Kau, Ke Ua Uldesuel a Jehovah el Kirel a Llemalt?

1, 2. (a) Ngera el chelebirukel a blo lecharm er ngii a Naboth me a rengelekel? (b) Ngar tia el suobel e kede mo mesaod a ngera el eru el blekeradel?

A RETERU el mekngit el chad a oltelechakl er a ta el chad er a kmal oberaod el klengit. E tirkang a ulumulak. Engdi ngmla obiich el kmo, ngika el chad a mekngit me ngkirel el okodall. Ka di molatk a uldesuir tirke el melemalt a rengrir el chad sel lomes er ngika el diak a telemellel el chad me a rengelekel el sechal el mocha kirir el obetech er a bad el mad! Tiang a diak di el cheldecheduch, e ngmera el dilubech el tekoi el kirel a blak a rengul el mesiungel a Jehovah el Naboth, el kiliei er a taem el longedereder er a beluu er a Israel a King el Ahab.​—1 King 21:11-13; 2 King 9:26.

² Ngar tia el suobel e kede mo mesaod a tekoi el dilubech el mo er a Naboth. Kede dirrek el mo mesaod er a klou el cheleuid el tekoi el lerirellii a ta el blak a rengul el chuodel er a ongdibel er a taem er a rekot el Kristiano. Aika el eru el tekoi a mo ochotii sel rolel e a klengariourreng me sel demereched el ousubes a kmal meklou a ultutelel a lsekum e ngsoad el oukerebai er a uldesuel a Jehovah el kirel a llemalt.

A KLOU EL CHELEBIRUKEL EL MILEKETMOKL

3, 4. Ngua techa el chad a Naboth? E ngera me ngdimlak lekengei el olterau er a sersel el mo er a King el Ahab?

³ A Naboth a mle blak a rengul el mo er a Jehovah er sel taem el oumesingd el chad er a Israel a uleltirakl a mekngit el blekerdelel a King el Ahab me a bechil el kmal mekngit el Kuin el Jesebel. Tirkang a milengull er a klsuul chelid el Baal, e kmal dimlak el lomekerreu er a Jehovah me a lechub e lekengei el oltirakl a llechul. Engdi a Naboth a milengreos er a deleuill er ngii me a Jehovah el kuk ngaruchei er a klengar er ngii.

⁴ Monguiu er a 1 King 21:1-3. Sel taem el Ahab a mlo soal el omechar me a lechub e nguu a ungil sers er a bilong el mtechir a sersel a Naboth, e a Naboth a dimlak lekengei er ngii. E ngera uchul? Nguleba omengull e dilu er a Ahab el kmo: “Tial sers er a bilong a dikesek er a ruchelek. A RUBAK olekebai er ngak me ng diak kbechikau me bo mousers er ngii!” A Naboth a dimlak lekengei er a ongtil a King el Ahab e le ngomtok er a llechul a Jehovah a lsekum a chad a oterur a dikesel a telungalek er ngii. (Levitikus 25:23; Ulecherangel 36:7) Me ngbleketakl el kmo a Naboth a ullengesenges er a Jehovah.

5. Ngmilekerang a Jesebel me bo el sebechel el nguu a sersel a Naboth?

⁵ Me a Naboth er sera lak lekengei el olterau er a sersel, e a King el Ahab me a bechil a mlo remuul a kmal mekngit el tekoi. A Kuin el Jesebel a uldercheterir a reteru el chad el mo otelecheklii a Naboth el kirel a klengit el dimlak letemellii me bo el sebechel el nguu a sers. Me tiang a mlo uchul a kodellel a Naboth me a rengelekel. Me ngmilekerang a Jehovah el kirel tia el kmal klou el chelebirukel?

A MELEMALT EL KERREKERILEL A DIOS

6, 7. Ngmilekerang a Jehovah e ochotii el kmo ngbetik a rengul er a llemalt? E ngera me tia el omerellel a milengelaod er a telungalek me a resechelil a Naboth?

