Bo Moumerang el Kmo a Jehovah Mla Ousubes er Kau

1-2. Ngera ngmo melechesuar er ngii a chad sel bo lomelechesiu el kmo a Jehovah mla ousubes er ngii? (Dirrek el momes er a siasing.)

KING David a kmal uluuchel er a rengul el kirel a klengit el leriruul er a ngar er a mong. (Psa. 40:12; 51:3; superscription) Ngriruul a kmal oberaod el klengit engdi sera lobult er a kngtil e a Jehovah a uluusubes er ngii. (2 Sa. 12:13) Ngkmal mlo dmeu a rengul er a bo lomelechesiu el kmo a Jehovah a mla ousubes er ngii.—Psa. 32:1.

² Kid me ngdirrek el sebechel kmal mo dmeu a rengud sel bo dolechesuar el kmo a Jehovah mla ochotii er kid a klechubechub e ousubes a kngtid. Ngkmal mechelaod a rengud sel dodengei el kmo a Jehovah a kongei el ousubes a kngtid mo lmuut er a oberaod el klengit, sel douuchel a rengud er a kngtid, doluluuch lolengit a klausubes er ngii, e debora tkurrebab el klisiched el diak deluut el meruul a cheleuid el deriruul. (Osi. 28:13; Rel. 26:20; 1 Jn. 1:9) Ngdirrek el kmal mechelaod a rengud sel dodengei el kmo sel lousubes a kngtid e ngdiak el lluut el mo melatk!—Ese. 33:16.

3-4. Ngera ngulemelechesiu er ngii a ta el odos er a uriul er a lemetecholb? Ngera kede mo mesaod er tia el suobel?

³ Me nguaisei, engdi a lebebil e kede mo oumededenger el kmo a Jehovah ngmera el mla ousubes er kid. Tiakid a lulemelechesiu er ngii a Jennifer. A rechad er a blil a ulsisecheklii el kirel a Jehovah engdi sera bo le teenage e ngmlo diak lolengesenges e ulemart er ngii e meruul a mekngit. Sesei el rak er uriul e ngliluut el mei er a Jehovah e miltecholb. Ngdmu el kmo: “A ngar er a mong e ak kmal di millatk a mengereker a udoud. Ak dirrek el mlara deleboes, mle chad er omelim el rrom, e di ngera ngmasech a renguk. Ak medengei el kmo a Biblia a kmo Jehovah sebechel ousubes a kngtid loeak olubet el tengetengel a Kristus. Me nguaisei alta kmla obult er a kngtik e olengit a klausubes er a Jehovah engdi chelsel a renguk e ngmle meringel er ngak a mo oumerang er tiang.”

⁴ Kau, ngdirrek el meringel er kau a lebebil el mo oumerang el kmo a Jehovah mla ousubes a kngtim er a ngar er a mong? A Jehovah soal a bo deua David el mle ulterekokl a rengul er a klechubechub er Ngii. Ngar tia el suobel e kede mo mesaod er a uchul me ngklou a ultutelel a bo doumerang el kmo a Jehovah mla ousubes er kid. Kede dirrek el mo mesaod aike el ngosukid el mo oumerang er tiang.

NGERA UCHUL ME NGKLOU A ULTUTELEL A BO DOUMERANG EL KMO A JEHOVAH MLA OUSUBES ER KID?

5. A Satan ngngera soal a bo doumerang er ngii? Mouchais er a ta er a example.

⁵ Sel bo doumerang el kmo a Jehovah a mla ousubes er kid e ngdiak derebet er a ukbetil a Satan. Lak mobes el kmo a Satan a mora bek el cheldechuul el melasem el meruul er kid el mo stob el mesiou er a Jehovah. El ua tiang, ngmelasem el meruul er kid el mo omdasu el kmo a kngtid a kmal oberaod me a Jehovah kmal diak bo lousubes er kid. Molatk er ngike el chad er a Korinth el mirruul a deleboes e mesuld a ngklel er a ongdibel. (1 Ko. 5:​1, 5, 13) Uriul e ngulebult er a kngtil. A Satan a mle soal a rechad er a ongdibel a lak lousubes er ngii e lak loutkeu er ngii el lmuut el mei er a ongdibel. A osisiu el taem e ngmle soal ngika el chad a bo le feel el kmo ngkmal diak el sebechel musubes er a kngtil me “le meeleb er a klou el klengiterreng” e le stob el mesiou er a Jehovah. A Satan a dirkak lemengodech a turrekong er ngii. Me nguaisei engdi kid a “diak lak dodenge uldesuel.”—2 Ko. 2:​5-11.

