A Rokui el “Kristiano” Te Kristiano?

NGTELANG a ildisir a Rekristiano? A doltirakl er a Atlas of Global Christianity, e sera 2010 e te mla er ngii a bekord el 2.3 el biliol el Kristiano el meliuekl er a beluulechad el rokir. Engdi tia el babier a dirrek el melekoi el kmo tirka el Kristiano a chedal a betok er a 41,000 el klechelid, el derta er ngii a ngar er ngii a kuk di osisecheklir me a llecherir. Ngii el kmal betok a klechelid er a “Kristiano” a uchul me a rebebil a mo rrau a rengrir. Me te locha mo melatk el kmo, ‘A rokui el chad el melekoi el kmo te Kristiano te mera el Kristiano?’

Ka me domes er tia el tekoi el ngar er a kuk ta er a rolel. A chad el mesarech a beluu a blechoel el kirel el ouchais el kmo ngchad er ker el mo er a chad er a immigration. Ngdirrek el kirel el olecholt el kmo ngtechang el oeak a lochotii a passport er ngii. Me nguaisei, a mera el Kristiano a kirel el meruul a betok er a di lolekoi el kmo ngoumerang er a Kristus. Ngkirel el ngar er ngii a lmuut el ta er a olengchelel. Tia ngngerang?

A tekoi el “Kristiano” a ble lekot el ousbech er ngii er a uriul er a rak er a 44. A Lukas a milluches el kmo: “Mar Ubengkel a Kristus el mlungakl el Kristiano a ulemuchel ra Antiok.” (Rellir 11:26) Momtab el kmo tirka el Kristiano a mle disaiplo er a Kristus. Ngera rullii a chad el mo disaiplo er a Jesus Kristus? A babier el The New International Dictionary of New Testament Theology a mesaod el kmo: “A doltirakl er a Jesus el ua disaiplo er ngii e ngbelkul a kmo a [chad] a tongetengii a klengar er ngii . . . el mo lmuut er a kodellel.” Me seikid, e a mera el Kristiano a ngike el oltirakl a osisecheklel a Jesus me a ulekrael er ngii el oba rengul el rokir.

Ngsebeched el metik er a choua itirkaikid el chad er a delongelir tirke el leko te Kristiano er chelecha el taem? A Jesus ngdilu el kmo ngngerang a olengchelir a remera el oltirakl er ngii? Aki olengit er kau el mo mesa el kmo ngmekerang a Biblia a longer aika el ker. Ngar er aika el ongingil el suobel, e kede mo mesaod a eua el tekoi el lulsaod a Jesus el mo ngosukid el dongcheterir a remera el oltirakl er ngii. Kede mo mesa el kmo ngmilekerang a Rekristiano er a kot el dart el rak a lolecholt el kmo te uleltirakl a tekingel a Jesus. Ngdirrek el sebeched el mo mesa el kmo te rua techang er a delongelir tirka el leko te Kristiano er chelechang a meruul er a osisiu el tekoi.

“Diblechoel ngara Tikingek”

“A kmo kom diblechoel ngara tikingek, e ko meral Obengkek, me ko mo medengei a klemerang, ma klemerang a meskemiu a ilmokl.”​—JOHANES 8:31, 32.

A Belkul Tia el Tekoi: A “tekingel” a Jesus a melekoi el kirel a osisecheklel el mla er a bab el mei. A Jesus a dilu el kmo: “Ngngikel ulderchak el Chedam, ingii a milskak chodruchel el bo kulekoi e mengedecheduch.” (Johanes 12:49) Ngar er a nglunguchel el mo er a Demal el ngar er a eanged, el Jehovah el Dios, e a Jesus a dilu el kmo: “A tikingem a klemerang.” Ngmle blechoel el ousbech a Tekingel a Dios el melisiich a osisecheklel. (Johanes 17:17; Matteus 4:4, 7, 10) Me a remera el Kristiano a ‘diblechoel ngara tikingel’ el belkul a kmo te kongei er a Tekingel a Dios, el Biblia, el “klemerang” e uchetemel a klaumerang er tir me aike el tekoi el loruul.