⁶ Ngdi mle mereched a Jehovah el oderchii a Elias el mo omals er a Ahab. Me ngdilu er a Ahab el kmo ngmerechorech e omekoad. Ngera mle uldesuel a Jehovah el kirel tiang? Ngmle soal a lemad a Ahab me a bechil me a rengelekel el sechal el ua omeruul el mileketmokl el mo er a Naboth me a rengelekel el sechal.​—1 King 21:17-25.

⁷ A telungalek er a Naboth me a resechelil a kmal mlo mekngit a rengrir el kirel a mekngit el tekoi el leriruul a Ahab. Engdi Jehovah a milsa chelebirukel el tekoi el meketmokl me ngdi mle mereched el sumecheklii. Me ngulterekokl el kmal mlo mechelaod a rengrir. Me nguaisei, engdi a klengariourreng me a klaumerang er tir a locha mleasem sel bo desa tekoi el dilubech er a uriul er tiang.

8. Ngmilekera Ahab er sera lerengesii a klemechel a Jehovah? Me ngera mlo rsel?

⁸ A Ahab er sera bo lodengelii a uldesuel a Jehovah el bedulngii, e ng “silodel a bilel, e ngilubet e uluubail a bek. Ng ulekor a blengur, e di uluubail a bek el mechiuaiu, e mirrorael el di belalk a medal e klsesechebuul.” A Ahab a mlo ngariou a rengul! Me ngera mlo rsel? A Jehovah a dilu er a Elias el kmo: “Chelechal bla le rellii tiang, e ng diak bo kuba kerior el mor ngii er chelechal le chad; ak mo nguu a kerior el mor a telungalek er a Ahab el mor a klengar er a ngelekel sechal.” (1 King 21:27-29; 2 King 10:10, 11, 17) A Jehovah a ngike el merriter a rengud me ngsebechel el mesekid el kmo kede uangera el chad, me ngulechotii a klechubechub er ngii el mo er a Ahab.​—Osisechakl 17:3.

A KLENGARIOURRENG A UCHUL A ULEKERREU

9. Ngera me a klengariourreng a ulemekerreu er a telungalek er a Naboth me a resechelil?

⁹ A rechedal a Naboth me a resechelil er sera lerenges el kmo, a telungalek er a Ahab a diak bo lobals el mo lmuut er a uriul er a kodellel a Ahab, e nglocha kmal mleasem a klaumerang er tir er a Dios. Me ngdi ta el klengariourreng a mo sebechel el omekerreu er a klaumerang er tir. E ngera uchul? A lsekum e ngmo ngariou a rengrir, e ngsebechir el melemolem el mengull er a Jehovah e mo mui el oumerang el kmo, ngkmal diak el sebechel a Dios el mo diak el tabesul a omerellel. (Monguiu er a Duteronomi 32:3, 4.) A ngar medad el klebesei, e a telungalek er a Naboth a mo chormii a klengeltengat e le te mo mesterir a rebetik er a rengrir el mo mekiis er a kodall. Ngmo er ngii a cherrungel e melemalt el kerrekeriil el kirel a Naboth me a rengelekel el sechal. (Job 14:14, 15; Johanes 5:28, 29) A ngariou a rengul el chad a medengei el kmo: “A Dios a mo oukerrekeriil a bek el tekoi el doruul, a ungil ma mekngit el mo lmuut er a berrotel el omeruul.” (Olisechakl 12:14) A Jehovah a sebechel el mes a klemerang er a tekoi el kid a diak a ungil klemedengei er kid er ngii. Sei a uchul me a klengariourreng a omekerreu er kid me ngdiak doridii a klaumerang er kid er a Jehovah.

10, 11. (a) Ngera el blekeradel a sebechel el melasem er a uldesued el kirel a llemalt? (b) Ngokiu a ngera el rolel e ngsebechel a klengariourreng el omekerreu er kid?

