Dmak el Mengiil er a Ulebongel er Tia el Beluulechad

1, 2. A Dios ngmengerechir er a ua ngera el rolel a omengull er a remekekerei me a remeklou el chad?

KAU ke ngeasek el chad? A leuaisei, e bo modengei el kmo kau a klou a ultutelem el chedal a ongdibel er a Jehovah er a beluulechad el rokir. Ngar er a betok el beluu, e a klou el ildois er tirke el mo metecholb a rengeasek. Me ngkmal melisiich er kid sel desterir a rebetok el ngeasek el tibir el mo mesiou er a Jehovah!

² Kau el ngeasek, ngsoam el oldeu er a rengum el obengterir tirke el ua meklungem? Ke locha uaisei, e le ngsoad el obengterir a resechelid. Nguaisei, engdi a Jehovah a soal a dongull er ngii el obengterir a rokui el rudam er kid. Ngsoal a bo doba kltarreng, el diak lultuil er a rekid me a lechub a blekerdelel a klengar er kid. A apostol el Paulus a milluches el kmo, a Dios a “soal a rokui el chad a bo le sobel e bo lodengelii a klemerang.” (1 Ti. 2:3, 4) E a Ocholt 7:9 a mesaod er tirke el mengull er a Dios el kmo, “te chad er a bek el beluu, ma kebliil, ma bek el bedengir a re chad ma omelekoi.”

3, 4. (a) Ngua ngera uldesuir a rebetok el ngeasek er chelechang? (b) Ngerang dilung a Paulus el kirel a ongdibel el ngar er a Efesus 4:25?

³ Ngkmal klou a klekakerous er a delongelir a rengeasek el mesiou er a Jehovah me tirke el diak. A rebetok el diak losiou er a Jehovah a di melatk er a di tir me aike el sorir. Me a rebebil el chellimosk el chad a melekoi el kmo a rengeasek er chelechang a kuk mekngit a blekerdelir er tirke el ngeasek er a uchei. Me a rolel a longedecheduch me a rolel a loubail a diak lochotii a omengull el mo er a rechad, el ileakl a remeklou el chad.

⁴ A rebetok el chad a uaisei a blekerdelir, me ngdiak el beot er kid el kuk mo ngodech er tir e doldeu er a rengul a Jehovah. Sera taem er a rekot el Kristiano, e a Paulus a ulemeklatk er tir el kirel a osisiu el uldasu er a losaod el kirir “tirkel chad el diak loltaut a tekingel a Dios.” (Monguiu er a Efesus 2:1-3.) Me chelechang e ngkmal melisiich er kid sel desterir a rengeasek el ngar er a ongdibel el diak leuaisei. Ngkmal sorir el mo mesiou er a Jehovah el obengterir a rudam er tir. Te medengei el kmo a ongdibel a di ua bek el kakerous el klekedellel a bedengel a chad el dmak el oureor. Me a Paulus a milluches el mo er a rengellitel el Kristiano el kmo, “kede rokui el klekedellel a tal chelechad.” (Efe. 4:25) Me nglmuut el kmal kired el mo oba kltarreng kid me a rudam me a rudos er kid er chelecha el lolekedang a ulebongel er a beluulechad er a Satan. Me bo dosaod a bebil el cheldecheduch er a Biblia el ngosukid el mo mesa uchul e ngkired el mo oba kltarreng.

TE MILLEMOLEM EL DMAK EL ROKUI

5, 6. Ngera kede suubii er a Lot me a telungalek er ngii?

⁵ A rechedal a Jehovah er a ngar a mong a uluutekangel a meringel el blekeradel. Me a Jehovah a ulemekerreu er tir sel lolemolem el dmak e lekaukerreu. Me kid el rokui el meklou me a remekekerei a sebeched el ngmai a klubeled er aika el cheldecheduch er a Biblia. Me bo dosaod a tekoi el dilubech el mo er a Lot.