A Rolel a Rekristiano er a Irechar a Loltirakl er Tia el Tekoi: A apostol el Paulus a mle uai a Jesus el uleba omengull el kirel a Tekingel a Dios. Ngmilluches el kmo: “Ele chedaol Llechukl el rokui a melluches luleak a [oureor el klisichel a] Dios, me ngngarngii a blkul er chosisechakl.” (2 Timoteus 3:16) A resechal el miltutk el mo olisechakl er a rekldemir el Kristiano a mle kirir el “urrekodel er a ulterekokl e klemerang el Tekingel a Dios.” (Titus 1:7, 9, The Amplified Bible) A Rekristiano er a irechar a mluchelechel el mo oltngakl a “bechachau lomengeblad el llomeserreng el mengetiit ra belulechad, e tia diak loltirakl ra Kristus.”​—Kolose 2:8.

Te Rua Techang a Oltirakl er Tia el Tekoi er Chelechang?: A doltirakl er a Dogmatic Constitution on Divine Revelation er a Vatican, el lekilengei er ngii er a 1965 e uluusbech er ngii er a Catechism of the Catholic Church e ngmelekoi el kmo: “A tekoi el lolisechakl a Ikelesia er a [Katolik] a diak di lultuil er a Chedaol el Bades. Sei a uchul me a Ikelesia a kongei e dirrek el mengull a siukang er a klechelid me a Chedaol el Bades.” A omesaod el ngar er a Maclean’s el makesin a millekoi a tekingel a ta el minister er a klechelid el ngar er a Toronto, Canada el uleker el kmo: “Ngera uchul me kede ousbech a tekingel a ‘chad el ulemtok a beluu’ er a eru el telael el rak er a mla me mong el mo omekrael er kid? Kid me ngngar er ngii a kmal ungil el uldesued, el blechoel el mo diak a ultutelel e le kede ousbech a tekingel a Jesus me a Bades el mesaod.”

A New Catholic Encyclopedia a melekoi el kirir a Resioning er a Jehovah el kmo: “Te omes er a Biblia el di ta el uchetemel a klaumerang er tir me a blekerdelir.” A ta el chad er a Canada a tirrebengii a ta er a Sioning er a Jehovah er a louchais el kmo ngtechang. Ngtiletkii a Biblia er ngii e dilu el kmo, “Ak medengei el kmo ke techang el lokiu tia el Biblia el mobang.”

“Diak Le Klalo ra Belulechad”

“A belulechad chouketui er tir, ele te diak le klalo ra belulechad.”​—JOHANES 17:14.

A Belkul Tia el Tekoi: A Jesus a dimlak el chedal tia el beluulechad, me ngdimlak loba bitang me a ka lebitang er a tekoi er a beluu me a mondai er a balatiks er sel taem. Ngmilsaod el kmo: “Le kmo rengedek a ngar tial belulechad, e ar chederdellek chokoad, me ngdiak kbora chimorir ar Chijudea; ngdi rengedek a diak le ngar tial belulechad.” (Johanes 18:36) Ngdirrek el milengelechel er a rulebengkel el mo oltngakl a blekeradel, cheldecheduch me a omeruul el omtok a Tekingel a Dios.​—Matteus 20:25-​27.

