18 el Suobel
Bo Msechelil A Dios El Mo Cherechar!
Ngmeringel el ureor a doruul er a remo sechelid; ngmeringel el ureor el dolemolem er a klausechelei. A omelasem er kau el mo sechelil a Dios e lomelemii tia el klausechelei e ke mo mukngeltengat. A Jesus a millekoi er tirke el uluumerang er ngii el kmo: “A klemerang a meskemiu a ilmokl.” (Johanes 8:32) Tiang ngera belkul?
Ngsebechem el oldeu a rengum er a ilmokl er a chelecha el taem. Ngsebechem el mo mimokl er a klsuul el osisechakl ma blulak el lulemerk er ngii a Satan. Ngsebechem el mo mimokl er a klengiterreng el omekeek er a klengar er a betok el milliol el chad el diak lodengelii a Jehovah. (Rom 8:22) A resechelil a Dios a dirrek el mimokl er a “dakd ra kodall.”—Hebru 2:14, 15.
Ngsebechem el mo oldeu a rengum er a ilmokl el ngar er a beches el beluulechad er a Dios. Ngkol ua ngera el mengasireng el ilmokl el sebechem el mo oldeu a rengum er ngii er a ngar er a medam el klebesei! Ngar er sel Paradis el chutem, e ngmo er ngii a ilmokl er a mekemad, ma secher, ma delengerenger. Ma ilmokl er a chelebuul ma klengerenger. Ma ilmokl er a cheluodel ma kodall. Ma ilmokl er a dakt, ma orrimel, ma diak lemelemalt el omeruul. A Biblia a melekoi el kirel a Dios el kmo: “Ngmesterir a ungil a ildisel; ngmesterir a rokui a ikel lousbech.”—Psalm 145:16.
A resechelil a Dios a mo kiei el mo cherechar. A diak a ullebengelel el klengar a mekreos el sengk el Dios a mo mesterir tirke el osiik er a klausechelei er ngii. (Rom 6:23) Ka di molatk er a belkul a diak a ullebengelel el klengar el kirem!
Ngmo er ngii a temem el mo meruul a betok el tekoi. Altang soam el mo mesuub el mo outumetum. Ma lechub e ngsoam el mesuub el mo ousunga ma lechub e ke mo daiksang. Altang soam el mo mesuub el kirel a charm ma lechub e ngdellomel. Ma lechub e nglocha soam el mo oldingel e omes a ngodech el beluu ma rechad. A lebo er ngii a diak a ullebengelel el klengar e ngmo sebechem el meruul aika el rokui el tekoi!
Ngmo er ngii a temem el mo sechelirir er a rebetok. A bo dekiei el mo cherechar e ngmo uchul e ngsebeched el mo medengelterir a lmuut el betok el sechelil a Dios. Ke mo medengei aike el duch er tir ma ike el ungil el blekerdelir, e tir a dirrek el mo sechelim. Ke mo betik a rengum er tir, e tir a mo betik a rengrir er kau. (1 Korinth 13:8) A diak a ullebengelel el klengar a mo meskau a taem el mo sechelirir a rokui el chad er tia el chutem! Ma ngar er a uchei er a rokiu el tekoi, e a klausechelei er kau ma Jehovah a merael el mo mesisiich el mo chuib aike el betok el dart el rak. Me bo lsebechem el mo sechelil a Dios el mo cherechar!