Ngmla ta el molatk a menguiu er a Biblia engdi ngmle osisiu a uldesuem el uai tirka el chad el llechukl er bab? A rebetok el chad a omes er a omengiuel a Biblia el kmal meringel el tekoi. Engdi ngera uldesuem omko ke mlo medengei el kmo, a Biblia a sebechel ngosukau el mo ungil a klengar er kau? E kuk mekerang a lsekum ke mlo medengei el kmo ngar er ngii a sebechem el meruul me bo el deu a rengum er a omengiuem? Ke kongei el mo omes a lolekoi a Biblia?

Ka momtab a tekingir tirka el chad el milsa klungiolel a longuiu er a Biblia.

A Ezekiel, el 20 me a derengel a rekil a kmo: “A ngar er a mong, e ak mle ua chad el omekall er a mlai el diak a ulterekokl el basio el lebo er ngii. Engdi a omengiuek er a Biblia a mla rullii a klengar er ngak el mo er ngii a belkul. Ngar er ngii a ungil el ulekrael er a chelsel el sebechek el ousbech er a bek el sils.”

A Frieda, el dirrek el 20 me a derengel a rekil a kmo: “A ngar er a mong e ngdi ngera ngmasech a renguk. Engdi a omengiuek er a Biblia a ngilsukak el mo klou a renguk. Tia mlo uchul e ngmlo beot er a rechad a obengkek, me chelechang e ngbetok a resechelik.”

A Eunice, el 50 me a derengel a rekil a melekoi el kirel a Biblia el kmo: “Ngolengeseu er ngak el mo ungil el chad, e melodech a diak el ungil blekerdelek.”

Ngua lolekoi tirkang me a rebetok el miliol el chad, a omengiuel a Biblia a sebechel ngosukau el lmuut el mo ungil a klengar er kau. (Isaia 48:17, 18) Ngsebechel el ngosukau el mo (1) ungil melilt a tekoi, (2) e mo er ngii a resechelim, (3) e moutekangel a mondai, (4) e a ngaruchei er ngii el rokui, a mo suubii a klemerang el kirel a Dios. A ulekrael er a Biblia a mla er a Dios el mei, me ngkmal sebechem el oltirakl. A Dios a diak el sebechel el meskid a cheleuid el ulekrael.

A klou a ultutelel el tekoi a kmo, ngkired el omuchel el menguiu er a Biblia. Ngera sebechem el meruul me bo el beot er kau e bo ledeu a rengum el menguiu er a Biblia?

Ngera sebechel ngosukau el mo dmeu a rengum er a omengiuem er a Biblia e ngmai a klungiolem er ngii? Ka momtab aika el eim el tekoi el mla ngosuterir a rebetok el chad.

Mngiltii a ungil el basio. Bo er a basio el diak a cherrodech er ngii. Mongesadel a tekoi el mo mengesang er kau. A mellomes el basio el ungil a eltel a sebechel ngosukau el mo ngmai a klungiolem er a omengiuem.

Moba melemalt el uldasu. A Biblia a mla er a Demad el ngar er a eanged, me a lsekum e kede mo ngmai a klungioled er ngii, e ngkired el mo ua ngalek el ngii a soal melai a klubelel er a demal. Me a lengar er ngii a mekngit el uldesued el kirel a Biblia, e ngkired el chemoit me bo el sebechel a Dios el osisecheklid.​—Psalm 25:4.

Moluluuch er a uchei er a omonguiu. A Biblia a babilengel a Dios, me kede ousbech er a ngelsuil el mo ungil medengelii. A Dios a tibir el mo ‘mesterir a Chedaol Reng tirkel olengit er ngii.’ (Lukas 11:13) A chedaol reng a mo ngosukau el mo medengei a uldesuel a Dios. E a cherengel a taem, e ngmo ngosukau el omtab aike el “dmolech ra Dios.”​—1 Korinth 2:10, BT.

Bo mungil medengei a tekoi el monguiu. Lak di monguiu e lemerekong e bai molebedebek a tekoi el monguiu. Di lekau el oker el kmo: ‘Ngika el chad el kunguiu el kirel, ngua ngera blekerdelel? Ngmekerang a kultaut er tia el tekoi?’

