Budech​—Ke Mekera Metik er Ngii?

KID a kiei er a chelsel a meringel el blekeradel me ngsebechel mo meringel er kid el metik er a budech. Engdi ngmo lmuut me a lengar er ngii a budech er a uldesued me a rengud me kid a sebeched el oridii. Me ngera ngmelekoi a Biblia el sebechel ngosukid el metik er a mera el budech el diak a ulebengelel? E mekera dengesuterir a rebebil el mo meruul er a osisiu el tekoi?

NGERA KIRED EL MERUUL ER NGII?

A bo el sebeched el metik er a mera el budech e ngkired el mo melechesuar er a ungil ulekerreu. Ngkirel el ngar er ngii a rungil sechelid, engdi ngkired el olekes er a deleuill er kid me a Jehovah el ngii a kot el klou a ultutelel el tekoi. Me ngmekera doruul er tiang?

A llechul a Jehovah me a omellach er ngii a blechoel el mo uchul a klungioled. Me sel bo dolengesenges a llechul me a omellach er ngii, e kede ochotii el kmo kede oumerang er Ngii, e soad a lebudech a deleongel er kid me Ngii. (Jeremia 17:7, 8; Jakobus 2:22, 23) E seikid e a Jehovah mo kmeed er kid, e dirrek el meskid a budech er a uldesued. A Isaia 32:17 a melekoi el kmo: “Ele re bek el chad a mo meruul a ikel melemalt, me ng mor ngii a budech e mo ungilbesrir el di blechoel.” Me kid a sebeched el metik er a mera el budech a lsekum kede kongei el olengesenges er a Jehovah.​—Isaia 48:18, 19.

A Jehovah dirrek el mla meskid a mekreos el sengk el mo ngosukid el mo omekeroul er a diak a ulebengelel el budech. E tia el sengk a chedaol reng er ngii.​—Rellir 9:31.

A CHEDAOL RENG ER A DIOS A NGOSUKID EL MO MEKURULII A BUDECH

A apostol el Paulus a dilu el kmo a budech a dirrek el uldimukl er a “rodech ra Reng.” (Galatia 5:22, 23, BT) Me a chedaol reng er a Dios el uchul a budech a uchul, me ngkired el mechere chedaol reng me ngomekrael er kid a lsekum ngsoad a budech. Me ngmekera doruul er tiang?

A kot e ngkired el menguiu er a Tekingel a Dios er a bek el sils. (Psalm 1:2, 3) E sel bo dungil el melebedebek aike el donguiu, e a chedaol reng a ngosukid el mo medengei a soal me a chetil a Jehovah. El ua tiang, sel desuubii el kmo ngmelemolem el budech a uldesuel e kede mo medengelii a klungel a ultutelel tia el budech er a uldesuel. Me sel doltaut aike el desuub er a Biblia, e ngmera el mo klou a budech er a klengar er kid.​—Osisechakl 3:1, 2.

A ongerung, e ngkired el meluluuch el olengit er a chedaol reng er a Dios. (Lukas 11:13) A Jehovah tibir el mo er tirke el olengit a ngeso er ngii el kmo: “A budech er a Dios, el diak el sebechel a chad el mo cherrungel el medengelii, a mo mtebechel a rengmiu ma uldesuiu el oltirakl er a Kristus Jesus.” (Filipi 4:6, 7) Me sel dolemolem el kmeed er a Jehovah, e mo ultuil er a chedaol reng er ngii, e ngmo meskid a mera el budech er a uldesued.​—Rom 15:13.

A Biblia mla ngosuterir a rebetok el chad el mo meruul a omelodech er a klengar er tir, me sel rolel e te oldeu er a rengrir er a budech el obengkel a Jehovah, me a budech er a uldesuir, me a budech el obengterir a rebebil. Me nguaisei, engdi te milekera remuul aika el omelodech?

A ROLEL E A REBEBIL A MILTIK ER A MERA EL BUDECH

A rebebil el rudam me a rudos er a uchei er a bo lodengelii a klemerang e tuleba ngasecherreng, e mirruul a tekoi er a uldikel me a koadelchad. Engdi te uleba blakerreng el mo melodech er a klengar er tir, me chelechang e te kmal bekokeuii, e oba kllourreng, e ngar ngii a budech er a delongelir tir me a rebebil.a (Momes er a footnote.) (Osisechakl 29:22) Me chelechang e bo desa rolel e a odam el ngklel a David me a odos el ngklel a Rachel a millodech aika el blekerdelir.

A David er a uchei er a bo lodengelii a klemerang e ngmle blechoel el mekngit a uldesuel el bedul a rebebil, e dirrek el mekngit a ngerel el mora rechad er a blil. Engdi ngmlo mtebengii el kmo ngkirel el meruul a omelodech er a klengar er ngii. Me ngmilekera metik er a budech? Ngmelekoi el kmo, “Ak kulemuchel el oltaut a omellach er a Biblia er a klengar er ngak el mlo uchul me ngmlo er ngii a omengull er a delongelek ngak me a rechad er a blik.”

A blekeradel er a basio el lemlukeroul er ngii a Rachel a mla er ngii a letemellii er a klengar er ngii. Ngmelekoi el kmo, “Ngme lmuut er chelechang me ak chuarm er a ngasecherreng e le kiliei el obengterir a rebekongesengasech a rengrir el chad.” Me ngera ngilsuir el mo metik er a budech? Ngmelekoi el kmo, “Ak milluluuch el olengit a ngeso er a Jehovah.”