¹⁰ Ngmo uangera uldesuem a lsekum a remechuodel a oterekeklii a tekoi el diak mungil medengelii a uchul me te mirruul er ngii me a lechub e ngdiak mkengei er a tekoi el lerirellii? El ua tiang, ngmo uangera uldesuem a lsekum kau me a lechub a betik er a rengum a mo diak loruul er a ngerachel el mloterekokl er ngii er a omesiungel el mo er a Jehovah? Me a lechub a bechim me a lechub a ngelekem el sechal me a lechub e ngredil me a lechub e ngkmeed el sechelim a mesuld a ngklel, e kau a diak mkengei er a mloterekokl el tekoi el lerirellii a remechuodel? Ke mo mekerang a lsekum ke oumerang el kmo te cheleuid a remechuodel er sera lochotii a klechubechub el mo er a chad el rirebet er a klengit? Aika el blekeradel a sebechel el melasem a klaumerang er kid er a Jehovah me sel rolel a losmechokl a tekoi er a chelsel a cheldebechelel er chelecha el taem. Me ngmekera klengariourreng e omekerreu er kau sel bo lemeasem a klaumerang er kau er aika el blekeradel? Me bo dosaod a eru el rolel.

¹¹ A kot, a lsekum kede oba klengariourreng e lak dobes el kmo ngdiak dodengei a rokui el klemerang el tekoi. El mo lmuut er a taem el domdasu el kmo kede medengei a rokui el tekoi el mileketmokl. Ngdi ta el Jehovah a mera el medengelii a rengul a chad. (1 Samuel 16:7) Me sel deblechoel el melatk er tiang e ngmo ngariou a rengud e mo medengei el kmo ngar er ngii a telkelel a klemedengei er kid me ngkmal kired el ngodechii a uldesued. E a ongerung, a lsekum kede mesang me a lechub e kede chormii a chelebirukel el omeruul e a klengariourreng a ngosukid el mo olengesenges e mo klou a rengud el mengiil er a temel a Jehovah el mo sumecheklii a tekoi. A Biblia a kmo: “Ng ungil tirkel meluu er a Dios ele bek el tekoi a di mo ungilbesul.” Ngdirrek el mesaod el kmo: “E ngdi ngikel dengerenger a diak bo lungilbesul. A klengar er ngii a di me engelakl.” (Olisechakl 8:12, 13) Me a lsekum e ngmelemolem el ngariou a rengud e ngmo uchul a klungioled kid me tirke el rokui el ulebengked er a leduubech tia el tekoi.​—Monguiu er a 1 Petrus 5:5.

A CHELEBLAD EL MILEKETMOKL ER A CHELSEL A ONGDIBEL

12. Kede mo mesaod er a ngera el cheldecheduch? E ngera uchul?

¹² Tirke el Kristiano er a ongdibel er a Antiok er a beluu er a Siria a chirremii a blekeradel el millasem a klengariourreng er tir, e dirrek el rirelleterir el mo meringel er tir lousubes er a omeruul el dilubech. Me bo dosaod er tia el cheldecheduch, e dousbech er ngii el merriter a rengud el kirel a omeruul el klausubes. Tiang a sebechel el ngosukid el mo medengelii a uchul me a Jehovah a diak el sebechel el tomall a llechul sel lousbech er a rediak lemecherrungel el chad el meruul a tekoi.

13, 14. Ngera el ngerachel a mloterekokl er a apostol el Petrus? Me ngmilekerang e ochotii a blekeurreng er ngii?

¹³ A apostol el Petrus a mle ta er a remechuodel er a ongdibel, el betok el Kristiano a mle ungil medengelii. Ngkmal mle kmes a deleuill er ngii me a Jesus, e mlukngerachel el mo meruul a meklou a ultutelel el ureor. (Mateus 16:19) El ua tiang, sera rak er a 36, e ngmlodurech el mo omerk er a klumech el mo er a Kornelius me a rokui el chedal a telungalek er ngii. E tia ngera me ngkmal ileakl el tekoi? E le Kornelius a dimlak leblotk el Chisentael, e dimlak el chad er a Judea. Me sel taem el Kornelius me tirke el rokui el chad er a blil a ngiluu a chedaol reng er a Dios, e a Petrus a mlo medengei el kmo ngsebechel el melecholb er tir me te mo Kristiano. Me ngdilu el kmo: “Ng ngar ngii a sebechel el merrob er tir me ng diak bo le metecholb?”​—Rellir 10:47.

