A Ker el Mla er a Remenguiu
Ngera el ‘uldasu’ a di kmedung e a Jehovah mo loia er a rengrir aika el renged?
A Ocholt 17:16, 17 a mesaod er a uchelel a kloul ringel el kmo: “A truich el orsul a charm el mules me ngikel charm a mo ouketui er a prostitute; te mo medobed el ngmai a ikel rokui el ngar ngii er ngii me ng di mo meau; te mo kma techel a bedengel e durur el tomellii. Ele Dios a mla rullii el mor ngii er a rengrir a mo oltaut a ngar a uldesuel sel bo leta uldesuir e lenga klisichir el msa ngkel charm el mo mengedereder el dimerkmo bo letaut a tekingel a Dios.” A ngar er a mong e aika el babilenged a dilu el kmo a ‘uldasu’ el Jehovah mo otungii er a rengrir aika el renged a mo olekngemed a klsuul klechelid.
Me nguaisei engdi ngngar ngii omeldechel tia el mle klemedengei er kid. Tia el ‘uldasu’ el Jehovah mo nguu loia er a rengrir aika el renged a mo ‘ngma klisichir el msa [bekerkard el] charm.’ Ka me dorriter aika el ker el mo mesa rolel e tiang a mo tmaut.
Te rua techa losaod er tir tia el ulaoch? “A prostitute” a dirrek el okedongall el Kloul Babilon; ngika omtechei a rokui el klsuul el klechelid er a beluulechad. A “bekerekard el charm” a omtechei er a cheldebechel er a budech el mlo er ngii er a 1919 el League of Nations e chelechang e ng United Nations. (Och. 17:3-5, BT) “A truich el orsul a charm” a omtechei a rokui el kabelment el support er a bekerkard el charm.
Ngera deleuill er a prostitute me a bekerkard el charm? A prostitute ngkaikid er a ‘ledengchokl er bebul’ ngika el charm, e support er ngii e meruul er ngii el mo kutmokl aike el soal.
Ngera mo duubech el mora prostitute? A bekerkard el charm me ngike el teruich a orsul el charm el ngii a support er ngii a kmal “mo ouketui er a prostitute” me te mo ngmai a rokui er ngii e ochotii a klikingelel el mora rokui el chad. E sola te mo okngemedii el di ua ledilu Jehovah. (Och. 17:1; 18:8) Sei a mo ulebengelel a rokui el klsuul el klechelid. Engdi uchei er tiang, e a Jehovah mo remuul aike el renged el mo rullii a tekoi el dirkak a ta el lemeketmokl.
A Jehovah ngmo rulleterir aika el renged me te mo mekerang? Ngmo rullii ngika el teruich a orsul el charm el mo oba “uldesuel” me ngmo “ngma klisichir ma klisichel omengedereder er tir el msa ngkel [bekerkard el] charm” el ngii a United Nations. (Och. 17:13) Ka molatk er a belkul tiang. Aika el kabelment er a rechad omomdasu e ngsebechel mo sorir el chemoit a rokui el klisichir e ngmai el msa ngika el bekerkard el charm? Ngkmal diak! A ulaoch a melekoi el kmo a Dios a mo remuul a rengrir el mo meruul er tiang. (Osi. 21:1; momekesiu er a Isaia 44:28.) Me tirka te mo mekekokterir el olab a klisichir lomsa bekerkard el charm? Ngdiak te bai di mo kiul ngmai el msang. Seikid e a bekerkard el charm a mo oba tia el beches el klisichel lotutii a kerrekerilel a Jehovah el mora rokui el klsuul el klechelid.
Me ngngera sebeched el expect er ngii? Ngdiak de expect el kmo a news a mo melekoi el kmo aika el kabelment a merael el di mocha support er a United Nations. Ngbai kede expect el kmo ngkmal di mo mereched el tekoi sel leruul aika el renged a Jehovah el mo msang a klisichir er a bekerkard el charm. Sel leduubech tiang e kede medengei el kmo ngmocha omuchel a kloul ringel. Engdi chelecha el dongiil e di “de mekar e lulterekokl a rengud” e le ngkmal di kmedung e ngmengodech a blekeradel!—1 Th. 5:6.