 25) E ngar er a ulebengelel a bek el suobel er a Mkiei el Mo Cherechar! em review er a “A Rebebil a Kmo.” Molisiich er a study er kau me le practice a nger er ngii el lousbech a di tekingel. Lak momai er a rengum el louchais er ngii aike el sebechel meruul el lmuut el mo ungil smodii a klaumerang er ngii el mora rebebil. Sel moruul aika el practice e ke ngosuir el mo meduch el di ngii el mesebechakl er a klaumerang er ngii loba ulterekokl el reng.

18. Ngmekera sebechem el melisiich er a chad el mesuub el qualify el mo omerk er a klumech lobengkel a ongdibel? (Mateus 10:​27, BT)

¹⁸ A Jesus a millisiich er a redisaiplo er ngii me lomerk er a ungil chais el mora rechad. (Monguiu er a Mateus 10:​27, BT.c) Sel rechedel a chad el mesuub el mo ouchais er a klaumerang er ngii er a rebebil e ngrechedel suubii el mo oumerang el ulsirs er a Jehovah. Ngmekera sebechem el ngosuir a study er kau el rullii tiang el mo turrekong er ngii? Sel louchais er a ongdibel el kirel a ileakl el ureor er a berkel a klumech, e molisiich er ngii me lolatk er a rolel e ngsebechel qualify el mo publisher. Mouchais er a uchul me a rebetok a mla metik el kmo ngbeot a domuchel lomerk er a klumech er a temel chouaika el campaign. Ngdirrek el sebechel ngmai a klungiolel er a training el dolai er ngii er a miting er a Klengar me a Omesiunged. Sel lolasem el loltaut er tia el turrekong e ngmo suubii el mo meduch el louchais a klaumerang er ngii loba ulterekokl el reng.

MOCHOTII A KLAUMERANG ER KAU ER A STUDY ER KAU

19. Ngmilekera Jesus e ochotii a klaumerang er ngii er a redisaiplo er ngii, e mekera sebeched el loukerebai er ngii?

¹⁹ Uchei er a lluut el mora eanged a Jesus e ngdilu er a redisaiplo er ngii el kmo a ta er a klebesei e te lmuut el mo kasoues. Te dimlak lutebengii el kmo a Jesus a mesaod er tir el mora eanged. Me nguaisei engdi a Jesus a mle ulturk osengel er a blakerreng er tir ngdiak el klaumededenger er tir. (Jn. 14:​1-5, 8) Ngmle medengei el kmo te ousbech a taem el mo medengei a bebil tekoi el ua omeltkir el mora eanged. (Jn. 16:12) Kid me ngdirrek el sebeched el lochotii a klaumerang er kid er a study er kid el kmo kede medengei el kmo ngsorir el meruul a soal a Jehovah.

20. Ngmilekera odos er a Malawi e ochotii a klaumerang er ngii er a study er ngii?

²⁰ Kede melemolem el oba omelatk el kmo a study er kid a soal meruul er a llemalt. Molatk er a Chifundo el odos er a Malawi. Ngulemuchel el mesuub er a Biblia lousbech er a Mkiei el Mo Cherechar! lobengkel a Alinafe el redil er a Katolik. Sera lerekir a 14 el suobel e nguleker er ngii er a uldesuel el kirel a omengull lousbech a bleob. A Alinafe a kmal ngilasech a rengul e dilu el kmo, “Tia kmal di choice er a chad!” Me a Chifundo a mlo melatk el kmo a Alinafe a di kmedung e ngstob el mesuub. Engdi ngdi millemolem loba kllourreng el mesuub lobengkel a Alinafe e dimlak loridii omelatk el kmo a cherengel a taem e ngmo get er a point. A sesei el buil er uriul e a Chifundo uleker er ngii er a ker el ngar er a 34 el suobel el kmo: “Ngmekera omesubem er a Biblia me a dirrek el kirel a di ta el mera el Dios el Jehovah e mla mo uchul a klungiolem?” A Chifundo a mesaod er a nger er a Alinafe el kmo, “Ngdilung a betok el kmal ungil point, el ta er ngii a Resioning a diak loruul a tekoi el Biblia a ouketui.” Kedeb el taem er uriul e a Alinafe mle stob lousbech a bleob e miltecholb.

21. Ngmekera sebeched el smisichii a chad el mesuub el mo dechor el kirel a klemerang?

²¹ Me alta Jehovah “ngii ia omekeroul,” kid a ngar ngii a part er kid el olengeseu er a chad el mesuub el olengeriakl. (1 Ko. 3:7) Ngdiak di dolisechakl aike el soal a Dios a loruul. Kede olengeseu er ngii el mo er ngii a dmolech el bltkil a rengul el mora Jehovah. Kede dirrek el melisiich er ngii el mo ochotii a bltkil a rengul loeak a le adjust aike el mo meklou a ultutelel er a klengar er ngii, e olisechakl er ngii er a rolel e ngsebechel el oumerang el ulsirs er a Jehovah sel lebo el chebangel omelsemai. Sel dochotii a klaumerang er kid er ngii e kede rullii el mo ulterekokl a rengul el kmo ngsebechel el kiei el loltirakl a llechul a Jehovah e mo dechor el kirel a klemerang.