¹⁴ E sera rak er a 49, e a rechapostol me a remechuodel er a Jerusalem a mlo kldibel el mo olterekokl er a tekoi el kmo ngkirir tirka el Kristiano el Chisentael el mo obotk me a lechub e ngdiak. Me ngar tia el miting e a Petrus a mle bekeu el omeklatk er a rudam el kmo ngmla mesang a diak leblotk el Chisentael el nguu a chedaol reng er a Dios. Me ngokiu a tekoi el lechirremii a Petrus e ngmlo sebechel el ngosuir a chelechad er a ruungerachel el oterekeklii a uldesuir. (Rellir 15:6-11, 13, 14, 28, 29) Me tirke el Kristiano el chad er a Judea me a Rechisentael a locha kmal mirreng a sulel a Petrus el mle bekeu el ouchais a klemerang el tekoi. Me ngulterekokl el kmal mle beot er tirka el Kristiano er a irechar el mo oumerang er ngika el blak a rengul e melemalt el chad!​—Hebru 13:7.

15. Ngera el cheleuid el tekoi a lerirellii a Petrus er a lengar er a ongdibel er a Antiok er a beluu er a Siria? (Momes er a siasing er a uchelel a suobel.)

¹⁵ Telkib el taem er a uriul er sel miting er tir er a Jerusalem, e a Petrus a mlo oldingel er a ongdibel er a Antiok er a beluu er a Siria. Me sera lebong, e ngmilengoit a temel el obengterir a rudam er ngii el Chisentael. Me kede kora melatk el kmo, te locha kmal mle semeriar el lorrenges a tekoi el bla lechebangel a Petrus me sel klou el klemedengei er ngii er a tekoi. Me nguaisei, engdi te locha kmal kilebetiekl er sera bo lak el omengur el obengterir. Ngdirrek el milengesuseu er a rebebil el Kristiano el chad er a Judea el uldimukl er a Barnabas el mo meruul el uaisei. Me ngera uchul me ngika el blak a rengul el Kristiano, e ta er a remechuodel me ngmirruul er tia el kmal klou el cheleuid el tekoi, el sebechel el mo uchul a klekakeakl er a chelsel a ongdibel? Ngmo duubech a klou a ultutelel el ker el kmo, ngera sebeched el suubii er a cheleuid el omerellel a Petrus el ngosukid er sel taem el bo lemekngit a rengud er a tekingel me a lechub e ngomerellel a ta er a remechuodel?

16. Ngmilekera e mesmechokl a uldesuel a Petrus? E ngera el ker a dilubech?

¹⁶ Monguiu er a Galatia 2:11-14. A Petrus a mlo medakt er a rechad. (Osisechakl 29:25) A Petrus a mle ungil el medengelii a uldesuel a Jehovah el kirir a Rechisentael. Engdi ngmle medakt er tirke el blotk el Kristiano el chad er a Judea el mle oldingel er a Jerusalem, e lesang e bo lemekngit a uldesuir el bedulngii a lsekum te mesang el teloi er tirke el Kristiano el Chisentael. Me a apostol el Paulus a dilu er ngii el kmo, ngcheblad el chad. E ngera uchul? E le Paulus a rirenges a chisel a Petrus el mesebechakl er a Rechisentael el ngar sel miting er a Jerusalem er a rak er a 49. (Rellir 15:12; Galatia 2:13.) Me ngmo uangera uldesuir tirke el Kristiano el Chisentael el Petrus a mla tomall a rengrir? Te mo mesibas er tia el omerellel? Me a Petrus, ngmo oriid aike el ngerachel el mloterekokl er ngii el tia el cheleuid el bla lerellii a uchul?

