Ngsebechel el Mo Melemalt a Omerelled er a Chelsel a Chebirukel el Beluulechad?

“Ngsomam el melemalt loureor el kirel a ngiidil tekoi.”​—HEBRU 13:18, Beches el Testament.

ME ALTA e a Diabelong me a klengit me a beluulechad el dekiei er ngii a sebechel el orrimel er kid, engdi ngsebeched el oltngakl a ongetikaik er ngii! Ngoeak a ngera el rolel? Ngoeak sel dolekeed er kid er a Dios e doltaut a omellach er a Tekingel el Biblia el mla obeketakl el kmo nguchul a klungiaol. Ka momtab aika el teblo el olechotel.

OMELLACH ER A BIBLIA: “Lak di moltirakl a blekerdelel a tekoi er tial beluulchad.”​—Rom 12:2.

Tekoi el dilubech: A Guilherme el meduch el chad er a siobai er a Brazil a kongei el kmo ngmeringel a dolecholt a melemalt el omeruul. Ngmelekoi el kmo: “A chad er a siobai a sebechel mo beot er ngii el lomulak, e le ngii el morimel el mo oltaut a turrekong er a kombalii me a lechub e ngsoal a bo lungil merael a siobai er ngii er a chelsel a beluulechad el klou a klaisichai er ngii. A rebetok el chad a omdasu el kmo ngdi ungilbesul a rolel a omengeluch er a chelsel a siobai. Me a lsekum e ke chad er a siobai el oungerachel a tekoi er a udoud, e ngmeringel er kau el meruul a llemalt.”

A Guilherme a mle blak a rengul el meruul a llemalt. Ngdilu el kmo: “Ngsebeched el melemolem el melemalt a omerelled alta kede ngar er a chelsel a blekeradel el di ungil er a rechad er a siobai a lolemall a bebil el llach. Ngkirel el mo mesisiich a rengum er aike el tekoi el moumerang. A Biblia a mla ngosukak el mes a klungiolel a lemelemalt a omerelled. A chad el melemalt a omerellel a klikiid a ukltkel, e chelellakl a rengul, e dmeu a rengul er a blekerdelel. Ngdirrek el sebechel el mo ungil el ocholt el mo er tirke el iliuekl er ngii.”

OMELLACH ER A BIBLIA: “Tirkel oureng el mo meteet a mechetikaik er ongarm, el obedikl er a betok el chelsengsang e mekngit el di sorir a re chad, el ngii a mo orrebet er tir el di tomelleterir el mo diak a medechel er tir. Ele ngibes er a udoud a uchelel a bek el bedengel a mekngit.”​—1 Timothy 6:9, 10.

Tekoi el dilubech: A André a ngar er ngii a kombalii er ngii el mengetiut a security system er a blai. A ta er a okiak er ngii a cheldebechel er a rechad er a soccer. A ta el taem er a uriul er a klekool, e ngmlo er a obis er tir e milsterir a invoice el kirel a ureor el leriruul. Engdi sera lebo er a obis er a udoud, e ngmocha merek a temel a ureor me a rechad er tia el obis a kmal mle mechesang el omechur a udoud el dirk lengilai er aike el obis er tir el domechar a ticket er ngii. Me ngike el merredel a di mle mereched el harau er tirke el luluusbech er tir, el uldimukl er a André.

A André a melekoi el kmo: “Ngar er a omerollek el mo remei, e ak mlo medengei el kmo ngike el merreder a milskak a kmal betok el udoud. Ak mle medengei el kmo nglocha diak lodengelii a chad el lebilsang a betok el udoud e mo harau aike el mlo dibus el udoud el ousbech a di ududel! Me alta tia el basio a mle meseked er a rulemes a klekool engdi ak liluut el mong el mo oluut a derengel aike el udoud el lebilskak. Me ngkmal mlo mechas a rengul e le ngdirkak a chad el mla oluut a udoud el mo er ngii.”

A André a dochelii el kmo: “Tia el melemalt el omeruul a uchul e ngika el merredel a mlo olecholt a omengull el mei er ngak. Me alta ngmla mo chuib a betok el rak, engdi ngdirk ngar er ngii a contract er ngak me tia el cheldebechel. Ngdmeu a renguk e le ngak el uleltirakl a omellach er a Biblia a uchul me ngmlo ungil a chisek.”

Nguchul a omelisiich sel dodengei el kmo ngoeak a ngelsuil a Dios e ngsebeched el oltngakl a chelebirukel el omeruul. Engdi a melemalt el omerellir a redersta el chad a diak el sebechel el okngemedii a chelebirukel el omeruul. E a chelebirukel el omeruul a kmal mesisiich el tekoi er chelecha el taem me ngdiak el sebechir a rediak el mecherrungel el chad el di tir el sumechokl. Me tiang belkul a kmo ngdi melemolem el ngar er ngii a chelebirukel el omeruul? A ulebongel el suobel a mo mesaod er a ungil nger er a Biblia el kirel tiang.