6. Ngmekera sebechel mo diak di douuchel a rengud er a kngtid?

⁶ Sel bo doumerang el kmo a Jehovah a mla ousubes er kid e ngmo diak di loldechelakl er kid a ukltked. Sel derebet er a klengit e kede mo ouuchel er a rengud el kirel. (Psa. 51:17) Tia ungil tekoi. A ukltked a sebechel lodbechid el mo meklemeltii a roled. (2 Ko. 7:​10, 11) Me nguaisei engdi a lsekum kede melemolem el di ouuchel a rengud el kirel a tekoi el bla lousubes er kid a Jehovah e ngsebechel rullid el mo soad el give up. Ngbai sel bo doumerang el kmo a Jehovah a mera el mla ousubes er kid e ngmo diak el mekngit a rengud. Seikid e ngmo sebeched el melemolem el mesiou er ngii el dmeu a rengud e ulterekokl a rengud el kmo kede oba kengei er ngii. Tiakid a soal a Jehovah el kired. (Kol. 1:​10, 11; 2 Ti. 1:3) Engdi ngmekera sebechel mo ulterekokl a rengud er a klausubes er a Jehovah?

NGERA SEBECHEL NGOSUKID EL MO OUMERANG EL KMO A JEHOVAH MLA OUSUBES ER KID?

7-8. Ngmilekera Jehovah losaod er ngii el mora Moses, e ngera sebechel mo ulterekokl a rengud er ngii? (Exodus 34:​6, 7)

⁷ Molatk aike el bla louchais a Jehovah el kirel. El ua tiang molatk aike el ledilung a Jehovah el mora Moses er a Rois Sinai.a (Monguiu er a Exodus 34:​6, 7.) Alta Jehovah betok a ungil el blekerdelel me nguaisei engdi ngmillilt el mo ouchais er a Moses el kmo ng “Dios el mui er a blekokuii ma klechubechub.” Me a omomdasu e a Jehovah ngdiak bo lousubes er a chad el betik a rengul er ngii engdi rullii a klengit e obult? A lsekum a Jehovah rullii tiang e ngbelkul a kmo ngmekngit omerellel e diak el chubechub. A Jehovah a kmal diak el sebechel uaisei!

⁸ Ngkmal sebechel mo ulterekokl a rengud el kmo a Jehovah sel ledu el kmo ngchubechub, e ngmelekoi a klemerang. Ngkmal diak lomulak. (Psa. 31:5) Me ngsebeched el loumerang er ngii. A lsekum ngmeringel er kau a di kau lousubes er kau e di lekau el oker, ‘Ngak a kuumerang el kmo a Jehovah a chubechub e ousubes er a ngii di el chad el lobult er a kngtil?’ A lsekum koumerang er tiang, e ngkmal sebechel mo ulterekokl a rengum el kmo ngdirrek el mla ousubes er kau.

9. Ngera belkul a lemusubes a kngtid? (Psalm 32:5)

⁹ Molebedebek aike el lemlukreng el mo meluches a rechad el milluches er a Biblia el kirel a klausubes er a Jehovah. Ka molatk a leliluches a David el ta er a milluches er a Biblia el kirel a klausubes er a Jehovah. (Monguiu er a Psalm 32:5.) A David a dilu el kmo: “Kuluusubes a rokui el kngtik.” Tia el tekoi er a Hebru el moiuid el “kuluusubes” a dirrek el sebechel belkul a kmo, “kilider” me a lechub “chilol.” Me a Jehovah er a lousubes er a David e ngua lekilider a kngtil a David e chemol el merael. Me a David a mlo diak lolechesuar a berredel a klengit el lulengol er ngii. (Psa. 32:​2-4) Kid me ngdirrek el sebeched el mo kebekakl. Sel demera el ngar er a rengud el lobult er a kngtid, e ngdiak a belkul dolemolem el mengol a berredel a klengit el bla lekider e chemol a Jehovah.