A Rolel a Rekristiano er a Irechar a Loltirakl er Tia el Tekoi: A Jonathan Dymond el meluches a tekoi er a klechelid, a millekoi el kirir a Rekristiano er a irechar el kmo te “dimlak el kengei el mo er a [mekemad]; alta te mo chelebangel a meringel el blekeradel el ua otuub me a omengelebus me a lechub a kodall.” Te kilengei el mo chuarm er a bai lebo er a mekemad. A llecherir el kirel a tekoi er a kldung a dirrek el rirelleterir el mo ngodech er a rechad. A Rekristiano a mluchelechel el kmo: “Ngmechese rengrir, me toltuub er kemiu ele chelechang e ngdikea mobenterir el ngar chouaisel mengelengalek lomeruul.” (1 Petrus 4:4) A chad er a reksi el Will Durant a milluches el kirir a Rekristiano el kmo “ngmle klikiid e melemalt a klengar er tir a uchul me te ulemekringel er a uldesuir a remengull a bleob el chelid el tirke el ulsiik a tametereng.”

Te Rua Techang a Oltirakl er Tia el Tekoi er Chelechang? A New Catholic Encyclopedia a melekoi el kirir a Rekristiano el diak loba bitang me a ka lebitang el kmo: “Ngkmal mekngit el tekoi a lsekum a chad a diak el lebo er a mekemad.” A omesaod el ngar er a Reformierte Presse a melekoi el kmo a report el kirel a okodellir a rechad er a Rwanda er a 1994, el lultebedii a African Rights el cheldebechel el melisiich a llemeltir a rechad, a miltik el kmo a rokui el ikelesia a mlo teloi er tia el tekoi e “di mle ta el Resioning er a Jehovah a dimlak.”

A ta el sensei er a high school a milsaod el kirel a Nazi Holocaust el kmo “ngdimlak a chelechad me a lechub e ngcheldebechel er a redi chad el ulemtok aike el betok el cheleblad, ringel me a okodellir a rechad el mla er ngii.” A uriul er a longedecheduch er a rechad er a Holocaust Memorial Museum er a Merikel, e ngmilluches el kmo: “Ak mla metik er a nger er ngak.” Ngmlo medengei el kmo a Resioning er a Jehovah a mle mesisiich el dechor el kirel a klaumerang er tir, alta te mlo chelebangel a meringel el blekeradel.

E kuk ua ngerang a omellach er tir el kirel a tekoi er a kldung? A U.S. Catholic el makesin a melekoi el kmo: “A ruumesingd el ngeasek el chad er a Katolik er chelechang a diak el kengei er a osisecheklel a ikelesia, el kirir a rechad el dmak el kiei alta te diak el bechiil me a durs er a uchei er a chebechiil.” Tia el babier a milsaod a tekingel a ta el diakon er a ikelesia el dilu el kmo: “A klou el basent er a rengeasek el kisterir, el kuk betok er a 50 el basent, a dmak el kiei er a uchei er a bo el bechiil.” A The New Encyclopædia Britannica a mesaod el kirir a Resioning er a Jehovah el kmo te “melisiich a ngarbab el omellach el kirel a tekoi er a kldung er a bek el tekoi el loruul.”

“Bo Mkaubltikerreng”

“A beches el llach a kbeskemiu el kmo, bo mkaubltikerreng; el kaubltikerreng el ua ngak el betik a renguk er kemiu. Cho bo mkaubltikerreng, e te mo medengelkemiu a rokuil chad el kmo kom Obengkek.”​—JOHANES 13:34, 35.

A Belkul Tia el Tekoi: A Jesus a dilu er a rulebengkel el kmo te mo kaubltikerreng er a delongelir el uai ngii el mle betik a rengul er tir. Ngmilekerang a Jesus er a lolecholt a bltikerreng el mo er tir? Ngmle betik a rengul er a rokui el chad alta ngmle mekngit a blekerdelir a rebebil el mo er a rechad er a ngodech el beluu me a redil er sel taem. (Johanes 4:7-​10) A bltikerreng a millisiich er a Jesus el mo melenget a temel, klisichel me aike el soal el tekoi me bo el sebechel el ngosuterir a rebebil. (Markus 6:30-​34) A Kristus a dirrek el ulechotii a bltikerreng el ngar sel kot el ngarbab el rolel. Ngdilu el kmo: “Ngak a ungil klekar. A ungil klekar a mengkengkii a klengar er ngii el kirel a sib.”​—Johanes 10:11.