Mruul a turrekong er kau. A bo el sebechem el ngmai a klungiolem er a omengiuem, e mosuub a tekoi el ngar er ngii a lerellii er a klengar er kau. Ngsebechem el meruul a turrekong er kau el ua: ‘Ngsoak el lmuut el mo medengei a betok el kirel a Dios.’ ‘Ngsoak el lmuut el mo ungil a blekerdelek, e mo ungil bechiil el sechal me a lechub e ngbechiil el redil.’ E molilt a bliongel er a Biblia el sebechel ngosukau el mo oltaut aika el turrekong.a

Aika el eim el tekoi a mo ngosukau el omuchel el menguiu er a Biblia. Engdi ngmekerang e lmuut el mo dmeu a rengum er a omengiuem? A ongingil el suobel a mo ngosukau.

Ngchetim? Ngsoam? Ngera uldesuem er a omengiuem er a Biblia? Tia di mo ultuil er a rolel a omengiuem. Ka me bo domes a rolel e ngsebechem el lmuut el mo dmeu a rengum er a omengiuem.

Mngiltii a Biblia el melemalt a oidel e ousbech a omelekoi er chelecha el taem. A lsekum e ke menguiu er a babier el diak modengei a tekoi er ngii, e ngdiak el deu a rengum el menguiu er ngii. Me a leuaisei, e mosiik er a Biblia el ousbech a omelekoi el beot er kid a mo medengei el sebechel el melisiich a rengud. Engdi ngdirrek el kirel el melemalt a oidel.a

Mousbech a klekedall er chelecha el taem. Chelecha el sils, e a Biblia a dirrek el sebeched el menguiu er ngii el ngar er a Internet me a lechub e kede download er ngii el mo er a computer, e ng tablet, me a lechub e ng cell phone er kid. Ngar er ngii a bebil er a Biblia el ngar er ngii a dongu er ngii el sebechem el ousbech el omes a oidel a kuk bebil er a Biblia. Ngdirrek el sebechem el orrenges a omengiuel a Biblia el ngar er a bebil er a omelekoi. A rebetok el chad a sorir el orrenges a omengiuel a Biblia sel lengar er a olidiuul er a buai, te mesilek, me a lechub e te meruul a kuk bebil er a tekoi. Ngera ungil rolel e ngsebechem el menguiu er a Biblia?

Mousbech a dongu el kirel a omesubel a Biblia. A dongu el kirel a omesubel a Biblia a sebechel el ngosukau el ngmai a klungiolem er a omengiuem. Ngar er ngii a map er aike el beluu el ngar er a Biblia el ngosukau el metik a basio el monguiu el kirel me bo el sebechem el omtab a omonguiu. Ngdirrek el ngar er ngii a suobel el uai aike el ngar tia el babier me a lechub e ngar er a jw.org el website el sebechel el ngosukau el mo medengei a lmuut el betok el kirel a Biblia.

Mngedechii a rolel omonguiu. A lemeringel er kau el menguiu er a Biblia el rokir, e ngsebechem el mekurulii a klemeriarreng er kau sel monguiu a tekoi el kmal soam. A lsoam el mo medengelterir tirke el merael a chisir el chad el ngar er a Biblia, e ngsebechem el menguiu el kirel a klengar er tir. Ngar sel baks el “Monguiu a Chisir a Rechad el Ngar er a Biblia” e ngolecholt a rolel e ngsebechem el meruul er tiang. Me a lechub e ngsebechem el menguiu a ileakl el tekoi el ngar er a Biblia me a lechub e ke menguiu el ngar er a blechebechel a tekoi el dilubech. Ngsoam el melasem a ta er aika el rolel?