⁶ A Lot me a telungalek er ngii a mle chelebangel er a meringel el blekeradel. A Jehovah a mle kltmokl el mo melemall er a beluu er a Sodom el lekiliei er ngii. Me nguldercheterir a rechanghel el mo dmu er a Lot me lechiis el mo er a rois. Te dilu er ngii el kmo: “Morchedau! Mrurt!” (Gen. 19:12-22) A Lot me tirke el teru el ngelekel el redil a ullengesenges e chiliis. Engdi ngklengiterreng, e le rebebil el chedal a Lot a dimlak lolengesenges. Me sera lolekoi er tirke el mle kirir el mo becherir a rengelekel me lechiis, e te ulemdasu el kmo ngika el rubak a di “oungelakel.” Ngdimlak lorrenges er ngii me te mlad er a lemetemall a beluu. (Gen. 19:14) Me ngdi ta el Lot me a rengelekel a silobel e le tir el ullengesenges e millemolem el dmak.

7. Ngmilekerang a Jehovah e ngosuterir a rechad el dilak el tuobed er a Ekipten?

⁷ Ngsebeched el nguu a klubeled er a kerebai er a rechad er a Israel er sera letobed er a Ekipten. Ngdimlak lobii el mo betok el cheldebechel e di el tir el melilt er a rolir el mo soiseb er a Beluu er a Nglat. Te bai dilak el merael el ua ta el cheldebechel. Me sera lebingii a Bekerkard el Daob a Jehovah, e a Moses a dimlak di lengii el tang el mo imuul me a lechub e lulebengterir a redi kesai el chad. Ngbai ulebengterir a rokui el chad er a Israel el mo imuul e a Jehovah a ulemekerreu er tir. (Exo. 14:21, 22, 29, 30) Me a rebetok el dimlak el chad er a Israel a millilt el mo mesiou er a Jehovah e mlo obengterir el tuobed er a Ekipten. A rokui el chad a millemolem el dmak. (Exo. 12:38) Me ngklebelung el tekoi a lsekum a rebebil el locha ngeasek a di tir el melilt er a rael el bo lokiu ngii e le te omdasu el kmo ngungil. Me a ngii di el chad el millodech er a rolel a dimlak el sebechel el nguu a ulekerreu er a Jehovah.​—1 Ko. 10:1.

8. Ngmle ua ngerang a kltarreng er a rechedal a Dios er a taem er a Jehosafat?

⁸ Sera taem er a King el Jehosafat, e a klou e mesisiich el urrurt er a resoldau a mlo oumekemad er a rechedal a Dios. (2 Kr. 20:1, 2) Me te milekerang a rechad er a Israel er a lemerma tirka el cheraro? Te mle ultuil er a Jehovah e milluluuch el olengit a ulekrael er ngii. (Monguiu er a 2 Kronika 20:3, 4.) A derta el chad er a Israel a dimlak lolasem el di tir el osiik a rolel a loruul a tekoi, te bai mlo dmak el kldibel. A Biblia a kmo: “Isei e a rokui el sechal er a Juda a dilechor er medal a RUBAK, ma re becherir, ma re ngelekir el meklou ma re mekekerei a ulebengterir.” (2 Kr. 20:13) Tir el rokui a mlo ultuil er a Jehovah e ullengesenges a rokui el tekoi el mildung. Te millemolem el dmak me a Jehovah a ulemekerreu er tir er a recherrouir. (2 Kr. 20:20-27) Me tiang a ungil el kerebai el kirir a rechedal a Dios sel bo lechelebangel a ultok.

9. Ngera kede suubii er a rekot el Kristiano?

⁹ A rekot el Kristiano a dilak el mengull er a Jehovah el ngar er a budech me a kltarreng. El ua tiang, sera bo el Kristiano a rebetok el chad er a Judea me a Rechisentael e ngmle “blak a rengrir el mesuub osisecheklir a re apostol, e ngar ongdibel, e dmak el omengur, e dmak el meluluuch.” (Rel. 2:42) Me sel taem er a lemodechelakl e te millemolem el dmak, e tiaikid sel taem el kmal mle kirir el kaingeseu. (Rel. 4:23, 24) Me sel bo demodechelakl, e ngkmal kired el mo oba kltarreng e kaingeseu er a delongeled.

