Kau Komekmeoud er a Omerellel Tia el Card?
Ngngera el card? Sel DPA (durable power of attorney) el card el kltmokl el kirir a remla metecholb el Sioning. Ng “diak modengelii a tikingel a klukuk” a uchul me ngkmal klou a ultutelel a omereched el rullii a uldesuem e mluches a blekerdelel a ukeruul el omkengei sel duubech a bkaischemrungel el secher el eko er kau. (Jak. 4:14; Rel. 15:28, 29) Sel video el Transfusion-Alternative Health Care—Meeting Patient Needs and Rights (Rolel a Ukeruul el Mo Mtechir a Oidel a Rasech—el Olterekokl Aike el Ousbech a Smecher me a Llemeltel) a mleketmokl el mo ngosukau. Momes er ngii, e moeak a nglunguuch e mluut el mo omelekl aike el omsiluub el oeak a ngelseuil aike el ker el beldukl er a eou.—Utebengall: Tia el video a olecholt a bebil el rolel a botk el ngar er ngii, me a ruungalek a kirir el mo oba sekutaberreng a lomes er ngii el obengterir a remekekerei el ngelekir.
(1) Ngera uchul me a rebebil er a retoktang a lmuut el merritel a uldesuir el kirel a oidel a rasech? (2) Mouchais a edei el bedengel a meringel el botk el mleketmokl el dimlak el ousbech a oidel a rasech. (3) Ngua ngera ildisir a retoktang er a beluulechad el rokir el mla kongei er a ukeruul el diak lousbech a oidel a rasech? Ngera uchul me te kongei el mo meruul el uaisei? (4) A omesuub el mleketmokl er a osbitar ngerang mla ocholt el kirel a usbechel a rasech? (5) Ngerang a bebil er a tellemall el sebechel el mo er ngii el oeak a oidel a rasech? (6) Ngmlo ua ngerang a uldesuir a rebetok el toktang el kirel a klungiolel a usbechel aike el klekedall el omtechei a oidel a rasech? (7) Ngerang a mo uchul e ngmo olengesonges a rsechel a chad? Ngua ngera klungel a sebechir a rechad el mtekengelii? Kede mekerang e ngosuir a chad el olengesonges a rsechel? (8) Kede mekerang e rullii a bedengel a chad el mo meruul a bekerekard el cells? (9) Ngerang a bebil er a rolel e kede kekeringii a ildisel a rasech el remiid er a temel a botk? (10) Ngsebechel a bebil er aike el ukeruul el omtechei er a oidel a rasech el oureor el kirir a remekekerei el ngalek me a remeklou el chad el tir a cherur a kodall? (11) Ngerang a ta er aike el meklou a ultutelel el omellach el kirel a ungil el ukeruul? (12) Ngera uchul me ngklou a ultutelel el kirir a Rekristiano el di me a uchei e te me a oterekokl a uldesuir el kirel aike el ukeruul el diak lousbech a rasech? Kede mekerang a doruul er tiang?
Ngkirel a derta me a derta el chad el di tir el melilt el oltirakl er a ukltkir el mla mosisechakl er a Biblia el kmo te mo kongei el ousbech a bebil er aike el ukeruul el mlocholt er a chelsel tia el video me a lechub e ngdiak. Kau ke mla mo ulterekokl a rengum el kirel aike el ukeruul el mkengei el mo ousbech kau me a rengelekem e mla lmuches er a chelsel a DPA card er kemiu? A omesodel tia el tekoi a ngar er a suobel er sel chelsel el llel a November 2006 el Omesiunged el kirel a Renged el dai er ngii a kmo “Ngua Ngera Osengek el Kirel aike el Dertelngimech el Klekedellel a Rasech ma Rolel a Ukeruul el Ousbech er a Rsechek?” E a ulebongel er ngii, e bo mkerekikl el mesang el kmo ke mla lmuches aike el mullilt el mo meruul er a DPA card er kau. Me tirke el omolilt er tir el mo omtechei er kau el kirel a ukeruul me a ngii di el diak el Sioning el chedal a telungalek er kau a kirem el mo subedeterir el kirel a uldesuem.
[Baks el ngar er a 7 el llel]
• Ke mla oterekeklii el kmo ngngera el ukeruul a omkengei el mo ousbech kau me a rengelekem?
• Ke obang a DPA card er kau el lluches a rokui el mullilt el mo meruul er a chelsel a lsekum e ngmo er ngii a bkaischemrungel el secherem?