A Biblia a kmal ileakl el babier e le ulekrael er a chelsel a mla er Ngike el Ulemeob. (2 Timothy 3:16) Ngkmal klou a lerellii er a klengar er kid e le ngmelekoi el kmo: “A tekingel a Dios a di ngar e mesisiich.” (Hebru 4:12) Ngar er ngii a klisichel el remuul a klengar er kid el mo ungil el oeak a eru el rolel. Ngmeskid a ulekrael el kirel a klengar er kid er a bek el sils e olengeseu er kid el mo medengelii a Dios me a telbilel.​—1 Timothy 4:8; Jakobus 4:8.

Rullii a klengar er kid el mo ungil er chelechang. A Biblia a sebechel el ngosukid er a tekoi el dechelebangel. Ngmeskid a ulekrael el kirel aike el beldukl er iou.

• Deleuill er kid me a rebebil.​—Efesus 4:31, 32; 5:22, 25, 28, 33.

• Tekoi el ngar er a rengud me a klisichel a bedenged.​—Psalm 37:8; Osisechakl 17:22.

• Tekoi er a kldung.​—1 Korinth 6:9, 10.

• Tekoi er a oketmeklel aike el dousbech.​—Osisechakl 10:4; 28:19; Efesus 4:28.a

A reteru el obekel el ngar er a Asia a kmal oba omereng el saul el kirel a ulekrael er a Biblia. Ngdi ua rebetok el dirk mlo bechiil el chad, ngmle meringel er tir el dmak e le ngkakerous a blekerdelir e dimlak el beot er tir el mimokl el chadecheduch. Engdi te mlo omuchel el oltaut aike el lulenguiu er a Biblia. Ngera mlo rsel? A Vicent a kmo: “Aike el kulenguiu a ngilsukak el mo oba bltikerreng el mesmechokl a mondai er a chebechiielam. Kemam el kiei el oltirakl er a Biblia a uchul me ngungil a klengar er kemam.” A bechil er a Annalou a kmo: “A omengiuam er a Biblia a mla ngosukemam. Chelechang e ngdmeu a renguk er a chebechiielam me aike el turrekong er kemam.”

Olengeseu er kid el mo medengelii a Dios. A Vicent a dirrek el melekoi el kmo: “Sel kunguiu er a Biblia, e ak kumelechesiu er a deleuill er ngak me a Jehovah el kmal mla mo mesisiich.” Tia el tekingel a Vicent a ochotii a ta er a klou a ultutelel el tekoi el kmo, a Biblia a sebechel el ngosukau el mo medengelii a Dios. Sel moruul el uaisei, e ke mo ngmai a klungiolem er a ulekrael er Ngii e dirrek el mo omes er Ngii el ua lesechelim. E seikid e ke mo medengei a lolekoi el kirel a ungil klengar er a ngar medad el taem, el taem el bo doldeu er a rengud er a “meral klengar” el diak a ulebengelel. (1 Timothy 6:19) Tia diak bo betik er ngii er a ngii di el babier.

A lsekum e ke mla muchel el menguiu er a Biblia, e molemolem el meruul er ngii, e le ngsebechel el mo ungil a klengar er kau er chelechang e mo medengelii a Dios. Engdi sel monguiu er a Biblia, e nglocha mo betok a kerim. Sel bo leuaisei, e molatk er a ungil kerebil ngike el ngarbab el mesiou er a Ethiopia el kiliei er a 2,000 el rak er a mla me mong. Ngkmal mle betok a keril er a Biblia. Me sera loker er ngii el kmo ngmedengei aike el lulenguiu, e ngdilu el kmo: “Ng mekera e sebechek el mo medengelii a lak a chad el smodii er ngak?”b Me ngkilengei er a ngelsuil a Filip el mle meduch el sensei er a Biblia e ta er a disaiplo er a Jesus. (Rellir 8:30, 31, 34) A lsoam el mo medengei a lmuut el betok el kirel a Biblia, e aki olengit er kau el mo luchesii a ongtim er a jw.org me a lechub e ke meluches el mo er a address el ngar er tia el babier. Ngdirrek el sebechem el omekedong er a Resioning er a Jehovah me a lechub e ke mo er a Blil a Ongdibel el kmeed er kau. Kau ngsebechem el menguiu er a Biblia me lomekrael er kau el mo er a ungil klengar?