A Rolel a Rekristiano er a Irechar a Loltirakl er Tia el Tekoi: A rekot el Kristiano a mle kaukedong er a delongelir el rudam me a rudos. (Filemon 1, 2) A rechad er a rokui el renged a mle sebechir el mo er a ongdibel er a Rekristiano, e le te uluumerang el kmo “ngdiak a klekakerous rar Chijudea mar Chigriik; a di tal Rubak a Rubak ra rokuil chad.” (Rom 10:11, 12) A uriul er a Pentekost er a rak er a 33, e a redisaiplo el ngar er a Jerusalem a “ulterau a chetemir ma kloklir e rirous a udoud el kirel a ikel lousbech a derta er tir.” E ngera uchul? Me bo el sebechir tirke el dirk miltecholb el di kiei er a Jerusalem e lolemolem el oba “blakerreng el olab chosisecheklir ar apostel.” (Rellir 2:41-45) Ngera rirelleterir tirka el chad el mo meruul el uaisei? Ngkesai er a 200 el rak er a uriul er a kodellir a rechapostol, e a Tertullian a milsaod a tekingir a rechad el kirir a Rekristiano el kmo: “Te meral kaubltikerreng er a delongelir . . . e kltmokl el mo mad el kirel a tang me a tang.”

Te Rua Techang a Oltirakl er Tia el Tekoi er Chelechang? A babier el The History of the Decline and Fall of the Roman Empire (1837) a millekoi el kmo, ngar er aika el mereko el betok el rak, e tirke el leko te Kristiano a “mle kaudechelakl er a delongelir el kuk mle meringel er tirke el diak loumerang a loldechelakl er tir.” A omesuub el lurruul er ngii er a Merikel a miltik er ngii el kmo a rebetok el chad el melekoi el kmo te Kristiano a dirrek el mengetukel er a rechad. A rechad el mo er a Ikelesia el ngar er a chimo el beluu a blechoel el diak lodengelterir tirke el chedal a klechelid er tir er a ngodech el beluu a uchul me ngmeringel er tir el ngosuterir sel lebo lousbech a ngeso.

Sera 2004, er a uriul er a lemetemall a Florida er a eua el meklou el eolt er a di chelsel a eru el buil, e ngike el chad el oungerachel er a Emergency Operations Committee er sel beluu a ulemes el kmo aike el klekedellir te mle ungil el ousbech me a lechub e ngdiak. Ngmillekoi el kmo ngdimlak a ta el cheldebechel el mle ungil el kltmokl el uai a Resioning er a Jehovah, me ngkilengei el mo omesterir a ngii di el klekedall el lousbech. Sera 1997, e tirke el Sioning er a Jehovah el mlo olengeseu a ullab a kar, kall, me a bail el mo omesterir a rudam me a rebebil el uluusbech a ngeso el ngar er a Democratic Republic of Congo. E a rekldemir el Kristiano el ngar er a Europe a kuk millenget a klekedall el mle ta el miliol a cheral.

“Ma Kmla Ochotii a Ngklem”

“Ak mla mo ochotii a ngklem er tirikel chad el mngiliiteterir ra belulechad el meskak; . . . Ma kmla ochotii a ngklem er tir, e lmuut lolecholt er ngii.”​—JOHANES 17:6, 26.

A Belkul Tia el Tekoi: A Jesus a ulecholt er a ngklel a Dios er a lousbech er ngii er a omesiungel. Me sera leblechoel el menguiu a Bades, e nguluusbech er a ngklel a Dios. (Lukas 4:16-​21) Ngulsisechakl er a rulebengkel el mo meluluuch el kmo: “Chedam, le mechedaol a ngklem.”​—Lukas 11:2.

