Reteru el Beches el Chedal a Governing Body

NGTILOBED a ileakl el subed er a annual meeting el mla er ngii er a October 5, 2024 el kmo: A Brother Jody Jedele me a Brother Jacob Rumph a mla metutk el mo chedal a Governing Body er a Resioning er a Jehovah. Tirka el teru el odam a mla blak a rengrir el mesiou er a Jehovah el betok el rak.

A Brother Jedele a mlechell er a Missouri er a beluu er a Merikel e mlukeroul er a klemerang. Ngkiliei er a basio el dimlak el lebetok a Resioning er ngii me a rebetok el rudam er a kakerous el beluu er a Merikel a mle oldingel e olengeseu el lomerk er a klumech. Tiakid a uchul me ngmlo medengelterir a rebetok el odam. A bltikerreng me a kltarreng er tir a kmal klou a lerellii el mo er ngii. Ngkmal dirk mle ngeasek er a lemetecholb er a October 15, 1983. Ngkmal mle soal lomerk er a klumech me a uriul er a letobed er a high school e ngulemuchel el regular pioneer er a September 1989.

Sera lekekerei a Brother Jedele e a rechad er a blil a mle blechoel lobang ngii me a ochedal el mo visit er a Bethel. Aika el odngelir el mora Bethel uldbecheterir el mo rullii a turrekong er tir el mora Bethel. Ngmlo sebechir el terung el ruedem er a uriul. A Brother Jedele a mlora Wallkill Bethel er a September 1990. A kot e nguluureor er a Cleaning Department e a uriul e ngmlora Medical Services.

Ngar tiakid el taem e aike el ongdibel el kmeed er ngii el melekoi a tekoi er a Spanish a di mirrael el mo betok a rechad er ngii me te mlo ousbech er a rudam. Me a Brother Jedele a mlo teloi er a one er aika el ongdibel e mlo mesuub el melekoi a Spanish. A uriul e ngmlo medengelii a Damaris el ta er a odos el mle pioneer el ngar er a osisiu el circuit. Cherengel a taem e te mlo bechiil e dmak el mesiou el ngar er a Bethel.

A 2005 e te tilobed er a Bethel el mo omekerreu er a rechad er a blirir el blak a rengrir el Sioning. Tiakid el taem e te milsiou el regular pioneer. A Brother Jedele a ullisechakl er a Skuul el Kirir a re Pioneer e mle chedal a Hospital Liaison Committee me a Regional Building Committee er a basio el lengar er ngii.

A 2013 e a Brother me a Sister Jedele a ble le invite er tir el lmuut el mora Bethel el mo olengeseu er a Warwick construction project. Tiakid el taem el mei e te mlo mesiou el ngar er a Bethel er a Patterson me a Wallkill. A Brother Jedele a mla oureor el ngar cheungel a Local Design/Construction Department me a Hospital Information Services. A March 2023 e ngmiltutk el mo helper er a Service Committee. Ngmelatk aika el rokui el assignment er ngii e kmo: “Sel omnguu a beches el assignment e ngsebechem el kmal mo omelechesiu er a klou el berraod. Engdi tiakid sel taem el kirem el mo ultuil er a Jehovah e le ngii a rullid el mo ngii di el ngerang el lousbech er ngii.”

A Brother Rumph a mlechell er a California er a beluu er a Merikel. Sera ledirk kekerei e a delal a mle inactive engdi ngmillasem lolisechakl er ngii a klemerang er a Biblia. Ngdirrek el mle bek el rak el bo loldingel er a delal el mechas el ta er a blak a rengul el Sioning. Ngngilsuir el mo semeriar er a klemerang me sera le 13 a rekil e ngullengit er a chad el mo mesuub a Biblia el lobengkel. Ngdirk mle ngeasek er a lemetecholb er a September 27, 1992. Ngkmal mle dmeu a rengul e le delal a liluut el mei er a klemerang me a rechad er a blil me a rebebil er ngii a ulengeriakl me a delal a liluut el mo blak a rengul e a demal me a rebebil er ngii a miltecholb.

Sera ledirk kekerei a Brother Rumph e ngmilsa el kmo a re pioneer a kmal dmeu a rengrir. Me sera letobed er a high school e ngulemuchel el pioneer er a September 1995. E a 2000 ngmillukl el mora Ecuador el mo olengeseu er aike el beluu lousbech a ruumerk er a klumech. Ngar isei e ngmlo medengelii a Inga el pioneer el odos el chad er a Canada me a cherengel a taem e te mlo bechiil. A uriul er a bo lebechiil e te mlo mesiou er a beluu er a Ecuador el di mle mekesai a re publisher er ngii. Chelecha el taem e tia el ongdibel a meloseb.

Omerollel a taem e a Brother me a Sister Rumph a miltutk el mo special pioneer e a uriul e te mlo mesiou loldingel ongdibel. A 2011 e te mlora 132 el klas er a Gilead. Uriul er a letobed er a Gilead e te mlo mesiou el ngar er a kakerous el beluu el meliuekl er a beluulechad e mlo teloi a kakerous el bedengel a omesiou el ua mora Bethel, mo missionari, me a mesiou el oldingel ongdibel. A Brother Rumph a dirrek el mlo er ngii a ileakl el techellel lolisechakl er a Skuul el Kirir a Rumerk er a Rengedel a Dios (SKE).

COVID-19 pandemic a uchul me a Brother me a Sister Rumph a mle kirir el lmuut el mora Merikel. Te mle invite er tir el mora Wallkill Bethel, e ngar isei e a Brother Rumph a millai a training er a Service Department. Uriul e te liluut el mora Branch er a Ecuador me a Brother Rumph a mlo mesiou el ta er a chedal a Branch Committee. A 2023 e te mle transfer er tir el mora Warwick. E a January 2024 e te tiltkii a Brother Rumph el mo helper er a Service Committee. Ngmelatk aika el basio el bla losiou er ngii e kmo, “Ngdiak el basio a rullii a assignment el mo ileakl ngbai rechad el mosiou el lobengterir.”

Kede mera el oba omereng el saul el kirel a meringel el urerir tirka el odam e “dirrek el [mengull] rar uaisel chad.”—Fil. 2:​29, BT.