MOBA KLTARRENG ER A UCHEI ER A LEMEI A SILS ER A JEHOVAH

10. Ngoingerang e ngkmal kired el mo oba kltarreng?

¹⁰ Ngdi kmedung, e kede mo chelebangel er a kot el meringel el taem er a reksi er a klechad. A profet el Joel a mesaod er ngii el ua “milkolk e mekngit el sils, el mechucheb e chedelekelek.” (Joel 2:1, 2; Sef. 1:14) Ngar er seikid el taem, e a rechedal a Dios a kmal kirir el mo oba kltarreng. Molatk a tekingel a Jesus el kmo: “A beluu el obii e mo kautok a diak bo le meketeket el beluu.”​—Mt. 12:25.

11. A rechedal a Dios ngera te suubii er a Psalm 122:3, 4 el kirel a kltarreng? (Momes er a siasing er a uchelel a suobel.)

¹¹ Ngkirel el mo ua ngerang a kltarreng er a delongeled er seikid el taem? Ngsebeched el nguu a klubeled er a rolel a lemeteketek aike el blai er a Jerusalem er a irechar. Te milleketek el kmal mle kaiuekeed. Me a rechad a mle selebechakl e le tir el mle kaiuekeed me ngmle beot er tir el kaingeseu e kaukerreu er a delongelir. Me a blai el kmal mle kaiuekeed a locha ulemeklatk er ngika el milluches er a psalm el kirel a taem el kebliil er a Israel a mo mechudel el mo mengull er a Jehovah. (Monguiu er a Psalm 122:3, 4.) Me chelechang el mo lmuut er aike el meringel el sils el dirk merael el mei e ngkmal klou a ultutelel el kirir a rechedal a Jehovah el melemolem el dmak el ngar er a kltarreng.

12. Kede mekerang e mo suobel er sel taem el Kok a mo oldechelakl er a rechedal a Jehovah?

¹² Ngera uchul me a kltarreng er a delongeled a lmuut el mo klou a ultutelel er a ngar medad el taem? A 38 el bliongel er a Esekiel a omlaoch el kmo a “Kok . . . er a beluu er a Makok” a mo oldechelakl er a rechedal a Jehovah. Me seikid el taem e ngkmal diak el kired el mechei a ngii di lengerang me lerellid el mo kakeakl. Ngbai kmal kired el mo kmeed er a rudam er kid. Me nguaisei, engdi tiang a diak lebelkul a kmo kede mo suobel e le kid el chedal a ta el cheldebechel. Me kede rokui el kired el mo mui el ultuil er a Jehovah e olengesenges er ngii. Seikid e a Jehovah me a Jesus a mo osebelid er sel odechelakl e ngoikid el mo soiseb er a beches el beluulechad. (Joel 2:32; Mt. 28:20) Engdi ngkmal kired el melemolem el obengterir a rechedal a Dios. Omomdasu, a Jehovah ngmo olsobel er tirke el di tir el melilt er a rael el bo lokiu ngii?​—Mik. 2:12.

13. Ngera sebechir a rengeasek el suub er aika el cheldecheduch el bla desaod?

¹³ A lsekum ke ngeasek, ke kongei el kmo nguchul a llomeserreng sel molekeed er kau er a rudam er kau? Lak di mongoit a temem el obengterir a rua meklungem me a lechub e mongeroid er kau er a rechad. Ngdi kmedung e kede rokui el meklou me a remekekerei el mo kired el ultuil er a derta me a derta er kid. Molisiich er a deleuill er kau me a rudam me a rudos er kau e ledeu a rengum el obengterir el mesiou er a Jehovah. A kltarreng er kau el obengterir a rechedal a Jehovah a mo uchul a osebelem er a ngar medad el taem!

“KEDE ROKUI EL KLEKEDELLEL A TAL CHELECHAD”

14, 15. (a) Ngera uchul me a Jehovah a olisechakl er kid el mo oba kltarreng? (b) E ngera el uleklatk a lebeskid me ngmo sebeched el oba kltarreng?