BO MKLTMOKL EL OUSUBES

17. Ngmilekerang a klausubes er a Jehovah e mo uchul a klungiolel a Petrus?

¹⁷ A Petrus a uleba klengariourreng e kilengei el ngodechii a uldesuel er a losmechokl er ngii a Paulus. A Bades a diak losaod el kmo ngurriid aike el ngerachel el mloterekokl er a Petrus. A uriul, e ngbai mlukrael el mo meluches a eru el babier er a Biblia. Me ngar sel ongeru el babilengel, e ngmilsaod el kirel a Paulus el kmo: “betik er a rengud” el odam er kid. (2 Petrus 3:15) Me a cheleuid el omerellel a Petrus a locha kmal tilemall a rengrir tirke el Kristiano el Chisentael. Me nguaisei, engdi a Jesus el ngike el bdelul a ongdibel a millemolem el ousbech er ngii. (Efesus 1:22) Me a rudam me a rudos er a chelsel a ongdibel, a uleba ileakl el techall el mo oukerebai er a Jesus me a Demal e ousubes er a Petrus. Me kede melatk el kmo, ngdimlak a chad el mecherei tia el cheleuid el omerellel a diak lecherrungel el chad me bo luchul e lemesibas.

18. Ngoingerang a ungil el techall el doukerebai er a uldesuel a Jehovah el kirel a llemalt?

¹⁸ Ngdimlak a ta el cherrungel el Kristiano er a irechar, me chelecha el taem me ngdirrek el diak a remecherrungel el mechuodel er a ongdibel er a Rekristiano. A Biblia a kmo: “Kede rokui el blechoel el mo e mecheuid a omerelled.” (Jakobus 3:2) Ngkot el beot er kid el mes a cheleuid el meketmokl. Me kede mo mekerang sel desang me a lechub e kede melechesuar a cheleuid el omerellel a odam er kid? Kede mo oukerebai er a uldesuel a Jehovah el kirel a llemalt? El ua tiang, ngmo uangera uldesuem a lsekum a ta er a remechuodel a dulii a tekoi el ua longetukel er a rechad? Ke mo mesibas e le ngii el dimlak el lungil el omdasu e dulii a tekoi el tomellii a rengum? Ke di mereched el mo melatk el kmo ngikang a kmal diak el kirel el ta er a remechuodel, me a lechub e ngmo klou a rengum e mengiil er a Jesus el ngii a bdelul a ongdibel? Ke di mo melatk er tia el cheleuid el omerellel me a lechub e ngsebechem el lotkii a klemengetel a taem el leblak a rengul er a omesiungel? A lsekum e ngika el odam el mlo cheleuid a omerellel el bedulkau a ngmai a lmuut el bebil er a ngerachel er a ongdibel, e ngmo dmeu a rengum el kirel? A lsekum e ke kongei el ousubes er ngii e ke ochotii el kmo, ngsoam el oukerebai er a uldesuel a Jehovah el kirel a llemalt.​—Monguiu er a Mateus 6:14, 15.

19. Ngkired el oterekeklii a rengud el mo mekerang?

¹⁹ Kid a kmal betik a rengud er a llemalt a uchul, me kede semeriar el lomes el beduluchei el kirel sel sils el Jehovah a mo okngemed a rokui el chelebirukel el Satan me tia el mekngit el beluulechad er ngii a miluchel. (Isaia 65:17) Me chelecha el dongiil er sel taem, e bo doba klengariourreng sel bo dechermii a chebirukel el omeruul e dolatk el kmo ngdiak a ungil klemedengei er kid er a tekoi el dilubech, e bo dekltmokl el ousubes er tirke el tomellii a rengud. Sel doruul el uaisei, e kede mera el oukerebai er a uldesuel a Jehovah el kirel a llemalt.