A PROFET el Daniel a kiliei er a betok er a 500 el rak er a uchei er a cherellel a Jesus. Me nguaisei, engdi a Jehovah a uluuchais er a Daniel a tekoi el mo ngosukid el mo medengelii sel taem el Jesus a mo metutk el mo Mesias me a lechub e ng Kristus. A Jehovah a dilu er a Daniel el kmo: “Mutebengii tiang e bo modengelii. Sel taem el le tobed a tekoi el bo lluut el meteketek a Jerusalem el mor sel le mei ngiil ngellitel er a Dios el merreder e ng mo 49 el rak. A Jerusalem a lmuut el mo meteketek el mor ngii a rael ma mesisiich el cheuatel, el mo dechor el 434 el rak.”​—Daniel 9:25.

Me a bo dodengelii a demiel a Mesias el ngii a ngellitel er a Dios, e a kot e ngkired el mo medengei el kmo tia el ulaoch ngulemuchel er oingerang. A ulaoch a kmo ngomuchel er “sel taem el le tobed a tekoi el bo lluut el meteketek a Jerusalem.” Tia el “tekoi” ngtilobed er oingerang? A doltirakl a tekingel a Nehemia e a tekoi el mo omekedechor er a cheotelel a Jerusalem a tilobed er a “chelsel ongelluich er a rak er a le king a Artakserses.” (Nehemia 2:1, 5-8) A rechad er a reksi a melekoi el kmo a kot el rak er a omengederederel a Artakserses a mle 474 B.C.E.a Me a leuaisei, e a ongelluich el rak er a omengederederel a mle rak er a 455 B.C.E. Me a ulochel a Daniel el kirel a demiel a Mesias a ulemuchel er a rak er a 455 B.C.E.

A Daniel a uluuchais el kirel a klemengetel a taem e ngmei a Mesias el “ngellitel er a Dios el merredel.” A ulaoch a melekoi el kirel a “49 el rak” me a dirrek el “434 el rak,” el uldekial a 483 el rak.

Me chelechang e ngdi kired el omechur. Me a domuchel er a rak er a 455 B.C.E. e domechur el 483 el rak e ngngoikid el mo er a rak er a 29 C.E. Tia sel rak el lemiltecholb er ngii a Jesus e mlo Mesias!b (Lukas 3:1, 2, 21, 22) Tia ngdiak el sal mengasireng el otutel a ulaoch er a Biblia?

A JEHOVAH el Dios a ulemekrael er a reprofet er ngii el mo meluches el kirel a cherellel, me a omesiungel, me a okodellel ngika el telbiil el mo Olsobel er a klechad me bo el sebeched el dongchii a Mesias. Me aika el rokui el ulaoch er a Biblia a melutk er a Jesus Kristus. Ngkmal mle melemalt e komakai a omesodel. Me bo domes a bebil er a ulaoch el mildung el kirel a cherellel a Mesias me a klengar er ngii er a lengalek.

A profet el Isaia a ulemlaoch el kmo, a Mesias a mo ngar er a klengelakel er a King el David. (Isaia 9:7) A Jesus a mera el mle uldidellel a rsechel a David.​—Mateus 1:1, 6-17.

A Mika el ta er a profet er a Dios a ulemlaoch el kmo ngika el ngalek a mo mengedereder e mo mechell er a “Bethlehem el Efrata.” (Mika 5:2) Sera lemechell a Jesus, e ngmla er ngii a teblo el beluu er a Israel el uluungakl er a Bethlehem. A ta er ngii a mla er a bita er a Nasareth er a mo bedul a diluches, e sel tang a mla er a bita er a Jerusalem er a Juda. Sel Bethlehem el mle kmeed er a Jerusalem a mle okedongall el Efrata. Me a Jesus a milechell er isei el ua lolekoi a ulaoch!​—Mateus 2:1.

A lmuut el ta er a ulaoch er a Biblia a ouchais el kirel a Ngelekel a Dios el kmo ngmo mokedong el tuobed er a Ekipten. A Jesus er a letolechoi e te ngiluu el mo er a beluu er a Ekipten. E a uriul er a kodellel a Herodes e ngliluut el mo er a Bethlehem. Me a ulaoch a tilaut.​—Hosea 11:1; Mateus 2:15.

Ngar sel chart el dai er ngii a kmo, “Ulaoch el Kirel a Mesias,” e aike el bades el ngar cheungel a dai el “Ulaoch” a mesaod a komakai el tekoi el kirel a Mesias. Momes a klaisisiu er aikang me aike el bades el ngar cheungel a dai el kmo “Otutel.” A omoruul el uaisei e nglmuut el smisichii a klaumerang er kau er a klemerang el Tekingel a Dios.

Me sel morriter aika el bades, e lak mobes el kmo aika el ulaoch a milluches er a betok el dart el rak er a uchei er a cherellel a Jesus. A Jesus a dilu el kmo: “A bek el tekoi el llechukl el kirek el ngar a Llach er a Moses, ma babier er a re profet, ma Psalm a kirel el mo tmaut.” (Lukas 24:44) Me ngsebechem el mesang el okiu a Biblia er kau el kmo, ngtilaut a rokui el tekoi el mildung er a ulaoch el kirel!