¹⁴ A Jehovah a olengeseu er kid el mo “dmak” el mesiou er ngii kid me a rudam me a rudos er kid. (Fil. 1:27; Sef. 3:8) Ngmengetmokl er kid el kirel sel taem el bo loldak “a ikel rokui el mle duubech el ngar a eanged ma beluulchad, e a Kristus a mo bdelul.” (Monguiu er a Efesus 1:9, 10.) A moktek er a Jehovah a mo oldak a rokui el ngar er a eanged me a chutem el mo ta el telungalek el mengull er ngii. Me ngulterekokl el mo meruul er tiang. Me ngar er ngii a techelliu kemiu el ngeasek el mo kiei el mo cherechar el chedal tia el telungalek. Me kemiu, ngsomiu el mo chedal a cheldebechelel a Jehovah?

¹⁵ A Jehovah a olisechakl er kid el mo oba kltarreng er chelechang me bo el sebeched el dmak el kiei el ngar er a budech er a chelsel a beches el beluulechad. Ngklou a rengul el olisechakl er kid el mo “dmak el kaukerreu,” e “ungil el kaubltikerreng,” e ‘kaingeseu el melisiich a rengud,’ e ‘melemolem el kasisiich.’ (1 Ko. 12:25; Rom 12:10; 1 Th. 4:18; 5:11) A Jehovah a medengei el kmo ngdiak demecherrungel me a lebebil er a taem e ngmeringel er kid el mo ta rengud. Sei a uchul me ngmengelechel er kid el mo blechoel el “kausubes” er a delongeled.​—Efe. 4:32.

16, 17. (a) Ngera ta er a uchul me kede mo er a miting? (b) A rengeasek ngera te suubii er a kerebil a Jesus?

¹⁶ A Jehovah a dirrek el osisecheklid el mo ta rengud el okiu a miting. Me a Hebru 10:24, 25 a mesaod er a ta er a uchul me kede mo er aika el miting el kmo, ngosisecheklid el mo meduch el ‘kaingeseu el olecholt a bltikerreng e meruul a ungil.’ Me chelecha el lolekedang a sils er a Jehovah e aika el miting er kid a lmuut el mengal mo meklou a ultutelel.

¹⁷ A Jesus a ungil el kerebai el kired e le ngkmal mle soal el teloi er a rechedal a Jehovah. Sera bo le 12 a rekil, e ngulebengkel a demal me a delal el mo er a klou el ongdibel el ngar er a templo. E a uriul, e a demal me a delal a mlo diak lebetik er ngii. Me ngikang ngmlo milil el obengterir a rebebil el ngeasek? Ngdiak. A demal me a delal er a bo lebetik er ngii, e ngmle dengchokl er a delongelir a resensei el ngar er a templo el mesaod a Bades.​—Lk. 2:45-47.

18. Ngmekerang a nglunguuch e smisichii a kltarreng er a delongeled?

¹⁸ Ngdirrek el sebeched el melisiich er a kltarreng er a delongeled el okiu a bleketakl e komakai el nglunguched el kirir a rudam er kid. Me a nglunguched el kirir a rudam er kid a omeklatk er kid er a bltkil a rengud el mo er tir. Ngklou a ultutelel el kirel el mo betik a rengud er a rudam er kid, e melisiich er tir sel debo er a miting, e meluluuch el kirir. Me kemiu el ngeasek, kom mla melasem aika el tekoi me bo el sebechiu el olekeed er kemiu er tirke el ngar er a ongdibel er kemiu? A bo desobel sel lemei a ulebongel, e ngkmal kired el mo kmeed er a rudam er kid, el diak el beluulechad er a Satan.

DOCHOTII EL KMO “KEDE ROKUI EL KLEKEDELLEL A TAL CHELECHAD”

19-21. (a) Kede mo mekerang e le kid el “rokui el klekedellel a tal chelechad”? Mosaod. (b) Ngera ke suubii er a rolel a klaingeseu er a delongelir a rudam er kid er a taem er a chelebuul?