A David me a Rachel a di eru el kerebai er a rechad el ngar ngii a budech er a uldesuir, e le te uleltaut a omellach er a Biblia, e mle ultuil er a chedaol reng er a Jehovah. Me alta kede kiei er a beluulechad el mui er a ngasecherreng engdi, ngdirk sebechel el budech a uldesued me a rengud. E tiang a rullii el mo beot er kid el obengterir a rechedal a telungalek er kid, me a dirrek el rudam me a rudos er a ongdibel. Engdi Jehovah mengelechel er kid el mo ‘kie el ngar a budech kid ma rokui el chad.’ (Rom 12:18) Engdi tiang ngsebechel el meketmokl? E ngera uchul me kede melasem el meruul a budech er a delongeled kid me a rebebil?

MERUUL A BUDECH ER A DELONGELED KID ME A REBEBIL

Sel doldingel e kede douchais el kirel a budech el ngar er a Rengedel a Dios el mei. (Isaia 9:6, 7; Mateus 24:14) Te betok a mo sorir tia el klumech me te mo kongei er ngii. Me chelechang e ngdikea lomdasu el kmo ngdiak a belkrir, me a lechub e di lekesib a rengrir e le ngtekoi el duubech er tia el beluulechad a uchul. Me chelechang e te oba mera el omelatk el kirel a ngar medad el klebesei el rulleterir el mo sorir el “nguu a budech.”​—Psalm 34:14.

Me nguaisei engdi ngdiak el rokui el chad a sorir a klumech el domerk er ngii sel dekot el mo oldingel er tir. (Johanes 3:19) Engdi Dios a meskid a chedaol reng er ngii alta ngkakerous a blekerdelir a rechad el bedul kid. E tia ngosukid el mo melemolem el budech a uldesued, e mo olecholt a omengull sel domerk er a klumech. E ngar tiakid el rolel e kede oltirakl er a ulekrael er a Jesus el kmo: “Ma lsekum a re chad er ngii el blai a ngoikemiu, e a budech a mo medechel er ngii; ngdi lsekum ng diak le ngikemiu, e kom lmuut el nguu sel budech el mulebal mong.” (Mateus 10:11-13) Me sel bo domekeroul er tia el blekeradel e ngsebeched el melemolem el budech a uldesued me a rengud alta ngmekngit a tekingir me a omerellir a rebebil. E dirrek el ngosukid el mo melatk el kmo nglocha dirk ngar ngii a techelled el mo ngosuterir a rebebil er a ngar medad el klebesei.

Kede dirrek el melisiich a budech el okiu sel doba omengull el mengedecheduch er a rechad er a kabelment el mo lmuut me a lsekum te omtok er kid. El ua tiang, ngar er a ta er a beluu er a Africa, e a kabelment a dimlak lekengei er tir el mo omekedechor a Blil a Ongdibel er tir. Me a rudam er kid a mle medengei el kmo ngmle kirir el melasem el sumecheklii tia el mondai el oba budech. Me te ulderchii a ta el odam el mla ta el missionari er sel beluu el mo mesa High Commissioner er a London er a beluu er a England, e ouchais er ngii el kirel aike el urerir a Resioning er a Jehovah el melisiich a budech.

Me ngika el odam a dilu el kmo: “Me sera kbo er ngike el receptionist, e ngokiu a rolel a loubail e ak mlo medengei el kmo ngchad er sel kebliil el ksilubii a omelekingir. Me a kuluuetkeu er ngii el ousbech er a omelekingel me ngkmal mlo mechas a rengul me nguleker er ngak el kmo, ‘Ngera moktek er kau me ke mlei?’ Me ak mle ungil mengedecheduch er ngii el kmo ngmeral soak el mesa High Commissioner. Me ngmocha oudengua el mora obis er ngika el High Commissioner me ngtilobed el me outkeu er ngak el melekoi a tekoi er sel beluu. Me a uriul er tiang, e ngmlo ungil rongesak er a kusaod aike el ureor el loruul a Resioning el melisiich a budech.”

Me a uriul er ngika el High Commissioner er a lerengesii a odam er kid, e ngmlo ungil medengelii a ureor el doruul er ngii, me ngmlo diak el sal mengetukel er kid el ua uchelel. A telkib el taem er uriul, e a rechad er a kabelment a ngildechii a uldesuir, e kilengei er a Resioning er a Jehovah me te mlo omekedechor a Blil a Ongdibel er tir. Me tirka el odam a kmal mlo dmeu a rengrir! Me ngkmal bleketakl el kmo kede melisiich er a budech sel doba omengull el bedul a rebebil.

OLDEU A RENGUD ER A DIAK A ULEBENGELEL EL BUDECH

A rechedal a Jehovah er chelecha el taem a oldeu er a rengrir er a ungil el blekeradel er a klengar, e a osisiu el taem e te mengull er Ngii el ngar er a budech. Ngsebechel a derta er kid el mo melisiich er tia el budech el okiu sel domekeroul er a budech er a klengar er kid. E seikid e ngsebechel el mo ulterekokl a rengud el kmo a Jehovah a dmeu a rengul er kid. E ngar er a beches el beluulechad er ngii, e ngmo meskid a diak a ulebengelel el budech.​—2 Petrus 3:13, 14.