A Babier el Mla er a Chelechad er a Ruungerachel

Betik er a Rengmam el Rudam me a Rudos:

“Aki di blechoel el mereng a sulel a Dios el kiriu el rokui e melatk er kemiu el ngar a nglungucham. Ele ki ngar medal a Dios el Demad e melatk a ikel tekoi el murruul el olechotel a tekoi el moumerang me sel bltikerreng el meruul er kemiu me kom meringel el oureor ma dirrek a mesisiich el omeltkiu el mengiil er a Rubak er kid el Jesus Kristus.” (1 Th. 1:2, 3) Aika el kmal ungil el tekoi a kmal ochotii a uldesuam el kiriu! Aki mereng a sulel a Jehovah el kiriu me a ungil el ureor el mongetmokl er ngii. E ngera uchul?

Ngar tia el mlo merek el rak, e kom mle mechesang er a “tekoi el murruul el olechotel a tekoi el moumerang” e ullecholt er “sel bltikerreng el meruul er kemiu me kom meringel el oureor” el kirel a ureor er a Renged. A rebetok er kemiu a ulsiik a techall el mo menglou er a omesiungir. A rebebil a millukl el mo er a kuk bebil er a basio, me a lechub e te mlo er a bebil er a beluu el ousbech er a ruumerk er a Renged. A rekuk bebil a milenglou er a omesiungir el oeak sel lousioning er a buai. A rebetok a dirrek el mlo auxiliary pioneer er a blsechel a Chedaol Belsoil, me a temel a odngelel ngike el odam el oldingel a ongdibel, me a lechub sera lengar er ngii sel ileakl el ureor er a August 2014. Me alta ngkakerous a blekerdelel a klengar er kemiu, engdi ngsebecham el mesa el kmo kom mesiou er a Jehovah el oba rengmiu el rokir, me aki kmal chemat er kemiu. (Kol. 3:23, 24) Me a “tekoi el murruul el olechotel a tekoi el moumerang” a kmal ungil uchul me aki mereng a sulel a Jehovah!

Aki dirrek el kmal oba omereng el saul el kirel “sel bltikerreng el meruul er kemiu me kom meringel el oureor” el omekedechor a kakerous el blil a urerel a Dios el meliuekl er a beluulechad el rokir. Kede kmal ousbech aika el blai, e le ildisir a rechedal a Jehovah a di merael el mo klou. (Isa. 60:22) Ka di molatk, a kot el ngarbab el ildisir a re publisher er tia el mlo merek el rak a mle 8,201,545, e a rechad el dulsuub a Biblia el obengterir er a bek el buil a mle bekord el 9,499,933 a ildisir. Tia el ildois a uchul me ngkired el menglou me a lechub e kede omekbeches a betok el branch office. E tiang a dirrek el belkul a kmo kede kmal ousbech a betok el Blil a Ongdibel! E a osisiu el taem, e ngusbechall er a betok el basio a obis er a ruliuid a babier me bo el sebechir tirke el oliuid el kiei e loureor el ngar er aike el basio el ousbech er a omelekingir.

Me a leuaisei, e ngsebeched el di kid el oker er kid el kmo, ‘Ngera sebechek el rullii el mo olengeseu er a ureor er a okedecherul aika el blai?’ A rebebil er kid a locha sebechir el mo teloi er tia el ureor. Me a lengar er ngii a duch er kid er a okedecherul a blai me a lak, me kid el rokui a ngar er ngii a ileakl el techelled el mo melenget aike el kot el ungil er kid el kirel aika el meklou a ultutelel el ureor. (Osi. 3:9, 10) Sera temel a okedecherul a chedaol Tento, e a rechad er a Israel a kmal mle sorir el melenget me ngtilobed a subed el mo merrob er tir me lak el lluut el melenget. (Exo. 36:5-7) Ngulterekokl aika el kerebai el ngar er a Biblia a kmal melisiich er a rengud. “Sel bltikerreng el meruul er kemiu me kom meringel el oureor” el ngar aika el telengtengil a omesiungiu el mo er a Dios a kuk ta er a uchul me aki mereng a sulel a Jehovah!

Ngdirrek el ngar er ngii a ungil uchul e aki oldeu a rengmam sel ki momes a ducherreng er a rudam er kid. El ua tiang, ka molatk er a rebetik er a rengud el rudam er kid el ngar er a South Korea. Ngulemuchel er a 1950, e a rengeasek el odam er kid el ngar sel beluu a mlo kelebus el kakerous el klemengetel a taem e le tir el dimlak el bo er a mekemad. Te betok el rudam er kid a mle kirir el outekangel er tia el blekeradel, el diak el mesim a klaumerang er tir. A kerebai er a ducherreng er tir a melisiich er a klaumerang er kid!

Ngar er a beluu er a Eritrea, e a retedei el odam er kid a mla ngar er a kelebus el kuk betok er a 20 el rak. A rekuk bebil, el uldimukl er a rudos er kid me a rengelekir a mla ngar er a kelebus el kuk kesai er a 20 el rak. Ngmileketmokl a klou el ureor el mo oltobed er tir er a kelebus, engdi ngdimlak a ta er tir el tilobed. Tirka el odam er kid a dimlak lechitii a klaumerang er tir. Te millemolem er a blakerreng er tir er a chelsel a meringel el blekeradel. Ngkmal diak dobes er tirka el blak a rengrir el chad er a nglunguched.​—Rom 1:8, 9.

Nguaisei, el oumesingd er kemiu a diak mngar er a kelebus e le ngklaumerang er kemiu a uchul. Engdi betok er kemiu a chudelang e outekangel a meringel el secher, ultok el mla er a rebechemiu me a lechub a rechedemiu el diak el ngar er a klemerang, me a kuk di bebil er a mondai el di kemiu a medengei. Alta nguaisei, engdi kom di melemolem el blak a rengmiu el mesiou er a Jehovah! (Jak. 1:12) Aki kmal chemat er kemiu. A blakerreng er kemiu el outekangel a kuk ta er a uchul me aki mereng a sulel a Jehovah.

Chochoi, a ureriu e le ngklaumerang me a bltikerreng er kemiu a uchul me a ducherreng er kemiu a meskemam a kmal ungil uchul me aki ‘mereng a sulel a RUBAK ele ngii a ungil.’ (Psa. 106:1) Ngkmal betik a rengmam er kemiu el rokui, e aki meluluuch me a Jehovah bo lolisiich, e lolengeseu, e lomekngeltengat er kemiu me bo el sebechiu el mesiou er ngii el mo cherechar.

Rudam er kemiu,

Chelechad er a Ruungerachel er a Resioning er a Jehovah