A Rolel a Rekristiano er a Irechar a Loltirakl er Tia Tekoi: A apostol el Petrus a uluuchais er tirke el mechuodel er a Jerusalem el kmo a Dios a ultebedeterir a rechad er aike el renged “el kirel a ngklel.” (Rellir 15:14) A rechapostol me a rekuk bebil a ulemerk el kmo “tirikel rokui lomekedong ra ngklel a Rubak [“Jehovah,” NW] a mosobel.” (Rellir 2:21; Rom 10:13) Te dirrek el uluusbech er a chedaol el ngakl el ngar er a babilengir. A The Tosefta, el cheldellel a llecherir a Rechijudea el mlo merek er a bekord el 300 el rak er a uriul er a Kristus, a melekoi el kirel a taem el tirke el ulemtok a milleseb a babilengir a Rekristiano el kmo: “Aike el babilengir a re Evangelist me a re minim [tirke el Chijudea el Kristiano] a di lesileseb el rokui. Te kilengei me ngmeseseb, . . . aike el babier el mla er ngii a ngklel a Dios er a chelsel.”

Te Rua Techang a Oltirakl er Tia el Tekoi er Chelechang? A Revised Standard Version er a Biblia, el lekilengei er ngii a National Council of the Churches of Christ el ngar er a Merikel a melekoi el ngar er a uchelel el kmo: “A usbechel a ngii di el ngakl el kirel a di ta el mera el Dios, el ua lengar er ngii a lmuut el bebil er a Dios me ngkirel el medangch, a milterob er a klechelid er a Rechijudea er a uchei er a temir a Rekristiano e kmal diak el ungil el kirel a klaumerang er a ikelesia er a Rekristiano el meliuekl er a beluulechad.” Me a leuaisei, e ngmiltechir a chedaol el ngakl el oba dui el “RUBAK.” A Vatican a dirk ultebedii a ulekrael el mo er a rebisob el kmo: “A ngklel a Dios el ngar er a tetragrammaton el YHWHa a diak bo lusbechall me a lechub e ngmedung el ngar er aike el chelitakl me a nglunguuch.”

Te rua techang er chelechang a ousbech er a ngklel a Dios e omerk er ngii? A Sergey er a lengeasek el ngar er a Kyrgyzstan, e ngulemes er a video el ulechotii a ngklel a Dios el Jehovah. Ngmle kmeed el teruich el rak el diak lerengesii tia el chedaol el ngakl. E a uriul er a lolukl el mo er a Merikel, e a reteru el Sioning er a Jehovah a mlo oldingel er ngii er a blil e ulechotii a ngklel a Dios el ngar er a Biblia. Ngmera el mlo dmeu a rengul el mo medengei el kmo ngngar er ngii a cheldellir a rechad el uluusbech er a ngakl el Jehovah. A mengasireng el tekoi a kmo, ngar er a Webster’s Third New International Dictionary e ngochotii a belkul a “Jehovah God” el kmo “ngmesisiich el Dios el lodengelii a Resioning er a Jehovah e di ngii el tang a longull er ngii.”

[Footnote]

“Tial Evangkelio ra Rengedel a Dios a Mo Oberk”

“Me tial evangkelio ra rengedel a Dios a mo oberk ra belulechad el rokir, el kirel locholt el bedul a bek el renged; e sola e ngmochu ullebongel.”​—MATTEUS 24:14.

A Belkul Tia el Tekoi: A Lukas el milluches a Evangkelio a dilu el kmo a Jesus a “merrael el meliuekl a mats ma mekekerel beluu, el olisechakl e omerk a ungil klumech ra rengedel a Dios.” (Lukas 8:1) A Jesus a dilu el kmo: “Ngkirek el mo omerk ra ungil klumech ra rengedel a Dios . . . itiai a uchul ma kmlodurch.” (Lukas 4:43) Nguldureklterir a redisaiplo er ngii el mo omerk er a ungil el chais er a bek el basio e a uriul e ngdilu er tir el kmo: “Ko mo ochotek . . . el mo lmuut ra bek lullebongel ra belulechad.”​—Rellir 1:8; Lukas 10:1.