10-11. A “kltmokl el lousubes” ngera ngouchais er kid el kirel a Jehovah? (Psalm 86:​5, NW)

¹⁰ Monguiu er a Psalm 86:5 (NW).b Ngar tia el bades e a David a melekoi el kirel a Jehovah el kmo ng “kltmokl el lousubes.” Tia belkul a kmo sel deruul a cheleuid e a Jehovah diak di lemereched el ngmasech a rengul me ngii a soal lousubes er tirke el lobult. Ngera uchul me nguaisei? A tedebechel a bades a kmo: “Kolecholt er a diak lemengodech el bltikerreng el mo er tirke el rokui el omekedong er kau.” Ngua desilubii er a uleak uchei el suobel, a diak lemengodech el bltikerreng er a Jehovah odbechii el mo merekedii er a reblak a rengrir el mesiungel. Tiakid el diak lemengodech el bltikerreng er ngii odbechii el mo “mereched el ousubes” er tirke el rokui el lobult er a kngterir. (Isa. 55:7) A lsekum ke metik el kmo ngmeringel er kau oumerang el kmo a Jehovah mla ousubes er kau e di lekau el oker: ‘Ngak a kuumerang el kmo a Jehovah a kltmokl lousubes er tirke el rokui el lobult e meluluuch lolengit er a klechubechub er ngii? A lsekum a kuumerang er tiang e ngsebechel mo ulterekokl a renguk el kmo ngdirrek el uluusubes er ngak er a kulengit a klechubechub me a klausubes er ngii.’

¹¹ A Biblia dirrek louchais er kid el kmo a Jehovah ungil medengei el kmo kede rruul er a ngerang me kid a diak demecherrungel. Tia sebechel chemolodid. (Psa. 139:​1, 2) Ka me dosaod aike el leliluches a David er a lmuut el ta er a babier er a Psalm me a rolel e ngdirrek el sebechel ngosukid el mo oumerang el kmo a Jehovah a soal lousubes er kid.

LAK MOBES ER A LODENGELII A JEHOVAH

12-13. A doltirakl er a Psalm 103:​14, e ngera ngmedengelii a Jehovah el kired, e ngera ngodbechii el mo meruul er ngii?

¹² Monguiu er a Psalm 103:14. A David a melekoi el kirel a Jehovah el kmo “ng melatk el kmo kid a di chebechab.” Aika el tekingel a David a smodii a ta er a uchul me a Jehovah a kltmokl el mo ousubes er a remesiungel el lobult er a kngterir: Ngmedengei el kmo kid a diak demecherrungel me ngngar ngii a blekerdeled el soad el mo meruul a klengit. Ka me bo de dmolech el melatk aika el tekingel a David.

¹³ A David a melekoi el kmo a Jehovah a “medengei el kmo kede rruul er a ngerang.” Ngmilebii a Adam lolab a “chebechab er a chutem” e mle medengei el kmo a remecherrungel el chad a dirrek el mla er ngii a tekoi el rruul el lousbech. El ua tiang, ngkirir el mengang, mechiuaiu, e outeliil. (Gen. 2:​7, NW) Engdi sera lebora klengit a Adam me a Eva e ngliluut el mo dmolech a belkul a ulebeob er a chebechab. Kid a rengelekir a mlo diak demecherrungel me ngngar ngii a blekerdeled el soad el mo meruul a klengit. A Jehovah a medengelii tiang me ngmedengei el kmo ngngar ngii a taem el bo deruul a cheleuid. Me a lsekum kede rullii a cheleuid e obult er a kngtid e ngochotii a klechubechub er kid e ousubes a kngtid.—Psa. 78:​38, 39.

14. (a) Ngera ngdirrek el louchais er ngii a David el kirel a klausubes er a Jehovah? (Psalm 103:12) (b) Ngmekera tekoi el dilubech el mora David e ochotii el kmo a Jehovah cherrungel el lousubes? (Momes er a baks el “Rolel a Jehovah a Lousubes e Lobes.”)

¹⁴ Ngera dirrek el sebechel ngosukid el mo ulterekokl a rengud el kmo a Jehovah mla ousubes er kid? (Monguiu er a Psalm 103:12.) A David a kmo a Jehovah sel lousubes er kid e ngmai a kngtid el choroid el ua “cherridel a delongelel ongos ma ngebard.” A ongos me a ngebard a kmal diak el sebechel lobech. Tia ngngera ngouchais er kid er ngii el kirel sel lousubes a Jehovah? A Jehovah sel lousubes a kngtid e ngmai el choroid er kid. Ngmai el kmal mo cheroid me ngdiak a ngii di el ngerang el sebechel rullii el lmuut el mo lmatk me a lechub e lluut el olekar ngii el kngtid e loukerrekeriil er kid el kirel.—Ese. 18:​21, 22; Rel. 3:19.