¹⁹ A betok el tekoi el mla duubech a ochotii el kmo kid a rechedal a Jehovah er chelechang a “kerous bedenged e ngdi kaukuak a delongeled.” (Rom 12:5) Me sel leduubech a chelebuul el mo uchul a ringel el mo er a rudam er kid, e kede melatk er tir e soad el mo ngosuterir. Sera December 2011 e a mesisiich el eolt a silbechii er a Mindanao, el beluu er a Huriping. Ngar er a chelsel a ta el kesus, e a kuk betok er a 40,000 el blai a mleeleb er a ralm, el uldimukl er a betok el blirir a rudam er kid. Me a branch office a uluuchais el kmo a uchei er a lemei a ngeso el okiu aike el relief committee, e a “rudam el mla er a bebil el basio a uleldurokl a betok el ngeso.”

²⁰ A rudam er kid el ngar er a beluu er a Siabal a kmal mlo metacherbesrir er sel taem el klou el desiu me a tsunami a silbechii er a ongos er sel beluu. Me a rebetok a urriid a rokui el kloklir. El ua tiang, a Yoshiko a miltemall a blil. Ngkiliei el bekord el 25 el mael a cherridel er a Blil a Ongdibel e dilu el kmo: “A uriul, e ngkmal mlo mechas a rengmam er a ki bo modengei el kmo sel sils er a uriul er a desiu, e a odam el oldingel a ongdibel me a kuk ta er a odam a mle osiik er kemam.” Me ngkmal klikmechur e dochelii el kmo: “Aki kmal mereng a saul el ngilai a betok el ngeso el melisiich a klaumerang er kemam el okiu a ongdibel. Me a lmuut el tang, aki ngilai a coat, oeacher, tet, me a bail er a cheliuaiu.” Me a ta er a chedal tia el relief committee a kmo: “A rudam el mla er a bek el merekelel a Siabal a mlo dmak e kaingeseu er a delongelir. Me a rudam a dirrek el mla er a beluu er a Merikel el me olengeseu. Me sera loker el tir el kmo ngera me te mla er a kmal cheroid el beluu el mei, e te dilu el kmo, ‘Aki oba kltarreng kemam me a rudam er kemam er a beluu er a Siabal e le tir el ousbech a ngeso.’” Me kau, ngkmal dmeu a rengum el chedal tia el cheldebechel el rechedal a mera el kaubltikerreng? Ka di molatk er sel deuil a rengul a Jehovah er a lesa tia el kltarreng.

²¹ Me a lsekum kede mesuub el mo kaukerreu er a delongeled er chelechang, e kede mo kltmokl el kirel a meringel el blekeradel el bo dechelebangel er a uriul. Me ngmo lmuut er a taem el ledubech a tekoi el uchul e ngmo diak el sebeched el mengedecheduch er a rudam er kid er a ngodech el beluu, me kid a di mo melemolem el oba kltarreng kid me a rudam er kid er a beluad. A Fumiko, el odos er a Siabal el silobel er a typhoon a kmo: “A ulebongel a kmal kmedang, me ngkired el melemolem el olengeseu er a rekldemed er a klaumerang e domes el bedul sel taem el mo diak a chelebuul.”

22. Ngmekerang a kltarreng e ngosukid er a ngar medad el taem?

²² Mada me dongetmokl er kid er chelechang el kirel a sils er a Jehovah el okiu a doruul aike el rokui el sebeched el mo oba kltarreng kid me a rudam er kid. Me sel lemokngemed tia el beluulechad er a Satan, e a Jehovah a mo olsobel er a rechedal el di ua lurruul er a irechar. (Isa. 52:9, 10) Me a omngeasek me a lechub e ke chudelang, e ngkmal kirem el melemolem el obengterir a rechedal a Dios me bo msobel. Ngar er sel ongingil el suobel, e kede mo mesaod er a uchul e ngdirrek el kired el mo oba omereng el saul el kirel aike el bla lebeskid a Dios.