A Rolel a Rekristiano er a Irechar a Loltirakl er Tia el Tekoi: A redisaiplo er a Jesus a mle mereched el meruul aike el lullekoi er tir el mo meruul. “Me ng mle bek el sils el lolemolem osisecheklir er a Ebangkelio el kirel a Jesus . . . el ullisechakl er a Templo ma obliil.” (Rellir 5:42) A berkel a klumech a dimlak di loruul er ngii a kekerei el cheldellir a rechad e lemerekong. A chad er a reksi el Neander a milsang el kmo a “Celsus el ngike el mle kot el meluches el omtok er a Klekristiano, a millenguul er a ruureor a bsechel a sib, me a remeruul a oeacher, me a remeruul a budel a charm, me a rediak a skulir me a rediak a belkrir el chad er a beluulechad, el tir a mle blak a rengrir el omerk er a evangkelio.” Ngar er a babilengel el The Early Centuries of the Church, e a Jean Bernardi a milluches el kmo: “A [Rekristiano] a mle kirir el mo tuobed e mengedecheduch er a rokui el chad el ngar er a rokui el basio. Ngar er a highway me a mats me a basio er a buai me a blirir a rechad. A lsorir a rechad me a lechetirir. . . . El mo er a bek el ulebengelel tia el beluulechad.”

Te Rua Techang a Oltirakl er Tia el Tekoi er Chelechang? A David Watson el prist er a Anglican a milluches el kmo: “A ikelesia a diak el lomes er a berkel a klumech me a osisechakl el meklou a ultutelel a uchul me ngdiak a kmal klemeriarreng er a rechad el mo mesiou er a Dios.” Ngar er a babilengel el Why Are the Catholics Leaving? e a José Luis Pérez Guadalupe a milluches el kirel a urerir a rechad er a Brodestant me a rechad er a Sebadong me a rekuk bebil, e miltik el kmo “te diak loldingel a obliil.” E milluches el kirir a Resioning er a Jehovah el kmo: “Ngar er ngii a ulterekokl el rolel a loldingel a obliil.”

A ungil e klemerang el omerriter el lurruul er ngii a Jonathan Turley a sebeched el metik er ngii er a Cato Supreme Court Review, 2001-2002 el melekoi el kmo: “Ke di dulii a ngakl el Sioning er a Jehovah, e a ruumesingd el chad a mo omdasu er a rumerk er a klumech el me oldingel er a blid er aike el metacherbesul el taem. A Resioning er a Jehovah a diak di loldingel a obliil me bo lemedechel a klaumerang er tir, e te bai omes er ngii el kmal klou a ultutelel el kirel a klaumerang.”

[Baks el ngar er a 9 el llel]

Ngsebechem el Mesang a Olangch?

Ngoeak aika el bla dosaod el mlengai er a Bades, e a omomdasu, e te rua techa er chelechang a oba olengchelir a remera el Kristiano? Alta ngkmal betok a cheldebechel me a klechelid el omekedong er tir el kmo te Kristiano, engdi ngkired el mo melatk a tekingel a Jesus el mo er a rulebengkel el kmo: “Ngdiak el tirikel rokui el dmu er ngak el kmo ‘Rubak, Rubak,’ a mo soiseb ra rengedel a eanged, ngdi tirikel meruul a soal a Demak el ngara eanged a mo soiseb.” (Matteus 7:21) Sel bo dodengelterir tirke el meruul a soal a Chedam, el tir a oba olengchelir a remera el Kristiano, e dobengterir e tiang a mo uchul a diak a ulebengelel el klengeltengat el ngar cheungel a Rengedel a Dios. Aki olengit er kau me moker er tirke el Sioning er a Jehovah el milskau tia el babier, el kirel a lmuut el bebil er a omesodel a Rengedel a Dios me aike el klengeltengat el mei el okiu ngii.​—Lukas 4:43.