15. Ngera sebeched el meruul er ngii a lsekum a ukltked a di oldechelakl er kid el kirel a klengit el deriruul er a ngar er a mong?

¹⁵ Ngmekera tekingel a David el ngar er a Psalm 103 e ngosukid el mo oumerang el kmo a Jehovah mla ousubes er kid er ngii? A lsekum a ukltked a di oldechelakl er kid el kirel a klengit el deriruul er a ngar er a mong, e ngsebeched el di kid el oker: ‘Ngak ak mla obes el kmo a Jehovah medengei el kmo ngdiak demecherrungel me ngii ousubes er tirke el rokui el obult er a kngterir? Ngak, ak dirrek el medengei el kmo a Jehovah mla obes aike el klengit el bla lousubes er ngak el kirel e kmal diak el lluut el mo oukerrekeriil er ngak el kirel?’ A Jehovah diak lolatk a klengit el deriruul er a ngar er a mong. Me kid me ngkired el diak dolatk. (Psa. 130:3) Sel bo doumerang el kmo a Jehovah a mera el mla ousubes er kid e ngmo sebeched el di kid lousubes er kid e mo omes el beduluchei.

16. Momekesiu er a uchul me ngkengaol a di dolemolem el melatk a kngtid er a ngar er a mong el bla lousubes a Jehovah. (Dirrek el momes er a siasing.)

¹⁶ Molatk er tia el okesiu. Sel dolemolem el mengol a berredel a kngtid er a ngar er a mong e ngua domekall er a mlai e di domes er uriul. Ngungil a dekuk bong e domes el kmo ngngera ngar ulled engdi ngkengaol a lsekum kede di omes er uriul. A lsoad el omekall e diak demekesakl e ngkired el lomes el beduluchei. Ngdi osisiu, a lebebil e ngungil a dolatk el kirel a cheleuid el tekoi el deriruul. Ngsebechel ngosukid me ngdiak deluut el mo meruul. Engdi a lsekum ngdi mo ulturk osenged er ngii e a berraod el dongol er ngii a sebechel olekebai er kid me ngmo diak deruul aike el rokui el sebeched er chelechang el mesiou er a Dios. Me a leuaisei e bai bo lulturk osenged er a omesiunged el mora Jehovah e dolemolem el melatk er a klengar el bla letibir el mei er kid el “ikel dilubech el tekoi er a ngar a mong a kmal di mo diak a melatk.”—Isa. 65:17; Osi. 4:25.

MOLEMOLEM EL OLTEREKOKL ER A RENGUM

17. Ngera uchul me ngkired el melemolem el lolterekokl er a rengud er a bltkil a rengul a Jehovah me a klausubes er ngii?

¹⁷ Ngkired el melemolem el olterekokl er a rengud er a bltkil a rengul a Jehovah me a klausubes er ngii. (1 Jn. 3:​19, BT) E ngerang? E le Satan a kmal diak bo el stob el melasem el meruul er kid el mo omdasu el kmo a Jehovah diak el betik a rengul er kid me a diak bo lousubes er kid. Ngdi tang a moktek er ngii el soal a destob el mesiou er a Jehovah. Ngkmal sebeched el expect el kmo nglmuut el kmal mo meringel loureor el meruul er tiang e le ngmedengei el kmo ngdi kedeb ku temel. (Och. 12:12) Ngdiak el kired el mecherei me ngmo mesisiich!

18. Ngera sebechem el meruul er ngii me bo lulterekokl a rengum er a bltkil a rengul a Jehovah me a klausubes er ngii?

¹⁸ A uleak uchei el suobel a milsaod aike el sebeched el meruul me bo lulterekokl a rengud el kmo a Jehovah a betik a rengul er kid. Tia el suobel a milsaod er a rolel e ngsebechel mo ulterekokl a rengud el kmo a Jehovah mla ousubes er kid. El ua tiang, molatk aike el bla louchais a Jehovah el kirel. Molebedebek aike el louchais a Biblia el kirel a rolel a lousubes. Lak mobes el kmo ngkmal medengei el kmo ngdiak mcherrungel e mo ochotii a klechubechub er kau. Lak mobes el kmo sel lousubes e ngcherrungel lousubes er kau. Seikid e ngmo sebechem el mo oba osisiu el ulterekokl el reng el kirel a klechubechub er a Jehovah el luleba David e mo sebechem el dmu el kmo: “Ke mera el mesulang e Jehovah el mla ousubes a kngtik!”—Psa. 32:5.